Botë

Paralajmërimi i fundit” ndaj Hamasit, Trump kërkon lirimin e të gjitha pengjeve

Published

1 year ago

March 6, 2025

UBTnews

Presidenti Donald Trump ka lëshuar atë që e quan “paralajmërimin e fundit” ndaj Hamasit për të liruar të gjitha pengjet e mbetura në Gazë.

Presidenti amerikan shkroi në rrjetin ‘TruthSocial’, mes të tjerash, se po i “dërgonte Izraelit gjithçka i nevojitet për të përfunduar detyrën”. Më herët presidenti priti në Shtëpinë e Bardhë tetë ish-pengje.

Gjuha e ashpër vjen ndërsa Shtëpia e Bardhë tha të mërkurën se zyrtarët amerikanë janë angazhuar në “bisedime dhe diskutime të vazhdueshme” me zyrtarët e Hamasit, duke u tërhequr nga një politikë e kahershme e Shteteve të Bashkuara për të mos u përfshirë drejtpërdrejt në bisedime me grupin militant.

Konfirmimi i bisedimeve në kryeqytetin e Katarit, Doha, vjen pasi armëpushimi mes Izraelit dhe Hamasit mbetet i ekuilibruar. Ky është angazhimi i parë, që dihet, i drejtpërdrejtë mes Shteteve të Bashkuara dhe organizatës militante, që kur Departamenti i Shtetit e shpalli Hamasin organizatë të huaj terroriste në vitin 1997.

Zyrtarët izraelitë thonë se Hamasi mban në Gazë rreth 24 pengje të gjalla, përfshirë amerikanin Edan Alexander, dhe të paktën 35 trupa të pajetë.

Angazhimi i drejtpërdrejtë vjen pasi vazhdimi i armëpushimit në Gazë mbetet i pasigurt. Presidenti Trump ka sinjalizuar se nuk ka ndërmend të ushtrojë trysni ndaj Izraelit që të mos i rifillojë luftimet nëse Hamasi nuk pajtohet me kushtet e një propozimi të ri armëpushimi, të cilin izraelitët thonë se është hartuar nga i dërguari amerikan, Steve Witkoff.

Lajmet

Tërmet i fuqishëm me magnitudë 6.7 ballë godet Indonezinë

Published

3 minutes ago

June 16, 2026

UBT News

Një tërmet me magnitudë 6.7 ballë të shkallës Rihter ka goditur ishullin Sulawesi në Indonezi, ka njoftuar Shërbimi Gjeologjik i Shteteve të Bashkuara (USGS).

Sipas të dhënave, lëkundja sizmike ndodhi në një thellësi prej 10 kilometrash, duke u konsideruar një tërmet relativisht i cekët.

Deri më tani nuk janë raportuar viktima apo dëme të mëdha materiale, ndërsa autoritetet indoneziane nuk kanë lëshuar paralajmërim për cunami pas tërmetit.

Rajoni i Sulawesit mbetet një nga zonat më të prekura nga aktiviteti sizmik. Në vitin 2018, qyteti Palu u godit nga një tërmet i fuqishëm dhe cunami, fatkeqësi që shkaktoi mbi 4 mijë viktima.

/A.K/

Lajmet

Britania ndalon rrjetet sociale për personat nën 16 vjeç

Published

20 hours ago

June 15, 2026

UBT News

Kryeministri britanik Keir Starmer ka njoftuar se Britania do të ndalojë përdorimin e rrjeteve sociale për personat nën moshën 16 vjeç dhe do të vendosë kufizime edhe në platformat e lojërave dhe transmetimeve të drejtpërdrejta.

Sipas tij, masat e reja kanë për qëllim “kthimin e fëmijërisë” për të rinjtë dhe rritjen e sigurisë së tyre në internet. Ai ka përmendur platforma si Snapchat, TikTok dhe Instagram, si dhe faqe lojërash ku mundësohet komunikimi me të panjohur.

Starmer deklaroi se një ndalim i plotë është “zgjedhja e duhur”, duke shtuar se ndryshimet do t’u ofrojnë fëmijëve më shumë siguri, kohë dhe mundësi për zhvillim jashtë botës online.

