Zëvendëskryeministri në detyrë, Besnik Bislimi, ka akuzuar mënyrën se si është trajtuar intervistimi i tij nga Prokuroria lidhur me hetimet për funksionalizimin e fabrikës për nënproduktet shtazore në Drenas.

Bislimi pas intevistimit nga Prokuroria Speciale, ka shkruar në Facebook se ndonëse ishte ftuar në cilësinë e dëshmitarit, intervista njëorëshe e gjysmë nuk përmbante asnjë pyetje që, sipas tij, i drejtohet zakonisht një dëshmitari. Sipas Bislimit, informacionet që ka dhënë mund të ishin siguruar përmes një kërkimi të thjeshtë, pa qenë nevoja për intervistim.

“Sot isha në prokurori i ftuar në cilësinë e dëshmitarit në hetimet e prokurorisë rreth funksionalizimit të fabrikës për nënproduktet shtazore në Drenas. Intervista zgjati diku 1 orë e 30 minuta dhe përgjatë kësaj kohe nuk kishte asnjë pyetje që mund të cilësohet si pyetje drejtuar një dëshmitari. Po ashtu arrita të konfirmoj që të gjitha informacionet që prezantova sot kanë mund të grumbullohen shumë lehtë pa patur nevojë fare për intervistim. Do të kishte mjaftuar një studim minimal për detyrat dhe përgjegjësitë e zëvendëskryeministrit brenda portfolios së integrimeve evropiane dhe një shfletim i shpejtë i raporteve për vendin ndër vite nga Komisioni Evropian”, ka shkruar Bislimi në Facebook.

Bislimi ka shprehur shqetësimin e tij për, siç thotë ai, praninë e portaleve në hyrje të ndërtesës ku është mbajtur intervista, gjë që, sipas tij, nuk ndodh zakonisht kur ftohen dëshmitarë.

“Nisur nga fakti se hyrja e ndërtesës ku u mbajt intervista ishte vërshuar nga portalet, gjë që nuk ndodh më raste të tjera kur ftohen dëshmitarët, dhe nga përvoja e nxjerrjes në media të lajmit për intervistim saktësisht kur po zhvillohej takimi trilateral i dialogut në Bruksel, del i pashmangshëm përfundimi se qëllimi parësor i kësaj interviste ka qenë prodhimi i lajmit medial, ku eksponentë të qeverisë bëhen pjesë e titujve bashkë me termin “skandal”. “Skandal” që origjinën nuk e ka as në Ministri të linjës e as në prokurori, por te eksponentë të medias. Kjo e vendosë prokurorinë në një perspektivë jashtëzakonisht negative karshi përgjegjësive që ka dhe orientimit që ka zgjedhur të ndjekë. Do të ishte me interes të shumëfishtë që kjo qasje të rishikohet”, ka theksuar ai.

Bislimi ishte ftuar në kuadër të hetimeve që lidhen me kontratën për mbetjet nën shtazore, të Ministrisë së Bujqësisë, e drejtuar nga ministri në detyrë Faton Peci.

Prokuroria Speciale ka thënë se Besnik Bislimi u intervistua në cilësinë e dëshmitarit.

Bordi i Drejtorëve të Agjencisë Kosovare të Privatizimit (AKP), ka miratuar një sërë vendimesh për proceset e privatizimit dhe forcimin e funksionimit të brendshëm institucional.

Sipas njoftimit, gjatë kësaj mbledhjeje, Bordi ka miratuar dy rregullore të brendshme: për procedurat e parcelimit të ngastrave kadastrale në pronësi të Ndërmarrjeve Shoqërore (NSh), e cila synon të lehtësojë dhe përshpejtojë procesin e parcelimit, si fazë e domosdoshme për transformimin e pronave dhe përmbylljen e likuidimit të NSh-ve, dhe Rregulloren për Ofruesit e Shërbimeve në procesin e likuidimit të NSh-ve, që përcakton kategoritë dhe profilin e ofruesve të shërbimeve si dhe nivelin e kompensimit të tyre.

“Lidhur me procesin e shitjes së aseteve me tender publik, Bordi shqyrtoi shitjen e Aseteve përmes Likuidimit nr. 72 (SHAL 72) që kishte 79 asete të publikuara, prej të cilave aprovoi 24 asete për shitje. Po ashtu, Bordi miratoi listën e aseteve të parapara për shitje përmes tenderit publik në kuadër të ShAL 74, që përfshin gjithsej 139 njësi. Publikimi i kësaj liste parashihet të bëhet me date 03 korrik 2025”, thuhet në njoftim.

