Lajmet

Paradoksi i ‘Epokës Merkel’ në Ballkanin Perendimor

Falë ushtrimit të “pushtetit të butë”, Merkel ka arritur të udhëheq BE-në në kohë të vështira.

Published

4 years ago

September 15, 2021

Betim Gashi

Shkruan: Ditmir Bushati

Për pak ditë, gjermanët do t’i drejtohen kutive të votimit për të përcaktuar përbërjen e re të Bundestagut. Për herë të parë që nga viti 1949, Kancelarja nuk kërkon të rizgjedhet. Ajo do të tërhiqet pas 16 vitesh dhe deri tani ky është i vetmi lajm i sigurtë. Gjithçka tjetër mbetet enigmë, pasi aritmetika elektorale bazuar në vrojtimet e opinionit publik është e larmishme dhe nuk përjashton asnjë koalicion të mundshëm për drejtimin e vendit. Interesant është fakti se rreth 50% e gjermanëve kanë votuar paraprakisht përmes postës. E lartë është fasha e të pavendosurve. Ndërsa pritet që shumica prej tre milion votuesve për herë të parë të anojë drejt të Gjelbërve.

Vështruar në këtë kontekst, është e vështirë të parashikosh nëse zgjedhjet parlamentare në Gjermani do të sigurojnë vazhdimësi apo ndryshim me “epokën Merkel”. Cilido qoftë rezultati, në planin ndërkombëtar, qeveria e ardhshme duhet të trajtojë sfidën urgjente të margjinalizimit gjeopolitik me të cilën përballet BE-ja, në kushtet e një bote gjithnjë e më zeropolare.

Duhet theksuar se Merkel krijoi një mbështetje mbresëlënëse publike në Gjermani dhe një reputacion të padiskutueshëm në arenën ndërkombëtare, përfshirë rajonin tonë. Stili i politikës dhe vendimet e saj kanë reflektuar ndryshimet e rëndësishme që kanë ndodhur në shoqërinë dhe politikën gjermane, si dhe një dëshirë dërrmuese për të ruajtur status quo, për aq kohë sa është e mundur, e duke shmangur ndryshimet drastike.

Falë ushtrimit të “pushtetit të butë”, Merkel ka arritur të udhëheq BE-në në kohë të vështira, duke përballuar krizën financiare që thelloi hendekun zhvillimor mes veriut dhe jugut të Europës; krizën e refugjatëve dhe përplasjet për nivelin e sundimit të së drejtës brenda BE-së, që thelloi ndarjen botëkuptimore mes perëndimit dhe lindjes së Europës; kërcënimet e sigurisë në lindje të Europës si pasojë e veprimeve të Rusisë dhe ato në jugun e kontinentit për shkak të terrorizmit dhe ekstremizmit të dhunshëm; BREXIT; plasaritjet transatlantike, të cilat dolën më në pah me administratën e Presidentit Trump, dhe pandeminë.

Në disa raste, në funksion të ruajtjes së kohezionit brenda BE-së, Merkel-it i është dashur të tolerojë rrëshqitjen demokratike të evidentuar në disa vende anëtare të BE-së, apo dallgët nacionaliste të cilat kanë dëmtuar korpusin e vlerave dhe lirive mbi të cilat qëndron në këmbë ngrehina e BE-së. Situata brenda BE-së është projektuar në një mënyrë a tjetër edhe në Ballkanin Perëndimor, i cili mund të konsiderohet si oborri i saj.

Në këtë kontekst, largimi nga skena politike i Angela Merkel-it shoqërohet natyrshëm me pasiguri jo vetëm për Gjermaninë dhe Europën, por edhe për të ardhmen europiane të rajonit tonë. Nuk ka dyshim se Kancelarja Merkel, në nivel europian, është udhëheqësja më e interesuar dhe me nivelin e kuptimit më të plotë për Ballkanin Perëndimor. Vizitat e saj të herëpashershme në rajon, mesazhet e saj edhe në vizitën e lamtumirës në Beograd e Tiranë, nismat e prezantuara e të mbështetura prej saj për rajonin konfirmojnë rëndësinë që Gjermania i kushton anëtarësimit të vendeve të Ballkanit Perëndimor në BE, ndonëse duhet pranuar se rajoni nuk bën pjesë në listën e përparësive kryesore të Gjermanisë.

Në vitin 2005, pak para së të zgjidhej Kancelare e Gjermanisë, Angela Merkel, do të deklaronte në një intervistë për Frankfurter Allgemeine Zeitung se “me politikën e tanishme të zgjerimit, BE ka prekur limitin e aftësisë së saj për të integruar anëtarë të rinj”, duke kërkuar një fazë konsolidimi për BE-në para se kjo e fundit të mendonte për anëtarë të rinj.

