4 Korriku i vitit 1776 shënon momentin historik të shpalljes së Pavarësisë së Shteteve të Bashkuara të Amerikës – një akt që vendosi themelet e demokracisë moderne dhe që sot frymëzon shumë kombe anembanë botës. Në këtë ditë të rëndësishme, vlerat universale të lirisë, barazisë dhe drejtësisë kremtohen jo vetëm në SHBA, por edhe nga miqtë dhe aleatët e saj.

Në këtë ditë të veçantë, rektori i UBT-së, Prof. Dr. Edmond Hajrizi, ka uruar popullin amerikan për Ditën e Pavarësisë, duke theksuar rëndësinë e kultivimit dhe forcimit të lidhjeve të forta mes popullit shqiptar dhe atij amerikan.

“Sot, teksa Shtetet e Bashkuara festojnë pavarësinë e tyre, ne i bashkohemi kësaj feste me respekt dhe mirënjohje. Miqësia mes shqiptarëve dhe amerikanëve është e vërtetë, e thellë dhe e ndërtuar mbi vlera të përbashkëta që transmetohen brez pas brezi,” është shprehur rektori Hajrizi.

UBT, si një institucion lider në arsimin e lartë në Kosovë, vazhdon të ndërtojë ura bashkëpunimi me institucionet arsimore në SHBA. Këto partneritete synojnë shkëmbimin e ideve dhe përvojave inovative, në funksion të zhvillimit të një sistemi modern dhe cilësor të arsimit në vend.

Rektori dhe themeluesi i UBT-së, Prof. Dr. Edmond Hajrizi, ka deklaruar se UBT tashmë është institucioni i parë akademik në Evropë që funksionon tërësisht mbi bazën e Inteligjencës Artificiale (AI), duke përfshirë të gjitha proceset, nga arsimi dhe kërkimi shkencor deri te trajnimi dhe integrimi në tregun e punës.

Gjatë intervistës në Debat Plus, Hajrizi theksoi se ky hap jo vetëm që përfaqëson një arritje të madhe për institucionin që ai udhëheq, por edhe një transformim strategjik për Kosovën, duke e pozicionuar si një qendër novatore në nivel global.

“Sot jemi duke fol për Inteligjencën Artificiale. Emiratet kanë krijuar, (Universiteti ‘Mohammed Bin Zayed’) ka bërë AI University. Çka kam me prit unë. Jo ne do ta bëjmë të njëjtën, dhe do të jemi të parët në Evropë. Dhe do ta bëjmë universitetin e parë, institucione e parë akademik në Evropë, i cili është i bazuar i tërë me AI. Dhe e kemi arritur. Sot mund të deklaroj zyrtarisht dhe publikisht se jemi institucioni më i parë, i cili në mënyrë të plotë, tërësore të gjitha veprimet akademike, prej edukimit deri te pjesa shkencore, inovacioni, ndërmarrësi, mentorimi, trajnimi, certifikim, aftësimi dhe t ë vendi i punës është i mbështetur me AI… Ne faktikisht do të marrim një rol të tillë.”, ka thënë Hajrizi.

Hajrizi ka shtuar se UBT ka investuar miliona në këtë drejtim dhe se përfitimet nuk do të kufizohen vetëm për studentët e UBT-së, por edhe për çdo qytetar dhe punëtor në Kosovë që kërkon aftësim për të përballuar sfidat e tregut modern.

“Kemi investuar me miliona, për të cilën dëshirojmë të ia japim çdo qytetari, jo vetëm atyre që janë në UBT. Çdo punëtori që ka nevojë të aftësohet të ia japim një vegës që i kushton shumë pak, por që i ndihmon shumë. Dhe ka një cilësi dhe aftësi për të ia transformuar aftësitë, dijet dhe të jetë i gatshëm për tu përshtatur me rrethanat e reja që i kemi. Dhe unë mendoj që kjo edhe për Kosovën është shumë e madhe, se na pozicionon në një vend q është model, inovativ, kreativ. Jo në një vend që ne shkojmë pas dikujt. Por një vend që është në venin e grupeve më inovative në botë”, ka shtuar Hajrizi./Dukagjini

Fakulteti i Menaxhmentit, Biznesit dhe Ekonomisë në UBT ka hapur zyrtarisht Akademinë Verore për Ekonomi, Financa, Banka dhe Sigurime, e cila po zhvillohet në kuadër të aktiviteteve edukative dhe shkencore që synojnë thellimin e njohurive të studentëve dhe profesionistëve mbi zhvillimet më të fundit në ekonominë moderne.

