Rektori i UBT-së, Prof. Dr. Edmond Hajrizi, po qëndron në një vizitë zyrtare në Texas, me ftesë të universitetit partner të UBT-së, Sam Houston State University.

Gjatë qëndrimit të tij, ai do të zhvillojë takime me drejtues akademikë dhe do të diskutojë mundësitë e zgjerimit të bashkëpunimeve në fushën e arsimit, kërkimit shkencor dhe shkëmbimit të studentëve.

Kjo vizitë nënvizon përkushtimin e UBT-së për forcimin e marrëdhënieve ndërkombëtare dhe zgjerimin e partneriteteve strategjike, duke hapur mundësi për projekte të përbashkëta dhe zhvillim akademik midis dy institucioneve.

Kuvendi Komunal i Prishtinës do të zhvillojë sot seancë të jashtëzakonshme.

Seanca është paralajmëruar të fillojë nga ora 15:00.

Kjo seancë është thirrur pas bllokimit prej disa ditësh të transportit publik për shkak të grevës së Trafiku Urban dhe operatorëve privatë që veprojnë në kryeqytet për shkak të problemeve financiare në komunë.

Punëtorët kanë këkuar zgjidhje të shpejt të problemit, teksa Komuna dhe Qeveria po i hedhin fajin njëra-tjetrës për alokimin e mjeteve të kryeqytetit./KP

Përfaqësuesit i punëtorëve të “Trafikut Urban” Ilmi Gashi ka shpresë që në mbledhjen e jashtëzakonshme të cilën e ka thirr Komuna e Prishtinës do të gjendet një zgjidhje për ta dhe do të marrin pagat e tyre.

Ai nga objekti i Komunës së Prishtinës, aty edhe ku janë mbledhur që përmes protestë të kërkojnë pagën e tyre, si të drejtë elementare, ka thënë se mbledhja e nesërme është legjitime.

“Këto kushte të cilat po ndodhemi jo me dëshirën ton po me imponimet për borxhet që na kanë ndërpre karburantin për 1 milion euro kompani në të cilën furnizohemi me naftë, borxhet tjera 800 mijë euro janë për punëtor, 100 mijë euro për sigurimet shëndetësore edhe borxhet tjera për autobusët. Nëse nuk ka zgjidhej nesër greva vazhdon deri në alokimin e mjeteve që është ndaj operatorëve. Në po shpresojmë që nesër do të mbarojë, po shpresojmë që në këtë mbledhje do të mbizotëroj arsyeja, unë nuk kam informacione pse nesër është mbledhje legjitime është e thirrur, ata që e shpallin jo legjitime janë instancat tjera prapa saj se për tu mbajt mbledhja do të funksionoj dhe besoj që do të bëhet votimi në asamble, do të dërgohet ne ministri dhe ministri do t’i alokoj mjetet. Besojmë edhe shpresojmë”, tha ai.

Nga e hëna kryeqyteti nuk ka qarkullim të autobusëve, e kjo u bë siç kanë thënë për shkak të mungesës së pagës dhe karburanteve.

Transportuesit urbanë do të vazhdojnë të mërkurën protestën për të tretën ditë radhazi. Një ditë më parë ata e ndryshuan formën – nga protestë paqësore, në atë që e bllokoi qytetin e Prishtinës.

Protesta në ditën e tretë do të vazhdojë me më pak autobusë, që të mos bllokohet komunikacioni si paraditen e së martës.

Meqë Komuna nuk ka shlyer obligimet financiare shkaku i pasojave që ka prodhuar mosmiratimi i buxhetit me kohë, ata vendosën autobusët në rrugën para objektit të këtij institucioni. Pas kësaj u krijuan kolona të gjata në kryeqytet.

E, nga takimi i së hënës me ministrin në detyrë të Financave, Hekuran Murati, përfaqësuesit e protestuesve ndryshuan mendim dhe të martën kërkuan zgjidhje vetëm nga Komuna.

Përfaqësuesi i sindikatës së punëtorëve të “Trafikut Urban”, Ilmi Gashi, tha se Ministria i ka alokuar 3.2 milionë euro te Komuna, e nga to Komuna ia ka ndarë “Trafikut Urban” vetëm 600 mijë euro.

“Nuk i mbulon shpenzimet e naftës që i kemi borxh një milion. 800 mijë punëtorëve në rroga. 100 mijë po na shkëputen kontrata me sigurimin shëndetësor. Ju lutem janë 1.6 milion euro borxh. Komuna nuk po reflekton, po na detyron neve kinse Ministria nuk i ka alokuar paratë”, ka thënë Gashi.

