Lajmet

PDK-ja me akuza në drejtim të Agim Bahtirit

Published

5 years ago

May 18, 2021

Betim Gashi

Partia Demokratike e Kosovës, dega në Mitrovicë, i është kthyer konferencave për shtyp përmes sekretarit të saj, Valon Brahimi, i cili ka akuzuar qeverisjen lokale në këtë komunë të udhëhequr nga VV, për degradim institucional gjatë tetë viteve me radhë.

Sipas tij, mashtrimi qytetar ishte kauza që i parapriu ardhjes së Agim Bahtirit në pushtet dhe u bë parim që e përcjelli përgjatë tërë viteve të keqqeverisjes së tij. Ai theksoi se pushteti aktual i VV-së në krye me Agim Bahtirin, jo vetëm që nuk përmbushi premtimin e madh të hapjes së 15 mijë vendeve të punës dhe nuk e çrrënjosi korrupsionin, por qytetarin e rëndomtë mitrovicas e zhyti më tej në varfëri.

”Po bëhen pothuajse tetë vite që kur mori rrugë degradimi institucional në komunën e Mitrovicës… Mashtrimi qytetar ishte kauza që i parapriu ardhjes së Agim Bahtirit në pushtet dhe u bë parim që e përcjelli përgjatë tërë viteve të keqqeverisjes së tij… Pushteti aktual i VV-së në krye me Agim Bahtirin, jo vetëm që nuk përmbushi premtimin e madh të hapjes së 15 mijë vendeve të punës, por për më tepër qytetarin e rëndomtë mitrovicas e zhyti më tej në varfëri, jo vetëm që nuk e çrrënjosi korrupsionin, por për më tepër të njëjtën e trashi edhe më duke e stërmbushur administratën komunale me familjarë, miq, kushërinj, nipa e dhëndurë”, u shpreh Brahimi.

Brahimi potencoi zhvillimet e fundit në sektorin e arsimit në Mitrovicë, përkatësisht përzgjedhjen e drejtorëve të shkollave, për të cilat tha se u përcollën me tendencën e pushtetit komunal të VV-së, për të vendosur kontroll të plotë mbi institucionet arsimore, përmes instalimit të militantëve të tyre partiak në cilësinë e drejtorëve.

Ai përmendi shkarkimin e drejtorit të deritashëm të Drejtorisë së Arsimit, Ismet Ferizi, vetëm se nuk ka pranuar ndërhyrjen e kryetarit Bahtiri në punën e komisionit profesional të DKA-së. Ndërsa kritikoi edhe involvimin e ministres së arsimit, Arbërie Nagavci në këtë çështje.

“Shqetësues është fakti që në një proces i cili në kushte normale do të duhej të udhëhiqej nën frymën e ligjit dhe akteve nënligjore në fuqi që rregullojnë çështjen e kritereve dhe procedurave të përzgjedhjes së drejtorëve të shkollave, u karakterizua me involvimin direkt jo vetëm të kryetarit Bahtiri, i cili duke përdorur autoritetin e tij nga pozicioni i kryetarit, përmes ushtrimit të ndikimit u mundua të diktojë punën e komisionit profesional të DKA-së në funksion të realizimit të agjendës së tij politike, por për më keq edhe involvimin e ministres së arsimit Nagavci. Këtë e pohoi edhe vet Bahtiri dje kur kumtoi kinse arsyet e shkarkimit të drejtorit të DKA-së Ferizi…. Involvimi i ministres së Arsimit Nagavci në diskutime brenda ambienteve të zyrës së kryetarit Bahtiri se kush duhet të zgjidhet drejtor, me shami apo pa shami, para se komisioni të dërgojë emrat e propozuar të kandidatëve, flet për seriozitetin dhe vendosmërinë e pushtetit komunal të VV-së në ikje, që me çdo kusht dhe mjet për të vendosur kontrollin politik mbi këto institucione përmes politizimit të tyre me militantë partiakë”, ka thënë Brahimi.

Ai shtoi se përtej çdo denoncimi politik, medial dhe qytetar, logjikshëm rrjedh apeli se ky proces duhet të hetohet edhe nga organet kompetente ligj zbatuese në mënyrë që komunës dhe sektorit të arsimit në Mitrovicë t’iI kthehet dinjiteti i nëpërkëmbur tash e tetë vite.

Lajmet

Lista Serbe fton konferencë për media pas moscertifikimit nga KQZ

Published

24 minutes ago

December 3, 2025

UBTnews

Lista Serbe, ka njoftuar se sot më 03.12.2025, në ora 15:00, në selinë e partisë do të mbajnë konferencë për media.

Sipas njoftimit, drejtuesit do të flasin për vendimin nga KQZ-ja i cili siç pretendojnë ata ka penguar pjesëmarrjen e subjektit në zgjedhjet e parakohshme parlamentare të 28 dhjetorit 2025, transmeton KosovaPress.

“Udhëheqja e Listës Serbe do të mbajë një konferencë të jashtëzakonshme për media, ku do të flasë për vendimin joligjor për të penguar pjesëmarrjen e Listës Serbe në zgjedhjet e parakohshme parlamentare më 28 dhjetor 2025” thuhet në njoftimin e partisë.

Ndërsa dje gjatë mbledhjes së dytë lidhur me përgatitjet për procesin zgjedhor, KQZ-së nuk ka certifikuar Listën Serbe për zgjedhjet e parakohshme parlamentare të 28 dhjetorit.

