Lajmet

​Prishtina kandidon që të shpallet “Qytet evropian i sportit” për vitin 2024

Komisioni vlerësues evropian, ACES Europe ka qëndruar për dy ditë në Prishtinë.

Published

3 years ago

on

Kryeqyteti i Kosovës, Prishtina edhe zyrtarisht ka kandiduar që të shpallet si “Qytet evropian i sportit” për vitin 2024.

Komisioni vlerësues evropian, ACES Europe ka qëndruar për dy ditë në Prishtinë ku ka inspektuar dhe vlerësuar situatën në lidhje me infrastrukturën sportive dhe qëllimi kryesor i kësaj kandidature është që të gjitha aktivitetet sportive që zhvillohen vitin e ardhshëm në Prishtinë të promovohen edhe nëpër vende të tjera evropiane.

Me këtë rast, kryetari i komunës së Prishtinës, Përparim Rama, tha se kjo kandidaturë nuk është vetëm sa për titull prestigjioz, por edhe për të dëshmuar se Prishtina është vend me gamë të gjerë sportive.

“Kemi paraqitur kandidaturën që Prishtinën tonë të na e pranojnë si njërin nga qytete evropiane të sporteve të vitit 2024. Kjo kandidaturë e Prishtinës nuk është thjeshtë aspiratë për një tjetër titull, ajo përbën një shpalle të hapur dhe është zotim i qartë për të krijuar një qytet që përqafon shëndetin, gjithëpërfshirjen dhe elanin sportiv. Prishtina, zemra e Kosovës, po kalon nëpër një metamorfozë që ndërthur vlerat tona thelbësore me një gamë të gjerë të sporteve e të ngjarjeve sportive…Vizioni ynë për vitin 2024 është dëshmi e përkushtimit tonë të palëkundshëm ndaj të gjitha këtyre idealeve. Rrugëtimi ynë drejt titullit të qytetit evropian të sportit i ka rrënjët te besimi se sportet janë një forcë e pandalshme dhe motor i fuqishëm për lëvizje dhe ndryshime pozitive… Ne e shohim këtë kandidaturë si një hap të rëndësishëm që do të na ndihmojë shumë drejt qëllimit tonë madhor”, tha Rama.

Ndërkohë që anëtari i këtij komisioni vlerësues nga Evropa, Hugo Alonso u shpreh shumë i bindur dhe madje i impresionuar me profilin sportiv që ka parë në Prishtinë dhe se meriton që ta fitojë titullin “Prishtina qytet evropian i sportit”.

“Më duhet të them se Prishtina ka një profil shumë sportiv. Ka një infrastrukturë të jashtëzakonshme sportive. Do të rindërtojë më shumë dhe do ta bëjnë më shumë edhe për shkak të Lojërave Mesdhetare 2030, po flisnim, mendoj dje, për 300 milionë euro investim, ky është investim i madh në objektet sportive. Kanë një përqindje të lartë të njerëzve aktivë në qytet, më shumë se 50% praktikojnë sportin në baza javore dhe ata i kushtojnë, dëgjojeni këtë sepse është shumë e rëndësishme, më shumë se 20% të buxhetit vendor sportit, kur mesatarja në Evropë është rreth dy-tre për qind. Pra, duhet të themi se jemi vërtet të impresionuar me profilin sportiv të qytetit të Prishtinës dhe ata i kanë të gjithë përbërësit për t’u bërë qytet evropian i sportit. Ne do të njoftojmë nëse përfundimisht Prishtina e merr titullin, në fund të javës së ardhshme dhe në rast të fitimit të këtij titulli, do ta marrin flamurin, më 7 dhjetor në Parlamentin Evropian me Komisionerin Evropian në një ceremoni të madhe me rreth 500 komuna të ndryshme nga e gjithë bota”, u shpreh ai.

