Lajmet

Shumë ngadalë: Për tri javë vetëm 12 mijë vaksinime

Published

on

Afërsisht janë bërë 3 javë prej kur ka nisur vaksinimi kundër COVID-19 në Kosovë, e me 24 mijë doza të vaksinës AstraZeneca që kanë qenë në dispozicion, deri më tani janë vaksinuar vetëm 12 mijë persona. Përkundër që Ministria e Shëndetësisë po vlerëson që ky proces po shkon jashtëzakonisht mirë, ka të tjerë që ndajnë mendim tjetër, madje konsiderojnë që procesi i vaksinimit anti-COVID në Kosovë po shkon ngadalë.

Në një përgjigje për KosovaPress nga Ministria e Shëndetësisë kanë deklaruar se vaksinimi po shkon sipas Planit Shtetëror për Vaksinim. Sipas tyre nuk ka nevojë për nguti.

“Procesi i vaksinimit po shkon krejtësisht sipas Planit Shtetëror të Vaksinimit dhe jashtëzakonisht mirë. Ata që e konsiderojnë të ngadalshëm janë krejt në periferi të ngjarjes dhe sigurisht nuk janë të familjarizuar në detaje me planin e vaksinimit dhe komentojnë sikur Kosova t’i kishte në dispozicion 240 mijë doza, e jo 24 mijë sa i ka. Nuk ka asnjë nguti që procesi të shkojë keq, përderisa administrimi i dozave po bëhet në bashkëpunim me këto grupe. Mbi 12 mijë persona janë vaksinuar, ndërsa brenda pak ditësh kryhet kjo fazë sepse nga nesër nis vaksinimi i personave 75-79 vjeç me sëmundje kronike që janë grupacion më i madh, se ato që janë vaksinuar deri tani”, thuhet në një përgjigjet e Ministrisë së Shëndetësisë.

Vetëm në qendrën kryesore të vaksinimit në sallën “1 Tetori” në Prishtinë, prej 30 marsit kur nisi vaksinimi i profesionistëve shëndetësorë e më pas edhe i personave mbi moshën 80-vjeç e tani kur po ndodh edhe vaksinimi i pacientëve me dializë, në total janë vaksinuar mbi 4 mijë persona.

Kështu ka njoftuar koordinatori i kësaj qendre, Niman Bardhi, i cili tha se plani ka qenë që shpërndarja e dozave të vaksinës anti-COVID në këtë qendër të përfundojë për rreth 1 javë.

Sipas tij, kjo qendër ka kapacitet për të vaksinuar deri në 1 mijë persona në ditë pasi thotë se aktualisht ekipet mjekësore po presin për të vaksinuar kategoritë që janë thirrur për vaksinim.

“Në total në qendrën “1 Tetori” ka kaluar 4 mijë persona të vaksinuar pavarësisht profileve dhe profesioneve që kanë pasur ata. Plani i punës ka qenë shumë dinamik dhe duke marrë parasysh, siç po e shihni këtë hapësirë që ne e kemi në dispozicion, ne kemi qenë të përgatitur gjithmonë për fluksin e njerëzve nga 750 deri në 1 mijë persona në ditë dhe aq ekipe i kemi pasur të gatshme, edhe sikur ta kishim atë fluks brenda një orari zyrtar nga ora 08:00 e deri në 19:30 padyshim që do e përballonim shumë suksesshëm. Sa i përket pjesës së qendrës ku po flasim, ka qenë e paraparë që shumë shpejt të përmbyllet si proces, brenda 5 ose 6 ditësh, por ja që nuk na ndodhi ashtu pa fajin tonë sepse e keni parë që çdo ditë kemi qenë këtu sepse ekipet mjekësore kanë qëndruar duke pritur këtu se kush do vijë të vaksinohet dhe po shohim dhe po shpresojmë që ndoshta vetëdijesohemi dhe ndoshta e përmbyllim sa më shpejt procesin e vaksinimit”, theksoi Bardhi.

Të gjithë procesin e vaksinimit kundër koronavirusit, i cili tash e gati 3 javë ka nisur në Kosovë po e konsideron të ngadalshëm, Besim Kodra nga Shoqata e Pacientëve. Ai thotë se përgatitjet e ekipeve mjekësore nuk kanë munguar.

