Miliarderët e Luginës së Silikonit, që qëndrojnë prapa blerjes sekrete të tokave në Kaliforninë Veriore në vlerë prej 800 milionë dollarësh, më në fund kanë bërë publike disa detaje të planeve të tyre për ndërtimin e një qyteti të ri të gjelbër. Por për të finalizuar këto plane, ata do të duhet të bindin votuesit skeptikë dhe liderët lokalë.
Pasi për vite të tëra kishte shmangur kritikat, Jan Sramek, ish-tregtar në bankën investuese Goldman Sachs i cili është në krye të kësaj përpjekjeje, së fundi lansoi ueb-faqen lidhur me projektin, California Forever. Aty thuhet se projekti ofron “një shans për një komunitet të ri, vende pune me pagë të mirë, ferma diellore dhe hapësirë” në Solano, një qark rural që gjendet midis San Franciskos dhe Sakramentos. Në këtë qark, aktualisht jetojnë 450.000 banorë.
Ai po ashtu ka nisur të takohet me politikanë kyçë që përfaqësojnë zonën, të cilët kanë tentuar për vite të tëra, por nuk kanë pasur sukses, që të zbulojnë se kush qëndron pas kompanisë misterioze Flannery Associates LLC, që ka blerë sipërfaqe të mëdha toke, duke u shndërruar në pronarin më të madh të tokës në këtë qark.
Një listë e sipërmarrësve dhe kapitalistëve të shquar të Luginës së Silikonit po mbështesin projektin, përfshirë filantropisten Laurene Powell Jobs, bashkëthemeluesin e LinkedIn Reid Hoffman, dhe sipërmarrësin kapitalist, Marc Andressen. The New York Times fillimisht kishte raportuar për grupin e investitorëve dhe për planet e tyre.
California Forever, që është kompania amë e Flannery, ka blerë mbi 202 kilometra katrorë tokë bujqësore në Qarkun Solano që nga viti 2018, kryesisht në pjesën juglindore të qarkut. Parcelat e blera shtrihen nga Feirfilld deri në Rio Vista. Sipas ueb-faqes, Sramek u dashurua me zonën kur shkonte për peshkim atje dhe ai me bashkëshorten e tij së fundi ka blerë një shtëpi në këtë qark për familjen e tyre.
Një sondazh që banorët pranuan së fundi sugjeroi se krijimi i komuniteti me dhjetëra mijëra shtëpi dhe hapësira për ecje do të funksiononte me energji të gjelbër dhe është i financuar krejtësisht nga sektori privat.
Por, për të ndërtuar diçka që i ngjan një qyteti në zonën që tani është tokë bujqësore, grupi i investitorëve fillimisht duhet të bindë votuesit e Qarkut Solano, të cilët duhet të miratojnë nismën përmes votimit, në mënyrë ajo tokë të përdoret për urbanizim. Kjo hapësirë ka qenë e mbrojtur si tokë bujqësore që nga viti 1984 . Zyrtarët lokalë dhe federalë ende kanë mëdyshje me qëllimet që ka grupi.
Dy kongresistë nga kjo zonë për vite të tëra kanë tentuar të zbulojnë nëse armiqtë e huaj apo investitorët qëndronin pas blerjeve në masë të tokës rreth një baze ajrore të forcave amerikane, që është vitale për sigurinë kombëtare, dhe ekonomia lokale është e zemëruar që Flennary ka mbajtur të fshehur identitetin për kaq gjatë. Në ueb-faqe u tha se projekti do të financohet 97 për qind nga investitorët amerikanë dhe pjesa tjetër janë nga Mbretëria e Bashkuar dhe Irlanda.
Grupi investues tha se mbajtja sekret e identitetit ishte e nevojshme derisa u ble tokë e mjaftueshme, në mënyrë që të shmangeshin spekulimet, por tani grupi është i gatshëm të dëgjojë mendimet e banorëve të Solanos, përmes sondazhit të dërguar me email dhe të krijojë një bord këshillues për komunitetin. Sondazhet e kaluara kanë treguar se prindërit ishin të shqetësuar më së shumti për të ardhmen e fëmijëve të tyre, u tha në ueb-faqe.
Kalifornia ka shumë nevojë për strehim, veçmas për shtëpi të përballueshme për mësuesit, zjarrfikësit dhe punëtorët e sektorit të shërbimeve. Por, qytetet dhe qarqet nuk po e dinë se ku të ndërtojnë, pasi banorët e lagjeve ekzistuese janë shprehur kundër shtëpive të reja, pasi kanë argumentuar se do të bllokonin rrugët e tyre dhe të prishnin mënyrën e jetës së tyre të qetë.
Në shumë mënyra, Qarku Solano është ideal për ndërtim. Ky qark gjendet 97 kilometra në verilindje të Sanfranciskos dhe 56 kilometra në jugperëndim të kryeqytetit kalifornian, Sakramento. Shtëpitë në Solano janë në mesin e shtëpive më të përballueshme në zonën e Bregut të San Franciskos dhe sipas të dhënave të muajit të kaluar, çmimi mesatar për një shtëpi në këtë zonë ishte 600.000 dollarë.
Por, Princess Washington, kryetare e Qytetit Suisun, tha se banorët me qëllim kanë vendosur të mbronin hapësirat e hapura dhe të mbajnë të pacenueshme zonën përreth bazës ajrore Travis, duke pasur parasysh rëndësinë që ka baza.
Ajo tha se dyshon se qëllimi i vërtetë i grupit ishte “krijimi i një qyteti për elitën”, duke u fshehur pas nevojës për më shumë strehim.
Hoffman dhe Andreessen nuk u përgjigjën për koment, sikurse Jobs përmes biznesit të saj, Emerson Collective.
Zhvilluesit e projektit thanë se do të mbrojnë bazën ushtarake dhe fermerët, të cilët mund të vazhdojnë të punojnë në tokën e tyre.
Flannery ka blerë pothuajse të gjithë tokën përreth qytetit të vogël, Rio Vista, tha kryetari i qytetit, Ron Kott.
Ai tha se dyshon që njerëzit më në moshë, që përbëjnë gjysmën e 10.000 banorëve të qytetit, janë në favor të projektit për shkak të zhurmës, por tha se të tjerët ndoshta do të pëlqenin të kishin kujdes më të mirë shëndetësor, jetë nate dhe për të bërë pazar, që qyteti më i sofistikuar fqinj mund t’i ofrojë.
“Nëse bëhet siç duhet, mendoj se ka shumë mundësi për qarkun. Të ardhurat e tyre nga taksat do të rriten shumë. Vlera e pronave me gjasë do të rritet edhe në zonën përreth. Prandaj, duke u nisur nga këto unë mendoj që është gjë e mirë”, tha Kott.
“Por, sërish, mendoj se heqja dorë nga kualiteti i mënyrës së jetesës është unike për këtë zonë”./AP
Lajmet3 months ago
Lajmet nga UBT3 months ago
Lajmet1 month ago
Lajmet2 months ago