Një studim i ri ka nxitur debate të shumta mbi ndikimin e platformave të videove të shkurtra, si TikTok, Instagram Reels dhe YouTube Shorts, në shëndetin mendor dhe funksionin e trurit.

Sipas kërkimit, ku morën pjesë 100,000 individë nga mosha të ndryshme, përdorimi i tepruar i platformave lidhet me një ulje të dukshme të aftësisë për t’u përqendruar dhe me vëmendje më të fragmentuar.

Natyra e videove të shpejta krijon një cikël stimulimi të menjëhershëm, duke mësuar trurin të kërkojë përmbajtje të shpejtë dhe të lehtë.

Me kalimin e kohës, kjo ndikon negativisht në aftësinë për të qëndruar i fokusuar në detyra më të gjata, si leximin apo studimin.

Pjesëmarrësit që konsumonin më shumë video të shkurtra raportuan gjumë të çrregullt, nivele më të larta ankthi dhe ndjesi më të theksuara të vetmisë. Ekspertët theksojnë se këto rezultate nuk duhet interpretuar si përfundimtare.

Ata nënvizojnë se është e nevojshme të bëhet më shumë kërkim për të kuptuar nëse videot e shkurtra janë shkaku kryesor i këtyre problemeve apo thjesht një faktor i lidhur me një mënyrë jetese gjithnjë e më të shpejtë dhe të mbingarkuar me informacion.

Rritja e vazhdueshme e popullaritetit të TikTok dhe platformave të ngjashme ngre pyetje për ndikimin e tyre afatgjatë, veçanërisht tek të rinjtë, grupi që është më i ekspozuar ndaj këtij lloji përmbajtjeje. /A.Z/UBT News/

Vetë-disiplina është një nga aftësitë më të rëndësishme për sukses profesional.

Ajo nënkupton kontrollin e impulseve, përqendrimin e qëndrueshëm dhe përkushtimin ndaj qëllimeve, pavarësisht pengesave apo shpërqendrimeve.

Në punë, vetë-disiplina ndihmon të menaxhoni përgjegjësitë, bashkëpunimin me të tjerët dhe procesin e vendimmarrjes. Punonjësit e vetë-disiplinuar janë këmbëngulës, të qëndrueshëm dhe i përfundojnë detyrat me kujdes, duke ruajtur fokusin edhe kur përballen me sfida.

Për ta zhvilluar këtë aftësi, duhet të vlerësoni nivelin tuaj aktual të vetë-disiplinës, duke iu përgjigjur pyetjeve si:

Cilat janë qëllimet që i caktoj vetes çdo ditë?

A po shmang shpërqendrimet që më pengojnë në punë?

A po i përfundoj detyrat në kohë?

Cilat zakone të mira kam krijuar deri tani?

1. Kujtoni rregullat e motivimit

Motivimi është baza e çdo qëllimi. Vendosni objektiva të qarta, angazhohuni për t’i përmbushur. Çdo arritje, sado e vogël, forcon ndjenjën e suksesit e ju nxit të vazhdoni. Mos harroni të shpërbleni veten për përpjekjet dhe rezultatet, krijon cikël pozitiv vetë-motivimi përforcon dëshirën për të qenë më produktiv.

2. Shmangni shpërqendrimet

Vetë-disiplina kërkon praktikë të vazhdueshme. Një mënyrë efektive për ta forcuar është identifikimi dhe eliminimi i shpërqendrimeve që e dëmtojnë fokusin tuaj. Mbani shënim momentet kur shpërqendroheni gjatë punës, qoftë nga telefoni, mesazhet apo rrjetet sociale dhe mendoni mënyra konkrete për t’i kufizuar ato. Kujtoni se ndryshimi i zakoneve kërkon kohë; ndaj, durimi dhe qëndrueshmëria janë çelësi për sukses.

3. Reflektoni para vendimmarrjes

Vendimmarrja është pjesë e pandashme e çdo dite pune. Prandaj, merrni kohën e nevojshme për të analizuar situatat para se të veproni. Durimi e mendimi i qetë para vendimeve ndihmon në zhvillimin e vetë-disiplinës dhe në marrjen e vendimeve më të drejta. /A.Z/UBT News/

Sipas një studimi të fundit, në momentin që ju jeni në makinë duke pritur në radhë jeni totalisht të ekspozuar ndaj shkarkimeve të naftës, gjë që dobëson të menduarit dhe memorien tuaj.

Tymi i motorëve ka sasi të larta të grimcave të blozës dhe përzierja përmban disa elementë kancerogjenë. Megjithëse efekti negativ konsiderohet afatshkurtër, nuk dihet ende nëse ekspozimi afatgjatë ndaj shkarkimit të naftës mund të çojë në dëme të përhershme në tru, siç është sëmundja e Alzheimerit.

Dr.Jodie Gawryluk, profesoreshë e asociuar e psikologjisë në Universitetin e Victoria në British Columbia të Kanadasë thotë se pas të dhënave që janë marrë rezulton se qëndrimi gjatë në makinë në trafik sjell efekte shumë negative në tru.

Ata zbuluan se shkarkimi i naftës redukton aftësinë njohëse, vendimmarrjen dhe shkakton depresion. Të njëjtin efekt dyshohet të ketë dhe ekspozimi ndaj emetimeve të gazit të benzinës apo tymi zjarreve.

Rreziku mendohet të jetë më i madh për njerëzit që jetojnë pranë autostradave dhe rrugëve të ngarkuara. /A.Z/UBT News/