U zhvillua një takim bilateral ndërmjet Dekanit të Fakultetit të Inxhinierisë Ndërtimore (Ndërtimtari) dhe Infrastrukturë në UBT, profesorit Visar Krelani dhe Drejtorit të Drejtorisë për Investime Kapitale dhe Menaxhim të Kontratave në Komunën e Prishtinës, Krenar Xhaferi, me ç’rast u nënshkrua një marrëveshje bashkëpunimi që synon forcimin e lidhjeve ndërmjet këtyre dy institucioneve.

Marrëveshja e bashkëpunimit ka për qëllim krijimin e mundësive të reja për avancimin e studentëve të Fakultetit të Inxhinierisë Ndërtimore dhe Infrastrukturë në të dyja nivelet e studimit, duke përfshirë ndjekjen e praktikave profesionale në objektet dhe mjediset e punës të menaxhuara nga Drejtoria për Investime Kapitale dhe Menaxhim të Kontratave.

Në këtë takim morën pjesë edhe stafi akademik: Hazir Çadraku, Blertë Retkoceri dhe Driton Ibrahimi.

Përmes këtij bashkëpunimi, do të mundësohet realizimi i aktiviteteve, projekteve dhe nismave të tjera që lidhen me misionin dhe objektivat zhvillimore të të dy institucioneve, duke kontribuar në zhvillimin profesional të studentëve dhe në përmirësimin e infrastrukturës lokale.

Ceremonia e nënshkrimit u shoqërua me diskutime frytdhënëse për zhvillimin e mëtejshëm të bashkëpunimit. Ky hap i rëndësishëm dëshmon përkushtimin e përbashkët të UBT-së dhe Komunës së Prishtinës për investimin në edukim dhe zhvillimin profesional të gjeneratave të reja.

Përmes këtij bashkëpunimi, do të mundësohet realizimi i aktiviteteve, projekteve dhe nismave të tjera që lidhen me misionin dhe objektivat zhvillimore të të dy institucioneve, duke kontribuar në zhvillimin profesional të studentëve dhe në përmirësimin e infrastrukturës lokale.

Ceremonia e nënshkrimit u shoqërua me diskutime frytdhënëse për zhvillimin e mëtejshëm të bashkëpunimit. Ky hap i rëndësishëm dëshmon përkushtimin e përbashkët të UBT-së dhe Komunës së Prishtinës për investimin në edukim dhe zhvillimin profesional të gjeneratave të reja./UBTNews/

Në përmbushje të programit të punës për semestrin dimëror të vitit akademik 2024-2025, studentët e nivelit Master të Departamentit Inxhinieria e Ujërave në UBT morën pjesë në një vizitë studimore të organizuar për modulet Hidrogjeologji dhe Menaxhim i Burimeve Ujore.

Ky aktivitet u realizua si faza e dytë e punës studimore dhe u ndoq nga një grup studentësh të udhëhequr nga profesori Hazir Çadraku, i cili shoqëroi studentët gjatë të gjithë procesit të vizitës dhe ofroi shpjegime të detajuara për temat që lidhen me menaxhimin e burimeve ujore dhe hidrogjeologjinë.

Vizita kishte dy qëllime kryesore: Përmbushja e detyrimeve akademike dhe programore për modulet Hidrogjeologji dhe Menaxhim i Burimeve Ujore, duke integruar njohuritë teorike me praktikat konkrete në terren. Ofrimi i mundësisë për studentët që të njihen drejtpërdrejt me elementet dhe proceset që lidhen me këto fusha, për të krijuar një kuptim të thellë dhe të plotë që mund të ndihmojë në zhvillimin e aftësive të tyre profesionale në fushën e inxhinierisë së ujërave.

Vizita u realizua duke udhëtuar nëpër rrugët rajonale të Dukagjinit, fillimisht nga qyteti i Shtimës, ku u grumbulluan studentët. Pasi u përshëndetën nga profesori Çadraku dhe iu dha një pasqyrë e programit të ditës, grupi nisi lëvizjen për të vizituar disa pika të rëndësishme në pellgun e Lumit Topillë, një nga pikat kyçe të këtij aktiviteti. Gjatë udhëtimit, studentët u ndalën në disa lokacione të rëndësishme për të studiuar fenomenet hidrogjeologjike dhe për të marrë shpjegime nga profesori dhe ekspertë të fushës.

Pikat kryesore të vizitës ishin “Menaxhimi i Pellgut Lumor të Lumit Topillë”, ku studentët morën shpjegime mbi menaxhimin e integruar të burimeve ujore dhe rëndësinë e palëve të interesit për të siguruar një menaxhim të suksesshëm. Profesori Çadraku theksoi rolin e pellgut lumor si njësia elementare për menaxhimin e burimeve dhe ndikimin që ka ai në ruajtjen e ujërave dhe ekosistemit.

“Studimi i formave karstike dhe burimeve ujore”, gjatë vizitës, studentët patën mundësinë të shihnin formacione karstike dhe burime natyrore të ujit, duke mësuar për llojet e shkëmbinjve gëlqerorë dhe rolin e tyre në formimin e burimeve të ujit dhe ndihmën që ato ofrojnë për mbushjen e lumenjve.

“Matja e sasisë së ujit në burime të ndryshme”, ku u realizuan matje të sasisë së ujit në disa burime, përfshirë burimin e Llanishtës dhe Papazit. Studentët mësuan si të matin dhe të interpretojnë kapacitetin e burimeve ujore dhe si kjo mund të aplikohet në projektet e menaxhimit të burimeve ujore.

