Këngëtarja amerikane Mariah Carey po planifikon rikthimin e turneut të saj të famshëm të Krishtlindjeve në Evropë për herë të parë pas tetë vitesh, ka raportuar “The Sun”.

Sipas burimeve pranë artistes, turneu pritet të përfshijë koncerte në Londër dhe Manchester, ndërsa njoftimi zyrtar pritet të bëhet së shpejti.

Carey ka mbajtur për disa vite koncerte festive kryesisht në Shtetet e Bashkuara, ndërsa fansat evropianë nuk e kanë parë në një turne të tillë që nga viti 2018.

Krahas këngëve të saj ikonike të Krishtlindjeve, këngëtarja 56-vjeçare pritet të sjellë edhe materiale të reja muzikore. Ajo ka bërë të ditur se është rikthyer në studio për regjistrime të reja dhe se është e emocionuar për publikimin e tyre.

Ndërkohë, Carey po përgatit edhe projekte të tjera, përfshirë publikimin e mundshëm të albumit të papublikuar “Someone’s Ugly Daughter” dhe një ribotim special për 25-vjetorin e filmit dhe albumit “Glitter”.

Edhe pse filmi “Glitter” nuk pati sukses në kinema në vitin 2001, kolona zanore e tij ndër vite ka fituar status kult dhe është vlerësuar nga fansat e këngëtares./A.K/

Mary Jo Campbell, e njohur si MJ Shannon dhe nëna e Kris Jenner, ka ndërruar jetë në moshën 91-vjeçare.

Lajmin e bëri të ditur vetë Kris Jenner përmes rrjeteve sociale, duke i kushtuar një mesazh prekës nënës së saj.

“Sot i thamë lamtumirë mamit tim të mrekullueshëm, MJ. Ajo na mësoi se familja është gjithçka, si të duam pa kushte dhe të gjejmë gëzim në momentet e vogla të jetës”, shkroi Jenner.

Shkaku i vdekjes nuk është bërë i ditur.

Mary Jo Campbell ishte një figurë e njohur për publikun falë paraqitjeve të saj në emisionet “Keeping Up with the Kardashians” dhe “The Kardashians”, ku fitoi simpatinë e fansave me humorin dhe këshillat e saj.

Ajo ishte nëna e Kris Jenner dhe Karen Houghton, e cila ndërroi jetë në mars të vitit 2024 në moshën 65-vjeçare.

MJ ishte gjyshja e Kim, Kourtney dhe Khloe Kardashian, si dhe e Kendall dhe Kylie Jenner. Gjatë viteve, ajo u bë një personazh i dashur i familjes Kardashian-Jenner, ndërsa fliste hapur edhe për betejën e saj të suksesshme me kancerin.

Në mesazhin e saj lamtumirës, Kris Jenner shkroi se çdo pjesë e jetës së saj është formësuar nga nëna e saj dhe se gjithmonë është përpjekur të jetojë në një mënyrë që do ta bënte krenare./BBC/A.K/

Anija turistike “Seven Seas Splendor”, e kompanisë Regent Seven Seas Cruises, ka mbërritur për herë të parë në Portin e Durrësit me rreth 650 pasagjerë në bord.

Mbërritja u shënua me ceremoninë tradicionale “Maiden Call”, ku morën pjesë përfaqësues të Autoritetit Portual Durrës dhe kapiteni i portit.

Sipas kryeministrit Edi Rama, përfaqësuesit e kompanisë kanë vlerësuar kushtet dhe facilitetet e ofruara në port. Ndërkohë, këtë sezon risi është imbarkimi nga Porti i Durrësit i 80 pasagjerëve nga vende të ndryshme.

Gjatë qëndrimit në Shqipëri, turistët do të vizitojnë atraksione të njohura si qytetin antik të Durrësit, Kalanë e Krujës dhe Beratin, pjesë e trashëgimisë botërore të UNESCO-s.

Sipas autoriteteve, rritja e numrit të kroçierave që vizitojnë Durrësin tregon zhvillimin e turizmit detar dhe rritjen e interesimit për Shqipërinë si destinacion turistik./A.K/

Aktorja Anne Hathaway ka folur për rikthimin e saj në një film të regjisorit Christopher Nolan, plot 12 vjet pas bashkëpunimit të fundit në “Interstellar”.

Gjatë promovimit të filmit “The Odyssey”, Hathaway tha se Nolan ka mbetur po aq i përkushtuar dhe i përgatitur sa gjithmonë, duke vlerësuar profesionalizmin dhe respektin e tij ndaj ekipit.

“Chris është një njeri jashtëzakonisht i qëndrueshëm. Mënyra se si i qaset punës, përgatitja dhe kujdesi për çdo detaj nuk kanë ndryshuar aspak,” u shpreh aktorja.

Megjithatë, ajo pranoi se ndryshimi më i madh ka ndodhur tek vetja, duke theksuar se është rritur si artiste dhe si njeri që nga bashkëpunimet e tyre në “The Dark Knight Rises” dhe “Interstellar”.

Hathaway e cilësoi atmosferën në sheshet e xhirimit të Nolan si të pakrahasueshme.

“Nuk ka asgjë tjetër si kjo. Të duket sikur po kthehesh në shtëpi, sepse ai është në kulmin e asaj që bën,” tha ajo.

Nga ana e tij, Christopher Nolan u shpreh i lumtur që Hathaway iu bashkua sërish projektit, duke vlerësuar përkushtimin e saj gjatë xhirimeve.

Në filmin “The Odyssey”, Hathaway interpreton Penelopën, ndërsa Matt Damon luan rolin e Odiseut. Aktorja tha se e ndërtoi personazhin duke u fokusuar te dashuria e thellë dhe besnikëria e Penelopës ndaj bashkëshortit të saj.

Sipas saj, historia e çiftit legjendar nuk flet vetëm për pritjen, por për një dashuri të rrallë që i reziston kohës dhe largësisë./A.K/