Mes tensioneve dhe përplasjeve të deputetëve të pozitës dhe opozitës është zhvilluar raportimi i drejtorit të Policisë së Kosovës, Gazmend Hoxha në Komisionin për Siguri dhe Mbrojtje.
Kryetari i këtij komisioni, Bekë Berisha ka pyetur drejtorin Hoxha për raportimet në media për ndryshimet e bëra tek Njësia e Hetimeve në Polici, lidhur me largimin e shefit të Task Forcës Antikorrupsion, Shemsi Haziri, duke e zëvendësuar këtë të fundit me Betim Berishën, i cili sipas Berishës, ‘vjen nga Konushefci, i cili gjendet shumë afër me fshatin e ministrit të punës së brendshme, Xhelal Sveçla’.
Berisha theksoi se nuk ka pozitë zëvendësdrejtor në atë njësi, dhe sipas tij, është krijuar pozita e veçantë që mos të mbetet në rrugë Haziri. Në këtë rast, Berisha përmendi hetimet ndaj Martin Berishajt.
“Majori Shemsi Haziri kishte qenë tri herë në takime, dy herë në Malin e Zi, dhe një herë në Slloveni për rastin e Martin Berishës. Dhe pas kthimit të majorit nga Mali i Zi, herën e fundit ka ndodhur transferimi. Ky paska qenë pikë kontakti e vetme me hetuesinë e Malit të Zi dhe ky për atë arsye është larguar nga Betimi. Pastaj I keni thënë ju drejtor, ‘ti duhet me u hequr prej këtu’. Nënkuptohet prej presionit politik, në fakt edhe kështu funksionon politika përmes drejtorit. Mirëpo, pse me u hequr ky (Haziri), kur iu paska pas ofruar hetimit dhe pa asnjë arsye. Tash kush është ky Shemsi Haziri, në bazë të strukturës organizative të policisë së Kosovës, nuk ka pozitë zëvendës drejtor, aty ku e keni quar. E ke krijuar pozitën, për me vendos dhe mos me qitë në rrugë, Shemsi Haziri. Me gradë është kapiten. Është shkuar zëvendës drejtor në Antidrogë aty ky është transferuar dhe në asnjë drejtori tjetër nuk paska zëvendësdrejtor”, theksoi Berisha.
Pas këtyre akuzave nga deputeti i AAK-së, deputeti nga partia në pushtet, Enver Dugolli theksoi se qasja e deputetit Berisha është e gabuar, dhe se akuzat ndaj policisë janë të rënda.
“Assesi nuk është në rregull që të keqpërdoret pozicioni i kryetarit të Komisionit, e komisioni ta humb komplet rolin për çka jemi të thirrur. Pra, unë nuk po e di tash momentalisht se a jemi në gjykatë, tashmë ‘prokurori’ por gjykatës nuk po shoh këtu. Po më vjen shumë keq, se e para herë që po ndodhë në Kuvendin e Kosovës kur thirret një institucion kaq i lartë siç është drejtori i policisë, edhe i bëhen këso akuza, që nuk e di edhe prokurori a kishte me qenë në gjendje ta bënte një gjë të tillë me emra mbiemra e dyshime. Po ndihem keq si nënkryetar i Komisionit ndaj drejtorit të policisë për shkak se nuk është detyrë e komisionit të lëshohet në këtë nivel… Nuk është në rregull ne t’i tregojmë drejtorit të policisë edhe si vlerësohen policët. Është lëshuar akuza se po vlerësohen dobët dhe me nota të larta… Me këtë qasje nuk jemi duke i ndihmuar policisë e as atyre emrave që po I përmend ti. Ne jemi në vit të fundit të mandatit, zgjedhjet janë afruar, por jo ta dëmtojmë policinë, kjo nuk është politike e asnjë e partie. Kështu e kemi gjetëm dhe kështu do të duhej të vazhdojmë”, tha ai.
Për deklaratën e Berishes, ka reaguar edhe deputetja nga Vetëvendosje, Shqipe Selimi, e cila kërkoi fjalën, porse fillimisht iu refuzua nga kryetari i këtij komisioni, Bekë Berisha.
