Botë

Presidenti Biden: SHBA mund t’u dërgojë vaksina vendeve të tjera

Published

4 years ago

April 22, 2021

Betim Gashi

Shtetet e Bashkuara po punojnë për të siguruar vaksina për koronavirusin për vendet e tjera që kanë nevojë të jashtëzakonshme për to, u tha presidenti Joe Biden gazetarëve në Shtëpinë e Bardhë të mërkurën.

Pasi njoftoi se Shtetet e Bashkuara kanë injektuar 200 milionë doza vaksinash kundër COVID-19, presidenti u pyet se si mund të ndihmohen vendet e tjera.

“Kemi filluar përpjekjet për ta bërë një gjë të tillë. Kemi dhënë një sasi. Tani do të shohim se çfarë do të bëjmë me disa nga vaksinat që nuk po i përdorim. Ne duam të garantojmë që t’i dërgojmë ato në mënyrë të sigurt dhe shpresojmë të jemi në gjendje të ndihmojmë venden në gjithë botën”, u përgjigj zoti Biden.

Presidenti tha se e kishte diskutuar këtë temë të mërkurën për rreth gjysmë ore në një telefonatë me kryeministrin kanadez, Justin Trudeau.

“Kemi ndihmuar atje në një farë mase dhe do të përpiqemi të ndihmojmë edhe më shumë disa“, tha zoti Biden. “Por ka edhe vende të tjera, që unë kam besim se mund t’i ndihmojmë, përfshirë në Amerikën Qendrore“.

Megjithatë presidenti tha se “nuk kemi aq sa të mund të themi me siguri se do t’i dërgojmë në këtë moment”.

Administrata e zotit Biden ka investuar 4 miliardë dollarë në programin global të vaksinave COVAX për të ndihmuar me furnizimin e vaksinave në vendet me të ardhura të ulëta dhe të mesme dhe është zotuar t’u dërgojë miliona doza të AstraZenecas, të cilat nuk janë ende të autorizuara për t’u përdorur në Shtetet e Bashkuara, Kanadasë dhe Meksikës fqinje.

Komentet e zotit Biden për ndihmë shtesë për vendet e tjera u bënë pasi ai lexoi një deklaratë të përgatitur ku njoftoi se SHBA kishte realizuar një objektiv që nuk e ka bërë asnjë vend tjetër gjatë pandemisë së koronavirusit dhe as në ndonjë fushatë të mëparshme vaksinimi për viruse: dhënien e 200 milionë dozave brenda 100 ditëve.

“Është një arritje e jashtëzakonshme për vendin“, tha presidenti, duke shtuar se kjo ndodhi në ditën e tij të 92-të në detyrë.

Presidenti gjithashtu bëri thirrje që çdo punëdhënës në SHBA t’u japë punonjësve leje me pagë që ata të mund të vaksinohen.

“Asnjë amerikan që punon nuk duhet të humbasë as edhe një dollar nga pagesa e tyre sepse përmbushin detyrën e tyre patriotike për t’u vaksinuar“, tha ai.

Shumica e kompanive tani mund të “marrin një kredi në taksa kur sigurojnë leje të paguar për secilin punonjës që merr vaksinën dhe për kohën e nevojshme për t’u rimëkëmbur nga vaksina”, njoftoi të mërkurën Departamenti amerikan i Thesarit.

Thirrje për ndihmë

Shtetet e Bashkuara e të tjera vende të pasura janë përballur me kritika ndërkombëtare për blerjen e pjesës më të madhe të sasisë globale të vaksinave kundër COVID-19.

Megjithatë edhe shumë vende të zhvilluara po përjetojnë mungesa dhe i janë lutur Uashingtonit për ndihmë.

Koreja e Jugut beson se duhet të jetë ndër të parat vende që duhet të marrë ndihmë nga aleati i saj i vjetër.

“Ne u kemi theksuar Shteteve të Bashkuara se “një mik që të vjen në ndihmë kur ke nevojë është një mik i vërtetë“, u tha gazetarëve të mërkurën Ministri i Jashtëm i Koresë së Jugut Chung Eui-yong.

Zoti Chung vuri në dukje se gjatë fazës së hershme të pandemisë “nën frymën e aleancës së veçantë mes dy vendeve”, Seuli dërgoi në Shtetet e Bashkuara një numër të madh testesh për koronavirus e maska, megjithë sasitë e kufizuara në vend.

