Sport

Premier League nis një epokë të re,rekord me nëntë trajnerë të rinj në edicionin 2026/27

Published

3 weeks ago

August 4, 2026

UBTNews

Edicioni 2026/2027 i Premier Leagues ende nuk ka filluar, por tashmë ka hyrë në histori. Sipas BBC-së, nëntë klube do ta nisin sezonin me trajner të ri, numri më i madh i ndryshimeve në stolin e skuadrave në javën e parë të kampionatit elitar anglez.

Nga Liverpooli dhe Manchester City, te Chelsea dhe Newcastle United, ndryshimet kanë prekur pothuajse gjysmën e ligës, duke sjellë një pamje krejtësisht të re të skenës së trajnerëve në Premier League.

Nëntë klube, nëntë emra të rinj

Shkalla e ndryshimeve është e jashtëzakonshme. Liverpooli i ka besuar Andoni Iraolas pas largimit të Arne Slot, ndërsa Manchester City ka zgjedhur Enzo Marescën pas dorëheqjes së Pep Guardiolas, trajnerit që solli shumë trofe në “Etihad”.

Chelsea ka emëruar Xabi Alonson pas largimit të Liam Rosenior, ndërsa Bournemouthi ka zgjedhur Marco Rosen si pasues të Iraolas. Nottingham Foresti ka emëruar Oliver Glasnerin pas shkarkimit të Vitor Pereiras.

Crystal Palace i ka dhënë besimin Pierre Sages pas largimit të Glasnerit, Fulhami ka sjellë Alvaro Arbeloan në vend të Marco Silvas, ndërsa Ipswich Town ka emëruar Gary O’Neilin pas dorëheqjes së Kieran McKennas.

Ndryshimi i fundit erdhi te Newcastle United, ku Matthias Jaissle mori drejtimin pas largimit të Eddie Howes.

Kështu, nëntë skuadra do të hyjnë në sezonin e ri me trajner të ri të përhershëm. Rekordi i mëparshëm ishte në edicionin 2016/17, kur tetë klube nisën kampionatin me ndryshime në stol – një sezon që shënoi edhe ardhjen e Pep Guardiolas në Manchester City.

Fundi i një gjenerate

Edicioni i ri i Premier Leagues shënon gjithashtu fundin e një epoke. Për herë të parë që nga sezoni 1985/86, kampionati anglez do të nisë pa asnjërin prej emrave më të mëdhenj të trajningut: Alex Ferguson, Arsene Wenger, Jose Mourinho, Jurgen Klopp apo Pep Guardiola.

Këta trajnerë kanë fituar së bashku 26 nga 34 titujt e Premier Leagues dhe kanë përcaktuar historinë moderne të futbollit anglez.

Ferguson vendosi standardet me dominimin e Manchester Unitedit, Wenger ndryshoi mënyrën e përgatitjes së lojtarëve te Arsenali, Mourinho solli një qasje të re taktike, Klopp transformoi Liverpoolin me futbollin intensiv, ndërsa Guardiola krijoi një nga ekipet më dominuese në historinë e ligës.

Tashmë, Mikel Arteta i Arsenalit është trajneri me qëndrimin më të gjatë në Premier League, pasi mori drejtimin e klubit në dhjetor të vitit 2019.

A sjell ndryshimi sukses?

Ndërrimi i trajnerëve shpesh shoqërohet me të ashtuquajturin “efekti i trajnerit të ri” – një përmirësim i menjëhershëm që vjen nga motivimi i ri, ndryshimet taktike dhe energjia e re brenda skuadrës.

Megjithatë, historia tregon se ndryshimi nuk garanton sukses.

Edicioni i kaluar solli 11 ndryshime trajnerësh, por jo të gjitha skuadrat patën përmirësim. Disa klube vazhduan të përballeshin me probleme, ndërsa të tjera patën rezultate pozitive menjëherë pas ndryshimit.

Shembulli më i mirë ishte Michael Carrick, i cili pati një ndikim të menjëhershëm te Manchester Unitedi, duke siguruar një mesatare prej 2.6 pikësh për ndeshje në pesë xhirot e para.

Megjithatë, studimet tregojnë se cilësia e lojtarëve, investimet dhe struktura e klubit mbeten faktorë më të rëndësishëm për sukses sesa vetëm ndërrimi i trajnerit.

Që nga krijimi i Premier Leagues në vitin 1992, vetëm gjashtë trajnerë kanë arritur ta fitojnë titullin në sezonin e tyre të parë me klubin: Jose Mourinho, Carlo Ancelotti, Manuel Pellegrini, Claudio Ranieri, Antonio Conte dhe së fundmi Arne Slot me Liverpoolin në sezonin 2025/26.

Me kaq shumë ndryshime në stol, Premier League po përgatitet për një sezon të ri plot pikëpyetje. Nëse trajnerët e rinj do të sjellin sukses apo vetëm një tjetër valë ndryshimesh, do ta tregojë koha.

D.L

Sport

Kosova merr pikën e parë historike në volejboll në Lojërat Mesdhetare

Published

13 hours ago

August 25, 2026

UBTNews

Përfaqësuesja e Kosovës në volejboll për meshkuj ka siguruar pikën e parë historike në Lojërat Mesdhetare “Taranto 2026”, në paraqitjen debutuese të volejbollit kosovar në këtë garë.

Dardanët zhvilluan një ndeshje të jashtëzakonshme ndaj Turqisë, njërës prej skuadrave favorite të turneut, duke fituar dy setet e para. Megjithatë, turqit arritën ta përmbysin rezultatin dhe triumfuan 3:2.

