Sport

Pse olimpistët kafshojnë medaljet e tyre dhe çfarë bëjnë me to?

Published

5 years ago

July 30, 2021

UBT news

Pamja e një olimpisti të gëzuar që qëndron në majë të podiumit pas fitores dhe vendosja e medaljes së artë në mes dhëmbëve po ndodh shumë shpesh.

Në Lojërat Olimpike 2020 në Tokio keni mundur ta shihni këtë shumë shpesh. Llogaria zyrtare e Tokios 2020 bërë përpjekje që t’u kujtonte njerëzve se medaljet nuk janë të ngrënshme.

Anëtari i Komitetit Ekzekutiv të Shoqërisë Ndërkombëtare të Historianëve Olimpikë, David Wallechinsky, tregoi se ky gjest është një përpjekje për të kënaqur mediat.

Një fenomen i tillë nuk është vetëm në Lojërat Olimpike. Për çiklistin slloven Primoz Roglic, i cili fitoi medaljen e artë tregoi se medalja e kishte befasuar.

Boksieri Superstar Wladimir Klitschko e shiti medaljen e artë që ai fitoi në Lojërat Atlanta 1996 për 1 milion dollarë, me fondet që shkuan në fondacionin vëllezërit Klitschko, një bamirësi e krijuar nga ai dhe vëllai i tij Vitali për të ndihmuar fëmijët e varfër në jetën e tyre.

Notari amerikan Anthony Ervin nxori në ankand medaljen e tij të artë olimpike të vitit 2000 në eBay për të ndihmuar të mbijetuarit e cunamit të Oqeanit Indian të vitit 2004./CNN/KlanKosova

Sport

Nga Drenica te Napoli, rrugëtimi i jashtëzakonshëm i Amir Rrahmanit

Published

3 minutes ago

June 1, 2026

UBTNews

Kapiteni i Kosovës, Amir Rrahmani, vazhdon të shkëlqejë në futbollin italian, duke u konfirmuar si një nga mbrojtësit më të mirë në Serie A. Pas një sezoni të jashtëzakonshëm me SSC Napoli, ai është përfshirë në formacionin më të mirë të sezonit 2025/26 nga SofaScore, falë paraqitjeve të qëndrueshme dhe rolit të tij kyç në repartin defensiv të skuadrës napolitane.

Rrahmani, i lindur në Prishtinë më 24 shkurt 1994, karrierën e nisi në Kosovë me Ramiz Sadikun dhe Drenicën, për të vazhduar më pas te Partizani në Shqipëri. Më vonë ai u transferua në Kroaci, ku luajti për RNK Split dhe Dinamo Zagreb, duke fituar dy tituj kampionë dhe Kupën e Kroacisë. Pas aventurës së suksesshme te Hellas Verona, në vitin 2020 ai iu bashkua Napolit, ku u shndërrua në një nga lojtarët më të rëndësishëm të skuadrës.

Me Napolin, Rrahmani ka fituar dy tituj të Serie A dhe është bërë një nga liderët e ekipit. Deri më tani ai ka zhvilluar mbi 180 ndeshje me fanellën e klubit italian dhe ka realizuar më shumë se 10 gola, shifra mbresëlënëse për një mbrojtës qendror. Në sezonin e fundit ai u dallua veçanërisht në fitoren 3:0 ndaj Pisës, ku u shpall “Lojtari i Ndeshjes”. Mbrojtësi kosovar realizoi një gol me kokë pas asistimit të Eljif Elmasit dhe u vlerësua me notën 9.3 nga SofaScore, pasi përveç golit dominoi edhe në fazën mbrojtëse.

Përveç suksesit në nivel klubesh, Rrahmani mbetet një figurë kyçe për Përfaqësuesen e Kosovës. Si kapiten i ekipit kombëtar, ai ka zhvilluar dhjetëra ndeshje ndërkombëtare dhe ka kontribuar me disa gola, duke u shndërruar në një nga futbollistët më të rëndësishëm në historinë e futbollit kosovar.