“Ato vende që aktualisht po vaksinojnë të rinjtë, apo personat e shëndetshëm me rrezik të ulët për t’u sëmurur po e bëjnë këtë në kurriz të jetës së punonjësve të shëndetësisë, njerëzve të moshuar dhe grupeve të tjera në rrezik në vendet e tjera“, tha muajin e kaluar Drejtori i Përgjithshëm i Organizatës Botërore të Shëndetësisë Tedros Adhanom Ghebreyesus. Ai fajësoi vendet e pasura për vdekjet e atyre njerëzve me rrezik të lartë ndaj virusit, në vendet me të ardhura të ulëta e të mesme.

Shtetet e Bashkuara kanë mbrojtur qëndrimin e tyre për t’u kujdesur më parë për popullatën në vend, duke theksuar gjithashtu numrin e vdekjeve si pasojë e COVID-19-s, i cili është më i larti krahasuar me çdo vend tjetër në botë.

Sipas Universitetit Johns Hopkins, në Shtetet e Bashkuara prej fillimit të pandemisë deri më tani, kanë vdekur nga koronavirusi më shumë se 568,000 persona, dhe janë infektuar më shumë se 31 milionë amerikanë.

Administrata Biden po përballet gjithashtu me thirrje për t’u bërë presion zhvilluesve dhe prodhuesve të vaksinave që të ndajnë me kompani të tjera informacion mbi teknologjinë, në mënyrë që të prodhohen më shumë vaksina.

Botë

Turqia do të bisedojë me Hamasin për planin amerikan të Gazës

Published

15 hours ago

September 30, 2025

UBTnews

Presidenti turk, Recep Tayyip Erdogan, vlerësoi më parë “përpjekjet dhe lidershipin” e Donald Trump për t’i dhënë fund luftës në Gaza.

Përfaqësuesit turq do të marrin pjesë në diskutimet me delegacionin e Hamasit mbi planin e Presidentit të SHBA-ve Donald Trump për t’i dhënë fund luftës në Gaza, tha një zëdhënës i Ministrisë së Jashtme të Katarit.

Presidenti turk, Recep Tayyip Erdogan, vlerësoi më parë “përpjekjet dhe lidershipin” e Donald Trump për t’i dhënë fund luftës në Gaza, pasi udhëheqësi amerikan siguroi mbështetjen e kryeministrit izraelit Benjamin Netanyahu për një propozim paqeje të sponsorizuar nga SHBA-të.

“Unë përgëzoj përpjekjet dhe lidershipin e presidentit amerikan Donald Trump që synojnë ndalimin e gjakderdhjes në Gaza dhe arritjen e një armëpushimi”, tha Erdogan, i cili u takua me Trump në Shtëpinë e Bardhë për herë të parë në gjashtë vjet javën e kaluar.

Turqia do të vazhdojë të kontribuojë në proces “me qëllim krijimin e një paqeje të drejtë dhe të qëndrueshme të pranueshme për të gjitha palët”, shtoi ai në X.

Një burim nga Ministria e Jashtme turke tha vonë të hënën se ministri i Jashtëm Hakan Fidan kishte diskutuar propozimin e Trump me homologët e Arabisë Saudite, Katarit dhe Jordanisë në një telefonatë./D.B/EO

Botë

Sulmi me dronë rus vret një familje të tërë ukrainase

Published

15 hours ago

September 30, 2025

UBTnews

Një familje e tërë, një çift i martuar dhe dy djemtë e tyre të vegjël janë vrarë në një sulm me dron rus gjatë natës në rajonin verilindor Sumy të Ukrainës, thanë zyrtarët lokalë.

Kreu rajonal Oleh Hryhorov tha se një ndërtesë banimi u godit në fshatin Chernechchyna. Trupat e dy fëmijëve, të moshës katër dhe gjashtë vjeç, dhe të prindërve të tyre u nxorën më vonë nga rrënojat, shkruan BBC.

Forca ajrore e Ukrainës tha se njësitë e saj qëlluan 46 nga 65 dronë rusë në të gjithë vendin – por pati 19 goditje të drejtpërdrejta në gjashtë vende.

Ushtria ruse nuk ka komentuar. Në një deklaratë, tha se 81 dronë ukrainas u shkatërruan gjatë natës në pesë rajone ruse./D.B/KP

Botë

Netanyahu: Tërheqja e Izraelit nga Gaza nuk do të ndodhë

Published

15 hours ago

September 30, 2025

UBTnews

Kryeministri izraelit sulmon kritikët që përpiqen ta ushtrojnë presion mbi të që të tërheqë Forcat Mbrojtëse të Izraelit (IDF) nga Gaza, duke thënë “kjo nuk po ndodh”.