Kjo klimë u reflektua në Strategjinë e Zgjerimit të nëntorit 2006, ku Komisioni Europian për herë të parë prezantoi benchmarks (kushte) si një instrument për të përmirësuar e monitoruar cilësinë e reformave gjatë procesit të anëtarësimit. Pjesë integrale e kësaj strategjie ishte dhe raporti i posaçëm mbi aftësinë e BE-së për të pranuar anëtar të rinj, ku theksohej se zgjerimi nuk duhet të pengojë aftësinë e BE-së për të thelluar procesin e integrimit dhe rritur efikasitetin e institucioneve të saj.

Për herë të parë në kornizën negociuese të vitit 2005 për Kroacinë dhe Turqinë u prezantua një kapitull i veçantë, kapitulli 23 – gjyqësori dhe të drejtat themelore, që së bashku me kapitullin 24 – drejtësia, liria dhe siguria, mbulojnë një gamë të gjerë të çështjeve që lidhen me sundimin e së drejtës, kryesisht me reformën në drejtësi, luftën kundër krimit të organizuar dhe korrupsionit. Në këtë mënyrë, prezantimi i benchmarks dhe i kapitullit 23 rezultoi efektiv për Kroacinë, duke u bërë vendi i parë që u përball me qasjen e re dhe arriti me sukses t’i përmbyll negociatat dhe procesin e anëtarësimit në BE.

Rëndësia e kapitujve 23 dhe 24 u përforcua nga Komisioni Europian, në Strategjinë e Zgjerimit të vitit 2011, ku u propozua një qasje e re përsa i përket prioritizimit të reformave në fushën e sundimit të së drejtës. Çështjet e sundimit të së drejtës u konsideruan si prioritare, e për rrjedhojë u vendos që kapitujt 23 dhe 24 të hapen të parët dhe të mbyllen të fundit, duke e shoqëruar të gjithë procesin e anëtarësimit.

Mali i Zi ishte i pari shtet që filloi bisedimet bazuar në këtë qasje të re. Tek rasti i Serbisë, për shkak të insistimit të Gjermanisë, BE-ja përfshiu në kornizën negociuese elementë që kanë të bëjnë me normalizimin e marrëdhënieve me Kosovën. Për pasojë, bisedimet filluan me kapitullin 35, duke i dhënë një rëndësi të madhe procesit të normalizimit të marrëdhënieve Serbi-Kosovë, që do të pasohej me njohjen e ndërsjellë. Në rastin e Shqipërisë, reforma në drejtësi do të kthehej në parakusht për fillimin e bisedimeve për anëtarësim në BE.

Në mënyrë të pashprehur BE-ja me insistimin e disa vendeve anëtare të mbështetura nga Gjermania “themeloi” një praktikë të pashkruar sipas së cilës nuk mund të hapen më shumë se dy kapituj përgjatë një presidence gjashtë mujore. Franca, nga ana tjetër, për arsye kryesisht të brendshme, kërkoi reformimin e mëtejshëm të procesit të zgjerimit, duke e bërë procesin e anëtarësimit në BE edhe më kushtëzues, jo automatik, e thuajse të ndryshëm për nga etapat dhe kërkesat me atë që kaluan vendet e Europës Qendrore dhe Lindore.

Kësisoj, i gjithë procesi i anëtarësimit në BE të vendeve të rajonit ngeci. Më flagrant është rasti i Shqipërisë dhe Maqedonisë së Veriut. Megjithëse i kanë përmbushur standardet për të filluar bisedimet për anëtarësim që prej qershorit të 2018-ës, ende nuk i kanë nisur ato. Kosova edhe pse ka vite që i ka përmbushur reformat që lidhen me procesin e liberalizimit të vizave vijon të jetë e izoluar. Një situatë e tillë me të drejtë shton pikëpyetjet për besueshmërinë e procesit të zgjerimit dhe nxit instinktet e së shkuarës, duke e mbajtur peng të ardhmen e rajonit.

Për të mos e lënë rajonin nën efektet e depresionit që mund të sillte mungesa e konkretizimit të procesit të zgjerimit, Kancelarja Gjermane shpalli në vitin 2014 “Procesin e Berlinit”, si një mundësi riangazhimi e BE-së me vendet e Ballkanit Perëndimor, në një kohë kur vetë BE-ja ishte më shumë e fokusuar në adresimin e krizave të brendshme dhe ku konteksti gjeopolitik me krizën në Ukrainë kishte evoluar ndjeshëm.

