Lajmet

Ragmi Mustafi: Lugina e Preshevës duhet të jetë pjesë e pandashme e zgjidhjes në mes të Kosovës dhe Serbisë

Published

4 years ago

on

Çështja e shqiptarëve të Luginës së Preshevës duhet të shtrohet në procesin e bisedimeve Kosovë-Serbi.

Kështu shprehet, Ragmi Mustafi, Kryetar i Këshillit Kombëtar të Shqiptarëve të Luginës së Preshevës në një intervistë të dhënë për KlanKosova.tv.

“Ne vazhdimisht kemi kërkuar që pjesë e agjendës së këtij dialogu të shtrohet edhe çështja e shqiptarëve të Luginës së Preshevës sepse konsiderojmë që Lugina e Preshevës duhet të jetë pjesë e pandashme e zgjidhjes në mes të dy shteteve”, është shprehur Mustafi.

Mustafi ka përmendur edhe deklaratën politike të miratuar më 14 korrik 2018 në të cilën thuhet se “Pa zgjidhjen e të drejtave të shqiptarëve në Luginë të Preshevës, nuk mund të ketë normalizim të mirëfilltë mes Republikës së Kosovës dhe Republikës së Serbisë”.

Po ashtu ai ka theksuar se sa i përket zgjidhjes së problemit të tyre shqiptarët e Luginës së Preshevës janë deklaruar në referendumin e 1992-ës, ku kanë votuar për bashkim me Kosovën.

Për gjendjen e shqiptarëve në këtë pjesë që njihet si Kosova Lindore, institucionet e reja lokale në Preshevë, procesin e vaksinimit kundër COVID-19, gjendjen e sigurisë dhe largimin e shqiptarëve nga tri komunat shqiptare, lexojeni intervistën e plotë me Ragmi Mustafi.

INTERVISTA E PLOTË:

Ç’peshë ka krijimi ditë më parë i koalicionit mbarëshqiptar në Luginën e Preshevës dhe zgjedhja e institucioneve lokale?

Ragmi Mustafi: Edhe pse me polarizime të shumta ndërmjet partive politike shqiptare në Luginë të Preshevës në nivel të vetëqeverisjes lokale, politika shqiptare ka dëshmuar se sa i përket temave që prekin interesin kombëtar si dhe kërkesat politike të shqiptarëve të Luginës, mund të dalin me qëndrime të përbashkëta. Kjo dëshmohet më së miri me deklaratat e dala nga organi më i lartë joformal, Kuvendi i Këshilltarëve Shqiptar të Luginës së Preshevës.  Së fundmi kemi edhe koalicionin e partive politike për zgjedhjet parlamentare në Serbi, me të cilin në zgjedhjet e fundit shqiptarët kanë marrë tre deputetë në parlamentin serb.

Po ashtu si fryt i kësaj iniciative, sot Komuna e Bujanocit udhëhiqet nga një koalicion i përbërë vetëm me shqiptarë. Edhe në Komunën e Preshevës pas një periudhe ku partia e Presidentit të Shtetit, Aleksandër Vuçiq ishte pjesë e qeverisjes në këtë komunë, qeverisje kjo që varej direkt nga votat e këshilltarëve serbë për të funksionuar, zgjedhjet e 28 marsit në Preshevë kanë prodhuar një koalicion i tëri shqiptar.

Përfaqësimi sa më i madh politik i shqiptarëve në të gjitha nivelet është edhe një mekanizëm shtesë që kërkesat e drejta të shqiptarëve të Luginës së Preshevës të adresohen drejt në çdo organ, qoftë ai vendor apo ndërkombëtar.

Cila është situata në Luginë të Preshevës dhe çfarë mesazhi përçojnë incidentet si ai me lapidarin e dëshmorit Fatmir Ibishi?

Ragmi Mustafi: Qëllimi i qeverisë së Beogradit në vazhdimësi është mbajtja e situatës jo stabile dhe të tensionuar në Luginën e Preshevës. Kjo ndodh vazhdimisht me vendosjen e trupave të xhandarmërisë në këtë rajon, edhe pas kërkesave të vazhdueshme të faktorit politik shqiptar që të largojë njësitet speciale nga kjo pjesë. Kjo jep një ndjenjë pasigurie tek banorët shqiptarë të këtyre komunave.

