Lajmet

PDK nuk merr pjesë në votim, Lushtaku: Vetëm qeveri me Bedri Hamzën sjell stabilitet

Published

on

Deputeti i Partisë Demokratike të Kosovës, Mergim Lushtaku, tha se PDK nuk do të marrë pjesë në votimin për Kuvendin, përderisa nuk ka një zgjidhje të qëndrueshme për vendin, duke theksuar mbështetjen për kandidaturën e Bedri Hamzës si kryeministër.

“Sigurisht që qëndrimet e mia janë edhe ato të PDK-së, ne nuk do të marrim pjesë në votim derisa nuk kemi një zgjidhje të qëndrueshme për Kosovën. Edhe sigurisht që zgjidhja e qëndrueshme për Kosovën është zgjedhja e kryeministrit Bedri Hamza si udhëheqës i qeverisë së Kosovës edhe mendoj që do të krijohet edhe stabiliteti edhe qëndrueshmëria në vend” tha Lushtaku.

Ai shtoi se janë bërë thirrje të vazhdueshme ndaj partive tjera politike për të qëndruar në përputhje me premtimet publike sa i përket refuzimit të një mandati të tretë për kryeministrin aktual.

“Nuk ka asnjë dakordim konkret por besoj që mbetet në qëndrueshmërinë dhe premtimet publike që kanë bërë. Besoj që e ka bërë të qartë PDK se ne kemi pozitën që na ka besuar edhe qytetari i vendit në mundësinë e dytë në formimin e qeverisë, besoj që ne qëndrojmë në premtimet tona” u shpreh Lushtaku.

Lajmet

Faton Peci reagon pas bastisjeve në Ministrinë e Bujqësisë

Published

on

By

Ministri në detyrë i Bujqësisë, Faton Peci, ka reaguar një ditë pas bastisjeve në Ministrinë e Bujqësisë dhe intervistimit të tij nga Prokuroria Speciale e Republikës së Kosovës.

“Jam i bindur që epilogu i këtij procesi do të jetë i njohur për ju, sikurse është i njohur për rreth 30 mijë fermerë që përfitojnë në baza vjetore subvencione dhe grante, dhe që njëherit janë dëshmitarët më të vëmendshëm në çdo cep të Kosovës. Ata, më së miri e dinë se në funksion të kujt e kam kryer detyrën zyrtare,” ka shkruar ai ndër të tjera në Facebook.

Policia e Kosovës, me urdhër të Prokurorisë Speciale të Republikës së Kosovës, zhvilloi të martën bastisje në Ministrinë e Bujqësisë.

Prokurori i rastit, Admir Shala, ka bërë me dije më 27 maj se Prokuroria Speciale ka nisur një hetim lidhur me dhënien në shfrytëzim të fabrikës për përpunimin e nënprodukteve shtazore.

Në raportin 24-orësh të Policisë së Kosovës thuhet se nga Njësia e Veçantë e Hetimeve janë kryer kontrolle në Ministrinë e Bujqësisë, Pylltarisë dhe Zhvillimit Rural, Agjencinë e Ushqimit dhe Veterinarisë, zyrën e një kompanie private dhe Agjencinë për Zhvillimin e Bujqësisë.

“Gjatë kontrollit janë sekuestruar pajisje elektronike (kompjuterë, telefona), si dhe dokumente të ndryshme në përputhje me urdhëresën e Gjykatës. Dy persona meshkuj kosovarë janë intervistuar dhe pas intervistimit në prani të avokatëve, me vendim të prokurorit, janë liruar në procedurë të rregullt,” thuhet në njoftimin e Policisë së Kosovës.

Continue Reading

Lajmet

Policia jep detaje për bastisjet në Ministrinë e Bujqësisë

Published

on

By

Policia e Kosovës njofton se gjatë kontrollit të zhvilluar të martën në Ministrinë e Bujqësisë, Agjencinë e Ushqimit dhe Veterinarisë (AUV), Agjencinë për Zhvillim të Bujqësisë dhe zyrën e një kompanie private, janë sekuestruar pajisje elektronike dhe dokumente të ndryshme.

Kontrolli është bërë në kuadër të hetimeve për dyshimet e keqpërdorimit të kontratës për dhënien me qira të impiantit të mbetjeve shtazore. Gjatë aksionit, janë intervistuar dy persona, të cilët janë liruar në procedurë të rregullt pas intervistimit në prani të avokatëve.

Nga Prokuroria është konfirmuar se ndër të intervistuarit ishin ministri i Bujqësisë, Faton Peci, dhe drejtori i Agjencisë për Ushqim dhe Veterinari, Bekim Hoxha. Rasti është cilësuar si “keqpërdorim i detyrës zyrtare”.

Në raportin 24-orësh të Policisë thuhet: “Më 27 maj 2025, bazuar në urdhëresën e Gjykatës Themelore të Prishtinës, Njësia e Veçantë e Hetimeve ka kryer kontrolle në Ministrinë e Bujqësisë, Pylltarisë dhe Zhvillimit Rural, Agjencinë e Ushqimit dhe Veterinarisë, zyrën e një kompanie private dhe Agjencinë për Zhvillimin e Bujqësisë. Gjatë kontrollit janë sekuestruar pajisje elektronike si kompjuterë dhe telefona, si dhe dokumente të ndryshme në përputhje me urdhër-njoftimin e Gjykatës. Dy persona meshkuj kosovarë janë intervistuar dhe pas intervistimit, me vendim të prokurorit, janë liruar në procedurë të rregullt.”