Asokohe mbizotëronte frika se Procesi i Berlinit mund të shërbente si zëvendësues i procesit të anëtarësimit në BE. Gjermania nga njëra anë dhe vendet e rajonit nga ana tjetër këmbëngulnin që për rajonin nuk ka alternativë tjetër përveçse anëtarësimit në BE. Duhet pranuar se Procesi i Berlinit ndryshoi disi rutinën e formatit të zgjerimit dhe vendosi theksin tek bashkëpunimi rajonal gjithëpërfshirës me nënshkrimin e deklaratës për adresimin e mosmarrëveshjeve dypalëshe dhe çështjeve të përfundimit të shtetësisë; me krijimin e Zyrës Rajonale të Bashkëpunimit Rinor bazuar mbi modelin franko-gjerman; Sekretariatit të Dhomave të Tregtisë të gjashtë vendeve të Ballkanit Perëndimor; dhe Zonës Ekonomike Rajonale, duke nxitur kështu marrëdhëniet ndërmjet agjentëve të ndryshëm shoqëror.

Në të njëjtën kohë, Procesi i Berlinit miratoi edhe agjendën e ndërlidhjes rajonale mes vetë vendeve të rajonit dhe me ato BE-së, me qëllim zbutjen e hendekut zhvillimor mes Ballkanit Perëndimor dhe BE-së. Përmes këtij procesi, Ballkani Perëndimor u vendos në hartën europiane të transportit dhe energjisë, ndonësë ende pa projekte të prekshme për qytetarët e rajonit dhe pa ndërlidhje me fqinjët pjesë e BE-së.

Po kështu, në Strategjinë e Zgjerimit të Komisionit Evropian të 2018-ës, e cila u mbështet nga drejtuesit e vendeve Anëtare të BE-së dhe atyre të vendeve të Ballkanit Perëndimor në Samitin e Sofias, u përvijuan 6 nisma të tilla si: transporti, ndërlidhja energjetike, agjenda digjitale, zhvillimi ekonomik e shoqëror, sundimi i së drejtës e siguria, dhe migracioni, më qëllim forcimin e bashkëpunimit ndërsektorial.

Mirëpo shtatë vjet pas prezantimit të kësaj nisme mund të thuhet se ajo është larg pritshmërive fillestare, ashtu sikundër procesi i anëtarësimit në BE. Së pari, procesi nuk ka arritur të zbusë mosmarrëveshjet dypalëshe apo çështjet e përfundimit të shtetësisë, të cilat pengojnë potencialin e vendeve të Ballkanit Perëndimor për bashkëpunim më të thelluar, çka do të përkthehej në më shumë mirëqënie dhe rritje ekonomike. Në të kundërt, në rajon u shfaqën prirje e tentativa për t’iu kthyer ideve të vjetra që i jepnin përparësi territoreve përkundrejt njerëzve, revizionimit të historisë, mohimit të gjenocidit dhe krimeve barbare të luftës, njehsimit të fesë me kombin si instrument përçarës e sundues përkundrejt fqinjëve. Në zmbrapsjen e këtyre tentativave, roli i Kancerales dhe Gjermanisë është i pazëvendësueshëm.

Së dyti, procesi nuk ka arritur të mobilizojë burimet e domosdoshme financiare për të adresuar hendekun ekzistues ndërmjet vendeve të Ballkanit Perëndimor dhe atyre të BE-së që kanë impakt të drejtpërdrejtë në ndërlidhjen rajonale. Për shembull, për ciklin buxhetor 2021-2027, i cili reflektohet në Planin e Investimeve Ekonomike për Ballkanin Perëndimor, vendet Anëtare të BE-së që rrethojnë rajonin tonë përfitojnë 11 herë më shumë fonde për frymë sesa vendet e Ballkanit Perëndimor. Kjo rrit pesimizmin tek qytetarët e rajonit, dhe shpie në humbjen e besimit për ndërtimin e një perspektive zhvillimore. Le ta themi troç, qytetarët nuk mund të ushqehen me kapituj, procedura burokratike të panumërta apo konferenca ndërqeveritare. Ato kanë nevojë të përqafojnë konkretisht zhvillimin e të bëhen kësisoj aktorë të transformimit rrënjësor të shoqërive tona.

Së treti, procesi nuk ka ofruar instrumente që përmirësojnë sistemin e qeverisjes, bazuar në sundimin e së drejtës, e as pronësinë ndaj reformave të vendeve të Ballkanit Perëndimor. Është e qartë se shoqëritë tona mbeten në thelb shoqëri me institucione të brishta, jo funksionale dhe ku beteja kryesore nuk është aq shumë me influencën e aktorëve të tretë sesa me metastazat e krimit të organizuar e korrupsionit që gërryejnë themelet e shoqërisë dhe rregullat e bashkëjetesës demokratike.

