Partia Socialdemokrate ka vendosur letra ngjitëse me logon e KEDS-it në veturat zyrtare të Qeverisë së Kosovës. Sipas anëtarëve të kësaj partie Qeveria po e rrit buxhetin dhe është vënë në shërbim të kompanisë KESCO.
Nol Nushi nga PSD ka thënë se me financat që po i ndahen kësaj kompanie po i bëhet padrejtësi buxhetit publik.
“Ne sot po duam të ripotencojmë këtë padrejtësi që po i bëhet buxhetit publik dhe një tentativë tjetër për rritje të çmimit të energjisë, paramendoni të shtunën në vikend në ora nëntë e gjysmë të natës Qeveria mblidhet me urgjencë online dhe me një proces tepër jotransparent i ndanë ekstra 15 milionë euro për KEDS-in”, ka thënë Nushi.
Ai thënë në këtë periudhë me krizë energjetike vetëm KEDS po i vazhdon përfitimet ndërsa qytetarët po humbin.
“Tashmë kjo qeveri është totalisht në shërbim të Korporatës së Distribucionit të Energjisë-KEDS-it, dhe sot këto vetura të qeverisë dhe punëtorëve të kësaj qeverie nuk janë më vetura të qytetarëve dhe në shërbim të qytetarëve mirëpo këto muaj të dimrit kanë qenë totalisht vetura dhe zyrë në shërbim të KEDS-it. Për ne është e papranueshme qysh një qeveri e tërë vihet në kontrollin e një kompanie private dhe shantazhohet totalisht nga ajo”, ka thënë ai.
Ai ka deklaruar se janë në pritje të vendimit të ZRrE-së lidhur me çmimin e energjisë elektrike derisa ka shtuar se komentet më të mira për këtë çështje i kanë dhënë qytetarët përmes protestës së 29 janarit.
“Ne po i presim vendimet e ZRrE-së, mirëpo shenjat janë ogurzeza sepse një vendim i tillë të merret në gjysmë të natës, pa kurrfarë transparence, vetëm tregon çfarë vendimi do të bie edhe ZRRE-ja tash e tutje”, ka shtuar Nushi pas aksionit në oborrin e Qeverisë.
Kryesuesi i Bordit të Zyrës së Rregullatorit të Energjisë, Ymer Fejzullahu, sot gjatë ditës në një konferencë për media deklaroi se tarifat e reja të energjisë elektrike pritet të miratohen në mbledhjen e radhës të ZRrE-së.
Presidentja Vjosa Osmani, po qëndron në Bullgari, për ta përfaqësuar vendin krahas liderëve të tjerë në takimin e nivelit të lartë të Procesit Aqaba për Ballkanin III, i cili do të mbahet në Sofje.
Nga atje Osmani ka publikuar një fotografi nga takimit me Mbretin Abdullah II të Jordanisë dhe Presidentin e Bullgarisë, Rumen Radev.
‘’Me Mbretin Abdullah II të Jordanisë dhe Presidentin e Bullgarisë, Rumen Radev, në Takimin e Aqaba në Sofje, për ta nxitur bashkëpunimin, dialogun dhe stabilitetin rajonal.
Me nderime shtetërore, janë rivarrosur mbetjet mortore të dhjetë viktimave të luftës, të cilat ishin pjesë e listës së personave të zhdukur. Mbetjet e tyre ishin identifikuar së fundmi nga mbetjet mortore të zhvarrosura në varreza masive në Bishtazhin të Gjakovës.
Ceremonia e rivarrimit u mbajt në Kompleksin Memorial “Kodra e Kuqe” në Grabanicë të Klinës, ku u rivarrosën martirët Adem (Hazir) Gashi, Sahit (Ahmet) Gashi, Bekim (Hashim) Hasani, Sheremet (Brahim) Ismajli, Osman (Kadri) Fejza, Shkelzen (Rifat) Hajdaraj, dhe Bekim (Muharrem) Gashi. Në varrezat e Jashanicës në Klinë, u rivarrosën eshtrat e Mentor (Xhemajl) Myrtajt.
Ceremonitë e rivarrimit vazhduan me viktimat e tjera, përfshirë Vehbi (Pajazit) Halilaj, i cili u rivarros në varrezat e fshatit Llapqevë në Malishevë, dhe Mentor (Maliq) Kryeziu, që u rivarros në Bubavec të Malishevës. Mbetjet mortore të Sabedin (Kadri) Kryeziu u rivarrosën më 21 mars në varrezat e fshatit Mleqan, Malishevë.
Ky akt përkujton sakrificat e viktimave të luftës dhe mundëson nderimin dhe kujtimin e tyre.
Në Sudanin e Jugut, përleshjet e dhunshme kanë shpërthyer në komunitetin e Abiemnom, në veri të vendit, duke lënë të paktën 30 të vdekur. Trazirat nisën pas një vjedhjeje të bagëtive nga një grup të rinjsh të armatosur në distriktin Rueng. Pas kësaj, forcat e sigurisë intervenuan, por një ditë më vonë, të rinjtë u kthyen me përforcime dhe sulmuan komunitetin Abiemnom.
Qytetarët dhe forcat e sigurisë tentuan të mbronin qytetin, por u përballën me një numër më të madh forcash armiqësore. Disa nga viktimat ishin pjesë e grupit të rinjve të armatosur.
Konfliktet midis barinjve dhe fermerëve janë të zakonshme në Sudanin e Jugut, por përleshjet e fundit vijnë pas tensioneve politike të rritura në vend. Arrestimi i Zëvendës Presidentit, Riek Macar, nga forcat besnike të Presidentit Salva Kiir, ka rritur shqetësimet për mundësinë e një ripërtëritjeje të luftës civile, që ka shkatërruar vendin gati shtatë vjet më parë.
Millosh Vuçeviç, kryeministri i përkohshëm i Serbisë dhe lideri i Partisë Progresive Serbe (SNS), ka deklaruar se formimi i qeverisë së re është shumë afër, por ka ende mundësi që të thirren zgjedhje të reja. Në një intervistë për Prva TV, Vuçeviç tha se një kryeministër i ri do të mund të formonte një kabinet deri më 18 prill, por theksoi se ka një mundësi të vogël që, nëse nuk arrijnë një marrëveshje për formimin e kabinetit, mund të shpallen zgjedhje të reja.
Ai përmendi se procesi i formimit të kabinetit do të jetë i vështirë dhe kërkon hartimin e një prezantimi brenda shtatë deri në dhjetë ditë. Pas konsultimeve me presidentin serb, Aleksandar Vuçiç, Vuçeviç theksoi se koalicioni që mbështet SNS është i bindur se nuk është e nevojshme të mbahen zgjedhje të reja dhe se do të propozojnë dy kandidatë për postin e kryeministrit të emëruar.