Qeveria sllovene rriti këtë javë akcizën për llojet e karburanteve ku Ministria e Financave theksoi qeveria po monitoron nga afër situatën në tregun e produkteve të naftës.

Akciza u rrit për benzinën pa plumb nga 0.49693 euro për litër në 0.50177 euro për litër, për naftën nga 0.43250 euro në 0.45022 euro për litër dhe për vajin e ngrohjes nga 0.167 euro në 0.18676 euro për litër.

Një litër benzinë do të kushtojë 1.443 euro për 14 ditët e ardhshme, duke përfshirë deri më 8 shtator, një litër naftë do të kushtojë 1.465 euro dhe një litër vaj ngrohjeje do të kushtojë 1.063 euro.

Siç theksoi Ministria e Financave, qeveria po monitoron nga afër situatën në tregun e produkteve të naftës dhe, duke rregulluar akcizat, po kërkon një ekuilibër midis ruajtjes së çmimeve të shitjes me pakicë të përballueshme dhe konkurruese dhe sigurimit të qëndrueshmërisë financiare publike, raporton H1 Slovenia.

Marzhet e tregtarëve mund të vazhdojnë të jenë një maksimum prej 0.0983 euro për litër naftë, 0.0994 euro për litër benzinë 95 oktane dhe 0.08 euro për litër naftë për ngrohje.

Që nga qershori, çmimet e karburantit janë rregulluar në të gjitha stacionet e benzinës në të gjithë vendin, si në rrjetin autostradal ashtu edhe jashtë tij.

Me rritjen e marzheve, çmimet e produkteve të naftës llogariten bazuar në një metodologji të bazuar në lëvizjen e çmimeve të produkteve të naftës në tregun botëror dhe lëvizjen e kursit të këmbimit dollar-euro.

Çmimet model llogariten bazuar në mesataret 14-ditore të çmimeve të produkteve minerale të naftës.

/S.K/KP/

Komandanti i misionit të KFOR, Gjeneralmajor Enrico Barduani udhëhequr nga NATO, zhvilloi një vizitë zyrtare në Kampin Bondsteel, ku u prit nga Komandanti i Komandës Rajonale Lindje (RC-E), Kolonel Jonathan Lloyd.

Gjatë vizitës, Barduani mori një informim të detajuar mbi operacionet dhe aktivitetet e përditshme të RC-E, duke u njohur nga afër me përkushtimin dhe profesionalizmin e trupave në terren.

Në kuadër të vizitës, u zhvillua edhe një shfaqje armësh dhe pajisjesh ushtarake, e organizuar nga Garda Skoceze, e cila është e vendosur në Kosovë si pjesë e Forcës Rezervë të NATO-s për qëllime stërvitore.

Kjo ekspozitë ofroi një pasqyrë mbi kapacitetet moderne që KFOR-i ka në dispozicion.

“Profesionalizmi, përkushtimi dhe kompetenca juaj janë thelbësore për misionin tonë,” u shpreh gjeneralmajor Barduani, duke falënderuar personelin për kontributin e tyre në ruajtjen e sigurisë.

KFOR-i bashkëpunon ngushtë me Policinë e Kosovës dhe EULEX-in, në rolet e tyre përkatëse si reagues të sigurisë.

/S.K/KP/

Instruktorët e regjimentit të xhenios nga Forca e Sigurisë së Kosovës janë duke zhvilluar një trajnim të specializuar për ndërtimin e urave ushtarake të tipit “Mabey Johnson” për pjesëtarët e xhenios nga Forcat e Armatosura të Republikës së Shqipërisë (FARSH).

Sipas një njoftimi të FSK-së, ky trajnim po realizohet në kuadër të marrëveshjeve bilaterale ndërmjet FSK-së dhe FARSH-it, që synojnë forcimin e bashkëpunimit në fushat e interesit të përbashkët dhe avancimin e kapaciteteve profesionale dhe operacionale të të dy forcave.

Për të parë nga afër ecurinë e këtij bashkëpunimi, sot trajnimet u vizituan nga atasheu ushtarak i Shqipërisë në Kosovë, kolonel Beqir Tafili, si dhe komandanti i Regjimentit të Xhenios në FSK, OF4 Agron Xhekaj.

/S.K/KP/

Njësiti i Ndërhyrjes së Shpejtë i Policisë kufitare të Kosovës në fshatin Junake të Komunës së Zveçan, ka gjetur në një gyp të fshehura në pyll tri armë.

Lajmin e bëri të ditur zëvendësdrejtori i Policisë në Veri, Veton Elshani, i cili tha se janë gjetur një pushkë gjysëm-automatike, dy pushkë gjuetie dhe fishekë për të njëjtat.

“Njësiti i Hetimeve Rajonale, njësiti për trajtimin e mjeteve eksploduese kanë dal në vend të ngjarjes dhe kanë konfiskuar të njëjtat.

Sipas zyrtarit policor ende nuk ka të dyshuar apo të arrestuar.

/S.K/KP/PK