Turqi – Kosovë 3:2
21:25, 23:25, 25:15, 25:16, 15:10

Pavarësisht humbjes, Kosova fitoi një pikë të rëndësishme falë dy seteve të fituara dhe regjistroi një moment historik në debutimin e saj në Lojërat Mesdhetare.

Federata e Volejbollit të Kosovës e ka cilësuar këtë rezultat si dëshmi të rritjes së volejbollit kosovar në arenën ndërkombëtare.

Ndeshjen në “PalaMazzola” e ndoqën nga afër drejtues të Komitetit Olimpik të Kosovës dhe Federatës së Volejbollit të Kosovës, të cilët mbështetën nga afër Dardanët.

Kjo ishte një tjetër paraqitje pozitive e volejbollit kosovar në “Taranto 2026”, pas dy fitoreve të regjistruara më herët nga Kombëtarja e Kosovës për femra.

D.L

Sport

Kristjan Asllani drejt largimit nga Interi, interesim nga Al-Jazira

Published

13 hours ago

August 25, 2026

UBTNews

Interi po punon për të reduktuar numrin e lojtarëve në skuadër, ndërsa në mesin e futbollistëve që pritet të largohen është edhe mesfushori shqiptar Kristjan Asllani.

Asllani është rikthyer te Interi pas huazimeve te Torino dhe Besiktas, por nuk bën pjesë në planet e trajnerit Christian Chivu për sezonin e ri.

Sipas raportimeve nga mediat italiane, për 24-vjeçarin ka shfaqur interesim Al-Jazira nga Emiratet e Bashkuara Arabe. Dy klubet tashmë po përpiqen të gjejnë gjuhën e përbashkët për një marrëveshje, ndërsa ende nuk është përcaktuar formula e transferimit.

Mbetet të shihet edhe nëse Asllani do të jetë i gatshëm për të vazhduar karrierën në Emiratet e Bashkuara Arabe. Për mesfushorin shqiptar interesim kishte shfaqur më herët edhe Monza.

Asllani iu bashkua Interit nga Empoli, por gjatë periudhës së tij në Milano e pati të vështirë të siguronte një vend të rregullt në formacion, fillimisht për shkak të konkurrencës me Marcelo Brozović dhe më pas me Hakan Çalhanoğlu.

Në huazimin e fundit te Besiktasi, Asllani zhvilloi 33 ndeshje, duke shënuar dy gola dhe dy asistime.

Sipas raportimeve, Al-Jazira është e gatshme t’i ofrojë një kontratë të leverdishme, ndërsa Interi po synon një transferim të përhershëm të mesfushorit. Zhvillime të reja rreth marrëveshjes priten në orët në vijim.

D.L

Sport

Tottenhami transferon Savinhon nga Manchester City për gati 100 milionë euro

Published

14 hours ago

August 25, 2026

UBTNews

Tottenham Hotspuri ka arritur marrëveshje për transferimin e sulmuesit brazilian Savinho nga Manchester City.

Sipas raportimeve të mediave angleze, marrëveshja kap vlerën e 85 milionë funteve, apo rreth 100 milionë eurove.

Tottenhami do të paguajë fillimisht 75 milionë funte, ndërsa 10 milionë të tjera janë të parapara në formën e bonuseve.

Me këtë transferim, Tottenhamit i është rritur edhe më tej shpenzimi gjatë kësaj vere. Klubi londinez tashmë ka shpenzuar mbi 300 milionë funte, në përpjekje për t’u rikthyer në majat e futbollit anglez.

Sipas “Sky Sports”, 22-vjeçari brazilian te Tottenham do të prezantohet me emrin Savio.

Ndërkohë, për Manchester Cityn, shitja e Savinhos përbën transferimin më të shtrenjtë në dalje në historinë e klubit.

D.L

Sport

Notarët kosovarë garojnë në “Taranto 2026”, Beiqi pranë finales

Published

17 hours ago

August 25, 2026

UBTNews

Notarët kosovarë kanë zhvilluar garat e radhës të martën në Lojërat Mesdhetare “Taranto 2026”, ndërsa paraqitjen më të mirë e pati Hana Beiqi.

Beiqi garoi në disiplinën 50 metra stil i lirë, ku u rendit e 13-ta në kualifikime nga gjithsej 22 notare. Ajo e përfundoi garën me kohën 26.72 sekonda, ndërsa për një vend në finale nevojitej koha 25.89 sekonda. Në finale u kualifikuan tetë notaret më të mira.

Në të njëjtën disiplinë garoi edhe Riga Shala, e cila e përfundoi garën në vendin e fundit, me kohën 28.11 sekonda.

Te meshkujt, në 50 metra stil i lirë garoi Dior Krasniqi. Ai u rendit i 18-ti dhe i fundit nga notarët që morën pjesë, me kohën 24.97 sekonda. Për krahasim, notari i parafundit regjistroi kohën 23.93 sekonda, ndërsa koha e fundit që siguronte kualifikimin në finale ishte 22.73 sekonda.

Ndërkohë, Erina Idrizaj garoi në disiplinën 100 metra shpinë dhe u rendit e nënta nga 11 notare. Ajo regjistroi kohën 1:08.56, ndërsa për finale nevojitej të ishte në mesin e tetë më të mirave. Notarja e fundit që siguroi finalen kishte kohën 1:04.33.

Megjithatë, Idrizaj arriti të lërë pas notare nga Libani dhe Shqipëria.

Paraqitjet e notarëve kosovarë vazhdojnë në ditët në vijim, me synimin për rezultate sa më të mira në “Taranto 2026”.

D.L