Sipas planit, ndalimi do të përfshijë edhe platforma si YouTube, Facebook dhe X, ndërsa aplikacionet e mesazheve si WhatsApp dhe Signal nuk do të preken.

Qeveria britanike pritet të miratojë rregulloret deri në fund të vitit, ndërsa ndalimi i plotë parashikohet të hyjë në fuqi në pranverën e ardhshme.

/A.K/

Lajmet

Liderët evropianë mirëpresin marrëveshjen SHBA-Iran

Published

23 hours ago

June 15, 2026

UBT News

Liderët e Bashkimit Evropian kanë përshëndetur marrëveshjen e arritur mes Shteteve të Bashkuara të Amerikës dhe Iranit për përfundimin e luftës në të gjitha frontet, përfshirë Libanin, si dhe për rihapjen e Ngushticës së Hormuzit, një nga rrugët më të rëndësishme për furnizimet globale me energji, raporton “Euronews”.

Presidenti i Këshillit Evropian, António Costa, e ka cilësuar marrëveshjen si një hap të rëndësishëm drejt stabilitetit rajonal, duke theksuar nevojën për ndaljen e menjëhershme të konflikteve.

Edhe presidentja e Komisionit Evropian, Ursula von der Leyen, ka bërë thirrje për zbatim të shpejtë të marrëveshjes dhe respektim të sovranitetit të Libanit, duke paralajmëruar se nuk mund të ketë paqe të qëndrueshme pa stabilitet në rajon.

Përfaqësuesja e Lartë e BE-së për Politikë të Jashtme, Kaja Kallas, ka deklaruar se ministrat e jashtëm të BE-së do të diskutojnë rolin e bllokut në fazat e ardhshme të procesit të paqes.

Ndërkohë, presidenti francez Emmanuel Macron ka njoftuar se misioni ushtarak i Francës dhe Mbretërisë së Bashkuar për sigurinë detare në Ngushticën e Hormuzit është i gatshëm për dislokim, duke theksuar rëndësinë e lirisë së lëvizjes detare për ekonominë globale.

Sipas raportimeve, Ngushtica e Hormuzit ishte bllokuar në mënyrë efektive që nga fillimi i konfliktit, ndërsa ceremonia e nënshkrimit të marrëveshjes pritet të mbahet të premten në Zvicër.

/A.K/

Lajmet

Bie çmimi i naftës pas marrëveshjes mes SHBA-së dhe Iranit

Published

1 day ago

June 15, 2026

UBT News

Çmimi i naftës ka shënuar rënie të ndjeshme pas lajmeve për arritjen e një marrëveshjeje ndërmjet Shteteve të Bashkuara të Amerikës dhe Iranit.

Kontratat e ardhshme të naftës së papërpunuar Brent ranë me 4.02 për qind, duke arritur në 83.82 dollarë për fuçi. Ndërkohë, nafta e tipit US West Texas shënoi rënie prej 4.63 për qind, duke u tregtuar me 80.95 dollarë për fuçi.

Presidenti amerikan, Donald Trump, deklaroi se Ngushtica e Hormuzit do të rihapet për qarkullim dhe se bllokada detare amerikane ndaj porteve iraniane do të hiqet.

“Marrëveshja me Republikën Islamike të Iranit tani është e përfunduar. Urime të gjithëve. Unë autorizoj plotësisht hapjen pa pagesë të Ngushticës së Hormuzit dhe, njëkohësisht, autorizoj heqjen e menjëhershme të bllokadës detare të Shteteve të Bashkuara. Anijet e botës, ndizni motorët. Le të rrjedhë nafta”, ka shkruar Trump.

Sipas raportimeve, të dyja palët kanë shpallur përfundimin e menjëhershëm dhe të përhershëm të operacioneve ushtarake në të gjitha frontet, përfshirë edhe në Liban, ndërsa lajmi është konfirmuar edhe nga kryeministri i Pakistanit.

Rënia e çmimit të naftës vjen si reagim i tregjeve ndaj pritjeve për stabilizim të situatës në rajon dhe rikthim të furnizimeve normale globale me naftë.

/A.K/