“E kemi përcjellë procesin e vaksinimit dhe kemi vaksina pak, mirëpo vaksinimi është duke shkuar tepër ngadalë, që rrjedhimisht edhe po të kishim më tepër vaksina me këtë trend nuk do të mund të vaksinonim më shumë qytetarë. Ka një mobilizim mjaft të madh të ekipeve për vaksinim, nuk e di pse ka një trend kaq të ngadalshëm, por ato arsye duhet të dalin në pah dhe të zgjidhen”, theksoi Kodra.

Edhe për specialisten për hulumtime të politikave globale shëndetësore, Hana Xhemajli, procesi i vaksinimit është pak i ngadalshëm. Ajo këtë e arsyeton me faktin se prioritet në këtë fazën e parë të vaksinimit kanë pasur profesionistët shëndetësorë, dhe bartja e tyre ka kaluar me disa ngecje.

Xhemajli thotë se duhet të nisë sa më parë një fushatë vetëdijësuese për vaksinimin, madje kërkon mobilizim më të madh me ardhjen e kontingjenteve të tjera të vaksinave.

“Procesi po shkon pak më ngadalë sesa që është planifikuar, mirëpo për shkak se raundi i parë i vaksinimit është tek stafi mjekësor ardhja e tyre dhe bartja e tyre në sallën ‘1 Tetori’, ka pasur disa ngecje, por në përgjithësi janë duke u vaksinuar njerëzit edhe nëse duhen edhe një javë më shumë se sa që është planifikuar, unë besoj që është në rregull. Apeloj tek të gjithë njerëzit që të vaksinohen sepse rreziku është tejet minimal krahas me benefitet që vijnë nga vaksinimi. Sa më shumë vaksina që vijnë aq më shumë duhet me pas grupe, si mobile, si nëpër lokacione të ndryshme, që duhet të merren me vaksinim besoj që këtë gjë e kanë marrë parasysh sepse me ardhjen e kontingjentit të ri duhet të vaksinohen edhe gjeneratat e tjera të popullsisë”, theksoi ajo.

Kurse Shemsedin Dreshaj, anëtar i Komisionit Parlamentar për Shëndetësi, thotë se nëse vazhdohet me këtë ritëm të vaksinimit, problem do të jetë shpërndarja e vaksinës kur do të kemi doza të mëdha.

“Ka shumë çka për të dëshiruar aty pasi që vërtet na është prolonguar procesi i vaksinimit. Jemi duke punuar me doza të vogla të vaksinimit, kur të na vijnë ato 100 mijë doza si do të veprojmë? Nëse do të vazhdojmë me një tepmo të tillë të shpërndarjes dhe marrjes së vaksinës vërtetë do kemi probleme në distribuimin e saj. Mendoj që Kosova ka kapacitete të rrisë kapacitetin e vaksinimit në vend dhe që të jemi më efikas në mbrojtje të qytetarëve. Është e hartuar strategjia lidhur me numrin e ekipeve të cilat do të punojnë në terren qoftë në nivel të kryeqytetit apo në nivel të shtetëror, ka shumëçka që mund të përshpejtohet aty ne procesin e marrjes së vaksinës”, tha Dreshaj.

Më 28 mars Kosova i ka pranuar 24 mijë dozat e para të vaksinës kundër COVID-19. Këto doza të vaksinës AstraZenenca u dhuruan si donacion për qytetarët e Kosovës nga COVAX-i. E ata që kishin prioritet për t’u vaksinuar ishin profesionistët shëndetësorë, më pas qytetarët mbi moshën 80-vjeç dhe ata me sëmundje kronike. I pari që e mori dozën e vaksinës AstraZenenca ishte kryeministri i Kosovës, Albin Kurti. 

Lajmet

​Flet drejtori i KH Rahovecit: Vendimi për të na përjashtuar nga palestra i pakuptimtë

Published

on

Klubi i hendbollit Rahoveci ka njoftuar se të dyja ndeshjet ndaj ekipit nga Luksemburgu, Dudelange, në kuadër të garave evropiane, do të zhvillohen në Luksemburg.

