Lajmet

​Qeveria mirëpret kërkesën e PE-së për largimin e menjëhershëm të masave

Published

on

Kërkesa e Parlamentit Evropian ndaj vendeve anëtare të Bashkimit Evropian për heqjen e masave ndëshkuese ndaj Kosovës po mirëpritet në Qeverinë e Kosovës.

Sipas ekzekutivit kosovar, kjo kërkesë tashmë i shtohet edhe rekomandimit të ish- përfaqësuesit të lartë të BE-së, Josep Borrell për largimin e masave në verën e vitit 2024.

Megjithatë, njohës të integrimeve evropiane thonë se përkundër vullnetit të parlamentarëve evropianë, vendimmarrja kryesore për heqjen e masave i takon vendeve të unionit.

Të enjten, në Komisionin e Politikës së Jashtme të PE-së, raportuesi për Kosovën Riho Terras paraqiti draft-raportin e tij vjetor për situatën në Kosovë dhe përparimin e saj drejt BE-së, ku mes tjerash u kërkua nga blloku evropian të heqë masat ndëshkuese ndaj Kosovës.

Në lidhje me këtë, zëdhënësi i qeverisë së Kosovës, Përparim Kryeziu, në një përgjigje për KosovaPress, thotë se masat janë vendosur padrejtësisht dhe po vazhdojnë të mbahen padrejtësisht, andaj të njëjtat duhet të hiqen sa më parë.

“Ne e mirëpresim draft raportin e raportuesit për Kosovë në Parlamentin Evropian, Riho Terras në të cilën kërkohet largimi i menjëhershëm i masave të Bashkimit Evropian ndaj Kosovës. Kjo kërkesë tash i shtohet edhe rekomandimit të ish-Përfaqësuesit të Lartë të BE-së Josep Borrell për largimin e tyre. Me këtë rast, ritheksojmë gjithashtu kërkesën tonë për largimin e masave ndaj Kosovës të cilat u vendosën padrejtësisht, dhe po vazhdojnë të mbahen padrejtësisht”, thekson ai.

Kërkesën e PE-së ndaj vendeve të BE-së po e konsideron pozitive edhe analisti politik, Arbnor Sadiku. Megjithatë, sipas tij, për shkak të kompleksitetit të vendimmarrjes së Bashkimit Evropian është vështirë të besohet se masat ndaj Kosovës do të hiqen shpejt.

Ai kërkon nga Qeveria e Kosovës që të jetë më aktive dhe t’i bind vendet skeptike të BE-së për nevojën e heqjes së masave ndëshkuese.

“Është një lloj trysnie pozitive në kuptimin që Kosovës t’i largohen masat. Sa kemi pa në të kaluarën shtetet anëtare e kanë rolin kryesor në unionin evropian. Ato bazohen në bazën dy gjërave kur marrin vendime të tilla. E para është interesat e shteteve anëtare dhe gjeopolitika e BE-së… Lehtë është me ia vendos masat BE-ja një shteti, mirëpo është shumë vështirë me ia largu pasi vendimet janë koncensuale dhe bukur të komplikuara. Pasi nëse vetëm një anëtare e unionit është kundër atëherë bie poshtë… (Angazhimi i Qeverisë së Kosovës për largimin e masave) Sigurisht ndoshta është tentuar një formë ose tjetër, por ata që kemi pa publikisht ka qenë vendime në kundërshtim në kërkesat e BE-së dhe SHBA-së në raport me veriun. Ata kanë kërkuar që përmes dialogut të zbatohet sovraniteti atje por qeveria ka shkaktuar në mënyrë unilaterale dhe kjo ka shkaktuar probleme”, deklaron Sadiku.

Në takimin e ministrave të Bashkimit Evropian në fund të vitit 2024 është thënë se masat do të hiqen paralelisht me hapat që duhet të ndërmarrë Kosova për t’i ulur tensionet në veri.

BE ka vendosur masa ndëshkuese ndaj Kosovës në qershor të vitit 2023, për shkak të rritjes së tensioneve në veri të vendit. Përderisa masat ndëshkuese janë në fuqi përgjatë 1 viti e gjysmë, dëmi është konsideruar rreth 500 milionë euro, ku përfshihen ngrirja e disa fondeve të BE-së ndaj Kosovës.

Botë

Shkalla e ulët e lindjeve në Angli mund të detyrojë mbylljen e 800 shkollave fillore deri në vitin 2029

Published

on

Rënia e lindjes së numrit të fëmijëve në Angli mund të çojë në mbylljen e deri në 800 shkollave fillore deri në vitin 2029, sipas një studimi nga Instituti i Politikave të Arsimit (EPI).

Instituti i atribuoi rënien kombëtare të nxënësve të shkollave fillore shtetërore kryesisht rënies së nivelit të lindjeve.

Gjithashtu, Instituti paralajmëroi se rënia e numrit të nxënësve mund t’i vërë shkollat nën presion të rëndë financiar, me shumë këshilla lokale që tashmë po përpiqen të mbajnë operacionet.

