Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Suhareka

1 korrik 1993

Përmes Rumanisë emigruan 80 mijë shqiptarë nga Kosova

Gazeta shqiptaro-amerikane “Illyria” transmeton një informatë të agjencisë “Rojter” për numrin e refugjatëve shqiptarë që kaluan nëpër Rumani. Një udhëheqës i rojës kufitare rumune i deklaroi agjencisë Rojter se “gjatë vitit të fundit rreth 80 mijë shqiptarë nga ish-Jugosllavia kaluan vendin kufitar Kalafat në Rumani dhe jam i sigurt se ata tashmë janë diku në vendet e Perëndimit”.

1 korrik 1994

Vërshime me pasoja tragjike në Suharekë dhe rrethinë

Një i vdekur, disa të lënduar dhe dëme të mëdha materiale, ky është epilogu i vërshimeve që gjatë natës së kaluar e përfshinë Suharekën.

Vërshimet filluan diku rreth orës 00,40 në qytetin e Suharekës. Nga reshjet e mëdha lumi dhe përrenjtë e rrjedhat tjera vërshuan nga të gjitha drejtimet.

Nga vërshimet vdiq plaku 75-vjeç Salih Shala, kurse së paku 10 persona të tjerë janë lënduar. Katër prej tyre gjenden të shtrirë në Spitalin e Prizrenit.

Njoftohet për shumë shtëpi të rrënuara dhe rrëzim të rrethojave. Automjete të ndryshme, traktorë dhe multikultivatorë e aparate të ndryshme gjenden të shpërndarë nëpër ara.

Njoftohet se Xhavit Berisha i sëmurë kronik, nën gërmadhat e shtëpisë së rrënuar, u nxor i gjallë pas pesë orësh.

Thuhet se janë shkaktuar dëme të mëdha nga vërshimet dhe breshëri edhe në fshatrat përreth.

Shumë bagëti u përmbytën nga uji, po ashtu ka dëme të mëdha në shumë shitore dhe shtëpi private, sidomos në inventar dhe mobile. Nata që shkoi ishte e rëndë dhe e rrezikshme për banorët e Suharekës. Shumë njerëz kaluan natën në kulme të shtëpive, ndërsa aty ku pati mundësi u bë që gjatë natës evakuimi i qytetarëve. Dega e LDK-së në Suharekë njofton se një numër i madh familjesh kanë mbetur pa kulm mbi krye, pa mbuloja që janë përfshirë nga uji dhe pa bukë për shkak të dëmtimit të sasive të mëdha të miellit dhe të gjërave ushqimore.

Nga Suhareka bëhet thirrje për dërgim të ndihmave ushqimore dhe veshmbathje.

1 korrik 1995

Klintoni ndau 50 milionë dollarë për forcat për intervenim të shpejtë në Bosnjë

Presidenti i SHBA-ve Bill Klinton pa lejen e Kongresit shfrytëzoi mundësinë ligjore që nga buxheti ushtarak i Pentagonit të ndajë 50 milionë dollarë për financimin e forcave për intervenim të shpejtë në Bosnjë.

Ky vendim vlerësohet si manovër me qëllim që forcat e NATO-s për interevenim të shpejtë të arrijnë edhe në Ballkan, sepse, siç shkruan gazeta “Nasha borba”, vehet në dyshim jo vetëm misioni paqësor i OKB-së në Bosnjë, por edhe situata më e gjerë e sigurisë në Ballkan. Gazeta shton se ekziston rreziku që konflikti i tashëm të zgjerohet edhe në Kosovë e Maqedoni, por ekziston edhe mundësia që në fazën përfundimtare të këtij varianti të ndodhë konfrontimi midis Turqisë dhe Greqisë, dy aleatëve të rëndësishëm të krahut juglindor të aleancës së Atlantikut.

1 korrik 1997

Serbët e instaluar plaçkisin në komunën e Malishevës

Ditë më parë, persona të panjohur nga Rahoveci, në emër të udhëheqësve të instaluar të Ndërmarrjeve shoqërore, si “Një Maji” etj. kanë zhvendosur dhe dërguar për në Rahovec trafostacionin e gatshëm, të vendosur tash e disa vite në lagjen “Gërmiza” të Malishevës. njofton KI i Degës së LDK-së në këtë lokalitet.

