UBT është ranguar si institucioni i parë dhe më i mirë i arsimit të lartë privat në Kosovë për kërkime shkencore, sipas Renditjes Kombëtare të H-indeksit (National H-index Ranking) për tremujorin e dytë të vitit 2025.

Përmes një strategjie të qartë institucionale dhe përkrahjes së fuqishme të stafit akademik e studentëve, UBT ka arritur të krijojë një ekosistem shkencor ku kërkimi dhe aplikimi i njohurive ndërthuren për të gjeneruar zgjidhje të reja dhe të qëndrueshme.

Rektori i UBT-së, Prof. Dr. Edmond Hajrizi, ka thënë se kjo renditje tregon përkushtimin e UBT-së në promovimin e shkencës dhe kërkimit shkencor në vend dhe përtej tij.

“Kjo renditje në H-index është rezultat i punës së palodhshme të akademikëve tanë dhe përkushtimit për të qenë gjithnjë në hap me zhvillimet globale në fushën e kërkimit shkencor. Ne do të vazhdojmë të investojmë në projekte kërkimore, partneritete ndërkombëtare dhe zhvillimin e mëtejmë të kapaciteteve tona akademike”, theksoi Rektori Hajrizi.

UBT është një prej institucioneve më aktive në publikime shkencore me ndikim ndërkombëtar, në fusha si teknologjia, inxhinieria, shkencat mjekësore, arkitektura, menaxhimi, edukimi dhe shumë të tjera. Përmes pjesëmarrjes në projekte të mëdha evropiane dhe angazhimit të ekspertëve të njohur ndërkombëtarë, UBT po kontribuon në ngritjen e standardeve kërkimore në Kosovë.

Studentët e programit Inxhinieria e Agrikulturës dhe Mjedisit në UBT, si në nivelin Bachelor ashtu edhe Master, zhvilluan një vizitë praktike studimore në dy nga ndërmarrjet më të njohura të sektorit të bletarisë në vend, “API ROI” dhe “APIMODERNA”.

Gjatë kësaj vizite, studentët patën mundësinë të njoftohen nga afër me proceset e prodhimit, përpunimin dhe kontrollin e cilësisë në këto industri, duke parë në praktikë se si funksionojnë standardet profesionale në sektorin e prodhimit të mjaltit dhe produkteve të tjera bletare.

Vizita u zhvillua në kuadër të përpjekjeve të vazhdueshme të UBT-së për të kombinuar teorinë me praktikën, duke i ofruar studentëve një përvojë të drejtpërdrejtë në terren, që ndihmon në zgjerimin e njohurive akademike dhe zhvillimin e aftësive praktike profesionale.

Ky aktivitet dëshmon edhe njëherë qasjen moderne të UBT-së në arsim, përmes lidhjes së ngushtë me industrinë dhe krijimit të mundësive konkrete për përgatitje të avancuar profesionale, duke përgatitur studentë të aftë për tregun e punës dhe sfidat reale të sektorëve të agrikulturës dhe mjedisit.

Fakulteti Juridik në UBT ka marrë pjesë në Konferencën Ndërkombëtare Shkencore “Justice, Security and Human Rights” (ICJSHR-LFUL 2025), të mbajtur në ambientet e Universitetit Luarasi në Tiranë.

Konferenca, e cila u zhvillua në kuadër të Ditës së Evropës, mblodhi së bashku personalitete të njohura akademike, përfaqësues institucionalë dhe ekspertë të fushave të drejtësisë, sigurisë dhe të drejtave të njeriut, nga Shqipëria, Kosova dhe rajoni.

UBT ishte pjesë e kësaj ngjarjeje të rëndësishme si partnere akademike dhe u përfaqësua nga Dr. Egzone Osmanaj, Zëvendësdekane e Fakultetit Juridik, e cila mbajti një fjalë përshëndetëse në sesionin plenar, si dhe prezantoi dy punime shkencore në sesionet tematike të konferencës.

Konferenca u shënua nga një frymë bashkëpunimi ndërinstitucional dhe akademik, duke ofruar një platformë të vlefshme për shkëmbimin e ideve, përvojave dhe praktikave të mira në fushën e drejtësisë dhe të sigurisë.

UBT, përmes përfaqësuesve të tij dhe bashkëpunimit të ngushtë me institucione të tjera akademike në Shqipëri, po dëshmon përkushtimin e vazhdueshëm në avancimin e dijes juridike, promovimin e të drejtave të njeriut dhe ngritjen e standardeve të arsimit në nivel kombëtar dhe ndërkombëtar.

Studentët e vitit të dytë të Fakultetit të Psikologjisë, nën mbikëqyrjen e Prof. Violeta Zefi, realizuan një vizitë studimore në Qendrën Psikologjike “Rreze Dielli” në Prishtinë.

Gjatë kësaj vizitë, ata patën mundësinë të bashkëbisedojnë nga afër me psikologen Zana Qehaja, e cila është njëherësh edhe drejtuesja e qendrës. Po ashtu, gjatë vizitës u zhvillua simulimi i një seance psikoterapeutike, me qëllim që studentët të ndjekin nga afër mënyrën e realizimit të një procesi të tillë dhe të kuptojnë më mirë rëndësinë dhe format e komunikimit me personat që kanë nevojë për shërbime të shëndetit mendor.

Ky lloj ekspozimi i punës praktike për studentët është shumë i dobishëm për cilësinë e studimeve të tyre dhe karrierën e ardhshme profesionale në fushën e psikologjisë.