Në mbledhjen e sotme të Qeverisë u miratua Ligji për Inspektoratin Qendror të Trashëgimisë Kulturore

Ky ligj synon forcimin e sistemit të mbrojtjes së trashëgimisë kulturore, si dhe rritjen e kapaciteteve inspektuese në terren. Me miratimin e tij, Inspektorati i Trashëgimisë Kulturore ngrihet në nivelin e një agjencie ekzekutive, duke u bërë më funksional dhe më efektiv në ushtrimin e detyrave të veta.

Ky zhvillim përbën një hap konkret drejt mbrojtjes më të mirë të monumenteve kulturore dhe garanton një qasje më të koordinuar ndërmjet institucioneve qendrore dhe lokale, në funksion të ruajtjes dhe promovimit të trashëgimisë kulturore.

Reformat në këtë fushë synojnë forcimin e institucioneve shtetërore dhe ruajtjen e kujtesës historike

Biblioteka Kombëtare e Kosovës do të marrë pjesë për herë të parë në takimin e radhës të rrjetit evropian TRADUKI, i cili do të mbahet në Sarajevë më 20–21 prill 2026.

TRADUKI, i themeluar në vitin 2008, është një rrjet që synon të mbështesë përkthimin, botimin dhe qarkullimin e letërsisë nga vendet e Evropës Juglindore në hapësirën gjermanofolëse dhe më gjerë. Nëpërmjet këtij bashkëpunimi, krijohen ura lidhëse mes autorëve, përkthyesve, botuesve dhe institucioneve kulturore, duke kontribuar në ndërkombëtarizimin e letërsive kombëtare dhe në forcimin e dialogut kulturor evropian.

Pjesëmarrja e Bibliotekës Kombëtare të Kosovës në këtë takim shënon një hap të rëndësishëm drejt integrimit më të thellë në rrjetet kulturore ndërkombëtare. Në këtë kuadër, pranimi i Kosovës si anëtare vëzhguese në TRADUKI përbën një zhvillim domethënës institucional dhe kulturor, duke hapur mundësi të reja për promovimin dhe afirmimin e letërsisë kosovare në skenën ndërkombëtare.

Vetëm edhe pak kohë na ndan nga hapja e edicionit të ri të Bienales së Venecias, një nga ngjarjet më të rëndësishme ndërkombëtare të artit bashkëkohor. Kosova do të prezantohet në pavijonin e saj me ekspozitën “Hard Teeth” të artistit Brilant Milazimi, një projekt që eksploron peizazhe psikologjike mes tensionit, ëndrrës dhe mbijetesës.

Ekspozita, e kuruar nga José Esparza Chong Cuy dhe me komisionere Hana Halilaj nga Galeria Kombëtare e Kosovës, do të hapet më 9 maj 2026 në Chiesa di Santa Maria del Pianto dhe do të qëndrojë e hapur deri më 22 nëntor 2026.

Pjesëmarrja në Bienalen e Venecias përfaqëson një moment të rëndësishëm për prezantimin e artit bashkëkohor dhe krijimtarisë nga Kosova në arenën ndërkombëtare.

Orkestra e Filharmonisë së Kosovës solli dy mbrëmje të veçanta koncertale gjatë fundjavës, të shtunën në Prishtinë – Pallati i Rinisë dhe të dielën – Autostrada Hangar në Prizren, duke ofruar një program të pasur artistik për publikun.

Mbrëmja e së shtunës u hap me veprën “Passacaglia” nga Baki Jashari, e cila u karakterizua nga një atmosferë e thellë emocionale. Më pas u interpretua “Koncerti për dy piano” nga Francis Poulenc, një vepër plot energji dhe virtuozitet, e sjellë me mjeshtëri nga pianistët Patrick O’Byrne dhe Artem Yasynskyy, nën drejtimin e dirigjentit Premil Petrović.Në pjesën e dytë, orkestra interpretoi “Simfoninë nr. 7” të Ludwig van Beethovenit, duke kulmuar mbrëmjen me një paraqitje mbresëlënëse.

Ndërkaq, koncerti i së dielës u mbajt nën drejtimin e Rafet Rudit, duke vazhduar kështu serinë e performancave cilësore të Filharmonisë së Kosovës.