Në kuadër të angazhimit të vazhdueshëm të Fakultetit Juridik në UBT për të kombinuar mësimin teorik me përvojën praktike, studentët e lëndës “Procedura Civile e Avancuar”, të udhëhequr nga Prof. Egzona Osmanaj, realizuan një vizitë studimore në Gjykatën Komerciale të Kosovës.

Gjatë vizitës, studentët u pritën nga Kryetari i Gjykatës Komerciale, Mahir Tutuli, i cili i njoftoi me organizimin, kompetencat dhe funksionimin e kësaj gjykate, si dhe me rëndësinë e saj në trajtimin e çështjeve që lidhen me biznesin, investimet dhe marrëdhëniet tregtare.

Një nga momentet më të rëndësishme të vizitës ishte mundësia që studentët të ndjekin nga afër një seancë gjyqësore, duke vëzhguar në praktikë zbatimin e procedurave civile dhe mënyrën e zhvillimit të proceseve gjyqësore. Kjo përvojë u mundësoi atyre të lidhin njohuritë teorike të fituara në auditor me realitetin e sistemit gjyqësor dhe praktikën profesionale.

Vizitat studimore të këtij lloji përbëjnë një pjesë të rëndësishme të metodologjisë së mësimdhënies në Fakultetin Juridik të UBT-së, duke u ofruar studentëve mundësi të drejtpërdrejta për të njohur institucionet e drejtësisë, proceset ligjore dhe sfidat e profesionit juridik.

Prokuroria Themelore në Gjilan ka ndaluar një person të dyshuar për keqpërdorim të pozitës apo autoritetit zyrtar, pas dyshimeve se ka dëmtuar buxhetin e shtetit.

Sipas hetimeve, S.S., i punësuar në Komunën e Kllokotit si zyrtar për kulturë, rini dhe sport, si dhe menaxher i bibliotekës, dyshohet se nga viti 2019 deri në mars të vitit 2026 ka përfituar paga mujore pa u paraqitur fare në vendin e punës dhe pa ushtruar detyrat e tij zyrtare.

Prokuroria thotë se i dyshuari, “me dashje ka keqpërdorur detyrën e tij zyrtare duke mos i përmbushur obligimet e punës”, duke shkaktuar dëm në buxhetin e Republikës së Kosovës në vlerë prej rreth 39 mijë euro. Rasti është zbuluar pas hetimeve dhe aplikimit të masave të veçanta hetimore nga prokuroria në bashkëpunim me njësitet përkatëse.

Nga Prokuroria është bërë e ditur se ndaj të dyshuarit janë duke u zhvilluar hetime të mëtejshme, ndërsa pritet që në afatet ligjore të kërkohet edhe masa e sigurisë në Gjykatën Themelore në Gjilan. “Do të ndërmerren të gjitha veprimet e nevojshme për zbardhjen e plotë të rastit,” thuhet në njoftim.

Në Zonën Industriale të Prishtinës, përballë objektit të Agjencisë së Kosovës për Inteligjencë, është zhvilluar aksioni për rrënimin e një pike të karburanteve në hapësirën ku planifikohet të ndërtohet objekti i ri i Ministrisë së Bujqësisë.

Gjatë ndërhyrjes së policisë është arrestuar kandidati i PDK-së për deputet, Qëndrim Kryeziu, pasi sipas raportimeve dyshohet se nuk ka zbatuar urdhrat e zyrtarëve policorë gjatë zhvillimit të aksionit.

Objekti i rrënuar kishte funksionuar prej vitesh si pikë e karburanteve, ndërsa institucionet kanë paralajmëruar se në atë parcelë do të ndërtohet ndërtesa e re e Ministrisë së Bujqësisë.

NATO ka reaguar ashpër pas incidentit ku një dron rus goditi një zonë të banuar në Rumani, duke theksuar se aleanca do të mbrojë “çdo centimetër” të territorit të vendeve anëtare.

Reagimi erdhi pasi autoritetet rumune konfirmuan se një dron i përdorur gjatë sulmeve ruse ndaj Ukrainës ra në qytetin Galați, pranë kufirit ukrainas, duke plagosur dy persona dhe duke dëmtuar disa apartamente.

Në deklaratën e saj, NATO theksoi se po monitoron nga afër situatën në kufirin lindor të aleancës dhe ritheksoi përkushtimin për mbrojtjen kolektive të vendeve anëtare.

“Ne do të mbrojmë çdo centimetër të territorit aleat”, thuhet në reagimin e NATO-s pas incidentit që ka rritur tensionet në rajon.

Ngjarja konsiderohet si një nga incidentet më serioze që nga nisja e luftës në Ukrainë, pasi është hera e parë që një dron godet një zonë të populluar në territorin rumun dhe shkakton të plagosur.

Rumania, anëtare e NATO-s dhe Bashkimit Evropian, ka ngritur vazhdimisht shqetësime për rrezikun e sulmeve pranë kufirit të saj me Ukrainën, ndërsa aleatët perëndimorë druhen se konflikti mund të përhapet përtej territorit ukrainas.