KQZ votoi certifikimin ndaras për partitë politike, meqë rast Lista Serbe me 2 vota për, 2 kundër dhe 7 abstenime nuk u certifikua./KP

Lajmet

Ylli i Barcelonës, Dani Olmo pëson zhvendosje të shpatullës

Published

2 hours ago

December 3, 2025

UBT News

Mesfushori i Barcelonës, Dani Olmo, pësoi një zhvendosje të shpatullës ndërsa shënonte kundër Atletico Madrid dhe pritet të mungojë të paktën tre javë, praktikisht jashtë loje për pjesën tjetër të vitit 2025.

Dani Olmo pritet të mungojë të paktën tre javë pasi pësoi një zhvendosje të shpatullës, menjëherë pasi shënoi gol për Barcelonën në fitoren e tyre 3-1 ndaj Atlético Madrid, duke e përjashtuar atë praktikisht për pjesën tjetër të vitit 2025.

Përditësimi mjekësor i klubit dhe raportet e shumta bien dakord për diagnozën: një zhvendosje e shpatullës, me skanimet që konfirmojnë nevojën për një periudhë pushimi dhe rehabilitimi në vend të një date kthimi të menjëhershme dhe të fiksuar.

Është një kthesë brutale, sepse Olmo ishte në një nga periudhat e tij më të mira që nga kthimi në Barça, duke udhëhequr lojën midis vijave dhe më në fund dukej ashtu siç e imagjinuan tifozët qendrën krijuese kur u kthye nga RB Leipzig./S.K/EO/

Lajmet

Sot nis beteja për Kupën e Kosovës në futboll

Published

2 hours ago

December 3, 2025

UBT News

Në kuadër të fazës 1/16 të Kupës së Kosovës në futboll,, sot do të zhvillohen 10 ballafaqime shumë interesante.

Kupa e Kosovës është një tjetër rrugë që shumë skuadra e ndjekin për të siguruar daljen në garat evropiane sezonin e ardhshëm.

Këto janë të gjitha ballafaqime e ditës së sotme që nisin nga ora 12:30 e që janëL

Besa Peja – Drita, Drenica – Prizreni, Dukagjini – Ramiz Sadiku, Ballkani – Rilindja, Ferizaj – Tefik Çanga, Gjilani – Istogu, Llapi – Vjosa, Prishtina e Re, KF Lepenci Kaçanik, TOP Futbolli – Prishtina, Trepça Mitrovicë – Malisheva /S.K/KP/

Lajmet

Bisedimet Rusi-SHBA për marrëveshjen e paqes në Ukrainë përfundojnë pa përparim

Published

2 hours ago

December 3, 2025

UBTnews

Pesë orë bisedime midis Presidentit rus Vladimir Putin dhe negociatorëve kryesorë të Shteteve të Bashkuara nuk dhanë ndonjë përparim në një marrëveshje të mundshme paqeje në Ukrainë, tha një ndihmës i Kremlinit të mërkurën herët.

I dërguari special i Presidentit të SHBA-së Donald Trump, Steve Witkoff, dhe dhëndri i tij, Jared Kushner, u ulën për bisedime të nivelit të lartë me Putinin në Kremlin të martën, duke kulmuar një javë diplomacie intensive, ndërsa administrata Trump vazhdon përpjekjet e saj për t’i dhënë fund luftës ruse në Ukrainë, transmeton CNN.

Bisedimet në kryeqytetin rus ishin “shumë të dobishme, konstruktive dhe shumë thelbësore”, por një “opsion kompromisi nuk u gjet”, u tha gazetarëve pas takimit këshilltari rus i politikës së jashtme dhe ndihmësi i Putinit, Yuri Ushakov.

“Disa nga propozimet amerikane duken pak a shumë të pranueshme, megjithëse ato duhet të diskutohen“, tha Ushakov, duke shtuar se pika të tjera “nuk na përshtaten”.

“Puna do të vazhdojë”, tha ai.

Ndër pikat e mëparshme të ngërçitjes janë kërkesat e Kremlinit që Ukraina të heqë dorë zyrtarisht nga aspirata e saj për t’u bashkuar me NATO-n dhe që Ukraina të dorëzojë territorin në rajonin Donbas të Ukrainës lindore që është aneksuar, por ende jo i pushtuar, nga Rusia.

Pala amerikane ende nuk ka komentuar publikisht mbi bisedimet, por përpara takimit, SHBA-të kishin qenë “shumë optimiste” për arritjen e një marrëveshjeje për t’i dhënë fund luftës tre vjeçare e gjysmë, sipas sekretares së shtypit të Shtëpisë së Bardhë, Karoline Leavitt.

Një takim midis Putinit dhe Trump nuk ishte planifikuar dhe një takim i mundshëm ballë për ballë do të “varet nga progresi që jemi në gjendje të arrijmë”, tha Ushakov.

Zyrtarët ukrainas kanë vazhduar të refuzojnë kërkesat maksimaliste të Rusisë, të cilat Kremlini vazhdon t’i konsiderojë si vija të kuqe.

Ushakov tha se Putin dhe delegacioni amerikan diskutuan çështjet territoriale në takimin e tyre, “pa të cilat ne nuk shohim një zgjidhje për krizën”.

Presidenti ukrainas Volodymyr Zelensky tha se priste të komunikonte me ekipin negociator amerikan menjëherë pas bisedimeve të tyre me Putinin dhe se ai ishte “duke pritur sinjale” nga delegacioni mbi rezultatin e takimit./KP