Fisnik Asllani vazhdon të jetë një nga emrat që Barcelona po e monitoron për repartin ofensiv, por një zhvillim tjetër në merkato mund ta komplikojë kalimin e sulmuesit të Hoffenheimit në “Camp Nou”.

Sipas gazetës spanjolle AS, Asllani është një prej alternativave që klubi katalonas po shqyrton në rast se Ferran Torres largohet gjatë kësaj vere. Megjithatë, situata mund të ndryshojë në varësi të lëvizjeve të tjera në treg.

Nëse talenti nga Bregu i Fildishtë, Yan Diomande, përfundon te Real Madridi, atëherë RB Leipzig pritet të rrisë interesimin për transferimin e Asllanit. Klubi gjerman e konsideron sulmuesin kosovar si zëvendësuesin ideal dhe është i gatshëm të veprojë shpejt për ta siguruar shërbimin e tij.

Një kalim i mundshëm i Asllanit te Leipzig do t’ia vështirësonte ndjeshëm Barcelonës realizimin e planeve të saj, pasi klubi spanjoll mund të mbetet pa një nga objektivat kryesorë për zëvendësimin e Ferran Torresit.

Kështu, transferimi i mundshëm i Diomandes te Real Madridi mund të krijojë një efekt domino në merkato, duke ndikuar drejtpërdrejt në të ardhmen e Fisnik Asllanit.

Ndërkohë, për transferimin e Diomandes te Reali kanë mbetur vetëm disa detaje. RB Leipzig kërkon rreth 120 milionë euro si shumë fikse, ndërsa klubi madrilen raportohet se po ofron afërsisht 100 milionë euro plus bonuse.

D.L

Arbitri i njohur slloven i futbollit, Slavko Vinçiq, ka vendosur t’i japë fund karrierës së tij vetëm një javë pasi drejtoi finalen e Kupës së Botës mes Spanjës dhe Argjentinës.

Federata e Futbollit e Sllovenisë ka konfirmuar se Vinçiq është tërhequr nga arbitrimi në moshën 46-vjeçare, duke e mbyllur karrierën në kulmin e saj.

Lamtumira e tij vjen menjëherë pas drejtimit të ndeshjes më prestigjioze në futbollin botëror, finales së Kupës së Botës, një arritje që për shumë arbitra konsiderohet kulmi i karrierës.

Vinçiq u bë arbitër ndërkombëtar në vitin 2010 dhe gjatë viteve ndërtoi një karrierë të jashtëzakonshme. Përveç finales së Botërorit, ai ka drejtuar edhe finalen e Ligës së Kampionëve, si dhe ka qenë pjesë e dy edicioneve të Kupës së Botës dhe disa Kampionateve Evropiane.

Me përvojën dhe paraqitjet e tij në skenën më të madhe të futbollit, Vinçiq largohet nga arbitrimi si një prej gjyqtarëve më të suksesshëm të gjeneratës së tij.

D.L

Granit Xhaka nuk do të largohet nga Sunderlandi këtë verë. Trajneri i skuadrës angleze, Regis Le Bris, ka hedhur poshtë zërat për një transferim të mesfushorit shqiptar te Chelsea, duke theksuar se e ardhmja e tij është në “Stadium of Light”.

Xhaka ishte përfolur si një objektiv i Chelseat, ku trajneri Xabi Alonso synonte të ribashkohej me ish-lojtarin e tij nga koha te Bayer Leverkuseni. Megjithatë, bisedimet mes klubeve nuk prodhuan marrëveshje dhe çështja është mbyllur.

“Nuk ka asgjë të re për Granit Xhakën te Chelsea. Kjo çështje është e mbyllur. Ai ka qenë shumë i qartë për të ardhmen e tij. E do Sunderlandin, dëshiron të qëndrojë këtu dhe të ndërtojë të ardhmen me këtë klub. Është një kapiten i mirë dhe një lider i madh”, deklaroi Le Bris.

Edhe vetë Xhaka konfirmoi se nuk ka ndërmend të ndryshojë skuadër.

“Sunderlandi ka qenë shtëpia ime që nga dita e parë. Të gjithë jemi shumë të lumtur. Kam vendosur të qëndroj aty ku jam. Gjëja më e rëndësishme është familja. Jam gati të bëj histori me këtë klub”, u shpreh mesfushori 33-vjeçar.

Xhaka iu bashkua Sunderlandit verën e kaluar nga Bayer Leverkuseni, duke u rikthyer në Premier League pas periudhës së suksesshme me Arsenalin.

Në sezonin e tij të parë me Sunderlandin, ai zhvilloi 36 ndeshje, shënoi një gol dhe dha një kontribut të rëndësishëm në suksesin e skuadrës, e cila siguroi një vend në Ligën e Evropës për sezonin e ardhshëm.

D.L

Përfaqësuesja e Kosovës U18 në basketboll është shpallur kampione e FIBA U18 EuroBasket 2026, Divizioni C, pasi mposhti bindshëm Andorrën me rezultat 91:49 në finalen e zhvilluar në Shkodër. Me këtë fitore, Dardanët e rinj e mbyllën kampionatin pa asnjë humbje dhe siguruan promovimin në Divizionin B për edicionin e ardhshëm.

Kosova dominoi gjatë gjithë turneut, duke treguar paraqitje të shkëlqyera si në fazën e grupeve ashtu edhe në ndeshjet me eliminim direkt. Triumfi në finale vulosi një sukses të madh për basketbollin kosovar dhe konfirmoi potencialin e gjeneratës së re.

Ky është një moment i rëndësishëm për basketbollin e Kosovës, pasi titulli i kampionit dhe rikthimi në Divizionin B përfaqësojnë një hap të madh përpara në arenën evropiane. Urime Dardanëve për këtë arritje historike!

D.L