Gjatë përurimit të punimeve ndërtimore në Parkun Industrial të Përgjithshëm “Drenas 2”, ministrja e Industrisë, Ndërmarrësisë, Tregtisë, Rozeta Hajdari theksoi rëndësinë e përurimit të këtij parku që sipas saj ka për qëllim zgjerimin e hapësirës të drejtë, të adaptueshëm dhe konkurrues dhe me orientim në inovacion.

“Ky park industrial që e kemi përballë parkut industrial 1 është një gëzim dhe për bizneset që kanë nevojë për tu rritur dhe për tu zgjeruar sepse kur filluam me parkun industrial 1.  Për 6 muajt e parë kemi tenderuar 10. 3 milionë euro për parkun industrial në  Lipjan në Rahovec, Mitrovicë, Podujevë dhe presim sa më herët të tenderojmë edhe inkubatorin në Pejë edhe ky po ashtu prej 3.5 milionë euro që është post 10.3 milionë euro dhe presim që sa më shpejt të marrim edhe përgjigjet nga procedurat e OSHP-së…”, tha Hajdari.

Këshilli Prokurorial i Kosovës dhe Zyra e Kryeprokurorit të Shtetit kanë reaguar ndaj deklaratave të ministrit të Financave, Hekuran Murati të bëra dje gjatë ditës.

Në këtë reagim kërkohet që politikanë të jenë të kujdesshëm ndaj deklaratave dhe të mos pengojnë punën e prokurorëve, poashtu është thënë se tendencat e përfaqësuesve të Qeverisë ndaj Prokurorisë do të jenë të dështuara.

“Andaj, tendencat e akterëve të partive politike, përfshirë këtu përfaqësuesit e Qeverisë, të cilët synojnë të minojnë kredibilitetin dhe profesionalizmin e Prokurorisë Speciale, kanë qenë dhe do të jenë të dështuara. KPK dhe ZKPSH mbështesin Prokurorinë Speciale në ushtrimin e funksioneve të saj, përkatësisht në luftën e pakompromis ndaj të gjitha veprave penale që kjo prokurori i ka në kompetencë”, thuhet në reagim.

Derisa një ditë më parë, ministri i Financave, Hekuran Murati duke reaguar ndaj kritikave të opozitës për procedurat e prokurimit të realizuara përmes metodës së negociuar, tha se Prokuroria Speciale po lufton Kurtin dhe jo korrupsionin.

Kryeministri i Republikës së Kosovës, Albin Kurti, bashkë me ministrin e Punëve të Brendshme, Xhelal Sveçla dhe drejtorin e përgjithshëm të Policisë, Gazmend Hoxha, në mëngjesin e sotëm vendosën gurthemelin e nënstacionit policor në fshatin Izvor të Komunës së Zveçanit, dy kilometra larg kufirit me Serbinë.

Sipas një komunikate, vlera e projektit është rreth 700 mijë euro.

“Në këtë nënstacion të ri, që do të ofrojë kushte të përshtatshme të punës për zyrtarët policorë, do të shërbejë policia kufitare, e cila ka në mandat mbrojtjen dhe sigurinë e kufirit dhe parandalimin e aktiviteteve ilegale ndërkufitare. Të premten e javës që lëmë pas, është vënë gurthemeli i nënstacionit policor tek Ura e Lumit Bistricë e po punohet intensivisht në ndërtimin e objektit të Policisë dhe ARC-së në Leshak, ku vumë gurthemelin para një muaji. Të gjitha këto investime po bëhen me qëllim të sigurimit të kushteve të dinjitetshme të punës për policët tanë, të cilët shërbejnë në këtë pjesë dhe ngritjes së kapaciteteve për ofrimin e sigurisë për vendin tonë”, thuhet në njoftim.