Në një intervistë të fundit për Radio CRC, Rrahmani foli për lidhjen e tij të veçantë me Napolin, duke deklaruar se pas kaq shumë vitesh në qytetin italian, ai e konsideron Napolin si shtëpinë e tij të parë. Ai gjithashtu theksoi se synon të vazhdojë të kontribuojë për klubin dhe të arrijë sa më shumë paraqitje me fanellën e kaltër.

Falë profesionalizmit, paraqitjeve të qëndrueshme dhe rolit të liderit si te Napoli ashtu edhe te Kosova, Amir Rrahmani vazhdon të jetë një nga emrat më të respektuar të futbollit shqiptar në arenën ndërkombëtare.

Sport

Gresa Bakraqi fiton medaljen e argjendtë në Kampionatin Evropian në Monako

Published

15 minutes ago

June 1, 2026

UBTNews

Atletja kosovare Gresa Bakraqi ka arritur një sukses të rëndësishëm ndërkombëtar, duke fituar medaljen e argjendtë në Kampionatin Evropian të shteteve në zhvillim, që u mbajt në Monako.

Bakraqi shkëlqeu në disiplinën e 1500 metrave, ku siguroi vendin e dytë dhe medaljen e argjendtë, duke u bërë e vetmja garuese nga Kosova që u ngjit në podium në këtë kampionat.

Atletja kosovare, e cila është bursiste e Komiteti Olimpik i Kosovës në kuadër të programit për përgatitjet drejt Lojërat Olimpike Los Angeles 2028, vazhdon të tregojë formë të lartë dhe potencial të madh në arenën ndërkombëtare.

Suksesi i Bakraqit përbën një tjetër arritje të rëndësishme për atletikën kosovare dhe një motiv shtesë për përfaqësimin e Kosovës në garat e ardhshme evropiane dhe botërore.

Me këtë rast, urime për medaljen e fituar iu drejtuan Gresës dhe Federata Atletike e Kosovës për paraqitjen e suksesshme në këtë kampionat.

Sport

Kastrioti rikthen titullin në Ferizaj pas 15 vjetësh

Published

5 hours ago

June 1, 2026

UBTNews

Kastrioti është shpallur kampion i Kosovës në hendboll në konkurrencën e meshkujve, duke rikthyer trofeun në Ferizaj pas një pritjeje prej 15 vjetësh. Skuadra ferizajase triumfoi në serinë finale të plejofit ndaj Rahovecit me rezultat të përgjithshëm 3:1.

Ndeshja vendimtare u zhvillua të dielën mbrëma në Rahovec dhe solli shumë emocione deri në sekondat e fundit. Kastrioti arriti të fitojë me rezultat 25:23 pas një përballjeje dramatike, duke siguruar kështu titullin e kampionit.

Hero i finales ishte portieri tunisian Wadi Chebbi, i cili shkëlqeu me pritje të shumta gjatë gjithë takimit. Ai realizoi edhe një pritje vendimtare në minutën e fundit, duke i hapur rrugë festës së madhe të ferizajasve.

Më efikasi te Kastrioti ishte Yassine Henahen me shtatë gola, ndërsa Felippe Teixeira kontribuoi me pesë. Nga tri gola realizuan Alban Haziri, Festim Mustafa dhe Albin Ahlin.

Edhe te Rahoveci pati paraqitje të mira individuale. Portieri Arti Luzha ishte në nivel të lartë me disa pritje të rëndësishme, ndërsa Egzon Gjuka dhe Guilherme Fernandes shënuan nga pesë gola. Katër gola i realizoi Mali Luzha.

Kastrioti ishte në epërsi gjatë pjesës më të madhe të takimit, duke krijuar avantazh deri në katër gola në pjesën e dytë (21:17). Megjithatë, vendasit nuk u dorëzuan dhe arritën të barazonin rezultatin në 22:22 në minutën e 57-të, falë dy golave radhazi të Mali Luzhës.

