Të martën, Shtëpia e Bardhë hapi zyrtarisht një llogari në TikTok, në një kohë kur Donald Trump vazhdon të lejojë funksionimin e platformës kineze në Shtetet e Bashkuara, pavarësisht ligjit që kërkon shitjen e saj.

Në postimin e parë, një video 27-sekondëshe, shkruhej: “Amerikë, jemi kthyer! Çfarë ke TikTok?”.

Një orë pas publikimit, llogaria kishte mbledhur rreth 4,500 ndjekës. Ndërkohë, profili personal i Trump në TikTok numëron 110.1 milionë ndjekës, megjithëse postimi i tij i fundit daton më 5 nëntor 2024 – dita e zgjedhjeve.

Trump ka shprehur simpati për TikTok, duke e konsideruar një mjet të rëndësishëm për të fituar përkrahje tek votuesit e rinj gjatë garës së tij kundër Kamala Harris në zgjedhjet presidenciale të nëntorit 2024.

“Administrata Trump është e përkushtuar të ndajë sukseset historike të presidentit me sa më shumë audienca dhe platforma që është e mundur”, deklaroi Karoline Leavitt, zëdhënësja e shtypit e Shtëpisë së Bardhë, me rastin e hapjes së llogarisë.

Ligji federal që kërkon ndalimin ose shitjen e TikTok për arsye sigurie kombëtare ishte parashikuar të hynte në fuqi një ditë para inaugurimit të Trump më 20 janar. Por presidenti republikan e pezulloi zbatimin e tij, duke theksuar rëndësinë e platformës në fushatën e tij.

TikTok, me 170 milionë përdorues në SHBA, është në pronësi të kompanisë kineze ByteDance, e cila në prill bëri të ditur se po diskutonte me autoritetet amerikane për një marrëveshje, duke theksuar se çdo vendim do të duhej të miratohej nga autoritetet kineze.

Në qershor, Trump shtyu afatin për TikTok me 90 ditë, duke dhënë kohë për të gjetur një blerës jo-kinez. Ky afat pritet të skadojë në mes të shtatorit.

Iniciativa për ndalimin e TikTok u shfaq fillimisht në vitin 2020 nën drejtimin e Trump, për shkak të shqetësimeve lidhur me sigurinë kombëtare. Kjo u kthye në një çështje me mbështetje dypartiake dhe në vitin 2024, Kongresi votoi me shumicë për ndalimin e platformës – vendim që më vonë u mbështet edhe nga Gjykata Supreme. Afati fillestar për ndalimin ishte 19 janari.

Trump e rishikoi qëndrimin e tij ndaj TikTok gjatë fushatës presidenciale, ku arriti të tërheqë rreth 15 milionë ndjekës në platformë. Ai madje priti CEO-n e TikTok, Shou Zi Chew, në Mar-a-Lago, dhe ky i fundit mori pjesë në ceremoninë e inaugurimit.

Trump, i cili dikur ishte për ndalim ose shitje të platformës, tani shprehet se do ta mbrojë atë, duke e konsideruar si një faktor të rëndësishëm për mbështetjen që mori nga votuesit e rinj në zgjedhje.

Ndërkohë, në rrjetin X, llogaria e tij ka 108.5 milionë ndjekës, ndërsa në Truth Social, rrjetin e tij personal, ka 10.6 milionë ndjekës. Për krahasim, llogaritë zyrtare të Shtëpisë së Bardhë në X dhe Instagram numërojnë përkatësisht 2.4 milionë dhe 9.3 milionë ndjekës.

OpenAI ka prezantuar një plan të ri dhe më të përballueshëm të abonimit për ChatGPT në Indi, të quajtur ChatGPT Go, me çmim ₹399 në muaj (rreth $4.60). Ky çmim është dukshëm më i lirë krahasuar me planin ekzistues ChatGPT Plus, që kushton ₹1,999 në muaj (rreth $23).

Kompania ka aktivizuar së fundmi çmimet në monedhën vendase për të gjitha planet dhe me këtë lançim, ka shtuar edhe opsionin për pagesa përmes UPI (Unified Payment Interface), sistemi kombëtar i pagesave digjitale në Indi.

Sipas Nick Turley, zëvendës president në OpenAI dhe përgjegjës për ChatGPT, plani Go do të ofrojë një rritje 10-fish më të madhe të mesazheve, gjenerimit të imazheve dhe ngarkimit të skedarëve krahasuar me versionin falas. Gjithashtu, do të përfshijë ruajtje më të mirë të kujtesës, duke mundësuar përgjigje më të personalizuara.

“Bërja e ChatGPT më të përballueshëm ka qenë një kërkesë kryesore nga përdoruesit. Po e lansojmë fillimisht në Indi dhe do të mësojmë nga reagimet përpara se ta zgjerojmë në vende të tjera,” u shpreh Turley.

Çmimi i planit Plus në valutën vendase ka rezultuar më i shtrenjtë se 20 dollarë për përdoruesit në Indi. Ndërkohë, plani Go ofron një alternativë më ekonomike, të përshtatshme për ata që përdorin ChatGPT kryesisht për biseda, krijim imazhesh dhe përpunim skedarësh.

Plani ishte paralajmëruar më herët nga Tibor Blaho, një inxhinier softuerik i njohur për zbulimet e sakta të produkteve të reja në fushën e AI.

Aktualisht, plani është i kufizuar vetëm për përdoruesit në Indi, por në faqen zyrtare të mbështetjes, OpenAI ka deklaruar se po punon për ta sjellë edhe në rajone të tjera.