Edhe pse situata në përgjithësi është e qetë dhe pa incidente ndëretnike, ngjarje si ajo e lapidarit të dëshmorit Fatmir Ibishi në Konçul, e raste të ngjashme duket se janë përpjekje për të zhvendosur komplet vëmendjen nga shkeljet e të drejtave të njeriut dhe pakicave që qeveria vazhdon të bëjë ndaj shqiptarëve në këtë rajon. Pasivizimi i adresave të shqiptarëve të Luginës së Preshevës, me numër më të madh në Medvegjë e pjesët malore të Bujanocit e Preshevës, ka marrë  fokus të lartë ndërkombëtar.

Si qëndron situata me pandeminë e COVID-19 në Luginë të Preshevës?

Ragmi Mustafi: Në përgjithësi, situata me pandeminë COVID-19 ka filluar të përmirësohet sa i përket të infektuarve në Luginë. Momente delikate dhe të vështira për banorët e këtyre komunave ka pasur gjatë vitit 2020, ku përveç frikës nga infektimi me virusin korona dhe qasja për të marrë shërbimet shëndetësore, ishte edhe faktori ekonomik.

Duke qenë së shqiptarët e komunave Preshevë, Bujanoc e Medvegjë kryesisht veprimtari të tyre ekomomike i kanë bizneset e vogla familjare, nga mbyllja që ndodhte vazhdimisht janë prekur shumë dhe po kalojnë krizë të rëndë ekonomike.


A presin qytetarët e Luginës ndihmë nga Shqipëria dhe Kosova sa i përket vaksinave kundër koronavirusit? A keni kërkuar tek të dyja veç e veç ndihmë?

Ragmi Mustafi: Shteti serb ka pasur një qasje më të ndryshme sa i përket vaksinave në rajon, duke aprovuar thuajse të gjitha vaksinat e prodhuara deri më tani, dhe si pasojë e kësaj, Serbia ka pranuar një numër të madh të vaksinave që nga fillimi i vitit. Kjo ka bërë që për qytetarët e saj, e në këtë rast edhe për shqiptarët e Luginës së Preshevës që kanë qenë të gatshëm dhe të interesuar për të pranuar vaksinën anti COVID-19 ta marrin në Preshevë, Bujanoc edhe Medvegjë. Deri më tani sipas statistikave në këto komuna janë vaksinuar mbi 20 mijë qytetarë.

Po për idenë e bashkimit të Luginës me Kosovën, çfarë mendoni?

Ragmi Mustafi: Shqiptarët e Luginës së Preshevës më 1 dhe 2 korrik të vitit 1992 kanë realizuar referendumin e këtij rajoni duke votuar me mbi 99 përqind PRO në pyetjen se a janë për autonomi kulturore dhe territoriale me të drejtë bashkimi me Kosovën. Duke u bazuar në dokumentet si kjo, dhe nga mospërfillja e kërkesave të shqiptarëve të Luginës së Preshevës dhe mosrealizimi i marrëveshjeve të nënshkruara mes liderëve politik shqiptarë dhe qeverisë së Serbisë, Kuvendi i Këshilltarëve Shqiptar të komunave Preshevë, Bujanoc e Medvegjë më 14 korrik të vitit 2018 ka nxjerr Deklaratën Politike ku  ka kërkuar “nga Parlamenti, Presidenti dhe Qeveria e Republikës së Kosovës angazhim në funksion të realizimit të kërkesave politike të shqiptarëve të Luginës së Preshevës, të parashtruara me dokumentet përkatëse në këtë deklaratë”.

Ka një proces dialogu që zhvillohet tash e dhjetë vjet në Bruksel në mes të Kosovës dhe Serbisë. Besoni se aty duhet të shtrohet çështja e Luginës?

Ragmi Mustafi: Liderët e Luginës së Preshevës me 14 Korrik 2018 kanë aprovuar Deklaratën politike nga Këshilltarët e Kuvendeve Komunale të Preshevës, Bujanocit dhe Medvegjës në bashkëpunim me shoqërinë civile, organizatat e dala nga UÇPMB (OVL UÇPMB) dhe Këshilli Kombëtar Shqiptar me të cilën është konstatuar “se pa zgjidhjen e të drejtave të shqiptarëve në Luginë të Preshevës, nuk mund të ketë normalizim të mirëfilltë mes Republikës së Kosovës dhe Republikës së Serbisë”.