Continue Reading

Lajmet

Burg i përjetshëm për Jeton dhe Nexhat Vllasaliun për vrasjen e biznesmenit Bedri Rexhepi

Published

on

By

Gjykata Themelore në Prishtinë ka shpallur fajtorë Jeton dhe Nexhat Vllasaliun për vrasjen e rëndë të biznesmenit kosovar, Bedri Rexhepi. Të dy janë dënuar me burgim të përjetshëm.

Sipas aktgjykimit të shpallur, dy të akuzuarit e kryen këtë krim për qëllime përfitimi material. Më konkretisht, dyshohet se e vranë Rexhepin për një shumë prej 30 mijë eurosh.

Biznesmeni Bedri Rexhepi ishte zhdukur më 8 prill 2021, pasi kishte dalë nga banesa e tij në “Rrugën B” në Prishtinë. Për më shumë se një vit e gjysmë, nuk kishte asnjë informacion për vendndodhjen e tij, derisa pas një hetimi intensiv nga Prokuroria dhe Policia, trupi i pajetë i Rexhepit u gjet në një zonë të komunës së Novobërdës.

Në një konferencë për media, prokurori i rastit Armend Hamiti bëri të ditur se vrasja kishte ndodhur për përfitim material dhe se dy të akuzuarit kishin besuar se viktima posedonte një shumë prej rreth 30 mijë eurosh. Ata kishin planifikuar dhe më pas kryer vrasjen, ndërsa trupin e kishin fshehur.

“Pas sigurimit të provave dhe dëshmive të forta, kam ngritur aktakuzë për ‘vrasje të rëndë me bashkëkryerje’ dhe ‘dëmtim të kufomave’ kundër Jeton dhe Nexhat Vllasaliut. Hetimi zgjati rreth 18 muaj dhe përfshiu dëshmitë e 29 personave,” deklaroi prokurori Hamiti.

Ai theksoi se hetimi kishte përfshirë bashkëpunim të ngushtë me Policinë e Kosovës, Forcën e Sigurisë së Kosovës (FSK) dhe Agjencinë Kosovare të Inteligjencës (AKI), duke përfshirë edhe përdorimin e njësisë K-9 dhe mjeteve të tjera teknologjike në terren.

Me këtë vendim, drejtësia ka marrë një hap të rëndësishëm në ndriçimin e një prej rasteve më të rënda të viteve të fundit në Kosovë.

Continue Reading

Lajmet

Abdixhiku pas marrjes në pyetje të Faton Pecit: Paratë e vjedhura do të kthehen cent më cent

Published

on

By

Kryetari i Lidhjes Demokratike të Kosovës (LDK), Lumir Abdixhiku, ka reaguar pas marrjes në pyetje të ministrit në detyrë të Bujqësisë, Faton Peci, nga Prokuroria e Shtetit nën dyshimet për keqpërdorim të detyrës zyrtare në rastin e fabrikës për përpunimin e mbetjeve nën shtazore.

Përmes një postimi në rrjete sociale, Abdixhiku e ka cilësuar këtë zhvillim si një shenjë të një epoke të re për drejtësinë në vend. Ai tha se pas shumë vitesh pritjeje, ka ardhur koha që pasuria publike të mbrohet dhe keqpërdoruesit të japin llogari.

“Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë,” ka shkruar Abdixhiku.

Ai theksoi se në këtë epokë të re, askush nuk do të jetë mbi ligjin dhe çdo cent i vjedhur do t’i kthehet qytetarëve të Kosovës.

“Në këtë epokë, një e vërtetë e pashmangshme do të qëndrojë gjithëherë – se paratë e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!”, shtoi ai.

Kreu i LDK-së gjithashtu shprehu besimin se edhe në Kosovë do të dalin në pah prokurorë e hetues me integritet dhe guxim për të hetuar çdo akt korruptiv – përfshirë ata të kryer nga zyrtarët më të lartë të shtetit.

“Edhe në Kosovë, si në çdo shtet tjetër evropian, do të dalin prokurorë e prokurore, djem e vajza të reja me guxim e integritet, që do të trajtojnë secilin akt korruptiv, sidomos atë të pushtetarëve”, theksoi Abdixhiku.

Ndërkohë, ministri në detyrë i Bujqësisë, Faton Peci, është liruar në procedurë të rregullt pas intervistimit disa orësh nga Prokuroria Speciale. Ai është marrë në pyetje lidhur me dyshimet për keqpërdorime në procesin e tenderimit për funksionalizimin e fabrikës për mbetjet nën shtazore.

Hetimet përfshijnë edhe bastisje në katër institucione: Ministrinë e Bujqësisë, Agjencinë për Zhvillimin e Bujqësisë, Agjencinë e Ushqimit dhe Veterinarisë, si dhe kompaninë përfituese të kontratës.

Continue Reading

Të kërkuara