Lajmet

Protestat në Iran: Aktivistja Sepideh Qolian përshkruan brutalitetin e burgjeve në letër

Sepideh Qolian ka vuajtur një dënim prej pesë vitesh që nga viti 2018.

Published

4 years ago

on

Një nga aktivistet më të njohura të Iranit përshkroi tmerrin që përjetojnë të burgosurit, përmes një letre që u shkrua brenda burgut famëkeq.

Sepideh Qolian ka vuajtur një dënim prej pesë vitesh që nga viti 2018, pasi u dënua për veprim “kundër sigurisë kombëtare” për mbështetje të një proteste. Nga burgu Evin, ajo përshkruan trajtimin brutal të saj dhe të burgosurve të tjerë nga hetuesit. Rrëfimet e tyre të detyruara transmetohen më vonë në televizionin shtetëror.

Duke aluduar në protestat aktuale antiqeveritare që kanë përfshirë vendin, Qolian shkruan:“Në vitin e katërt të burgimit tim më në fund mund të dëgjoj hapat e çlirimit nga i gjithë Irani. Jehona e “Grua, Jetë, Liri” dëgjohet edhe nëpër muret e trasha të burgut të Evinit”.

Qolian aktualisht është duke studiuar drejtësi në burg. Në letrën e saj ajo përshkruan sesi krahu “kulturor” i Evinit – ku ajo jep provimet e saj – është shndërruar në një ndërtesë “torturash dhe marrjes në pyetje” dhe thotë se ka qenë dëshmitare e marrjes në pyetje të të burgosurve të rinj. Salla e provimit është mbushur me djem dhe vajza të reja dhe dëgjohen britmat e torturuesve, shkroi ajo tutje.

Qolian përshkruan një skenë që ajo e pa më 28 dhjetor të vitit 2022.

“Është ftohtë dhe po bie borë, afër është dera e daljes nga ndërtesa, një djalë i ri me sy të lidhur dhe i veshur vetëm me një bluzë të hollë gri është ulur përballë një hetuesi. Ai po dridhet dhe po lutet: “Betohem në zot se nuk e rraha askënd. Ata donin që ai të rrëfente. Teksa po kaloj bërtas: “Mos u rrëfeni” dhe “Vdekje ju tiranas””, shkroi ajo mes tjerash në letër.

Sipas Agjencisë së Lajmeve të Aktivistëve për të Drejtat e Njeriut (HRANA), deri më tani, të paktën 519 protestues – përfshirë 69 fëmijë – janë vrarë dhe 19 mijë e 300 janë arrestuar. Mijëra të tjerë janë burgosur.

Shumë prej të arrestuarve përballen me dënim me vdekje dhe deri më tani katër protestues janë varur pasi rrëfimet e tyre u shfaqën në TV./UBTNews/

Related Topics:
Continue Reading

lajme

Protestat vazhdojnë në Prishtinë: Kërkohet që vrasja e grave të trajtohet si urgjencë kombëtare

Published

1 hour ago

on

October 30, 2026

By

Protesta kundër vrasjes së Arlinda Zekajt ka vazhduar edhe sot në Prishtinë, ku qytetarët janë mbledhur për të tretën ditë radhazi në sheshin e kryeqytetit për të kërkuar drejtësi dhe përgjegjësi institucionale.

Gjatë ditës së sotme, protestuesit janë ndalur edhe para objektit të Qeverisë së Kosovës, duke shprehur pakënaqësi të thellë ndaj mënyrës se si po menaxhohen e trajtohen rastet e dhunës ndaj grave nga organet kompetente.

Këto aksione po organizohen nga Kolektivi për Mendim dhe Veprim Feminist, nën moton kryesore “Vrasja e grave të trajtohet si urgjencë kombëtare”.

Continue Reading

Lajmet

Akil Gjakova mbyll garën pa medalje në Abu Dhabi

Published

2 hours ago

on

October 30, 2026

By

Xhudisti kosovar Akil Gjakova e ka mbyllur pa medalje paraqitjen e tij në Grand Slam-in e Abu Dhabit, pasi u mposht në përballjen e drejtpërdrejtë për vendin e tretë.

Në kategorinë deri në 73 kilogramë, Gjakova u ndal në luftën për medaljen e bronztë nga xhudisti rus Karen Galstian. Pejani e nisi garën i lirë në xhiron e parë, ndërsa në të dytën mposhti me Ippon izraelitin Ohad Moritz. Suksesin më të madh e shënoi në raundin e tretë ku eliminoi nënkampionin e botës, Makhmadbek Makhmadbekov, po ashtu me Ippon në kohën shtesë.

Pasi u mposht në çerekfinale nga azerbajxhanasi Hidayat Heydarov, Gjakova kërkoi suksesin përmes repesazhit, por nuk arriti të ngjitej në podiumin e fituesve. /E.A/

Continue Reading

lajme

Nën hetim për projektin e kryeqytetit: Përparim Rama paraqitet në Prokurorinë Speciale

Published

2 hours ago

on

October 30, 2026

By

Kryetari i Komunës së Prishtinës, Përparim Rama, është paraqitur sot në Prokurorinë Speciale ku po intervistohet në cilësinë e të dyshuarit lidhur me projektin “Arkitekti i Kryeqytetit”.

Rama arriti në prokurori i shoqëruar nga avokati Artan Çerkini, teksa para hyrjes deklaroi shkurtimisht se detyra e tij është ndërtimi i kryeqytetit, ndërsa e organit të ndjekjes është të sigurohet që gjithçka bëhet në përputhje me ligjin. Hetimet për këtë projekt ndërlidhen me procedurat e prokurimit publik, vlerën prej 12 milionë eurosh, si dhe me dyshimet për manipulim të stafit e konflikt interesi.

Intervistimi i kryetarit të Prishtinës vjen pas tensioneve publike dhe paralajmërimeve nga zyrtarë të Lëvizjes Vetëvendosje për arrestimin e tij të mundshëm, reagime këto që pasuan ndryshimet e fundit në udhëheqjen e Prokurorisë Speciale, ku pas shkarkimit të Blerim Isufajt, detyra i është besuar prokurorit Dren Paca.

Ndaj deklaratave të përfaqësuesve të pushtetit, Rama u ka bërë thirrje publike organeve të drejtësisë që të merren me ato që i ka cilësuar si kërcënime direkte ndaj tij. /E.A/

Continue Reading

Lajmet

Laura Fazliu fiton të bronztën në Grand Slam

Published

3 hours ago

on

October 30, 2026

By

Laura Fazliu ka fituar medalje të bronztë në Grand Slamin e xhudos në Abu Dabi.

Në luftë për medalje të bronztë, Laura e mposhti bartësen e parë, kroaten Iva Oberan.

Lufta ishte e barabartë, ndërsa në kohën shtesë Laura realizoi hedhje të bukur për fitore me “Ippon”.

Laura fitoi 500 pikë në renditjen botërore. /E.A/

Continue Reading

Të kërkuara