Shkak për këtë është bërë fakti se palestra Mizahir Isma në Rahovec, për shkak të zgjedhjeve, kalon nga nesër në menaxhim të KQZ-së dhe rrjedhimisht nuk mund të shfrytëzohet për ndeshje sportive.

Drejtori Sportiv i këtij klubi, Afrim Deliu, thotë se vendimi për t’i përjashtuar klubet nga palestrat është krejtësisht i pakuptueshëm.

“Sigurisht që është problematike, tereni është një lojtar shtesë në fushë, ajo nuk diskutohet por përveç kësaj janë edhe shumë probleme të tjera sepse palestra kalon në menaxhimin e KQZ-s nga nesër dhe përveç tereni që duhet të zhvillohet ndeshja jashtë, ne e kemi problem edhe stërvitjet t’i vazhdojmë. DO të thitë është shumë problem kjo pjesa dhe sinqerisht nuk e kuptoj se si mund të merret një vendim që palestra të lirohen nga klubet ose të mos kenë mundësi t’i zhvillojnë stërvitjet. Pra përveç lojës, problem tjetër shumë i madh është edhe stërvitjet ku do t’i zhvillojmë”, tha Deliu.

Ai ka shtuar se me këtë problematikë përballen sa herë që në Kosovë ka zgjedhje.

“Edhe në zgjedhjet e kaluara ka qenë i njëjti problem dhe e kemi ditur që nuk ka mundësi të arrihet asgjë nga kjo marrëveshje dhe menjëherë kemi kontaktuar me ekipin kundërshtar dhe kemi kërkuar që t’i zhvillojmë dy ndeshjet sepse e dimë që kjo nuk mund të realizohet, nuk është problem vetëm Rahoveci por e gjithë Kosova…Nuk është se kemi tentuar të shkojmë edhe ne KQZ direkt por e kemi ditur se është e pamundur sepse jo vetëm për Rahovecin por edhe për të gjitha klubet tjera ka qenë e pamundur”, shtoi Deliu.

Përveç hendbollit, me telashe të njëjta po përballet edhe sporti i volejbollit dhe ai i basketbollit./S.K/KP/

Continue Reading

Lajmet

​Bashkimi kërkon suksesin historik në Evropë

Published

on

Bashkimi pas fitores shumë të rëndësishme përballë Anwil-it kërkon për herë të parë të jetë pjesë e grupeve në FIBA Europe Cup.

Për të arritur suksesin historik për klubin më të vjetër në Kosovë, prizrenasit duhet të ruajnë epërsinë e pikëve nga fitorja e parë.

Sfida në Prizren përfundoi 80:75 për Portokallezinjtë, derisa në grupe do të hyjë skuadra që është më e mirë nga dy ndeshjet.

Nënkampionët për herë të parë janë në kualifikimet e FIBA Europe Cup, ndërsa nëse kalojnë pengesën në Poloni, atëherë do t’i bashkoheshin kampiones së Kosovës, Trepçës, si dhe PAOK-ut të Greqisë dhe Braunschëeig të Gjermanisë në Grupin F.

Anwil është një nga skuadrat më të forta polake në vitet e fundit, ku para dy vitesh kishte triumfuar në FIBA Europe Cup, kurse edicionin e kaluar ishte ndalur në Raundin e 1/16-tes.

Ndeshja zhvillohet të mërkurën në Poloni nga ora 18:30./S.K/KP/

Continue Reading

Aktualitet

UBT hap thirrjen për pjesëmarrje në Konferencën Ndërkombëtare të Gazetarisë, Medias dhe Komunikimit 2025

Published

on

UBT fton studiuesit, profesionistët dhe studentët për të marrë pjesë në Konferencën Ndërkombëtare të Gazetarisë, Medias dhe Komunikimit (ICJMC 2025), një ngjarje që synon të bashkojë ekspertët për të prezantuar rezultatet e fundit të kërkimeve, për të shkëmbyer ide dhe përvoja në fushën e gazetarisë, medias dhe komunikimit.

Kjo konferencë është pjesë e edicionit të 14-të të Konferencës Ndërkombëtare të UBT-së për Biznes, Teknologji dhe Inovacion, ku fokusi i këtij viti do të jetë Reziliencia dhe Qëndrueshmëria.