“Ata vazhdojnë të thonë: ‘Ju duhet të pranoni kushtet e Hamasit. Largojini të gjithë. IDF duhet të largohet dhe Hamasi mund të rimëkëmbet dhe madje mund të rehabilitojë Rripin e Gazës“, thotë ai, shkruan BBC.

“Kjo nuk po ndodh”.

Netanyahu shton se Presidenti Trump premtoi mbështetjen e tij të plotë për Izraelin nëse Hamasi do të refuzonte planin e tij prej 20 pikash për paqen në Gaza.

“Përfundoni operacionin ushtarak për të eliminuar Hamasin. Dhe kështu mendoj se nga të gjitha anët ishte një vizitë e shkëlqyer”, thotë Netanyahu.

Një postim i veçantë nga Netanyahu në mediat sociale këtë mëngjes ndan një video të Shtëpisë së Bardhë me klipe të tij dhe Presidentit Trump dje. Në fillim të videos, kryeministri izraelit shihet duke shkruar një shënim në një libër ku lexohet: “Për Presidentin Donald Trump, [Pa dyshim] miku më i madh që Izraeli ka pasur ndonjëherë në Shtëpinë e Bardhë – me shumë mundësi!”/D.B/KP

Botë

Trump vendos tarifa të reja për drurin dhe mobiljet

Published

18 hours ago

September 30, 2025

UBTnews

Presidenti Donald Trump urdhëroi të hënën tarifa të reja të rëndësishme për drurin dhe produktet e ndryshme prej druri, duke përfshirë lëndën drusore të importuar, drurin, dollapët e kuzhinës dhe mobiljet e veshura me tapiceri – duke shtuar potencialisht kostot për ndërtimin e shtëpive dhe mobilimin, të cilat kanë pësuar rritje në çmime në muajt e fundit.

Në një deklaratë, Trump tha se Shtetet e Bashkuara do të fillojnë të vendosin një tarifë prej 10% për drurin e butë dhe drurin e huaj, të përdorur në një gamë të gjerë materialesh ndërtimi. Ai gjithashtu njoftoi një tarifë prej 25% për dollapët e kuzhinës, lavatriçet dhe mobiljet e veshura me tapiceri, shkruan CNN.

Këto tarifa do të hyjnë në fuqi më 14 tetor. Më 1 janar, Trump do ta rrisë tarifën për dollapët në 50% dhe për mobiljet e veshura me tapiceri në 30%. Ai i njoftoi për herë të parë këto tarifa të reja në një postim në Truth Social të enjten.

Në shpallje, Trump tha se tarifat e drurit ishin të nevojshme për të mbështetur industritë lokale të Amerikës dhe për të mbështetur sigurinë kombëtare.

“Sipas gjykimit tim, veprimet në këtë shpallje, ndër të tjera, do të forcojnë zinxhirët e furnizimit, do të rrisin qëndrueshmërinë industriale, do të krijojnë vende pune me cilësi të lartë dhe do të rrisin shfrytëzimin e kapaciteteve vendase për produktet e drurit, në mënyrë që Shtetet e Bashkuara të mund të plotësojnë plotësisht konsumin vendas, duke krijuar gjithashtu përfitime ekonomike përmes rritjes së eksporteve“, shkroi Trump.

Shtëpia e Bardhë në mars urdhëroi Departamentin e Tregtisë të hetojë kërcënimet e mundshme të sigurisë kombëtare që vijnë nga druri i importuar – shumica e të cilit vjen nga Kanadaja. Trump për muaj të tërë ka kritikuar fqinjin verior të Amerikës për eksportet e tij të konsiderueshme të drurit në Shtetet e Bashkuara.

Trump pretendon rregullisht se Shtetet e Bashkuara kanë pemë të mjaftueshme për të mbështetur nevojat e tyre për dru, dhe ai ka kritikuar ashpër tarifat kanadeze për drurin amerikan, duke pretenduar se Amerika mund të bëjë pa drurin kanadez. Në urdhrin e tij ekzekutiv të marsit që vuri në lëvizje hetimin, Trump tha se Shtetet e Bashkuara kanë një “bollëk burimesh druri që janë më se të mjaftueshme për të përmbushur nevojat tona vendase të prodhimit të drurit”./D.B/KP