Së katërti, megjithëse një platformë ndërqeveritare, Procesit të Berlinit i mungojnë institucionet dhe një buxhet i mirëpërcaktuar në funksion të përmbushjes së angazhimeve çka do të zvogëlonte varësinë e disa prej vendeve të rajonit ndaj aktorëve të tretë, të cilët synojnë status quo-n.

Së pesti, “menuja” e procesit ka humbur disi fokusin fillestar të tij, duke mos arritur të adresojë tre sfida themelore më të cilat përballën vendet e rajonit: (i) demokracia; (ii) zhvillimi i qëndrueshëm ekonomik; (iii) kërcënimi demografik.

Ky është paradoksi i “epokës Merkel” në rajon. Prezencë dhe kuptueshmëri të pakrahasueshme me asnjë vend tjetër europian, por rezultate të pamjaftueshme, pasi integrimi i gjashtë vendeve të Ballkanit Perëndimor në BE do të ishte një hap drejt arritjes së finalitetit të BE–së, duke nënkuptuar konsolidimin e projektit të integrimit europian, në një hapësirë konkrete politike me një kufi të përcaktuar në rang kontinental.

Sipas vrojtimit të fundit të Këshillit Europian për Marrëdhënie me Jashtë (ECFR), shumica e qytetarëve europian besojnë tek Gjermania dhe kërkojnë një rol më të madh të saj në BE. Vrojtimet e kryera në vendet e Ballkanit Perëndimor konfirmojnë gjithashtu besimin e qytetarëve tek Gjermania dhe pritshmëritë për një angazhim më të madh të saj.

Tema e angazhimit më të madh të Gjermanisë në arenën ndërkombëtare është një temë gjithnjë e pranishme në qendrat kërkimore dhe institucionet vendimmarrëse. Në vitet 2012-2013 në Gjermani u zbatua një projekt nga Instituti gjerman për Çështjet Ndërkombëtare dhe Sigurinë, me pjesëmarrjen e një rrjeti të gjerë ekspertësh, në lidhje me elementët strategjik të politikës së jashtme gjermane. Analiza strategjike tregonte se “fuqia gjermane imponon një ripërcaktim të pozitës gjermane në marrëdhëniet ndërkombëtare” dhe se “Gjermania, fuqinë dhe begatinë që disponon ia detyron mbi të gjitha ekspansionit global ekonomik, ndaj duhet të veprojë në mënyrë aktive në nivel global”.

Kësaj teze i mëshon edhe një prej ministrave të jashtëm më energjik Joschka Fischer, i cili interesat politike dhe ekonomike të Gjermanisë i konsideron të ndërlidhura me një BE të fortë dhe të suksesshme. Sipas tij, Gjermania duhet t’i tejkalojë traumat e së kaluarës dhe fuqinë e saj ta vërë në funksion të krijimit të Europës së fuqishme nën udhëheqjen e saj.

Ndaj, dilema që kërkon përgjigje pas largimit të Angela Merkel-it nga skena politike është nëse për të përmbushur plotësisht rolin e udhëheqësit të Europës, konsolidimin e projektit të integrimit europian dhe fuqizimin e lidhjes transatlantike, Berlinit do t’i duhet të rishikojë ato parime të Merkelizmit që i bënë europianët dhe popujt e rajonit tonë të vendosin me të drejtë shpresat e tyre tek Gjermania.

(Ditmir Bushari ishte Ministër i Jashtëm i Shqipërisë)

Lajmet

Çmimet ndërkombëtare të UBT-së, një traditë mirënjohjeje e repsekti

Published

22 minutes ago

July 6, 2025

UBTnews

UBT ka tashmë mbi një dekadë që jep çmimet “Honorary Degree – Excellence in Leadership” dhe “Leadership Excellence Award” për personalitete të rëndësishme, vendore e ndërkombëtare, që kanë dhënë kontribut, në fusha të ndryshme, për Republikën e Kosovës.

Në këtë plan, si edhe në shumë fusha të tjera, UBT është një hap para institucioneve shtetërore, duke hapur shtigje bashkëpunimi, por edhe duke nderuar të gjithë ata që meritojnë më shumë se nderim, respekt e falënderim të përhershëm.

Po përkujtojmë në këtë shkrim çmimet që UBT ka dhënë në dhjetë vitet e fundit.

Më 21 maj të këtij viti, UBT ndau çmimin më të lartë institucional “Honorary Degree – Excellence in Leadership” për liderin dhe politikanin e njohur kanadez, Tony Clement.