Ky trafostacion u zhvendos pa paralajmërimin e asnjë organi përgjegjës në Malishevë, madje as të udhëheqjes së Njësisë së “Elektrokosovës”.

Ndërsa, persona të punësuar në ndërmarrjet që i udhëheqin serbët në Rahovec, tentuan para dy ditësh të zhvendosin edhe trafostacionin tjetër të vendosur në oborrin e Gjimnazit “Avdyl Frashëri”, nga i cili, me energji elektrike furnizohet kjo shkollë e mesme, Shtëpia e Shëndetit dhe Qendra për punë Sociale në Malishevë. Vetëm këmbëngulësia e udhëheqjes së këtyre institucioneve bëri që punëtorët e “Një Majit” nga Rahoveci të kthehen mbrapa pa kryer punë.

Është e çuditshme se si organet serbe në komunën e Rahovecit, pas suprimimit të dhunshëm të Kuvendit të Komunës së Malishevës, më 1991, synojnë shkatërrimin e çdo gjëje. Ata së pari me forcë patën plaçkitur tërë inventarin nga objektet shoqërore, nuk lejuan as rojet e objekteve ta kryejnë detyrën, duke i lënë ato në mëshirë të fatit, dhe më pas synuan mbylljen e shkollave të mesme, plaçkitjen dhe konfiskimin e inventarit nga objekti i Gjimnazit të Malishevës.

Punëtorët nga Ndërmarrja ndërtimore “Elan” nga Prizreni, po ashtu gjatë këtyre viteve të okupimit, kanë zhvendosur nga muret e Shtëpisë së Shëndetit në Malishevë edhe radiatorë e pjesë të tjera, të cilat i kishin rregulluar vetë, por që më vonë kishin deklaruar se investuesi, KK i Malishevës, u ka mbetur borxh për kryerjen e këtij objekti të bukur, thuhet në fund të njoftimit.

1 korrik 1998

Në Drenoc të Klinës është vrarë Skender I. Ademi

Skender Imer Ademi (51) nga Drenoci i Klinës u vra më 28 qershor gjatë sulmit serb në këtë fshat. Ai u varros parmbrëmë.

Po këtë ditë, në këtë fshat u plagosën Fidan Rasim Agushi (12), Arben Hamzë Fejza (17) dhe Labinot Ismet Fejza (10).

Në njoftimin e parë për sulmin në Drenoc u tha se janë vrarë dy shqiptarë të tjerë, por lajmi më vonë u tërhoq si i pakonfirmuar.

Sulm i armatosur në Ministrinë e Informimit të Kosovës në Gjenevë

Sot në orën 15:00 dy persona të maskuar e të armatosur me revole zëmbytës kanë tentuar të hyjnë në lokalet e Ministrisë për Informim të Republikës së Kosovës në Gjenevë, në 4 Ruelle des Templiers.

Zoti Naser Berisha, bashkëpunëtor në këtë ministri ka penguar agresorët që të hyjnë në lokale dhe pas një përleshje me ta është plagosur në anën e majtë të belit. Me t’u dëgjuar zhurma, në korridor kanë dalur bashkëpunëtorët e tjerë të ministrisë dhe fqinjët, kështu që agresorët kanë ikur në drejtim të panjohur. Zoti Berisha është dërguar me urgjencë në spitalin kantonal të Gjenevës. Mjekët kanë pohuar se i plagosuri gjendet jashtë rrezikut.

Në njoftimin e Qendrës për Informim të Republikës së Kosovës në Gjenevë thuhet se ky sulm duhet parë në kontekst të situatës së rëndë në Kosovë, si pasojë e operacioneve policore e ushtarake të soldateskës serbe. Shërbimet sekrete serbe kanë një përvojë të gjatë në likuidimin e personaliteteve politike shqiptare në botën e jashtme, siç ka ndodhur në Gjermani dhe në Belgjikë.

Sipas pohimeve të të plagusorit, ky sulm është ndërmarrë me qëllim të likuidimit të Ministrit Shatri, i cili në këtë kohë ishte në vendin e punës.

Zoti Shatri ka qenë në shënjestër të policisë sekrete serbe edhe gjatë vitit 1989, kur në banesën e tij në Gjenevë është hedhur një bombë, thuhet në kumtesën e Qendrës për Informim të Republikës së Kosovës në Gjenevë.