Hapjen zyrtare të akademisë e bëri Prof. Kestrim Avdimetaj, i cili theksoi se ky aktivitet do të shërbejë si një platformë për analizimin e faktorëve kryesorë të ekonomisë dhe rritjes ekonomike, qëndrueshmërisë financiare, ambientit të investimeve dhe inovacioneve në sektorët financiar dhe bankar. Ai nënvizoi rëndësinë që do t’i kushtohet temave aktuale si tregjet e kapitalit, bankat digjitale, kriptovalutat dhe sfidat që paraqiten në sektorin e sigurimeve, duke krijuar një bashkëbisedim ndërmjet akademisë dhe sektorit privat.

Në vijim të programit, të pranishmit patën mundësinë të ndjekin prezantimin e Prof. Zef Dedaj, Drejtor i Përgjithshëm i KIESA-s (Agjencia Kosovare për Investime dhe Përkrahje të Ndërmarrjeve), i cili foli për ekosistemin e inovacionit dhe mundësitë e investimeve në Kosovë. Ai ndau të dhëna mbi mjedisin ekonomik dhe afarist të vendit, marrëveshjet ndërkombëtare të investimeve dhe tregtisë së lirë, si dhe sektorët më premtues industrialë. Një theks i veçantë iu kushtua përkrahjes për ndërmarrjet e vogla dhe të mesme, si shtyllë e zhvillimit ekonomik dhe gjenerimit të vendeve të reja të punës.

Në pjesën e dytë të akademisë, Prof. Ermal Lubishtani solli një analizë të thelluar mbi rëndësinë e institucioneve në tërheqjen e Investimeve të Huaja Direkte (FDI). Ai theksoi se mungesa e FDI-ve vazhdon të jetë një nga pengesat kryesore për rritjen ekonomike të qëndrueshme në Kosovë, ndërsa vuri në dukje se cilësia e institucioneve – si atyre formale ashtu edhe joformale – është thelbësore për krijimin e një ambienti të besueshëm dhe tërheqës për investitorët ndërkombëtarë.

Akademia Verore do të vazhdojë me sesione të tjera interaktive dhe ligjërata nga profesorë vendorë dhe ndërkombëtarë, duke krijuar një hapësirë për rrjetëzim, shkëmbim idesh dhe ndërtim të kompetencave profesionale për të rinjtë që synojnë karrierë në fushat e ekonomisë, financave, bankave dhe sigurimeve.

Më 1 korrik 2025, në Parkun Inovativ të Prizrenit, u zhvillua ceremonia e shpërndarjes së certifikatave për pjesëmarrësit që përfunduan me sukses nivelin e parë të Shkollës së Ndërmarrësisë – UBT Startup School, organizuar nga UBT dhe Quality Kosova, me mbështetjen financiare të GIZ Gjermane.

Në këtë aktivitet, 24 studentë morën certifikatat e tyre, duke shënuar një hap të rëndësishëm në rrugëtimin e tyre drejt zhvillimit të aftësive ndërmarrëse dhe inovative.

Në emër të UBT-së, një fjalë rasti mbajti Dr. Besnik Skenderi, Drejtor për Produkte dhe Shërbime Profesionale në UBT, i cili theksoi rëndësinë e përkrahjes së të rinjve në ndërtimin e ideve dhe nismave të reja të biznesit.

Në ceremoni mori pjesë edhe Nehat Islami, këshilltar për Bashkëpunim Ekonomik dhe Zhvillim të Sektorit Privat nga GIZ Gjermane, i cili përgëzoi të rinjtë për angazhimin dhe entuziazmin e tyre.

Të pranishëm ishin gjithashtu edhe Dr. Zef Dedaj dhe Dr. Vehbi Sofiu, të cilët përkrahën iniciativën dhe ndanë vlerësime pozitive për nivelin dhe përmbajtjen e trajnimit.

Pjesëmarrësit u shprehën se trajnimi ka qenë shumë i vlefshëm dhe se njohuritë dhe aftësitë e fituara tashmë po i zbatojnë në mënyrë praktike në projektet e tyre personale dhe profesionale.