Ky çmim i veçantë vjen si njohje për kontributin e tij të jashtëzakonshëm në fushën e udhëheqjes, inovacionit politik dhe bashkëpunimit ndërkombëtar.

Rektori i UBT-së, Prof. Dr. Edmond Hajrizi tha se ky çmim përfaqëson një nderim të veçantë për një personalitet me një përvojë të thellë në lidership dhe, njëkohësisht, për një mik të çmuar të Kosovës.

“Përmes këtij çmimi ne po nderojmë jo vetëm një personalitet me përvojë të pasur në lidership, por edhe një mik të Kosovës, i cili ka mbështetur vazhdimisht avancimin e vlerave demokratike dhe zhvillimin ndërkombëtar”, tha Rektori Hajrizi.

Politikani i njohur kanadez, Tony Clement, gjatë fjalës së tij, theksoi se ndjehej veçanërisht i nderuar për çmimin nga një institucion që përfaqëson përparimin, edukimin cilësor dhe të ardhmen. Ai vlerësoi Kosovën dhe UBT-në si shembuj të përkushtimit të sinqertë ndaj zhvillimit dhe integrimit ndërkombëtar, duke shprehur bindjen se këto vlera janë themeli i një bote më të bashkuar dhe të drejtë.

Në vitin 2024, UBT ndan çmimin “Leadership Excellence Award” për kryetarin e Bashkisë së Portos, Rui Moreira.

Në një ceremoni organizuar më 20 qershor, Rektori Edmond Hajrizi theksoi rëndësinë e kontributit të liderëve në përmirësimin e jetës shoqërore dhe zhvillimin e komuniteteve. Ai vuri në dukje se kontributi i kryetarit Moreira ka qenë thelbësor për zhvillimin e qytetit të Portos dhe ka shërbyer si një model frymëzimi për liderët e tjerë në Evropë dhe më gjerë.

Kryetari Rui Moreira, duke pranuar çmimin, shprehu mirënjohjen e tij dhe theksoi rëndësinë e bashkëpunimit ndërmjet institucioneve akademike dhe autoriteteve lokale.

Po më 2024, më 30 prill, UBT ndau çmimin më të lartë institucional për Rektorin e Trakya Üniversitesi, Prof. Dr. Erhan Tabakoğlu.

“Kemi kënaqësinë që në një ceremoni të veçantë, në emër të UBT-së, të ndajmë çmimin më të lartë institucional për Rektorin e Universitetit Trakya, Prof. Dr. Erhan Tabakoğlu, për kontributin e tij të jashtëzakonshëm në afirmimin, konsolidimin e vlerave, standardeve, si dhe lidershipin e treguar në promovimin dhe integrimin e universiteteve të Ballkanit”, tha në ceremoni Rektori Hajrizi.

Rektori Tabakoğlu falënderoi Rektorin Hajrizi për ndarjen e këtij çmimi, duke theksuar se, ndër të gjitha çmimet që ka marrë, ky çmim është më i rëndësishmi për të. Ai theksoi se, nga ky moment, Rektori Hajrizi është vëllai i tij, ndërsa UBT dhe Universiteti Trakya janë vëllazëruar.

Ndërsa, më 20 mars 2024, UBT nderoi z.David Phillips me çmimin më të lartë institucional “Leadership Excellence Award”

Çmimi iu nda David Phillips për kontributin e tij të jashtëzakonshëm në avancimin e partneritetit strategjik mes Kosovës dhe Shteteve të Bashkuara të Amerikës, si dhe për përpjekjet e vazhdueshme për të promovuar paqen, stabilitetin dhe zhvillimin në Kosovë.

Duke i bërë nder, Rektori Hajrizi e përshkroi David Phillips si një figurë jashtëzakonisht të rëndësishme në skenën ndërkombëtare, një diplomat dhe studiues i njohur për kontributin e tij të shquar në shumë fusha, sidomos në politikën ndërkombëtare dhe në promovimin e vlerave demokratike dhe të drejtave të njeriut.

Po kështu, më 17 shkurt, UBT nderoi me Çmimin Tradicional Honor Degree “Leadership Excellence Award”, Dr. Ernesto Madeo, kryetarin e Bashkisë së Shën Mitër Koronës (San Demetrio Corone), njëherit kryetar i Fondacionit të Institutit Rajonal të Komunitetit Arbëresh të Kalabrisë.