Raporti gjithashtu vuri në dukje se faktorë përtej nivelit të lindjeve, të tilla si kostot e larta të strehimit, po formësojnë vendimet familjare se ku të jetojnë dhe ku t’i dërgojnë fëmijët e tyre.

Trendi është më i theksuar në Londër mbetet ku familjet po zhvendosen jashtë kryeqytetit ose po zgjedhin shkolla private, thuhet në raport.

Regjistrimi në shkollat fillore kombëtare arriti kulmin në rreth 4.5 milionë në 2018-19, por që atëherë ka rënë me gati 2%.

Kjo rënie parashikohet të bjerë edhe me 4% gjatë pesë viteve të ardhshme, duke përfaqësuar një humbje prej 162,000 nxënësish,  ekuivalent i 800 shkollave fillore./S.K/KP/The Guardian.

Continue Reading

Botë

​Rritja ekonomike e SHBA-së rishikohet në rritje për shkak të shpenzimeve të konsumatorëve

Published

on

Sipas të dhënave të reja qeveritare, ekonomia amerikane u rrit më shpejt nga sa mendohej më parë, sepse ishte e nxitur nga shpenzimet e forta të konsumatorëve dhe rënia e importeve.

Produkti i brendshëm bruto (PBB), i cili mat prodhimin e mallrave dhe shërbimeve, u rrit me një normë vjetore prej 3.8% në periudhën nga prilli deri në qershor nga vlerësimi i mëparshëm prej 3.3%.

Rritja e tremujorit të dytë, ritmi më i shpejtë në gati dy vjet  pasoi një tkurrje në fillim të këtij viti.

Ekonomistët thanë se ekonomia amerikane po shkonte mjaft mirë, por disa pasiguri mbeten. Shpenzimet e konsumatorëve u rritën me 2.5% në vitin deri në fund të qershorit, nga një vlerësim i mëparshëm prej 1.6%.

Në tre muajt e parë të vitit 2025, ekonomia amerikane u tkurr me një normë prej 0.6%, ndërsa kompanitë nxituan në importe për të kapërcyer tarifat e Presidentit të SHBA-së Donald Trump, të cilat ulën PBB-në.

Konsumatorët amerikanë, motori i ekonomisë më të madhe në botë, kanë mbetur të qëndrueshëm përballë tarifave dhe pasigurisë ekonomike.

Punëdhënësit shtuan vetëm 22,000 vende pune në gusht, më pak se sa pritej, ndërsa shkalla e papunësisë u rrit nga 4.2% në 4.3%, sipas Departamentit të Punës.

Ekonomistja e lartë në EY-Parthenon, Lydia Boussour tha se momenti ekonomik mbeti i qëndrueshëm në gjysmën e parë të vitit pavarësisht vështirësive politike në rritje.

Por, ajo paralajmëroi se me ndikimin e tarifave dhe pasigurisë politike që po bëhet gjithnjë e më e dukshme, rritja më e ngadaltë e SHBA-së dhe inflacioni më i lartë janë ende në horizont./S.K/KP/

Continue Reading

Botë

Sllovenia e shpall Netanyahun non-grata

Published

on

Sllovenia e ka shpallur kryeministrin izraelit Benjamin Netanyahu si persona non-grata.

Qeveria e udhëhequr nga Robert Golob ka miratuar një rezolutë që e shpall kryeministrin izraelit Benjamin Netanyahu person non-grata.

Sipas sekretares së Ministrisë së Jashtme Neva Grasic, masa vjen pas të njëjtave masave të miratuara korrikun e kaluar kundër ministrave izraelitë Itamar Ben Gvir dhe Bezalel Smotrich, të cilët u akuzuan për ekstremizëm.

Profili zyrtar X i qeverisë thotë se me këtë vendim, ata duan t’i dërgojnë një mesazh të qartë Izraelit se Sllovenia pret që vendimet e gjykatave ndërkombëtare të respektohen, si dhe e drejta ndërkombëtare humanitare./S.K/KP/

Continue Reading

Botë

Italia dërgon 24 karabinierë në Kosovë para zgjedhjeve lokale të 12 tetorit

Published

on

Ambasada italiane në Prishtinë ka njoftuar se Italia ka dërguar 24 karabinierë italianë në Kosovë para zgjedhjeve lokale të 12 tetorit.

Nga ambasada thonë se karabinierët janë dërguar për të ndihmuar forcimin e sigurisë para zgjedhjeve lokale bashkë me partnerët e tjerë evropianë.

“Jemi të lumtur të mirëpresim në Kosovë 24 karabinierë italianë, të cilët së bashku me partnerët tanë evropianë do të ndihmojnë në forcimin e sigurisë para zgjedhjeve të ardhshme lokale. Si pjesë e #EUROGENDFOR, ata po formojnë Njësinë Policore të Formuar Rezervë të EULEX-it (RFPU), duke punuar për të mbështetur stabilitetin dhe për të ndërtuar besimin brenda komuniteteve”, thuhet në njoftim.

Italia thekson se mbetet e përkushtuar për paqen dhe sigurinë në Kosovë dhe në gjithë Ballkanin./S.K/KP/

Continue Reading

Të kërkuara