Trupi pa jetë i Ajet Dedincës nuk mund të tërhiqet e të varroset

Trupi pa jetë i Ajet Dedincës (43) nga fshati Lajthishtë i komunës së Obiliqit nuk mund të tërhiqet nga vendi ku është vrarë dhe të varroset, për shkak se në vendin ku gjendet ai nuk mund të depërtohet për shkak të snajperistëve serbë.

Ajet Dedinca, punëtor i Mihjes Sipërfaqësore të thëngjillit në Dobrosellë, u vra të hënën, më 29 qershor, në orët e hershme të mëgjesit, në mes të fshatrave Janovodë dhe Lajthishtë. Në atë kohë ai po kthehej nga vendi i tij i punës, ku atë natë kishte qenë në ndërrimin e natës.

Banorët e fshatit Lajthishtë kërkojnë nga përfaqësuesit e organizatave ndërkombëtare humanitare që gjenden në Kosovë që të ndihmojnë për tërheqjen e trupit pa jetë të Ajetit dhe për varrosjen e tij.

Burimet e informimit në Obiliq njoftojnë se Ajeti është vrarë nga snajperistët e vendosur në kompleksin e termocentralit “Kosova B”. Snajperistët që kanë zënë pozicione në këtë kompleks udhëhiqen nga ushëheqësi i mirëmbajtjes së termocentralit, Rade Popara dhe një refugjat i ardhur nga Knini i Kroacisë me mbiemrin Basara.

Aksionet e forcave serbe në fshatrat e komunës së Obiliqit, të cilat janë sulmuar ditët e fundit, ndihmohen edhe nga serbët e armatosur lokalë nga fshatrat Vodicë e Janovodë dhe nga Obiliqi.

Edhe një arritje e madhe ka shënuar suksesin e stafit akademik të UBT-së në arenën ndërkombëtare.

Profesori i UBT-së, njëherësh Drejtori Ekzekutiv i Asociacionit të Institucioneve Mikrofinanciare të Kosovës (AMIK), Shpresim Vranovci, është nderuar me çmimin prestigjioz “Menaxheri i Vitit 2026”

Ky vlerësim i lartë u nda gjatë një ceremonie madhështore të mbajtur në Sarajevë, të organizuar nga Agjencia Evropiane e Pavarur për Përzgjedhjen dhe Promovimin e Menaxherëve dhe Kompanive më të Suksesshme.

Çmimi, i cili iu dorëzua personalisht nga ish-presidenti i Kroacisë, Stjepan Mesić, u jepet liderëve që kanë dëshmuar rezultate të jashtëzakonshme në zhvillimin ekonomik, menaxhimin institucional dhe promovimin e praktikave më të mira profesionale.

Përtej udhëheqjes së suksesshme të AMIK-ut – ku u vlerësua për avancimin e sektorit mikrofinanciar dhe zgjerimin e përfshirjes financiare në Kosovë – prof. Vranovci luan një rol kyç në përgatitjen e brezave të rinj në UBT. Si profesor në fushat e menaxhimit, financave dhe zhvillimit ekonomik, ai sjell këtë përvojë të nivelit të lartë ndërkombëtar direkt tek studentët.

Ky çmim rikonfirmon modelin e suksesit të UBT-së, ku profesorët nuk janë vetëm teoricientë, por udhëheqës dhe praktikantë të dalluar në sektorët strategjikë të vendit dhe rajonit.

Në ceremoninë ku ishin të pranishëm përfaqësues të shumtë të bizneseve dhe institucioneve publike nga mbarë Evropa Juglindore, u nënvizua se ky çmim është një konfirmim i rëndësishëm për standardet moderne të menaxhimit që po aplikohen në Kosovë.

Për UBT-në, ky rreshtim i radhës i stafit të saj akademik në mesin e liderëve më të rëndësishëm të rajonit, dëshmon përkushtimin e vazhdueshëm të institucionit për të ofruar arsim cilësor të ndërtuar mbi ekspertizën më të lartë profesionale. Suksesi i prof. Shpresim Vranovcit tregon qartë se si ekspertiza që zhvillohet brenda UBT-së po lë gjurmë të qëndrueshme në zhvillimin ekonomik dhe institucional të mbarë rajonit. /E.A/

Foto: Rajoni press

Prishtinë, 1 korrik 2026 – Në Prishtinë ka nisur të mbahet takimi i 7-të i Komitetit të Stabilizim-Asociimit ndërmjet Kosovës dhe Bashkimit Evropian, një nga mekanizmat kryesorë të dialogut institucional në kuadër të Marrëveshjes së Stabilizim-Asociimit.

