Lajmet

Qindra artikuj për familjen Jashari përmblidhen në një libër

Bekim Jashari tha se promovimi i këtij libri është shembulli më i mirë i ruajtjes dhe promovimit të historisë.

Published

on

Mesditën e sotme në hapësirat e Bibliotekës Kombëtare dhe me organizim të këtij institucioni është promovuar “Libri i Kujtesës: Familja Jashari”. Libri përfshin artikuj të gazetave dhe revistave kosovare që nga dhjetori i vitit 1991 deri në mars 1998, gazeta të cilat ruhen në arkivat e Bibliotekës Kombëtare e Kosovës.

Libri shpalos se si janë mbuluar nga gazetat e ndryshme rezistenca e familjes Jashari, çfarë mesazhesh përhapnin apo synonin të përhapnin gazetat, çfarë dëshmish zbulonin nga betejat për liri të familjes Jashari. Në libër janë përfshirë qindra artikuj informativ, analitik e publicistik.

Ministri i Kulturës, Hajrulla Çeku, deklaroi se ky libër paraqet dëshmitë që anëtarët e familjes Jashari sakrifikuan jetën e tyre për lirinë që në e gëzojmë sot. Ai përgëzoi Bibliotekën për botimin e një libri të tillë duke theksuar se së bashku me Ministrinë e Arsimit u nënshkrua një marrëveshje për krijimin enjë rrjeti funksional të bibliotekave por edhe rritjen e kualitetit të këtyre të fundit.

“Ky libër përfshin artikuj të gazetave dhe revistave të Kosovës nga periudha dhjetor 1991 deri në mars 1998 dhe ky botim paraqet një dëshmi materiale për një periudhë shumë të rëndësishme të historisë sonë kombëtare, shkruar nga dora e gazetarëve më të mirë të Kosovës. Familja Jashari me kurajën dhe me guximin e tyre të papërkulshme sakrifikuan jetën e tyre për lirinë tonë, ne jemi përherë krenarë dhe mirënjohës për sakrificën e familjes Jashari. Mirënjohjen për kujtimin dhe veprën madhështore të tyre e përjetësojnë duke mësuar për historinë e tyre të kaluarën e tyre duke mësuar se çfarë i shtyri ata të flijonin gjithçka që kishin nga vetja për lirinë tonë”, ka thënë ai.

Anëtari i familjes Jashari, njëherit kryetari në detyrë i Skenderajt, Bekim Jashari, tha se promovimi i këtij libri është shembulli më i mirë i ruajtjes dhe promovimit të historisë ndërsa shtoi se duhet të ketë më shumë libra që nxjerrin në pah luftën e UÇK-së.

“Promovimi i librit të kujtesës mbi familjen Jashari është shembulli më i mirë i ruajtjes dhe promovimit të historisë sonë, në njërën anë edhe të fuqizimit të dëshmive tona mbi luftën e drejtë dhe dëshmi e gjenocidit që pushteti serb bëri në Kosovë. Për më tepër nevojitet që të kemi më shumë libra, hulumtime e studime që nxjerrin në pah madhështinë e popullit tonë mbi luftën heroike të Ushtrisë Çlirimtare të Kosovës në krye me komandantin legjendar Adem Jashari”, ka thënë ai.

Drejtori i Bibliotekës Kombëtare të Kosovës, Fazli Gajraku, tha se botimi i një libri të tillë bëhet për të kuptuar, kujtuar e nderuar heroizmin e familjes Jashari dhe për të formësuar mendimin e njeriut të Kosovës për sakrificën dhe flijimin për liri.

“Ndërsa ishte nisur si një hulumtim i mirëfilltë për hapjen e një ekspozite për raportimet e periodikut të Kosovës për ngjarjet që lidhen me rezistencën dhe heroizmin e familjes Jashari. Pra kur po ekspozoheshin në plot artikuj të gazetave dhe revistave të Kosovës që pasqyronin ngjarjet për familjen Jashari dhe kryekomandantin e Ushtrisë Çlirimtare të Kosovës, Adem Jashari, që përfshinin periudhën nga fundi i dhjetorit të vitit 1991 deri në mars të vitit 1998, në një ekspozitë në mars të këtij viti u kuptua që duhet punuar përtej kontributit që mund të japë biblioteka në një bibliografi indeksesh të revistave dhe gazetave për këtë ngjarje të paharrueshme historike. Libri përfshin 30 vjet histori të kësaj familje fisnike dhe kur u dëgjua zëri i qëndresës së saj, themi e brezit më të vonë e dhjetorit 1991 kur mbronin me armë dinjitetin e familjes dhe atdheut”, ka shtuar ai.

Që nga viti 1991 deri më 1998, Prekazi dhe Drenica ishin të rrethuar nga forcat paramilitare serbe. Synimi ishte vrasja e komandantit të Ushtrisë Çlirimtare të Kosovës, Adem Jashari dhe familjes së tij, për të shuar dhe shtypur rezistencën që familja Jashari me në krye Ademin e Hamzën po ia bënin regjimit të Sllobodan Millosheviqit.

Më 30 dhjetor të vitit 1991 ishte regjistruar sulmi i parë ndaj familjes Jashari, më 22 janar 1992 ndodhi sulmi i dytë ku pati të plagosur. Sulmi i tretë, që ndodhi më 5, 6 dhe 7 mars të vitit 1998, mori jetën e 55 njerëzve në fshatin Prekaz, 22 prej të cilëve ishin familjarë të ngushtë të Adem Jasharit.

Lajmet

QKUK përfundon verifikimin e pronësisë, paralajmëron rrënimin e objekteve pa leje në oborr

Published

on

By

Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.

Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.

Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.

Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.

Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.

“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/

Continue Reading

Lajmet

KEDS: Rikthehet energjia elektrike për rreth 80 për qind të konsumatorëve të prekur nga erërat e forta

Published

on

By

Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.

Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.

Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.

Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/

Continue Reading

Lajmet

Nga 18 vjet burgim për Ilir dhe Rrahim Abdullahun për vrasjen e policit Triumf Riza

Published

on

By

Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.

Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.

Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/

Continue Reading

Lajmet

AKB: Nga 7.16 miliardë euro remitanca në pesë vjet e gjysmë

Published

on

By

Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.

Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.

Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.

Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.

Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.

Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/

 

 

 

Continue Reading

Të kërkuara