Në momentet vendimtare, Henahen realizoi dy gola të rëndësishëm për mysafirët, ndërsa pas pritjes vendimtare të Chebbit, Alban Haziri vulosi fitoren me golin për 25:23.

Për Kastriotin, ky është titulli i gjashtë kampion në histori me këtë emër të klubit. Skuadra nga Ferizaj i dha fund dominimit të Rahovecit, që kishte fituar dy titujt e fundit kampionalë.

Ferizajasit e mbyllin sezonin në mënyrë të shkëlqyer, pasi përveç titullit kampion kanë fituar edhe Kupën e Kosovës, duke kompletuar kështu një edicion të suksesshëm.

Pas ndeshjes, trofeun e kampionit kapitenit të Kastriotit, Beni Sula, ia dorëzoi presidenti i Federatës së Hendbollit të Kosovës, Edin Kolgeci.

Sport

Festë e madhe për PSG-në në Paris, qindra arrestime pas incidenteve gjatë natës

Published

5 hours ago

June 1, 2026

UBTNews

Mijëra tifozë të Paris Saint-Germainit u mblodhën të dielën pranë Kullës Eiffel për të festuar suksesin historik të skuadrës në Ligën e Kampionëve. Atmosfera festive mbizotëroi gjatë ditës, megjithëse nata paraprake u shoqërua me incidente dhe përleshje në disa pjesë të Francës.

Ministri i Brendshëm francez, Laurent Nunez, njoftoi se 780 persona janë arrestuar në të gjithë vendin, ndërsa 57 zyrtarë policorë kanë mbetur të lënduar, kryesisht me lëndime të lehta. Ai theksoi se situata ka qenë përgjithësisht nën kontroll dhe se shumica e tifozëve kanë festuar në mënyrë paqësore.

Sipas autoriteteve, incidentet më të mëdha u regjistruan në zonën e Champs-Élysées dhe pranë stadiumit Parc des Princes, ku tifozët ishin mbledhur për të ndjekur finalen. Gjatë natës pati dëmtime të lokaleve, djegie të mbeturinave, biçikletave dhe disa automjeteve, ndërsa policia ndërhyri disa herë për të rikthyer rendin.

Autoritetet raportuan incidente në të paktën 15 lokacione në Francë, ndërsa vetëm në rajonin e Parisit u arrestuan 480 persona. Policia ndërhyri gjithashtu pesë herë për të larguar grupe që bllokonin trafikun në unazën kryesore rrugore përreth kryeqytetit.

Një aksident i rëndë ndodhi kur një drejtues mjeti humbi kontrollin e veturës dhe u përplas në tarracën e një restoranti, duke lënduar dy persona. Njëri prej tyre ndodhet në gjendje të rëndë.

Prokuroria e Parisit bëri të ditur se 277 persona mbeten në paraburgim, përfshirë 82 të mitur. Ata dyshohen për sulme ndaj policisë, dëmtim prone, vjedhje dhe prishje të rendit publik.

Ndërkohë, festimet zyrtare të së dielës në Champ de Mars u zhvilluan sipas planit dhe nën masa të rrepta sigurie. Deri në 100 mijë tifozë morën pjesë në këtë ngjarje, ku lojtarët e PSG-së prezantuan trofeun e Ligës së Kampionëve para mbështetësve të tyre. Më pas, skuadra u prit nga presidenti francez, Emmanuel Macron, në Pallatin Élysée.

Nënkryetari i Parisit, Emmanuel Grégoire, përgëzoi shumicën e tifozëve për festimet paqësore, por dënoi ashpër aktet e dhunës dhe vandalizmit që shoqëruan natën e triumfit. Ai theksoi se pjesa më e madhe e parisienëve festuan me gëzim, unitet dhe respekt.