Lojtarët dhe trajnerët që kanë kritikuar publikisht gjyqtarët gjatë Kupës së Botës mund të përballen me masa disiplinore dhe gjoba nga FIFA pas përfundimit të turneut.

Sipas një gazetari të The Athletic, të cituar nga mediumi kroat Jutarnji, përzgjedhësi i Anglisë, Thomas Tuchel, ai i Egjiptit, Hossam Hassan, si dhe mbrojtësi i Zvicrës, Manuel Akanji, janë ndër emrat që kanë shprehur kritikat më të ashpra ndaj arbitrimit.

Burime pranë FIFA-s kanë bërë të ditur se organi qeverisës i futbollit botëror nuk dëshiron të komentojë procedurat disiplinore aktuale apo të mundshme. Megjithatë, sipas të njëjtave burime, nuk përjashtohet mundësia që pas përfundimit të Kupës së Botës të ndërmerren masa ndaj atyre që kanë shkelur rregulloret disiplinore.

Vendimi për çdo sanksion do të bazohet në raportet e gjyqtarëve dhe në vlerësimin e rrethanave të secilit rast.

FIFA ka vepruar në mënyrë të ngjashme edhe pas Kupës së Botës në Katar në vitin 2022, kur sanksionoi disa federata për shkelje të ndryshme disiplinore.

D.L

Përfaqësuesja U20 e Kosovës ka regjistruar fitoren e parë në FIBA U20 EuroBasket, Divizioni B, pasi mposhti bindshëm Armeninë me rezultat 86:67, në ndeshjen e katërt të fazës së grupeve.

Dardanët e rinj zhvilluan një paraqitje shumë të mirë gjatë gjithë takimit, duke dominuar në parket dhe duke mos i lënë shumë hapësira kundërshtarit. Loja e organizuar në sulm dhe mbrojtja e fortë i siguruan Kosovës një fitore të merituar.

Më i dalluari në radhët e Kosovës ishte Erolt Rrahmani, i cili e përfundoi ndeshjen me 15 pikë dhe 18 kërcime. Kontribut të rëndësishëm dha edhe Noa Istrefi me 18 pikë, ndërsa Mal Tusuni realizoi “double-double” me 12 pikë dhe 10 kërcime.

Kjo fitore i jep moral dhe vetëbesim ekipit të Kosovës për sfidat e radhës në Kampionatin Evropian U20, Divizioni B.

D.L

Ëndrra e FC Dritës për të vazhduar rrugëtimin në UEFA Champions League mori fund në raundin e parë kualifikues, pasi kampionia e Kosovës u mposht 3:2 nga Kauno Žalgiris në ndeshjen e kthimit, të zhvilluar në stadiumin “Fadil Vokrri”.

Pas barazimit 1:1 në takimin e parë, sfida e kthimit ishte mjaft e luftuar dhe e mbushur me emocione, ndërsa fituesi u vendos vetëm në minutat shtesë, kur mysafirët realizuan golin e fitores nga pika e bardhë.

Kauno Žalgiris kaloi në epërsi në minutën e 9-të me golin e Vykintas Slivka. Drita reagoi shpejt dhe barazoi rezultatin në minutën e 21-të përmes Igball Jasharit. Në pjesën e dytë, Arb Manaj realizoi në minutën e 53-të për t’i dhënë epërsinë kampiones së Kosovës dhe për të rikthyer shpresat për kualifikim.

Megjithatë, skuadra lituaneze nuk u dorëzua. Vykintas Slivka shënoi golin e barazimit në minutën e 82-të, ndërsa në minutën e 94-t, Amine Benchaib u tregua i saktë nga pika e penalltisë, duke vulosur fitoren 3:2 dhe kualifikimin e Kauno Žalgiris në raundin e dytë kualifikues të Ligës së Kampionëve.

Me këtë disfatë, Drita i jep fund rrugëtimit në Champions League dhe tashmë do ta vazhdojë garimin në UEFA Conference League.

D.L

Kampione e Evropës dhe tashmë finaliste e Botërorit 2026. Kombëtarja e Spanjës ka siguruar biletën e madhe për në finalen e Kupës së Botës, pas një fitoreje bindëse dy me zero ndaj Francës të martën mbrëma në Dallas. Spanjollët dominuan plotësisht lojën që nga minuta e parë, duke lënë në hije yjet e Francës si Kylian Mbappe, Ousmane Dembele dhe Michael Olise, të cilët dështuan të gjenin rrugën e rrjetës përballë një Spanje tërësisht superiore.

Rrugën drejt finales e hapi Mikel Oyarzabal në minutën e 22-të, duke u treguar i saktë nga pika e bardhë e penalltisë. Kjo e fundit u sigurua nga talenti Lamine Yamal, i cili u pengua brenda zonës nga Lucas Digne gjatë një tentative për të larguar topin. Ky ishte goli i pestë në këtë kampionat për Oyarzabal, i cili e dërgoi ekipin në pushim me epërsi minimale.

Me të filluar pjesa e dytë, në minutën e 58-të, Pedro Porro vulosi fatin e takimit duke shënuar golin e dytë dhe duke siguruar finalen e parë të Spanjës në një Botëror që nga viti 2010, kur u shpallën kampionë bote.

Në krahun tjetër, kjo humbje shënon një dështim të madh për Francën, e cila humb mundësinë për të luajtur në finalen e saj të tretë radhazi, pas titullit të fituar në vitin 2018 dhe finales dramatike të katër viteve më parë kundër Argjentinës. Pavarësisht eliminimit, ylli francez Kylian Mbappe e mbyll këtë Botëror me tetë gola të shënuar, po aq sa ka realizuar edhe legjenda Lionel Messi. /E.A/