Në një ceremoni solemne, Rektori i UBT-së, Prof. Dr. Edmond Hajrizi ndau çmimin “Leadership Excellence Award”, për Dr. Ernesto Madeo, për të vlerësuar kontributin e tij dhënë në ruajtjen e traditës, të kulturës, të gjuhës dhe të identitetit kombëtar shqiptar, me theks të veçantë në Kalabri, por edhe ndër gjithë arbëreshët e Italisë.

Në dhjetor të vitit 2023, në bazë të vendimit të Këshillit Akademik, Presidenti i UBT-së, Prof. Dr. Edmond Hajrizi, ndau çmimin e nderit “Leadership Excellence Award”, për ish-presidentin e Republikës së Bullgarisë, Rosen Plevneliev.

Në fjalën e tij, Rektori Hajrizi falënderoi ish-presidentin Plevneliev për kontributin e tij, lidershipin e treguar në konsolidimin e brendshëm socio-ekonomik, si dhe në avancimin e shtetit të së drejtës.

“Kemi kënaqësinë të kemi sot, ish-presidentin e Republikës së Bullgarisë në Kosovë, në UBT, për t’i dhënë çmimin e nderit “Leadership Excellence Award”, gradën më të lartë që ka UBT. Ndarja e këtij çmimi për ish-presidentin Plevneliev është edhe një mesazh për të nderuar kontributin e tij të jashtëzakonshëm në avancimin e shtetit të së drejtës dhe lidershipin e treguar në konsolidimin e brendshëm socio-ekonomik”, tha Rektori Hajrizi.

“Nuk i harroj ndjesitë e mia të para në Kosovë. Janë kujtime shumë të mira dhe të jashtëzakonshme. Kosova gjithmonë ka qenë në zemrën time. Një popull aq i mrekullueshëm, punëtor, pozitiv. Unë vij gjithmonë këtu me zemrën plot. Dhe këtu ndihem si në shtëpi, e dua Kosovën. Ju falënderoj për nderimin me çmimin më të lartë universitar, dhe ju prezantoni institucioni më të mirë në Ballkan”, u shpreh Plevneliev.

Më 22 korrik 2023, UBT ndau çmimin “Leadership Excellence Award” për Dr. Judithanne Scourfiled Mclauchlan, në njohje të përkushtimit të saj në promovimin e shtetit të së drejtës dhe demokracisë.

Në ceremoni, Rektori Hajrizi vlerësoi lart kontributin e Dr. Judithanne Scourfiled Mclauchlanl në fushën e shkencave politike dhe për promovimin e vlerave demokratike dhe të angazhimit qytetar.

Dr. Judithanne Scourfield McLauchlan është profesoreshë e asociuar e Shkencave Politike dhe Drejtoreshë Themeluese e Qendrës për Përputhshmëri Qytetare në Universitetin e South Florida St. Petersburg, ku mëson lëndë të Qeverisjes Amerikane dhe Ligjit Publik.

Ndërsa më 19 maj 2023, UBT ndau çmimin Leadership Excellence Award për Damën e Luksemburgut, Tessy Antony de Nassau.

Këtë çmim rektori Hajrizi, i ndau Damës së Luksemburgut, Tessy Antony de Nassau për kontributin, përkushtimin dhe qëndrueshmërinë e madhe, si një avokate e zëshme për të drejtat e grave dhe një ambasadore e të drejtave të njeriut.

“Përkushtimi i Tessy Antony de Nassau për kauzat humanitare shërben si një motivim i madh, duke fuqizuar të drejtat e grave dhe fëmijëve, si dhe duke avokuar në barazitë shoqërore. Ne vendosëm të japim dhe të shpërblejmë me gradën e nderit – çmimin e ekselencës së lidershipit, si një mirënjohje ndaj angazhimit dhe punës së Dame Tessy Antony de Nassau në nisma të ndryshme sociale”, tha rektori Hajrizi.

Ndërsa, më 22 shkurt 2023, UBT dha Çmimin “Leadership Excellence Award” për Universitetet e Shqipërisë, për kontributin e pamohueshëm për krijimin e kuadrove profesioniste të Kosovës.

“Kontributi i Shqipërisë për arsimimin dhe edukimin e të rinjve nga Kosova është i pamohueshëm. Kujtojmë këtu vitin 1941, kur nga Shqipëria në Kosovë erdhën mbi 400 mësimdhënës dhe hapën shkolla shqipe e shpërndanë dituri, në një kohë kur analfabetizmi në Kosovë ishte shumë i lartë. Në kohët më të vështira, Universitetet e Shqipërisë përgatitën kuadro profesionale për Kosovën. Ky është një kontribut i paçmueshëm dhe që do të vlerësohet gjithmonë në Kosovë”, tha rektori Hajrizi.