Marrë shkas nga kjo, ne vazhdimisht kemi kërkuar që pjesë e agjendës së këtij dialogu të shtrohet edhe çështja e shqiptarëve të Luginës së Preshevës sepse konsiderojmë që Lugina e Preshevës duhet të jetë pjesë e pandashme e zgjidhjes në mes të dy shteteve.

Si qëndron situata tani sa i përket shpopullimit të tri komunave të Luginës dhe cili është numri i banorëve që jetojnë sot në Luginë?

Ragmi Mustafi: Nënpërfaqësimi i shqiptarëve në institucionet e sistemit, papunësia më e larta në Serbi, të ardhurat gjashtë herë më të ulëta se mesatarja në Beograd, mungesa e zhvillimit të përshpejtuar ekonomik, mos respektimi i Kushtetutës, zbatimi i ligjeve selektivisht, racizmi shtetëror, pasivizimi i adresave të shqiptarëve në Medvegjë, Preshevë e Bujanoc janë disa nga faktorët kryesorë që shumë të rinj nuk e kanë të vështirë të e shohin të ardhmen e tyre në këto komuna. Kjo po bën që në vazhdimësi të kemi një “brain drain” (ikje e trurit) nga kjo zonë.

Related Topics:
Continue Reading

Rajoni

UBT gati të mirëpresë nesër studiues nga e gjithë bota në Konferencën e 14-të Ndërkombëtare

Published

9 hours ago

on

October 24, 2025

By

Në ambientet e Parkut Shkencor, Inovativ dhe Teknologjik të UBT-së në Lipjan, nesër do të hapet zyrtarisht edicionit i 14-të i Konferencës Ndërkombëtare për Biznes, Teknologji dhe Inovacion – një prej ngjarjeve më të rëndësishme akademike dhe shkencore në rajon, e cila bashkon mijëra akademikë, studiues dhe studentë nga dhjetëra shtete të botës.

Kjo konferencë vjetore e organizuar nga UBT ka për qëllim të shërbejë si një platformë ndërkombëtare për shkëmbim idesh, kërkime shkencore dhe përvoja profesionale, duke ndërlidhur botën akademike me industrinë dhe inovacionin praktik.

Ky edicion pritet të ofrojë dhjetëra sesione paralele, punime shkencore, prezantime inovative dhe panele diskutimi, duke reflektuar trendet më të fundit globale në biznes, teknologji, edukim, mjekësi, energji, arkitekturë dhe fusha të tjera ndërdisiplinare.

Continue Reading

Rajoni

UBT organizoi me sukses Konferencën e parë Ndërkombëtare të Mjekësisë Sportive

Published

12 hours ago

on

October 24, 2025

By

Në Parkun Shkencor, Inovativ dhe Teknologjik të UBT-së në Lipjan, u mbajt me sukses Konferenca e parë Ndërkombëtare e Mjekësisë Sportive (IC-SM 2025) – një ngjarje e nivelit të lartë që shënoi një moment historik për zhvillimin e kësaj fushe në Kosovë dhe rajon.

Në këtë konferencë morën pjesë figura të njohura ndërkombëtare të mjekësisë sportive, përfshirë Presidentin e Federatës Ndërkombëtare të Mjekësisë Sportive (FIMS), Prof. Dr. Fabio Pigozzi nga Italia, Prof. Dr. Norbert Bachl nga Austria, Annika Hangleiter, M.Sc. nga Universiteti Teknik i Mynihut (Gjermani), dhe Prof. Dr. Gobert von Skrbensky nga Austria, së bashku me shumë ekspertë vendorë dhe ndërkombëtarë.

Në hapje të konferencës, Rektori i UBT-së, Prof. Dr. Edmond Hajrizi, theksoi se që nga themelimi, UBT ka qenë e përkushtuar ndaj dijes, inovacionit dhe krijimit të një shoqërie të zgjuar, ku shkenca, teknologjia dhe praktika bashkohen për të krijuar ndikim të qëndrueshëm në shoqëri.