“Vizita në Bifurkacionin e Lumit Nerodime”, ky fenomen natyror, ku një lum ndahet në dy degë që drenohet në dy dete të ndryshme, ishte një mundësi për studentët që të kuptonin procesin e drenimit të lumenjve dhe ndikimin e tij në menaxhimin e ujërave në rajon.

Gjatë vizitës, studentët kishin mundësinë të shihnin nga afër proceset e natyrshme dhe të ndërvepronin me mjedisin e terrenit për të përforcuar njohuritë e tyre teorike. Ata mësuan për ndikimin e morfologjisë karstike në ruajtjen e ujërave nëntokësore dhe për rolin e llojit të shkëmbinjve në përcaktimin e karakteristikave të ujërave. Ata gjithashtu kuptuan rëndësinë e menaxhimit të burimeve ujore dhe ndikimin që ka ky menaxhim në ruajtjen e ekosistemit dhe sigurinë e furnizimit me ujë për përdorime të ndryshme, duke përfshirë atë për pijet, bujqësinë dhe industrinë.

Përveç teorisë dhe praktikes, kjo vizitë ofroi mundësinë për studentët të përjetonin një diskutim të hapur mbi sfidat dhe mundësitë që lidhen me menaxhimin e burimeve ujore, si dhe për t’u njohur me ekspertë të fushës që ndihmuan në thellimin e kuptimit të tematikës së trajtuar.

Vizita studimore ishte një mundësi e shkëlqyer për studentët për të rritur aftësitë e tyre praktike dhe për të kuptuar më thellë temat dhe parimet që lidhen me Hidrogjeologjinë dhe Menaxhimin e Burimeve Ujore. Sipas profesor Çadrakut, ky aktivitet ka ofruar një kuadër të plotë për studentët që të aplikojnë njohuritë e tyre teorike dhe të zhvillojnë aftësi profesionale për të punuar në këtë fushë.

Përfundimisht, kjo vizitë ka krijuar një mundësi të vlefshme për studentët për të kuptuar se si konceptet teorike të studiuara në mësime janë të lidhura ngushtë me realitetin e menaxhimit të burimeve ujore dhe hidrogjeologjisë në terren, duke i përgatitur ata më mirë për sfidat e ardhshme profesionale./UBTNews/

Instituti i Ballkanologjisë në UBT, në bashkëpunim me Albanian Institute of Cultural Studies, organizoi dhe përfundoi me sukses një workshop dyditor me temë “Memoria kolektive: Burgu i idealit”.

Aktiviteti u zhvillua në ambientet e kampusit të UBT-së në Prishtinë dhe ishte i dedikuar për studentët e universiteteve të ndryshme, duke krijuar një platformë për dialog dhe reflektim mbi historinë dhe kujtesën kolektive.

Në këtë workshop morën pjesë jo vetëm studentët e UBT-së, por edhe ata të Universitetit të Tiranës (UT) dhe Universitetit të Tetovës (UT), duke e bërë këtë aktivitet një ngjarje ndëruniversitare me pjesëmarrje nga tre qendra të rëndësishme akademike shqiptare.

Të ftuarit specialë të këtij workshop-i ishin Emin Sallahu dhe Marti Çuni, të cilët ndanë me studentët përvojat e tyre si ish të burgosur në kohën kur idealet dhe liria e fjalës përballeshin me kufizime dhe represion. Përmes rrëfimeve të tyre personale, ata trajtuan sfidat, perspektivat dhe sakrificat e atyre që kanë përjetuar burgimin për bindjet dhe idealet e tyre. Diskutimet me të ftuarit nxorën në pah rëndësinë e ruajtjes së kujtesës kolektive si një mjet për të mësuar nga e kaluara dhe për të ndërtuar një shoqëri më të drejtë dhe të barabartë.

Ky workshop kishte për qëllim të ndërgjegjësojë studentët mbi rëndësinë e kujtesës kolektive në formësimin e identitetit kombëtar dhe shoqëror. Diskutimet dhe prezantimet u fokusuan në trajtimin e temave si: Roli i kujtesës historike në edukimin e brezave të rinj, përballja me të kaluarën përmes dialogut të hapur dhe reflektimit kritik dhe ndërtimi i një kulture që respekton lirinë dhe të drejtat themelore.

Studentët pjesëmarrës u angazhuan në diskutime aktive, ndanë pikëpamjet e tyre dhe u përfshinë në sesione interaktive, duke përfituar një pasqyrë më të thellë mbi historinë dhe rëndësinë e ruajtjes së saj për të ardhmen.

Workshop-i ishte një shembull i shkëlqyer i bashkëpunimit ndëruniversitar, ku institucionet akademike nga Prishtina, Tirana dhe Tetova u bënë bashkë për të krijuar një hapësirë reflektimi dhe edukimi për studentët e tyre. Kjo iniciativë është një tjetër hap drejt promovimit të dialogut akademik dhe ndarjes së eksperiencave midis universiteteve shqiptare.

Workshop-i u përmbyll me një diskutim të hapur mes studentëve dhe të ftuarve, ku u reflektua mbi rëndësinë e mësimeve të nxjerra nga e kaluara dhe nevojën për të ruajtur kujtesën si një vlerë thelbësore për zhvillimin shoqëror. Ky aktivitet i suksesshëm shënon një hap tjetër të rëndësishëm në misionin e Institutit të Ballkanologjisë të UBT-së për të edukuar dhe ndërgjegjësuar brezat e rinj mbi çështjet me rëndësi të veçantë për shoqërinë tonë./UBTNews/d.e