Brenda një dite, në qytetin e Pejës janë regjistruar dy raste të ndryshme të dhunës në familje, të cilat kanë kërkuar ndërhyrjen e menjëhershme të Policisë së Kosovës.

Rasti i parë ka ndodhur pasditen e së martës, rreth orës 16:50, ku është arrestuar një burrë. Sipas policisë, ai ka sulmuar fizikisht bashkëshorten e tij pas një mosmarrëveshjeje të çastit. Viktima nuk ka pranuar tretman mjekësor dhe, për shkaqe sigurie, është dërguar në strehimore së bashku me fëmijët e saj. I dyshuari, pas intervistimit nga organet e rendit, me vendim të prokurorit është dërguar në mbajtje.

Ndërkaq, rasti i dytë është raportuar më vonë gjatë mbrëmjes, rreth orës 22:10. Një burrë ka njoftuar policinë se pas një mosmarrëveshjeje është sulmuar fizikisht nga njerka e tij. Viktima po ashtu nuk ka pasur nevojë për tretman mjekësor, ndërsa e dyshuara është shoqëruar në stacionin policor. Pas përfundimit të procedurave të intervistimit, prokurori ka vendosur që ajo të lirohet dhe rasti të vazhdojë në procedurë të rregullt. /E.A/

Në raportin 24 orësh të Policisë së Kosovës është raportuar për zhdukjen e një burri në Gjilan.

Rasti është raportuar nga bashkëshortja e personit të zhdukur, e njëjta i ka thënë Policisë se nga data 05.07.2026 është larguar nga shtëpia personi dhe me nuk ka pasur kontakte me familjaret.

Lidhur me rastin, është informuar edhe prokurori, ndërsa njësitet policore janë duke hetuar rastin. /E.A/

Një përleshje fizike mes dy vëllezërve në Prishtinë ka përfunduar me sulm ndaj pjesëtarëve të Policisë së Kosovës dhe arrestimin e të dyshuarve.

Rasti është bërë i ditur përmes raportit 24-orësh të policisë, ku incidenti është iniciuar si “sulm ndaj personit zyrtar”.

Sipas raportit policor, dy të dyshuarit fillimisht janë hasur nga policia duke u rrahur dhe grushtuar me njëri-tjetrin. Me të arritur në vendin e ngjarjes, zyrtarët policorë kanë tentuar t’i qetësojnë dhe t’u japin urdhra, por vëllezërit nuk i kanë përfillur ato. Përkundrazi, të dyshuarit janë kthyer nga policët, duke i sulmuar dhe goditur fizikisht edhe ata.

Si pasojë e përleshjes dhe sulmit, lëndime trupore kanë pësuar si zyrtarët policorë, ashtu edhe vetë të dyshuarit, të cilët kanë pranuar trajtimin e nevojshëm mjekësor.

Me vendim të prokurorit të shtetit, dy vëllezërit – të cilët rezultuan të ishin në gjendje të dehur – janë dërguar në mbajtje për 48 orë. Intervistimi i tyre nga hetuesit pritet të bëhet sapo të këndellen plotësisht nga efekti i alkoolit, ndërsa rasti po vazhdon të hetohet. /E.A/

Dogana e Kosovës ka sekuestruar 29,900 euro dhe mall me natyrë komerciale të padeklaruar gjatë një kontrolli rutinë në Pikën e Kalimit Kufitar në Han të Elezit.

Sipas njoftimit të Doganës, gjatë kontrollit të një automjeti me targa të Maqedonisë së Veriut, zyrtarët doganorë kanë zbuluar mall komercial që nuk ishte deklaruar, si dhe 29,900 euro para të gatshme te drejtuesi i automjetit dhe pasagjeri.

“Gjatë kontrollit fizik të automjetit është konstatuar një sasi malli me natyrë komerciale, e cila nuk ishte deklaruar pranë autoriteteve doganore. Po ashtu, gjatë kontrollit të drejtuesit të automjetit dhe pasagjerit janë gjetur 29,900 euro në para të gatshme, të cilat gjithashtu nuk ishin deklaruar”, thuhet në njoftimin e Doganës.

Autoritetet kanë bërë të ditur se malli, mjetet monetare dhe automjeti janë sekuestruar për zhvillimin e procedurave të mëtejshme ligjore.

Sipas Doganës, ndaj palës do të ndërmerren masat e parapara me ligj, përfshirë konfiskimin e një përqindjeje të mjeteve monetare, sipas vendimit të autoritetit kompetent, si dhe procedurat për kundërvajtje doganore.

Dogana rikujton se çdo person që hyn ose del nga Republika e Kosovës me 10 mijë euro ose më shumë, apo kundërvlerën e tyre në valuta të tjera, është i obliguar t’i deklarojë ato pranë autoriteteve doganore. Mosdeklarimi i tyre përbën shkelje ligjore dhe mund të sjellë masa administrative dhe procedura të tjera ligjore./A.K/