“Mjekësia sportive është një nga fushat që mishëron më së miri këtë filozofi – duke bashkuar shëndetin, edukimin, performancën dhe inovacionin teknologjik”, u shpreh Rektori Hajrizi, duke theksuar se përmes Themelimit të Qendrës për Mjekësi Sportive në UBT, është hapur një kapitull i ri për zhvillimin e kësaj fushe në Kosovë.

Ai gjithashtu përmendi se falë kësaj nisme, Kosova është bërë për herë të parë anëtare e Federatës Ndërkombëtare të Mjekësisë Sportive (FIMS), përmes Shoqatës së Mjekësisë Sportive dhe Ushtrimeve të Kosovës (KASEM) — një arritje që e rendit vendin përkrah mbi 117 shteteve anëtare të kësaj organizate prestigjioze.

Në fjalën e tij përshëndetëse, Prof. Dr. Fabio Pigozzi, President i FIMS-it, vlerësoi kontributin e UBT-së në zhvillimin e mjekësisë sportive dhe theksoi rëndësinë e bashkëpunimit ndërkombëtar për avancimin e kërkimit dhe praktikave klinike në këtë fushë.

Në hapje të konferencës morën fjalën edhe: Fitim Arifi, përfaqësues i Komitetit Olimpik të Kosovës; Agim Ademi, Kryetar i Federatës së Futbollit të Kosovës; Agim Krasniqi, Kryetar i KASEM; Iber Alaj, Drejtor i Departamentit të Sportit në Ministrinë e Kulturës, Rinisë dhe Sportit.

Pjesa kryesore e konferencës përfshiu sesionet shkencore me ligjërata nga:

Prof. Dr. Fabio Pigozzi (Itali) – “Sudden Cardiac Death in Sports and Exercise”

Prof. Dr. Norbert Bachl (Austri) – “Sports Medicine as a Specialty in Europe: Shaping Precise Prevention”

Prof. Dr. Edmond Hajrizi (Kosovë) – “UBT Smart City – An Integrated Platform of Emerging Technologies and Smart Support for Sports Medicine Education, Research, Innovation, and Clinical Services”

Annika Hangleiter, M.Sc. (Gjermani) – “Wearable Technologies in Personalized Prevention: The Future is Already Present”

Prof. Dr. Gobert von Skrbensky (Austri) – “Concepts in Sports Surgery Following Knee Trauma: The Role of Activity Level and Biological Age”

Prezantimet shkencore dhe punimet kërkimore

Në sesionin e dytë të konferencës, të udhëhequr nga Dr. Milaim Berisha dhe Dr. Agron Thaqi, u prezantuan punime shkencore të recenzuara, ndër të cilat:

“The New Era FitScore Test: A Comprehensive General Fitness Assessment” – Era Deva, Milaim Berisha

“The Success Ratio of Non-Surgical Management of Proximal Hamstring Injury in Judo: The Case of Olympic Gold Medalist” – Nora Gjakova, Milaim Berisha

“Beyond Consensus, Into Action: Kosovo’s Response to Elite Athlete Mental Health Challenges” – L.J., Zhu., J., Hell & V. Klissouras

“Comparative Analysis of Body Composition in Elderly Residents of Nursing Homes in Kosovo” – Agron Thaqi

Konferenca IC-SM 2025 shërbeu si një platformë e rëndësishme ndërkombëtare për bashkëpunim, shkëmbim përvojash profesionale dhe prezantim të trendeve më të fundit në mjekësinë sportive. Ngjarja synon të nxisë kërkimin shkencor, inovacionin në rehabilitim, edukimin profesional dhe ndërtimin e rrjeteve ndërkombëtare në fushën e sportit dhe shëndetit.

Konferenca u organizua nga UBT, në bashkëpunim dhe mbështetje të:

  • Kosovo Association of Sports and Exercise Medicine (KASEM),
  • International Federation of Sports Medicine (FIMS),
  • Komitetit Olimpik të Kosovës, dhe
  • Sport, Health and the People – A Western Balkan University Network (SHAPE Project).