Për këtë vlerësim të UBT-së, në emrin e universiteteve shqiptare, kryetari i Konferencës së rektorëve në Shqipëri, Artan Hoxha, u shpreh falënderues dhe mirënjohës ndaj UBT-së, duke theksuar nevojën e rritjes së bashkëpunimeve të reja në mes institucioneve arsimore në Kosovë dhe Shqipëri.

Ndërsa, në maj 2022, UBT ndau çmimin “Honor Degree – Leadership Excellence Award” për dy personalitetet e shquara, Christopher Hyland dhe Jim Xhema.

Në prani të shumë mysafirëve nga institucionet vendore dhe ndërkombëtare, përfaqësuesve të Rrjetit të Bizneseve të Diasporës Shqiptare, si dhe profesorëve dhe studentëve të UBT-së, rektori Hajrizi ndau këtë çmim për kontributin dhe përkrahjen e jashtëzakonshme dhënë popullit të Kosovës për liri dhe pavarësi, konsolidimin e miqësisë mes dy kombeve dhe shteteve, si dhe për ngritjen e vlerave shqiptare në Shtetet e Bashkuara të Amerikës.

“Kosova pati fatin që në ditët e vështira të kishte miq si Jim Xhema dhe Christopher Hyland, që i dhanë mbështetje të padiskutueshme aspiratës së kombit për liri, pavarësi dhe dinjitet kombëtar. Pjesë e rëndësishme e lidhjes mes Kosovës dhe Amerikës ishin zotëri Hyland dhe zotëri Xhema, të cilët me angazhimin e tyre kontribuuan që kjo miqësi të ishte e përhershme mes dy vendeve tona, e cila më vonë kulmoi me ndërhyrjen e NATO-s për lirinë e Kosovës, gjë që ishte e pamundur pa ndihmën e Shteteve të Bashkuara të Amerikës”, ka potencuar rektori Hajrizi.

Christopher Hyland është shprehur shumë i nderuar me vlerësimin që i ka bërë UBT dhe rektori Hajrizi, duke thënë se ndihet shumë i lumtur që sot Kosova ka institucionet të tilla të arsimit të lartë, që po nxjerrin gjenerata të reja, të cilat po kontribuojnë në zhvillimin e shtetit për të cilin ai ishte shumë i zëshëm për pavarësinë dhe lirinë e tij.

“Si universitet, UBT shërben si një pikëmbështetje e jashtëzakonshme e energjisë, duke ndërmarrë mijëra iniciativa, nga ku me anë të çdo të diplomuari kontributi i UBT-së është i lartë në secilën fushë. Kjo e bën të realizueshme angazhimin e secilit studentë në fushën e teknologjisë, inovacionit, shkencës, diasporës dhe në politikën e jashtme, kështu duke gjeneruar një shoqëri të begatë”, ka thënë Hyland.

Ndërsa, në dhjetor 2021, UBT nderoi kontributin e KFOR-it në Kosovë me çmimin “Excellence Leadership Award”.

Në motivacion thuhej se çmimi ndahet për kontributin e shquar në sigurimin e paqes dhe lirisë në vend, kjo falë edhe rezistencës dhe sakrificës së popullit shqiptar, si dhe kontributit të komunitetit ndërkombëtar, rolin gjatë vitit 1999 dhe këtej, mbështetjen e pareshtur të institucioneve të vendit dhe qytetarëve të saj, si dhe misionin human në Kosovë, UBT i ka ndarë çmimin “Excellence Leadership Award”, misionit paqeruajtës të NATO-s në Kosovë, KFOR.

Ndërsa, në dhjetor 2021, për kontributin dhe krijimtarinë e tij në kulturë, në ruajtjen dhe ngritjen e vlerave kombëtare, si dhe për veprimtarinë artistike, UBT i ka ndarë çmimin “Excellence Leadership Award”, kolosit të këngës së mirëfilltë shqipe, kantautorit Ilir Shaqiri.

Me këtë rast, rektori i UBT-së, Prof. Dr. Edmond Hajrizi, ka vlerësuar lartë veprën e kantautorit Shaqiri, duke thënë se përmes këngëve të tij është dhënë një kontribut i madh në promovimin e vlerave patriotike të kombit shqiptar.

Në dhjetor 2020, me çmimin “Excellence Leadership Award”, UBT nderoi drejtoreshën e Qendrës për Rehabilitimin e Viktimave të Torturës në Kosovë, Feride Rushiti.

