Ish-trajneri legjendar i Arsenalit, Arsene Wenger, po shqyrton seriozisht mundësinë për të kandiduar për president të FIFA-s, përballë presidentit aktual Gianni Infantino, raporton “BBC”.

Për javë të tëra, figura të rëndësishme të futbollit evropian kanë shpresuar që francezi të hyjë në garën për këtë post, ndërsa tashmë Wenger po e konsideron seriozisht një hap të tillë.

Shefi i zhvillimit global të futbollit në FIFA thuhet se mund të ketë mbështetjen e UEFA-s, e cila ka qenë ndër kundërshtarët kryesorë të Infantinos. Për më tepër, Wenger gëzon respekt dhe besueshmëri në qarqet ndërkombëtare të futbollit.

Ndërkohë, pozita e Infantinos është vënë në pikëpyetje pas kritikave të shumta lidhur me planin e dështuar për shitjen e aksioneve të Kupës së Botës te investitorët privatë. Megjithatë, ai vazhdon të ketë mbështetje të konsiderueshme në Amerikën e Jugut, Afrikë dhe Azi.

Një nga çështjet që mund të ndikojë në kandidaturën e Wengerit është mosha e tij, pasi 77-vjeçari përballet me pikëpyetje rreth mundësisë për të ofruar udhëheqje afatgjatë. Sipas BBC-së, disa nga mbështetësit e tij do të ishin të kënaqur edhe nëse ai do të fitonte zgjedhjet dhe më pas do të tërhiqej para përfundimit të mandatit katërvjeçar.

Megjithatë, burime pranë francezit bëjnë të ditur se ai ende nuk ka marrë një vendim përfundimtar, ndërsa Infantino vazhdon të konsiderohet favorit për të fituar një mandat të katërt në zgjedhjet e vitit të ardhshëm.

Afati i fundit për paraqitjen e kandidaturave është 18 nëntori.

Wenger, ndërkohë, ishte distancuar nga plani për shitjen e aksioneve të Kupës së Botës, duke deklaruar se nuk kishte qenë i përfshirë në të dhe se për këtë projekt kishte mësuar përmes raportimeve në media.

Gjatë kohës së tij në FIFA, francezi ka nxitur disa debate me propozimet për organizimin e Kupës së Botës çdo dy vjet dhe ndryshimin e rregullit të pozitës jashtë loje.

D.L

Basketbollisti i Golden Eagle Yllit, Davontrey Thomas, është shpallur lojtari më i vlefshëm (MVP) i javës së tetë në ProCredit Superligën e Kosovës në basketboll.

Thomas është vlerësuar për paraqitjet e tij gjatë kësaj jave, duke u dalluar me kontributin e dhënë për skuadrën nga Suhareka.

Me këtë çmim, basketbollisti i Yllit merr vlerësimin si lojtari më i mirë i javës së tetë në elitën e basketbollit kosovar.

D.L

Edon Zhegrova vazhdon të mos fitojë besimin e trajnerit Luciano Spalletti te Juventusi, pasi ende nuk ka regjistruar asnjë paraqitje si titullar në Serie A.

Edhe në ndeshjen ndaj Fiorentinës, të zhvilluar të dielën, futbollisti kosovar u aktivizua nga banka rezervë, por pa arritur të lërë gjurmë në lojë.

Pas ndeshjes, trajneri i Juventusit, Luciano Spalletti, foli hapur për paraqitjet e Zhegrovës, duke vlerësuar cilësitë e tij, por edhe duke theksuar mangësitë në lojën pa top dhe aspektin taktik.

“Edoni ka cilësi dhe ato janë të rëndësishme, por ai humb gjëra gjatë lojës. Ai humb qetësinë në mbrojtje dhe pozicionimin, si dhe kur ndjek një kundërshtar. Në këtë nivel nuk mund ta përballosh këtë. Ke nevojë për lojë të vazhdueshme për 90 minuta. Paraqitjet individuale nuk janë të mjaftueshme”, ka deklaruar Spalletti, sipas “Goal”.

Nga 36 paraqitjet e zhvilluara me fanellën e Juventusit, Zhegrova në 35 prej tyre ka hyrë si zëvendësues. E vetmja ndeshje si titullar ishte ajo ndaj Pafosit në Ligën e Kampionëve, ku u zëvendësua pas përfundimit të pjesës së parë.

Ndërkohë, sipas “Goal”, e ardhmja e reprezentuesit të Kosovës në Torino mund të vihet në pikëpyetje që në afatin kalimtar të janarit. Juventusi thuhet se po shqyrton mundësinë e transferimit të një futbollisti që përshtatet më mirë me filozofinë e Spallettit.

27-vjeçari ka realizuar dy gola dhe ka dhuruar dy asistime në Serie A, ndërsa me Juventusin ka kontratë të vlefshme deri në qershor të vitit 2030.

D.L

Gjatë takimit me lojtarët, presidentja u ka uruar atyre fat dhe suksese në përballjet e ardhshme, duke shprehur besimin dhe përkrahjen e saj për përfaqësuesen e Kosovës.

Shiroka Pula ka vlerësuar paraqitjet e futbollistëve si në klubet ku aktivizohen në vende të ndryshme të botës, ashtu edhe me fanellën e Kombëtares, duke theksuar se ata vazhdojnë ta bëjnë vendin krenar.

“Vendi ynë beson në ju dhe do të jetë gjithmonë përkrah jush. Shumë fat dhe suksese në ndeshjet e ardhshme. Forca Kosova”, ka deklaruar presidentja.

Kosova do të përballet me Izraelin të shtunën, në ndeshjen e parafundit të këtij cikli, ndërsa tri ditë më vonë do të luajë ndaj Irlandës në udhëtim.

D.L