“Mos me pengo, jam duke fol. A jam duke e folur unë fjalën. Mbylle pra”…”Raportimi i drejtorit të policisë ka qenë para një muaji dhe nuk kemi pas të marr në email që do të raportonte ai. Ndërsa, ju për gjysmë ore këtu keni bërë akuza duke akuzuar drejtorin e policisë, policinë, dhe ndërhyrjen në punën e policisë. Iu kisha sugjeruar ta bënit një konferencë për shtyp për t’i thënë të gjitha këto shqetësime, e jo ta keqpërdorni në këtë mënyrë me emra dhe mbiemra policinë e Kosovës në këtë mbledhje… Kjo mbledhje nëse vazhdon në këtë mënyrë mund të dështojë, sepse nuk e keni thirr me këtë qëllim që drejtori i policisë, përndryshe do të thërrisnim një mbledhje me dyer të mbyllura edhe i kishim sqaruar të gjitha këto. Nëse tentoni me bërë fushatë, urdhëroni, mirëpo nuk mund të keqpërdoret institucioni i Kuvendit”, deklaroi ai.
Ndërkaq deputeti nga radhët e LDK-së, Anton Quni theksoi se nëse qëndrojnë gjitha këto akuza, duhet të shqetësohet edhe shteti.
“Unë pajtohem me ju, për të gjitha çështjet që ju i ngritët… Nëse këto qëndrojnë, me të vërtet është shqetësuese dhe do të duhej me u shqetësuar edhe kolegët e mi pa marrë parasysh se cilës parti politike i takojnë. Nuk mundemi me kaluar përtej këtyre pretendimeve dhe thjesht me hesht, sepse nëse këto qëndrojnë, nuk është vetëm problem i policisë, por është problem i shoqërisë dhe shtetëror, dhe dikush duhet me u marrë. Pas këtij takimi Prokuroria do të duhej me u marrë, ose për kryetarin për shpifje ose me drejtorin për të gjitha këto zhvillime”, tha ai.
Ndërsa drejtori i Përgjithshëm i Policisë së Kosovës, Gazmend Hoxha, iu përgjigj Berishës duke thënë se nuk ka pasur asnjë largim të asnjë polici përveç majorit Haziri.
“Nga Njësia e Veçantë e Hetimeve nuk ka pasur largime apo transferime të asnjë polici apo të asnjë eprori jashtë Njësisë përveç majorit Shemsi Hazirit, i cili është transferuar në kuadër të reformave që unë kam zbatuar me qellim të arritjes së vizionit dhe objektivave të mia… Ju përmendët disa emra që kanë lëvizur nga kjo Njësi, unë ju garantoj se gjithë këto lëvizje janë bërë me kërkesën e policëve vet. Pra, asnjë polic nuk është larguar nga kjo njësi, as polic as eprorë. Janë katër polic të cilët janë larguar nga njësia, kurse të gjithë kanë bërë kërkesë për me u larguar. Nuk kanë pasur presion, ju garantoj shumica kërkesave kanë qenë për nevojat e tyre personale… Sa i përket asaj që ju theksuat se ‘dikush vjen nga Podujeva, dikush nga Drenica’, unë mendoj se Kosova është e vogël ne me i ndarë në këto lokalitete”, tha ai.
Ndërsa deputeti nga LVV, Mefail Bajqinovci ka pyetur drejtorin e policisë, Hoxha për shkeljet e mundshme në detyrë të Shemsi Hazirit dhe ndërhyrjet e tij në komuna dhe ministri.
“Në reformën e juaj, kam pyetje konkrete, a ka pasur shkelje Shemsi Haziri gjatë punës së vetë dhe a ka pasur shkelje gjatë Covidt 19… A ka familjarë të punësuar Shemsi Haziri gjatë punës së vetë në komuna, në Ministrinë e Shëndetësisë a ka marrë specializime familjarët e tij? A është punësuar dikush në Mitrovicë kur ka qenë duke u hetuar ndërmarrja “Iber Lepenci”, ka pyetur Bajqinovci.
Për këtë, Hoxha tha se nuk ka informacione.
“Nuk kam informacione të tilla”, tha shkurt Hoxha.
Mes tjerash, gjatë raportimit, Hoxha po ashtu ka shprehur shqetësimin e tij lidhur zbehjen e aplikimit të femrave në polici. Sipas tij, ka rënë interesimi i tyre, porse ka shtuar se janë duke punuar në këtë drejtim.
Aktualitet3 months ago
Aktualitet2 months ago
Rajoni2 months ago
Lajmet3 months ago