Talentes së skijimit “cross-country” nga Austria, Katharina Engelhardt, i është dashur t’i japë fund karrierës sportive vetëm në moshën 18-vjeçare, pasi përjetoi dy arreste kardiake që e vunë jetën e saj në rrezik.

Sportistja e re zbuloi përmes një postimi në rrjetet sociale se kaloi ditë të vështira në spital, ku u mbajt në komë të shkaktuar nga mjekët për katër ditë.

“Më thanë se kisha pësuar dy arreste kardiake dhe isha në komë të shkaktuar nga mjekësia për katër ditë”, shkroi Engelhardt në Instagram, duke publikuar edhe një fotografi nga shtrati i spitalit.

Për shkak të një miokarditi (inflamacion i muskulit të zemrës), ajo kaloi një javë në repartin e kujdesit intensiv, ndërsa gjendja e saj ishte tejet kritike.

18-vjeçarja tregoi se edhe mjekët kishin pak shpresa për mbijetesën e saj.

“Edhe mjekët e shkëlqyer në Linz menduan se nuk do t’ia dilja. Por gabuan, sepse ia dola”, shkroi ajo, duke falënderuar stafin mjekësor, familjen dhe miqtë për mbështetjen gjatë periudhës më të vështirë të jetës së saj.

Engelhardt konsiderohej një prej talenteve premtuese të skijimit austriak, por problemet serioze shëndetësore e kanë detyruar të tërhiqet përgjithmonë nga sporti garues.

Megjithëse ëndrra e saj sportive ka marrë fund, 18-vjeçarja e ka fituar betejën më të rëndësishme, atë për jetën.

D.L

Legjenda e futbollit brazilian, Ronaldo Nazário, ka lavdëruar paraqitjen e Spanjës në finalen e Kupës së Botës 2026, duke vlerësuar se kampionët e rinj të botës ishin dukshëm superiorë ndaj Argjentinës, pavarësisht fitores minimale 1:0 pas vazhdimeve.

Në një reagim të publikuar në kanalin e tij në TikTok, ish-sulmuesi brazilian tha se rezultati nuk e pasqyroi aspak epërsinë që Spanja tregoi gjatë gjithë takimit.

“Ishte një ditë historike. Spanja dominoi nga fillimi deri në fund, pikërisht ashtu siç e prisja. Golat nuk erdhën aq lehtë sa e meritonin dhe nuk fituan me diferencën që e meritonin, por ishte dominim absolut gjatë gjithë ndeshjes”, deklaroi Ronaldo.

Fituesi i dy Kupave të Botës shkoi edhe më tej në analizën e tij, duke theksuar se dallimi në cilësi mes dy kombëtareve ishte i dukshëm.

“Ishte një shkatërrim. Diferenca në cilësi mes Spanjës dhe Argjentinës është e madhe. Edhe me Messin, nuk arritën t’i bëjnë ballë”, u shpreh ai.

Sipas Ronaldos, triumfi i Spanjës është rezultat i forcës kolektive dhe organizimit të skuadrës, e jo vetëm i individualiteteve.

“Një lojtar i talentuar mund të fitojë një ndeshje, por për të fituar një Kupë Bote të duhet forca e ekipit, siç e ka Spanja. Ata luajnë si një njësi dhe çdo futbollist është i rëndësishëm”, tha ai.

Në fund, ish-ylli brazilian e cilësoi stilin e lojës së Spanjës si standardin e ri të futbollit botëror.

“Argjentina nuk ka luajtur kurrë futboll të bukur, ata vetëm kanë luftuar me shumë karakter. Spanja ka ADN-në e saj të lojës dhe luan futboll të bukur. ‘Joga Bonito’ e Brazilit është tejkaluar dhe mënyra se si luan Spanja është tani më e mira në botë”, përfundoi Ronaldo.

D.L

Portieri legjendar i Meksikës, Guillermo Ochoa, ka njoftuar tërheqjen nga futbolli profesionist, duke i dhënë fund një karriere të jashtëzakonshme që zgjati 22 vjet.

41-vjeçari kishte bërë të ditur më herët largimin nga Kombëtarja e Meksikës, por kishte lënë të hapur mundësinë për të vazhduar të luante në nivel klubesh. Megjithatë, ai ka vendosur t’i japë fund përfundimisht karrierës së tij.

“Kam dhënë çdo gjë. Kam lënë gjithçka në fushë për klubet ku kam luajtur dhe për ekipin kombëtar. Sot i var dorezat e mia”, shkroi Ochoa në mesazhin e tij të lamtumirës.

Ochoa do të mbahet mend si një nga portierët më të mëdhenj në historinë e futbollit meksikan. Ai mori pjesë në gjashtë edicione të Kupës së Botës, një arritje që e ndajnë vetëm Cristiano Ronaldo dhe Lionel Messi. Në Botërorët e Brazilit 2014, Rusisë 2018 dhe Katarit 2022 ai ishte portieri titullar i Meksikës, duke dhuruar paraqitje që mbeten ndër më të mirat në historinë e turneut.

Karrierën e nisi te Club América, ndërsa më pas ndërtoi një rrugëtim të suksesshëm edhe në futbollin evropian, ku mbrojti ngjyrat e Ajaccio, Málaga, Granada, Standard Liège, Salernitana dhe disa klubeve të tjera.

Me pensionimin e Ochoas, futbolli humbet një prej portierëve më karizmatikë dhe më të spikatur të dy dekadave të fundit, i njohur për refleksin e jashtëzakonshëm dhe paraqitjet mbresëlënëse në skenën më të madhe të futbollit botëror.

D.L

Presidenti i Shteteve të Bashkuara të Amerikës, Donald Trump, dëshiron ta shohë presidentin e FIFA-s, Gianni Infantino, në postin e Sekretarit të Përgjithshëm të Kombeve të Bashkuara, raportoi The New York Post, duke cituar burime pranë presidentit amerikan.

Sipas raportimit, marrëdhëniet mes Trumpit dhe Infantinos janë forcuar gjatë bashkëpunimit për organizimin e Kupës së Botës 2026. Burimi i gazetës thotë se Trump e vlerëson lart kreun e FIFA-s, duke besuar se ai “respektohet nga të gjithë në botë” dhe se ka “një aftësi të veçantë për të bashkuar njerëzit”.

Mandati i sekretarit aktual të përgjithshëm të OKB-së, Antonio Guterres, përfundon në fund të dhjetorit dhe zgjedhja e pasuesit të tij pritet të zhvillohet gjatë këtij viti.

Për të marrë këtë detyrë, kandidati duhet të sigurojë fillimisht miratimin e Këshillit të Sigurimit të OKB-së, i përbërë nga 15 anëtarë, ku pesë anëtarët e përhershëm kanë të drejtën e vetos. Më pas, kandidatura duhet të konfirmohet nga Asambleja e Përgjithshme e OKB-së.

Megjithatë, ende nuk është e qartë nëse Infantino është i interesuar të kandidojë për këtë post apo nëse ka zhvilluar bisedime konkrete me Trump lidhur me këtë mundësi.

Sipas The New York Post, presidenti amerikan e sheh Infantinon si një kandidat me potencial të madh, veçanërisht në një garë ku kandidatët e tjerë konsiderohen “relativisht të dobët”, sipas një burimi të cituar nga gazeta amerikane.

D.L