Takimi u hap nga Kryenegociatori i Kosovës me BE-në, Jeton Zulfaj, dhe Drejtoresha për Ballkanin Perëndimor në Drejtorinë e Përgjithshme të Komisionit Evropian për Zgjerim dhe Fqinjësi Lindore (DG ENEST), Valentina Superti.

Në fokus të diskutimeve ishin zhvillimet politike dhe ekonomike në vend, progresi në përafrimin me standardet e Bashkimit Evropian, si dhe zbatimi i obligimeve që dalin nga MSA-ja. Komiteti shqyrtoi gjithashtu rezultatet e nënkomiteteve sektoriale dhe grupeve të punës në kuadër të dialogut të stabilizim-asociimit.

Nga pala evropiane u theksua rëndësia e institucioneve funksionale dhe vazhdimi i reformave, me fokus të veçantë në sundimin e ligjit, administratën publike, lirinë e shprehjes dhe mbrojtjen e të drejtave themelore dhe të komuniteteve joshumicë. Po ashtu u vlerësuan disa përparime në fusha si ekonomia, digjitalizimi, tatimet, arsimi dhe politikat sociale.

Nga ana e Kosovës u rikonfirmua përkushtimi për thellimin e reformave dhe zbatimin e plotë të obligimeve evropiane, si dhe shfrytëzimi i mundësive që ofron Plani i Rritjes i BE-së për Ballkanin Perëndimor.

Në takim u theksua se rruga evropiane e Kosovës mbetet një proces gjithëpërfshirës, që kërkon bashkëpunim të gjerë institucional dhe konsensus politik, ndërsa Bashkimi Evropian rikonfirmoi mbështetjen e tij për Kosovën si partneri kryesor financiar dhe zhvillimor, me mbi 3.7 miliardë euro të investuara që nga viti 1999./A.K/

Ashtu siç u paralajmërua një ditë më parë, një grup protestuesish janë mbledhur mëngjesin e sotëm përpara ambienteve të Strukturës së Posaçme Antikorrupsion, SPAK në Tiranë.

Në pamjet e siguruara, dëgjohet se si protestuesit po brohorasin në kor thirrje të tilla si “Rama, Rama, SPAK you”. Përmes këtij tubimi, qytetarët e pranishëm kanë vendosur të padisin publikisht atë që e quajnë “The Albanian Files”.

Sipas tyre, “Albanian Files” është libri që përmban projekte që synohet të ndërtohen në Shqipëri dhe kjo do të jetë dosja që do ta çojë kryeministrin Edi Rama në burg.

Aktivistja Sidorela Vatnikaj gjatë fjalës së saj tha se dorëheqja e kryeministrit është kërkesa e panegociueshme e tyre, ndërsa shprehën mbështetje të plotë ndaj SPAK për të hetuar kryeministrin.

“Ne qytetarë të Shqipërisë dhe protestues prej më shumë se 31 ditësh në shesh, jemi sot këtu për të sjellë prova që sipas nesh dëshmon shkeljet më të rënda të kryeministrit. Në këtë libër gjenden 523 projekte të ndryshme. Në këtë libër gjenden dhe mund të lexohen disa prej problemeve më të mëdha të kësaj qeverisjeje. Rama e ka shmangur konsultimin publik. Ligji 21/24 është ligj që është miratuar për shkak të projekteve të ndryshëm që gjenden në këtë libër vite përpara se të ndryshohej ligji. Në të ka pronarë që nuk kanë dijeni për ekzistencën e këtyre projekteve. Ka një konflikt interesi mes kryeministrit, arkitektëve dhe biznesmenëve të ftuar sepse Rama është kryetar i KKT dhe vendos për miratimin e këtyre projekteve. SPAK ka mbështetjen tonë për veprimet e deritanishme. Ne s’jemi këtu për drejtësi popullore, por për shtet të së drejtës ku kryeministri i vendit trajtohet dhe hetohet si gjithë qytetarët e tjerët”, u shpreh Vatnikaj. /Euronews/