Sulmuesi i talentuar Brazilian Endrick, nuk ka patur startin më të mirë të mundshëm të këtij sezoni te Los Blancos, pasi që erdhi me bujë të madhe sezonin e kaluar nga skuadra braziliane Palmeiras.

Ai nuk ka qenë fare në planet e Xabi Alonsos, por ka zhvilluar një ndeshje këtë sezon ndaj Valencias, ku u aktivizua për 12 minuta.

Gazetari i famshëm Fabrizio Romano ka raportuar që nga tetori se Endrick ka hapur derën për një kalim te skuadra e Olympique Lyon në Francë, për të rigjetur formën me qëllimin e lojtarit, për të qenë i gatshëm për Botërorin 2026.

Gazetari Italian ka cituar burimet e “El Globo”, mediumi brazilian shumë i besueshëm, që klubet kanë arritur marrëveshje për një huazim pa drejtë blerje deri në fund të sezonit./S.K/EO/

Gjatë prezantimit të fundit në State of Play Japan, Sony shpalli disa produkte të reja hardware.

Përveç versionit të përditësuar të PlayStation 5, i cili do të jetë i disponueshëm vetëm në Japoni, kompania prezantoi edhe monitorin zyrtar të PlayStation, i cili mund të lidhet me kompjuterin.

Ky monitor është ekran QHD 27-inç me ritëm rifreskimi 240Hz, i cili mbështet HDR e ritëm rifreskimi të ndryshueshëm. Megjithatë, kur përdoret me PS5, ritmi i rifreskimit është i kufizuar në 120Hz.

Përveç kësaj, monitori ka një port për karikim në pjesën e pasme, ku mund të vendoset edhe një kontrollues DualSense, duke e bërë të gatshëm për lojëra në çdo moment që dëshiron lojtari.

Monitori pritet të bëhet i disponueshëm në SHBA dhe Japoni vitin e ardhshëm, por Sony ende nuk ka zbuluar datën e saktë të lëshimit dhe çmimin.

Ky monitor vjen pas altoparlantëve desktop Pulse Elevate, të cilët Sony i prezantoi në shtator. Ata janë kompatibël me PC, Mac, PlayStation 5 dhe PlayStation Portal, dhe do të arrijnë në treg në vitin 2026.

Duket se ky harduer i ri është pjesë e përpjekjeve të Sony për të forcuar praninë e saj në tregun e lojërave për PC.

Kompania ka mundësuar lidhjen e DualSense me disa pajisje njëkohësisht, duke e lejuar lojtarin të kalojë më lehtë nga PS5 në PC dhe anasjelltas. /A.Z/UBT News/

Një ushtar nga Kosova, që po ndihmonte në trajnimin e personelit të ushtrisë ukrainase në Mbretërinë e Bashkuar, ka mohuar tre akuza për krime seksuale.

Bali Hoxha, 28 vjeç, nga Kampi West Tofts në Thetford të Norfolkut, po akuzohet për një rast përdhunimi dhe dy akuza për sulm seksual ndaj një gruaje, raporton BBC.

Sipas autoriteteve britanike, incidenti i dyshuar ka ndodhur më 17 shtator, rreth orës 23:30, përgjatë një shtegu midis Rrugës Prince of Wales dhe Parkut Tregtar Riverside.

Hoxha, i cili ndodhet aktualisht në paraburgim, u paraqit në Gjykatën e Kurorës në Norwich, ku u deklarua i pafajshëm për të gjitha akuzat. Gjyqi i tij është caktuar të nisë më 7 prill të vitit të ardhshëm dhe pritet të zgjasë pesë ditë.

Avokati mbrojtës, Jonathan Goodman, njoftoi gjykatën se klienti i tij ka njohuri të mjaftueshme të anglishtes për procedurat paraprake, por do të kërkojë një përkthyes në gjuhën shqipe gjatë gjyqit dhe çdo seance tjetër ndërmjetëse. Po ashtu, tre dëshmitarë të tjerë do të kenë nevojë për përkthim.

Sipas informacioneve nga gjykata, dëshmitarët pritet të jenë të dërguar në Kosovë në kohën e procesit gjyqësor, por ushtria e Kosovës është zotuar se do t’i lirojë ata nga detyrat për të marrë pjesë në seancat në Britani.

Hoxha është pjesëtar i Forcës së Sigurisë së Kosovës (FSK), por aktualisht i kontraktuar për të ndihmuar në trajnimin e ushtarëve ukrainas në poligonin e ushtrisë britanike pranë Thetfordit, në kuadër të një marrëveshjeje bashkëpunimi me Ministrinë e Mbrojtjes së Mbretërisë së Bashkuar.

Në Dhomat e Specializuara të Kosovës (DhSK) në Hagë, ka përfunduar dëshminë e tij ish-diplomati amerikan Christopher Hill, në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Hill tha se ishte një përvojë e veçantë pjesëmarrja e tij në këtë proces gjyqësor, raporton “Betimi për Drejtësi“.

“Ishte një përvojë e veçantë doja të them”, tha Hill.

Ndërsa, kryetari i trupit gjykues, Charles Smith III i tha dëshmitarit se shpreson që kjo të mos jetë një përvojë e keqe.

“Shpresoj të mos ketë qenë një përvojë e keqe”, tha Smith III.

Ndërsa, Hill ia ktheu duke i thënë se “Kam pasur përvoja edhe më të këqija”.

Gjatë fundit të dëshmisë, për dëshmitarin pati disa pyetje edhe avokati i Kadri Veselit, Rodney Dixon. Për klientin e Dixon, dëshmitari tha se nuk e ka parë dhe nuk e di se ku ka qëndruar.

Seanca pritet të vazhdojë pas pushimit me dëshminë e dëshmitarit të radhës./EO