Gashi tha se ministri Murati është zotuar ta kryejë pjesën e tij për gjithë buxhetin, nëse Komuna kryen detyrat.

“Ne ishim në ministri, u takuam me ministrin. Kontaktuam, ata u zotuan se nëse Komuna apo asambleja nxjerr një vendim për bartjen e të hyrave vetanake për vitin 2024, sapo të dalë ai vendim e ia përcjell ministrisë, ajo është e gatshme t’i alokojë mjetet”, ka thënë ai.

Por kryetari i Prishtinës, Përparim Rama, insistoi se problemi qëndron te Qeveria.

“Faji nuk është te transportuesit, faji është i Qeverisë së Kosovës dhe ata mund të zhbllokojnë këtë gjë. Prandaj shpresoj që të reflektojnë dhe ta kemi një takim me ta”, ka thënë Rama.

E, asamblisti i Lëvizjes Vetëvendosje në Prishtinë, Gëzim Sveçla, në një konferencë për media ka kritikuar kryetarin Rama, dhe Lidhjen Demokratike të Kosovës, duke thënë se qytetarët po përballen me ditën e dytë pa shërbime të trafikut urban për shkak të “politikave të gabuara” të kryetarit Rama.

Sveçla deklaroi se thirrja e seancës nga legjislatura e kaluar të Kuvendit Komunal tregon “pranimin e fajësisë” nga Rama, ndërsa e akuzoi për “shfaqje teatrale” dhe mungesë empatie ndaj punëtorëve të Trafikut Urban.

“Zhvillimet në kryeqytet janë të jashtëzakonshme, është dita e dytë që qytetarët e Prishtinës janë të privuar nga shërbimet e trafikut urban dhe gjithë kjo si rezultat i politikës dhe qasjes së Përparim Ramës, Lidhjes Demokratike të Kosovës në krye me Lumir Abdixhikun. Sot kishim deklaratë të Ramës që tha se thirrja e seancës për legjislaturën e kaluar të asamblesë së Kuvendit Komunal të Prishtinës është një mundësi opsionale për t’i inkasuar të hyrat vetanake dhe për të cilat ai tashmë e sa kohë ka ngritur kauzë të vetën dhe të partisë së vet. Vet ftesa për këtë seancë e dëshmon pranimin e fajësisë nga zotëri Rama, i cili ka traumatizuar qytetarët e Prishtinës”, ka thënë Sveçla. “Ai ka filluar të bëjë shfaqje teatrale, siç ishin ato sot që i pamë në mesin e protestuesve, në mesin e punëtorëve të Trafikut Urban, ku në stilin e një banditesku bërtiste ‘qiti paret, qiti paret’, sepse tashmë ai e ka kuptuar që edhe punëtorët e Trafikut Urban e kanë kuptuar se ku është adresa e dështimit të ndërmarrjes së tyre”.

E, kryetari i Lidhjes Demokratike të Kosovës, Lumir Abdixhiku, ka kundërshtuar deklarimet e presidentes Vjosa Osmanit e cila të hënën tha se nuk mund të kërkojë më nga deputetët të mblidhen për çështjen e buxhetit të Komunës së Prishtinës dhe RTK-së, duke theksuar se për një gjë të tillë u ishte lutur partive politike ditën kur kishte dështuar të zgjidhet mandatari i dytë për kryeministër.

Osmani ka thënë se ka bërë çdo përpjekje për ta shtyrë përpara dhe të gjejë zgjidhje, por sipas saj, ishin partitë e ish-opozitës që nuk pranuan dhe refuzuan të kthehen dhe njëherë në Kuvend para se ta nënshkruante dekretin për shpërndarje.

Abdixhiku ka shkruar se në mbrëmjen e nominimit të Glauk Konjufcës, i ka shprehur gatishmërinë Osmanit që të votohet një pako, me zgjatimin e buxhetit për 3 muaj, me votimin e Ligjeve të Prishtinës e Gjilanit, me sigurimin e pagave për RTK-në, si dhe me votimin e Pakos Evropiane të Rritjes.

Sipas tij, po atë mbrëmje, menjëherë pas mandatimit të Konjufcës, Osmani e ka kontaktuar, duke i thënë se ka komunikuar me mandatarin, ua ka përcjellë porosinë Lëvizjes Vetëvendosje, dhe ata janë shprehur shumë pozitivë për këtë ide.