Datat e rëndësishme:

  • Dorëzimi i abstrakteve: 10 Tetor 2025
  • Njoftimi për pranimin e abstrakteve: 17 Tetor 2025
  • Regjistrimi i hershëm: 17 Tetor 2025
  • Regjistrimi i vonë: 20 Tetor 2025
  • Dorëzimi i artikujve të plotë: 14 Nëntor 2025
  • Peer review: 17 Tetor 2025

Qëllimi i konferencës:

Konferenca synon të krijojë një platformë për shkëmbimin e njohurive ndërmjet studiuesve inovativë, akademikëve, hulumtuesve të rinj, studentëve pasuniversitarë dhe kandidatëve për doktoraturë, si dhe ekspertëve të fushës, duke mbështetur diskutime mbi sfidat, trendet dhe zhvillimet më të fundit në Gazetari, Media dhe Komunikim.

Tema e vitit:

  • Inteligjenca Artificiale dhe Sensacionalizmi i Informacionit në Kohë Krize dhe Konflikti

Nën-temat përfshijnë:

  • Roli i medias në kohë krize dhe kriza gjeopolitike
  • Transformimi i komunikimit politik në epokën dixhitale
  • Etika e medias dhe komunikimit gjatë krizave humanitare: Përdorimi i Chat GPT

Temat e tjera të trajtuara:

  • Reklama, media alternative dhe komunitare
  • Inteligjenca artificiale dhe gazetaria
  • Komunikimi biznesor dhe marketingu i integruar
  • Media dhe globalizimi, media dhe sporti
  • Etika e medias, dezinformimi dhe lajmet false
  • Komunikimi ndërkulturor dhe ndëretnik
  • Studime kritike dhe kulturore, rinia dhe gjinia
  • Gazetaria, ligji dhe ndikimi shoqëror
  • Media, ndryshimet klimatike dhe studimet mjedisore
  • Komunikimi i rrezikut, stigma dhe shëndeti publik
  • Media vizuale, muzikore, multimediale dhe teknologjitë e reja

Dorëzimi i artikujve:

Materiali i dorëzuar duhet të jetë origjinal, nuk duhet të jetë publikuar më parë apo të jetë duke u shqyrtuar diku tjetër. Maksimumi i artikullit është 6 faqe. Artikujt që nuk përmbushin kriteret e formatit nuk do të konsiderohen.

Për më shumë detaje mbi standardet e pranimit dhe regjistrimin, vizitoni faqen zyrtare: Konferenca Ndërkombëtare e UBT-së

Continue Reading

Lajmet

​Portieri 42 vjeçar kthehet për kualifikueset e Botërorit

Published

on

Portieri me përvojë Craig Gordon është rikthyer në kombëtaren e Skocisë për ndeshjet kualifikuese të Kupës së Botës kundër Greqisë dhe Bjellorusisë.

Gardiani 42-vjeçar nuk ka luajtur që nga maji dhe ende nuk është paraqitur me Hearts këtë sezon, por tashmë është rikuperuar plotësisht nga një dëmtim në qafë. Gordon, i cili ka 81 ndeshje me kombëtaren, zëvendëson shokun e tij të ekipit, Zander Clark.

Ndërkohë, mbrojtësi i Derby County, Max Johnston, dhe qendërmbrojtësi i Blackburn Rovers, Dominic Hyam, janë lënë jashtë listës. Po ashtu nuk është përfshirë as sulmuesi i formës së mirë i Hearts, Lawrence Shankland, i cili ka shënuar shtatë gola këtë sezon, si dhe Tommy Conway i Middlesbrough.

Skocia ka grumbulluar katër pikë në dy ndeshjet e para të grupit, pas barazimit 0-0 në Danimarkë dhe fitores 2-0 kundër Bjellorusisë. Greqia viziton Hampden Park më 9 tetor, ndërsa tre ditë më vonë Bjellorusia do të përballet me skocezët në Glasgow.

Trajneri Steve Clarke ka rikthyer edhe Anthony Ralston pas mungesës së tij, ndërsa Angus Gunn dhe Liam Kelly kompletojnë listën e portierëve, pavarësisht se kanë pak minuta me klubet e tyre./S.K/KP/

 

Continue Reading

Të kërkuara