IC-SM 2025 u vlerësua si një ngjarje që shënon fillimin e një tradite të re shkencore në Kosovë, duke e pozicionuar vendin në hartën ndërkombëtare të kërkimit në mjekësinë sportive dhe shëndetin publik.

Continue Reading

Lajmet

Kusari-Lila: Të dielën seanca e jashtëzakonshme për Qeverinë, ftesa është dërguar tashmë tek të gjithë deputetët

Published

13 hours ago

on

October 24, 2025

By

Në Kuvendin e Kosovës të dielën, më 26 tetor, do të mbahet seanca për votimin e Qeverisë së re të Kosovës.

Shefja e Grupit Parlamentar të Lëvizjes Vetëvendosje, Mimoza Kusari – Lila, konfirmoi për Telegrafin se ftesa tashmë është dërguar tek të gjithë deputetët për seancë të jashtëzakonshme.

“Po, kemi bërë kërkesë dhe tashmë është dërguar ftesa tek të gjithë deputetët për seancë të jashtëzakonshme për të dielën, ora 10:00, me një pikë të rendit të ditës: Zgjedhja e Qeverisë së Republikës së Kosovës”, tha ajo.

Më 11 tetor, presidentja e Kosovës, Vjosa Osmani, e ka mandatuar liderin e Lëvizjes Vetëvendosje (LVV), Albin Kurti, që të formojë Qeverinë e re të vendit, tetë muaj pas mbajtjes së zgjedhjeve të përgjithshme.

Derisa kanë mbetur edhe dy ditë afat për ta paraqitur përbërjen e re të Qeverisë, deri më tani nga LVV nuk është ndërmarrë asnjë hap konkret.

Nuk është raportuar për ndonjë takim apo negociatë me subjektet e tjera politike që do të mundësonte ndërtimin e një koalicioni qeverisës.

Kjo, pasi LVV-së i nevojiten të paktën 61 vota në Kuvend për të formuar Qeverinë, ndërsa në zgjedhjet e 9 shkurtit, kjo parti ka siguruar 48 ulëse./EO

Continue Reading

Lajmet

Në Kroaci po futet shërbimi i detyrueshëm ushtarak, parlamenti voton pro

Published

13 hours ago

on

October 24, 2025

By

Parlamenti kroat sot, me 84 vota pro, 30 abstenime dhe 11 kundër, ndryshoi Aktin e Mbrojtjes, duke konfirmuar kështu rikthimin e trajnimit bazë ushtarak të detyrueshëm.

Stërvitja bazë ushtarake (TVO) do të zgjasë dy muaj, thirrjet e para do të fillojnë deri në fund të vitit, dhe rekrutët e parë në kazermat në Knin, Slunj dhe Pozhega priten në fillim të vitit të ardhshëm. Siç është njoftuar nga Ministria e Mbrojtjes, është planifikuar të thirren rreth 4,000 rekrutë çdo vit, të ndarë në pesë breza.

Të gjithë të rinjtë 18-vjeçarë janë të regjistruar në regjistrin ushtarak dhe do të dërgohen në stërvitje ushtarake në vitin kalendarik kur të mbushin 19 vjeç. Rekrutët do t’i nënshtrohen një kontrolli mjekësor para stërvitjes për të përcaktuar nëse janë të aftë për stërvitje ushtarake dhe Ministria e Mbrojtjes deklaron se kjo do të organizohet sa më afër vendbanimit të rekrutëve për ta bërë më të lehtë aksesin për pjesëmarrësit.

Ekzaminimi përcakton aftësinë mjekësore të një rekruti potencial, njoftoi Ministria e Mbrojtjes, duke shtuar se ata që i nënshtrohen shërbimit ushtarak mund të dërgohen për stërvitje ose të marrin një shtyrje të përcaktuar me ligj deri në fund të vitit të 29-të të jetës, ose të përjashtohen nga detyrimi sipas kushteve dhe mënyrës së përcaktuar me ligj.

Përjashtimisht, rekrutët mbi moshën 19 vjeç dhe deri në moshën 30 vjeç mund të dërgohen edhe në stërvitje ushtarake, pasi shërbimi mund të shtyhet në rastin e studimit dhe për atletët që të marrin pjesë në kampionatet botërore dhe evropiane./EO

Continue Reading

Të kërkuara