Ndërkaq, sa i përket procesit të shitjtes direkte të aseteve, Bordi ka aprovuar 23 raporte rekomanduese për fillimin e procedurave të shitjes, refuzoj 33 kërkesa për shitje për mungesë të kushteve ligjore, si dhe aprovoi 7 raporte përfundimtare të shitjes sipas kërkesave të palëve të miratuara më herët.

“Ndër të tjera, Bordi ka aprovuar kërkesën e Komunës së Vitisë për rrënimin e një objekti të dëmtuar të NSH “Agromorava” në Viti, i cili përbënte rrezik për sigurinë publike”, thuhet në komunikatë.

Më tej thuhet se Bordi ka miratuar edhe projektbuxhetin e AKP-së për vitin fiskal 2026, rritjen e buxhetit për dy ndërmarrje në likuidim, si dhe ka shqyrtuar mundësitë për ristrukturim të brendshëm të AKP-së, në përputhje me Planin Strategjik dhe volumin e mbetur të punëve.

Po ashtu në përfundim të mbledhjes, Bordi i AKP-së ka vendos që, në bazë të propozimit të Bordit të Ndërmarrjes Shoqërore “Inex Sharr Planina”, të emërojë Sladan Nikolcevic si ushtrues detyre i Drejtorit Menaxhues të kësaj ndërmarrjeje në Brezovicë, deri në përfundimin e procedurës së konkursit zyrtar për këtë pozitë.

Ambasadori i Mbretërisë së Bashkuar në Kosovë, Jonathan Hargreaves, ka theksuar rëndësinë e zgjidhjes së ngërçit politik në vend.

Përmes një njoftimi në Facebook, Hargreaves ka bërë të ditur se ka mirëpritur në Rezidencën Britanike një grup organizatash të shoqërisë civile për të diskutuar gjendjen e demokracisë në vend, shkruan KosovaPress.

Ambasadori Hargreaves ka shprehur mirënjohje për përvojën dhe ekspertizën e OJQ-ve, duke vlerësuar rolin e tyre kyç në nxitjen e llogaridhënies politike.

“Unë e admiroj angazhimin e shoqërisë civile me politikanët e Kosovës për t’i inkurajuar ata që të marrin përgjegjësinë për të zgjidhur këtë ngërç në mënyrë që një Kuvend dhe Qeveri e re të mund të formohet dhe të vazhdojë me biznesin jetik në interes të popullit të Kosovës”, ka shkruar ambasadori britanik në Facebook.

Të martën, ka dështuar për herë të 33-të konstituimi i Kuvendit të Kosovës.

Të gjitha vazhdimet e deritanishme të seancës konstituive kanë dështuar, pasi Lëvizja Vetëvendosje, Guxo e Alternativa nuk kanë arritur të sigurojnë votat e mjaftueshme për zgjedhjen e kryetarit të ri të Kuvendit.

Zëvendëskryeministri në detyrë Besnik Bislimi doli nga prokuroria, ku u intervistua për rastin Peci. Bislimi në përfundim të intervistimit nuk iu përgjigj mediave.

Zëvendëskryeministri në detyrë, Besnik Bislimi, është paraqitur në Prokurorinë Speciale të mërkurën për intervistim lidhur me hetimet rreth dhënies me qira të fabrikës për përpunimin e nënprodukteve shtazore nga Ministria e Bujqësisë.

Ministri në detyrë i Bujqësisë, Faton Peci, e ka përmendur Bislimin për çështjen e funksionalizimit të kësaj fabrike.

Në fund të majit, Prokuroria Speciale urdhëroi bastisje në katër lokacione të ndryshme në Prishtinë e Ferizaj lidhur me dyshimet për keqpërdorim të kontratës për dhënien me qira të këtij impianti. Ministri Peci ishte intervistuar në cilësinë e të dyshuarit. Pos tij, qe intervistuar edhe kryeshefi i Agjencisë së Ushqimit dhe Veterinës, Bekim Hoxha.

Pas intervistimit, Peci pati thënë se ka vepruar në interes të publikut.