“Në ato momente kam kontaktuar Memli Krasniqin si kryetar të PDK-së; Ramush Haradinajn si kryetar të AAK-së; dhe Fatmir Limajn si Kryetar të Nismës. Të tre këta janë njoftuar se ka një mundësi që të votohet një pako e tillë për të mirën e vendit. Në atë mbrëmje kam kontaktuar dhe disa ambasadorë të QUINT-it. Nga ai moment, nuk ka lëvizur asgjë për 15 ditë. 15 ditë pa asnjë komunikim; përveç një vonese të pakuptueshme në shpenzimin e ditëve para një krize të paralajmëruar. E pakuptueshme për mua; e lexueshme si tendencë për krijim krize dhe fajësim politik”, ka thënë ai.

Sipas tij, ky propozim, i hapur, diskutuar e nxitur nga vetë ai, “u kthye në tavolinën e caktimit të zgjedhjeve, dhe atë me stilolaps mbi nënshkrimin e dekretit për zhbërje të Kuvendit. Edhe aty, thash, para të gjithëve, krejt në fund të fjalës sime, se nëse ka gatishmëri nga të gjithë LDK nuk është kundër. Ky deklarim është i regjistruar zyrtarisht”.

Abdixhiku ka thënë se nuk pati asnjë lëvizje, ani pse ishte vonë.

Abdixhikut i ka reaguar ministri në detyrë i Financave, Hekuran Murati.

“E pse nuk i votuat pra kur e kishit mundësinë? Deri dje keni thënë se seanca ka qenë antikushtetuese, prandaj s’keni marrë pjesë. Tash po del që paskeni pasë me i votu, por s’ju ka pëlqy mënyra e ftesës. Kjo është tallje me qytetarët”, ka shkruar Murati në Facebook.

Edhe mes protestuesve në Prishtinë pati përplasje për adresën se kush është fajtor për këtë situatë të krijuar.

Ndërsa qytetarët u shprehën të mllefosur me bllokadën që u krijua në kryeqytet dhe pamundësinë për të lëvizur me autobusë.

“Faji është se shtazë deputetë kemi. Kur te fiton dikush, del i pari pa marrë parasysh a e ka shumicën a jo, përkraheni. Por kjo nuk ndodh se kemi shtazë deputetë”, ka thënë njëri nga ta, që priste në kolonë me automjetin që e drejtonte.

“Unë dola në pauzë me marrë bukë dhe mbeta këtu. Tash kam mbetë, sigurt vonohem 2-3 orë”, ka thënë një i ri, që po kështu prishte në kolonë./EO

Kryetari i Prishtinës, Përparim Rama ka deklaruar se është i gatshëm të takohet me kryeministrin në detyrë, Albin Kurtin dhe ministrin në detyrë të Financave, Hekuran Muratin, ani pse dje nuk pranuan që të jetë i pranishëm në takimin me kryetarët e sindikatave të Trafikut Urban.

Pas protestës dy orëshe të punëtorëve të transportit publik, Rama tha se gjendja e njëjtë vazhdon ende.

Ai tha se ka paralajmëruar me muaj të tërë për bllokada që po i bëhen kryeqytetit nga Ministria e Financave.

Ndërkohë nesër do të mbahet seancë e jashtezakonshme në asamblenë e Komunës për të hyrat vetanake.

Linjat e autobusëve të Trafikut Urban dhe operatorëve private edhe sot kanë pezulluar punën pas bllokadës financiare që ka Komuna e Prishtinës.

Në shenjë proteste punëtorët e trafikut urban dhe sektorit publiko-privat kanë bllokuar rrugët e kryeqytetit me autobusë, të cilët i kanë vendosur në rrugën “Agim Ramadani” dhe Luan Haradinaj.

Ata kanë bllokuar rrugën te objekti i komunës se Prishtinës dhe mbrapa teatrit.

Punetorët po kërkojnë borxhin që ua ka komuna për të paguar derivatet dhe punëtorët për të rifilluar punën.

Tash e dy ditë, është ndalur qarkullimi i transportit publik ne kryeqytet.

Kryetari i Prishtinës, Përparim Rama ka akuzuar Ministrinë e Financave se e kanë bllokuar të hyrat vetanake, derisa ministri në detyrë, Hekuran Murati ka mohuar një gjë të tillë.