OpenAI ka raportuar se ChatGPT tani ka mbi 700 milion përdorues aktivë në javë globalisht, nga 500 milion në muajin mars. Përdorimi i shërbimit në Indi është rritur ndjeshëm që nga prezantimi i funksionit të përmirësuar për krijimin e imazheve në mars.

CEO i OpenAI, Sam Altman, ka deklaruar në një podcast të fundit se India është tregu i dytë më i madh për kompaninë. Me lançimin e planit Go, OpenAI synon të shfrytëzojë më tej këtë potencial.

Sipas të dhënave nga firma analitike AppFigures, India kryeson për sa i përket shkarkimeve të aplikacionit ChatGPT, me mbi 29 milion shkarkime vetëm në 90 ditët e fundit. Megjithatë, të ardhurat nga përdoruesit në Indi në këtë periudhë kanë qenë vetëm 3.6 milion dollarë.

Ky plan me çmim të reduktuar pritet të nxisë më shumë përdorues të abonohen, ndërkohë që edhe kompani të tjera të AI kanë ndërmarrë hapa për të tërhequr përdorues nga tregu masiv indian, që ka mbi 850 milion përdorues interneti. Kohët e fundit, Perplexity bashkëpunoi me operatorin Airtel për të ofruar abonime falas në Perplexity Pro, ndërsa Google ofroi një plan AI Pro falas për studentët në Indi për një vit.

Ndryshe nga këto, OpenAI nuk po ofron abonim falas, por me çmim lokal dhe të përballueshëm, pret të arrijë një normë më të lartë të abonimeve në këtë treg.

Spotify ka prezantuar një funksion të ri që u lejon përdoruesve Premium të krijojnë playlist-a më profesionale dhe të personalizuara. Tani, përdoruesit mund të shtojnë automatikisht ose manualisht kalime (transicione) mes këngëve në një playlist, duke përdorur stile të gatshme si fade, rise apo blend, si dhe opsione të tjera shtesë.

Për të përdorur këtë funksion, mjafton të hapni një playlist dhe të zgjidhni butonin “Mix” në shiritin e veglave për të filluar redaktimin. Gjatë personalizimit, mund të rregulloni gjithashtu volumin, efektet, ekuilibrin e zërit (EQ), dhe të përdorni pamjen vizuale të valëve dhe ritmit të këngëve për të zgjedhur pikën më të mirë të kalimit.

Spotify njofton se do të shfaqë automatikisht tonalitetin dhe ritmin (beats per minute) për çdo këngë, për ta bërë më të lehtë përdorimin edhe për fillestarët që nuk kanë përvojë në miksim audio.

Ky funksion i ri është krijuar për të tërhequr ata përdorues që krijojnë lista me kujdes – një kategori që, sipas kompanisë, ka krijuar deri më tani rreth 9 miliardë playlist-a në platformë.

Lançimi i këtij opsioni vjen si pjesë e një sërë përditësimesh që Spotify ka sjellë gjatë vitit të fundit, për të rritur kontrollin e përdoruesve mbi përvojën e dëgjimit – përfshirë mjete për shtimin, renditjen dhe redaktimin e playlistave, personalizimin e listës Discover Weekly, opsionin snooze për këngë, kërkesat me zë për DJ-në me inteligjencë artificiale, dhe të tjera.

Ky zhvillim e vendos Spotify-n në konkurrencë të drejtpërdrejtë me funksionin AutoMix të Apple Music, i cili aktualisht është në versionin beta të iOS 26 dhe premton miksim “si një DJ”.

Përdoruesit Premium që kanë qasje në këtë funksion, mund të ruajnë dhe ndajnë playlist-at e miksuara me miqtë në rrjete sociale, ose t’i ftojnë ata për të bashkëpunuar në krijimin e një miksimi të përbashkët.

Opsioni “Mix” mund të aktivizohet ose çaktivizohet në çdo moment, duke ju lejuar ta ktheni playlist-ën në versionin e zakonshëm kur, për shembull, përfundon një festë apo një seancë në palestër.

Amazon ka bërë të ditur se më 20 gusht do të mbyllë Amazon Appstore për pajisjet Android, duke ndërprerë kështu funksionimin e këtij shërbimi në këtë platformë.

Ky vendim, i paralajmëruar që në shkurt, vjen si pjesë e përqendrimit të kompanisë në platformat e veta, përkatësisht Fire TV dhe Fire Tablet, ku sipas Amazon shumica e përdoruesve aktualisht shfrytëzojnë Appstore.

Amazon kishte ndërprerë më parë funksionimin e Appstore edhe në Windows gjatë vitit 2024. Ndërkohë, përdoruesit e Amazon Appstore në pajisje Fire nuk do të preken nga ky ndryshim.

Së bashku me mbylljen e Appstore, më 20 gusht do të pezullohet edhe programi Amazon Coins. Përdoruesit që kanë ende monedha dixhitale në llogaritë e tyre do të mund të përfitojnë rimbursim, edhe pse detajet për mënyrën e kompensimit pritet të publikohen në një datë të mëvonshme.

Në faqen zyrtare të pyetjeve të shpeshta mbi mbylljen, Amazon thekson se aplikacionet e blera më herët përmes Appstore nuk garantojnë funksionim pas datës së mbylljes.

Amazon Coins janë përdorur për blerje brenda aplikacioneve dhe në vetë dyqanin e aplikacioneve të Amazon.