Ndërsa drejtori i Drejtorisë për Sport në Komunën e Prishtinës, Granit Rugova, theksoi se një prej benefiteve më të mëdha nëse Prishtina e fiton këtë titull, do të jetë promovimi i ngjarjeve sportive edhe në arenën ndërkombëtare.

“Përgatitje për këtë kandidaturë kanë filluar që nga janari i këtij viti. Është përgatitur një draft i cili ka rreth 85 faqe ku janë të detajuara infrastruktura e qytetit, aktivitete, mardhëniet dhe raportet tona me ministri, me federatat dhe me Komitet Olimpik. Gjatë kësaj kohe, nga dita e djeshme kur komiteti vlerësues ishte në Prishtinë, ne kishim takime dhe vizita te klubit i basketbollit Prishtina, tek Pripingi, ishim tek Rilindja, tokëbahçja në Gërmi. Sot ishim edhe tek Federata e Basketbollit, tek Komiteti Olimpik edhe qëllimi i tyre nuk është vetëm t’i inspektojmë apo t’i shohim vetëm klubet profesionale mirëpo t’i shohim edhe hapësirat nëpër lagje, nëpër parqe sepse në fund të fundit sporti është për të gjithë, nuk është vetëm për profesionistët… Benefiti më i madh është promovimi i kryeqytetit, i Prishtinës, i sportit të qytetit edhe në arenën ndërkombëtare”, tha Rugova.

Ndryshe, sa i përket organizimeve ndërkombëtare, Kosova gjithashtu ka fituar të drejtën e organizimit të Lojërave Mesdhetare të vitit 2030.

Related Topics:
Continue Reading

Lajmet

Shiroka Pula mban takimin e parë koordinues me krerët e institucioneve, diskutohet edhe strategjia për Apelin në Hagë

Published

1 hour ago

on

October 15, 2026

By

Presidentja e Kosovës, Justina Shiroka Pula, ka mbajtur sot takimin e parë koordinues me kryetaren e Kuvendit, Albulena Haxhiu, kryeministrin Albin Kurti dhe zëvendëskryeministrin, njëherësh ministrin e Punëve të Jashtme dhe Diasporës, Glauk Konjufca.

Sipas njoftimit për media, në takim u diskutua për zhvillimet e fundit në vend, situatën aktuale dhe çështje të tjera me rëndësi për institucionet e Republikës së Kosovës.

Një nga temat e takimit ishte edhe krijimi i Grupit Punues për Strategji Shtetërore për Apelin në mbështetje të ish-krerëve të Ushtrisë Çlirimtare të Kosovës në Hagë.

Takimi u zhvillua në kuadër të koordinimit të rregullt ndërmjet institucioneve të larta të shtetit./A.K/

Continue Reading

Lajmet

Haradinaj u bën thirrje opozitës për bashkim kundër Qeverisë Kurti

Published

1 hour ago

on

October 15, 2026

By

Deputeti i Aleancës për Ardhmërinë e Kosovës, Ramush Haradinaj, u ka bërë thirrje partive opozitare që të bashkohen kundër qeverisjes së kryeministrit Albin Kurti, duke theksuar se vendit i duhet një opozitë e vërtetë.

Gjatë seancës plenare të Kuvendit të Kosovës, Haradinaj ka akuzuar Qeverinë për korrupsion dhe përçarje, ndërsa ka kërkuar bashkërendim të veprimeve opozitare.

“Lirinë tonë e mbrojmë duke bërë opozitë të vërtetë. Duhet të bashkohemi kundër kësaj qeverisjeje të Kurtit”, ka deklaruar Haradinaj.

Ai ka folur edhe për mbështetjen ndaj ish-krerëve të Ushtrisë Çlirimtare të Kosovës që po gjykohen në Hagë, duke thënë se e përkrah çdo veprim në mbështetje të tyre, por i ka cilësuar si të vonshme vendimet e Qeverisë lidhur me këtë çështje.

Haradinaj ka theksuar se siguria kombëtare e Kosovës mbështetet në sakrificën e UÇK-së dhe në aleancat me Shtetet e Bashkuara të Amerikës dhe NATO-n.

