Një grua ka humbur jetën pasi u sulmua nga vëllai i saj në fshatin Poterq të Klinës.

Sipas Policisë, ngjarja ka ndodhur më 6 shtator, kur i dyshuari, i cili dyshohet se ka probleme të shëndetit mendor, fillimisht i ka vënë flakën krevatit ku ndodhej motra e tij dhe më pas ka sulmuar nënën e tij me një mjet të fortë.

Të dyja viktimat kanë pësuar lëndime të rënda. Ato fillimisht janë dërguar në Spitalin Rajonal të Pejës, ndërsa më pas janë transferuar në QKUK në Prishtinë.

Policia ka njoftuar se më 7 shtator motra e të dyshuarit ka ndërruar jetë si pasojë e plagëve të marra nga zjarri.

I dyshuari është arrestuar dhe, me vendim të prokurorit, i është caktuar masa e ndalimit prej 48 orësh. Për shkak të gjendjes së tij të rënduar psikike, ai është vendosur në repartin e psikiatrisë në Spitalin Rajonal të Pejës, nën përkujdesjen e personelit mjekësor dhe mbikëqyrjen e Policisë./A.K/

Lexoni pesë kuriozitete. Mund të mos i keni ditur:

1.Pemët Akacia në Afrikë komunikojnë me njëra-tjetrën. Kur sulmohen nga kafshët barngrënëse, ato lëshojnë gazra në ajër për të paralajmëruar pemët e tjera që të prodhojnë substanca mbrojtëse.

2.Armadilot njihen për mburojën e tyre shumë të fortë natyrore. Në disa raste është raportuar se predhat kanë devijuar nga lëkura e tyre e fortë, prandaj shpesh thuhet se janë “rezistente ndaj plumbave”.

3.Ujëvarat e Niagarës nuk ngrijnë kurrë plotësisht. Edhe gjatë dimrave ekstremë, sasia e madhe e ujit që rrjedh vazhdimisht e pengon ngrirjen totale.

4.Piramida e Madhe e Gizës është ndërtuar nga rreth 2.3 milionë blloqe guri. Secili prej tyre peshon mesatarisht rreth 2.5 ton, një arritje inxhinierike që vazhdon të mahnisë botën edhe sot.

5.Telefonata e parë nga një telefon mobil u realizua më 3 prill 1973 në New York. Në atë kohë askush nuk e imagjinonte se celularët do të bëheshin pjesë e përditshmërisë sonë.

U.d. e Presidentes së Kosovës, Albulena Haxhiu, ka pranuar letrat kredenciale të ambasadorit të ri të Francës në Kosovë, Jean-François Huchet.

Haxhiu i ka uruar mirëseardhje ambasadorit Huchet dhe sukses në misionin e tij diplomatik, duke theksuar synimin për forcimin e mëtejshëm të marrëdhënieve ndërmjet Kosovës dhe Francës.

Ajo ka vlerësuar mbështetjen e Francës ndaj Kosovës gjatë luftës dhe në procesin e shtetndërtimit, ndërsa ka theksuar se bashkëpunimi mes dy vendeve shtrihet në fusha si politika, ekonomia, siguria, arsimi dhe kultura.

Gjatë takimit është diskutuar edhe për mundësitë e zgjerimit të bashkëpunimit, veçanërisht pas marrëveshjeve të fundit ndërmjet Kosovës dhe Francës.

Haxhiu ka siguruar ambasadorin Huchet për bashkëpunimin e saj në forcimin e mëtejshëm të partneritetit ndërmjet dy vendeve./A.K/

Këshilli Prokurorial i Kosovës (KPK) ka mbajtur sot, nën udhëheqjen e kryesuesit Arian Gashi, takimin e 302-të, ku ka shqyrtuar disa çështje lidhur me funksionimin e sistemit prokurorial.

KPK-ja ka miratuar Mekanizmat e Raportimit vjetor për vitin 2025 për Prokurorinë Themelore në Prishtinë dhe atë në Gjakovë.

Në takim është caktuar prokurori Besnik Jakupi anëtar i Komisionit për Vlerësimin e Performancës së Prokurorëve, ndërsa Besart Mustafa është caktuar anëtar rezervë.

Këshilli ka shfuqizuar edhe një vendim të vitit 2025, përmes të cilit ishte autorizuar caktimi i dy prokurorëve për trajtimin e rasteve të Prokurorisë Speciale.

Po ashtu, KPK-ja ka vendosur të shfuqizojë memorandumet e bashkëpunimit të lidhura ndërmjet Zyrës së Kryeprokurorit të Shtetit, KPK-së dhe organizatave të shoqërisë civile. Sipas KPK-së, format e bashkëpunimit në të ardhmen do të rregullohen përmes një rregulloreje të veçantë.

Për hartimin e kësaj rregulloreje, Komisioni për Çështje Normative, i udhëhequr nga Visar Krasniqi, është autorizuar që procesin ta zhvillojë me urgjencë, në bashkëpunim me mediat dhe organizatat e shoqërisë civile./A.K/