Policia e Kosovës ka arrestuar një person të dyshuar për një grabitje të ndodhur në dhjetor të vitit të kaluar në rrugën “Qamëria” në Pejë.

Sipas njoftimit zyrtar, ngjarja kishte ndodhur më 20 dhjetor 2025, rreth orës 03:30, ku persona të dyshuar kishin hyrë në shtëpinë e viktimës dhe kishin vjedhur një sasi të konsiderueshme parash, stoli ari si dhe një telefon mobil.

Pas hetimeve intensive të Sektorit Rajonal për Hetime, më 6 gusht 2026 është arritur identifikimi dhe arrestimi i njërit prej të dyshuarve.

Me urdhër të Prokurorit të Shtetit, i dyshuari është dërguar në mbajtje për 48 orë, ndërsa hetimet po vazhdojnë nga Sektori Rajonal i Hetimeve pranë Drejtorisë Rajonale të Policisë në Pejë. /E.A/

Dy persona kanë mbetur të lënduar rëndë si pasojë e një rasti të cilin Policia e Kosovës e ka cilësuar si “shkaktim i rrezikut të përgjithshëm”, që ka ndodhur të mërkurën në mbrëmje në Gjilan.

Sipas raportit policor, nga ky rast lëndime të rënda trupore kanë pësuar një grua dhe një burrë. Të lënduarit kanë marrë trajtim mjekësor fillimisht në Spitalin e Gjilanit, ndërsa më pas janë dërguar për trajtim në Qendrën Klinike Universitare të Kosovës.

Në vendin e ngjarjes kanë dalë njësitë përkatëse të Policisë së Kosovës, zjarrfikësit, si dhe prokurori i shtetit, i cili është njoftuar për rastin.

Rrethanat e ngjarjes nuk janë bërë të ditura, ndërsa rasti është duke u hetuar nga organet kompetente.

D.L

Policia e Kosovës ka raportuar disa raste të përdorimit të armëve dhe posedimit të paautorizuar të narkotikëve në rajone të ndryshme të vendit gjatë 24 orëve të fundit, ku janë arrestuar disa persona dhe janë sekuestruar armë, municion e substanca narkotike.

Në Podujevë, pas të shtënave me armë zjarri në një aheng familjar, policia arrestoi një të dyshuar, të cilit i konfiskoi një pistoletë me gas dhe tre fishekë. Pas intervistimit, ai u lirua në procedurë të rregullt.

Një rast i ngjashëm u raportua edhe në Malishevë, ku një person dyshohet se kishte shtënë me armë gjatë një ahengu familjar. Gjatë bastisjes në shtëpinë e tij u gjet një pistoletë me gas, karikator dhe dy gëzhoja. Me vendim të prokurorit, i dyshuari u lirua në procedurë të rregullt. Edhe në Vushtrri, pas të shtënave në një aheng familjar, policia konfiskoi dy pistoleta, njëra prej tyre me gas, si dhe gjashtë gëzhoja. I dyshuari u intervistua dhe më pas u lirua në procedurë të rregullt.

Në Brezovicë, një person u arrestua pasi dyshohet se kishte kanosur me armë zjarri tre persona pas një mosmarrëveshjeje. Gjatë kontrollit, policia i konfiskoi një pistoletë me 18 fishekë, ndërsa me urdhër të prokurorit ai u dërgua në mbajtje.

Sa i përket rasteve që lidhen me narkotikët, në Qendrën e Paraburgimit në Prishtinë, gjatë një kontrolli rutinë, u gjetën 1.2 gramë kokainë, 0.7 gramë ekstazi dhe 32.4 gramë hashash. Substancat u sekuestruan, ndërsa rasti është iniciuar dhe po hetohet.

Në Fushë Kosovë, policia arrestoi dy persona, pasi gjatë kontrollit u gjetën 2.28 gramë kokainë. Gjatë bastisjes në banesën e njërit prej tyre u sekuestruan edhe 2.28 gramë të tjera kokainë, 29.7 gramë heroinë dhe një peshore digjitale. Me vendim të prokurorit, të dyshuarit u dërguan në mbajtje.

Ndërkohë, në rrugën “Luan Haradinaj” në Prishtinë, një shtetas i huaj u arrestua pasi në bagazhin e veturës së tij u gjetën 2.6 gramë marihuanë. Ai u dërgua në mbajtje për 48 orë.

Një tjetër rast u regjistrua në Suharekë, ku katër persona u arrestuan pasi gjatë kontrollit policor u sekuestruan 25.39 gramë marihuanë, një telefon celular, një shufër metalike dhe një pako rizlla. Pas intervistimit, njëri nga të dyshuarit u dërgua në mbajtje, ndërsa tre të tjerët u liruan në procedurë të rregullt.

Policia e Kosovës njoftoi se të gjitha rastet janë duke u trajtuar në koordinim me prokuroritë kompetente.

D.L

Policia e Kosovës ka raportuar pesë raste të dhunës në familje në rajone të ndryshme të vendit gjatë 24 orëve të fundit. Katër persona janë arrestuar, ndërsa në një rast i dyshuari vazhdon të jetë në kërkim.

Në Prishtinë janë raportuar dy raste të dhunës në familje brenda pak orësh. Rasti i parë ka ndodhur pak pas mesnatës, kur një burrë u arrestua nën dyshimin se kishte sulmuar fizikisht bashkëshorten e tij. Viktima refuzoi trajtimin mjekësor, ndërsa me vendim të prokurorit, pas intervistimit, të dyja palët u liruan dhe rasti do të trajtohet në procedurë të rregullt. Ndërkohë,u arrestua një tjetër i dyshuar, i cili dyshohet se sulmoi fizikisht një të mitur dhe ushtroi dhunë psikike ndaj bashkëshortes së tij. Viktima pranoi trajtim mjekësor, ndërsa me urdhër të prokurorit i dyshuari u dërgua në mbajtje.

Në Rahovec, një burrë raportoi se pas një mosmarrëveshjeje familjare, një i afërm e kërcënoi se do t’ia digjte veturën. I dyshuari u arrestua dhe, me vendim të prokurorit, u dërgua në mbajtje.

Ndërkaq, në Gjakovë, një grua raportoi se ishte sulmuar fizikisht nga një burrë më 4 gusht. Si pasojë e dhunës ajo mori trajtim mjekësor. I dyshuari ndodhet në kërkim policor, ndërsa rasti është duke u hetuar në koordinim me prokurorin.

Një tjetër rast u raportua në Mitrovicën e Jugut, ku pas një mosmarrëveshjeje një burrë dyshohet se sulmoi fizikisht një tjetër burrë. Pas konsultimit me prokurorin, i dyshuari u lirua në procedurë të rregullt.

Policia e Kosovës njoftoi se të gjitha rastet janë duke u trajtuar sipas procedurave ligjore.

D.L