Ai ka paralajmëruar se ruajtja e këtyre aleancave është thelbësore për sigurinë e vendit, duke kritikuar njëkohësisht situatën në të cilën, sipas tij, Kosova ka ardhur të ketë dilema të brendshme për çështje që lidhen me themelet e shtetësisë së saj./A.K/

Continue Reading

Lajmet

Hamza: Na duhet një strategji shtetërore për mbrojtjen e ish-krerëve të UÇK-së në Apel

Published

1 hour ago

on

October 15, 2026

By

Kryetari i Partisë Demokratike të Kosovës, Bedri Hamza, ka deklaruar në Kuvendin e Kosovës se është takuar para dy ditësh me kryeministrin Albin Kurti, ndërsa pas këtyre diskutimeve është miratuar themelimi i grupit punues për hartimin e një strategjie shtetërore për mbështetjen e ish-krerëve të UÇK-së në Hagë në shkallën e Apelit.

Hamza e ka vlerësuar këtë si një hap të mirë, duke theksuar se Kosovës i duhet një strategji e mirëfilltë shtetërore për këtë çështje.

Ai ka folur edhe për ndryshimet në Ligjin për Gjykatën Speciale, duke thënë se ato nuk janë bërë për të kënaqur palë të caktuara, por për të garantuar drejtësi dhe pavarësi.

“Ligjin nuk e kemi bërë për t’u pëlqyer, e kemi bërë për të garantuar drejtësi dhe pavarësi nga ndikimi i çdo pale”, ka deklaruar Hamza.

Kreu i PDK-së ka theksuar se Kuvendi i Kosovës ka të drejtë të hartojë dhe miratojë ligje që i konsideron të rëndësishme për mbrojtjen e vlerave të vendit dhe të Ushtrisë Çlirimtare të Kosovës.

Sipas tij, shqetësimi kryesor duhet të lidhet me trajtimin e ish-krerëve të UÇK-së në Hagë dhe jo me nismat ligjore të Kuvendit.

Hamza ka shprehur gjithashtu besimin se presidentja do ta dekretojë ligjin pa vonesa, pasi, sipas tij, dita e sotme është afati i fundit ligjor për procedimin e tij për dekretim./A.K/

Continue Reading

Lajmet

Nis seanca plenare e Kuvendit

Published

1 hour ago

on

October 15, 2026

By

Kuvendi i Kosovës ka filluar senacen plenare, raporton Ekonomia Online. Në rendin e ditës janë gjithsej shtatë pika, përfshirë përzgjedhjen e anëtarëve të Bordit të Bankës Qendrore të Republikës së Kosovës, formimin e një komisioni ad-hoc për përzgjedhjen e anëtarëve të Bordit të Radiotelevizionit të Kosovës, si dhe shqyrtimin e dytë të një projektligji për luftimin e pastrimit të parave dhe financimit të terrorizmit.

Këto janë pikat e rendit të ditës:

Miratimi i procesverbaleve nga seancat e mëparshme.-Deklarimet jashtë rendit të ditës.-Pyetjet parlamentare.-Përzgjedhja e dy anëtarëve joekzekutivë të Bordit të Bankës Qendrore të Republikës së Kosovës.-Formimi i Komisionit Ad-Hoc për përzgjedhjen e kandidatëve për dy anëtarë nga komuniteti shqiptar, një anëtar nga komuniteti serb dhe një anëtar nga komunitetet joshumicë në Bordin e Radiotelevizionit të Kosovës.-Propozimi i Grupit Parlamentar të Listës Serbe për emërimin e deputetëve në komisionet parlamentare.-Shqyrtimi i dytë i Projektligjit nr. 11/L-017 për ndryshimin dhe plotësimin e Ligjit nr. 05/L-096 për Parandalimin e Pastrimit të Parave dhe Luftimin e Financimit të Terrorizmit./A.K/

Continue Reading

Të kërkuara