Çmimi është ndarë nga rektori i UBT-së, Prof. Dr. Edmond Hajrizi, me rastin e 20-vjetorit të themelimit të UBT-së, dhe në kuadër të përmbylljes së vitit 2020. Ai tha se këtë çmim institucioni e jep për të nderuar personalitetet e ndryshme për kontributin e dhënë në sfera të ndryshme të jetës, sikurse Feride Rushiti.

Në shkurt 2020, me qëllim të vlerësimit të atributeve dhe ndihmës së dhënë Kosovës në aspektin akademik dhe jo vetëm, njëherësh respektimit të veprave të tij si profesor dhe si rektor, UBT ka vendosur ta nderojë rektorin e Universitetit “Fan S. Noli”, nga Korça, Ali Jashari, me çmimin “Excellence Leadership Award”.

Çmimi është ndarë nga rektori i UBT-së, Prof.Dr Edmond Hajrizi, me rastin e 12-vjetorit të Pavarësisë së Kosovës.

Profesori Jashari theksoi se ndjehet i nderuar me këtë çmim, ndonëse sipas tij, respekti i shprehur ndaj tij do të jetë një shtysë që ta mbajë edhe më të fuqishëm bashkëpunimin me UBT-në dhe Kosovën.

Ndërsa, në vitin 2018, UBT nderoi me Çmimin “Excellence Leadership Award” drejtoreshën e programeve për Evropë në Radion gjermane Deutsche Welle, për kontributin e saj të çmuar në fushën e gazetarisë, me theks të veçantë për ndikimin e saj në hapjen e shërbimit në gjuhën shqipe në Deutsche Welle.

Një vit më herët, më 25 tetor 2017, UBT nderoi me Çmimin “Excellence Leadership Award”, z. Jamie Shae.

“Suksesi me i madh për mua nuk është pavarësimi, por momenti kur pavarësimi të arrihet në tërësi, me integrimin e plotë të Kosovës në institucionet dhe ky është një  proces i pandalshëm për Kosovën. Kosova ka potencial të madh, por ky potencial është i pashfrytëzueshëm nëse nuk e zhvilloni tutje, sepse e ardhmja është edhe në duart tuaja”.

Këtë mesazh dhe porosi e dha Zëvendësndihmës Sekretari i Përgjithshëm për Sfidat në Ardhje të Sigurisë në shtabin e NATO-s, njëherësh ish-zëdhënës i NATO-së gjatë bombardimeve të vitit 1999, në Kosovë, dr Jamie Shae, me rastin e mbajtjes së konferencës: “E ardhmja euroatlantike e Kosovës”, të organizuar nga UBT, me ç’rast edhe nga rektori i UBT-së, Prof. Dr Edmond Hajrizi, iu nda Çmimi “Excellence Leadership Award”, çmim me të cilin UBT nderon personalitet më të njohura vendore e ndërkombëtare për kontributin e tyre në sfera të ndryshme të jetës.

Po këtë vit, UBT e nderon me çmimin “Excellence Leadership Award”, selektorin e reprezentacionit të xhudos së Kosovës, Driton Kuka.

Ndë, më 14 dhjeto 2017, Çmimi “Excellence Leadeship Award” iu nda profesoreshës së Universitetit të Floridës së Veriut dhe ish-togeres së Trupës së Infermierëve në Ushtrinë Amerikane, Linda Connelly.

Ajo u nderua me këtë çmim për hir të kontributit të dhënë për UBT-në dhe studentët e këtij institucioni dhe për të nderuar personalitetin dhe kontributin e saj jetësor në profesionin e infermierisë.
Connelly tha se ndjehet e nderuar dhe e lumtur për marrjen e këtij çmimi dhe se i tërë ky respekt i shprehur ndaj saj do të jetë një shtysë që ta mbajë edhe më të fuqishëm bashkëpunimin me UBT-në dhe Kosovën.

Ndërsa, në vitin 2016, UBT e nderoi me “Excellence Leadership Award” humanisten austriake, Dr. Marianne Graf.

Dr. Graf, pos aktiviteteve të shumta në Kosovë, ka treguar lidership edhe për ndihmën ndaj komuniteteve të tjera në nevojë.   Qysh në vitin 1992, duke parë varfërinë në Shqipëri dhe duke dashur t’i ndihmojë njerëzit atje, bashkë me bashkëshortin e saj, Wilhelm Graf, ka themeluar shoqatën e partneritetit, Shqipëri-Austri.

Ka zhvilluar mbi 100 projekte, si ndërtimi i shkollave, ambulancave shëndetësore, kopshteve të fëmijëve, banesave sociale, qendrave të edukimit, urave etj. Në Shqipëri ka shpërndarë mbi 30 mijë paketa familjare, veshmbathje e ushqime, për familjet e varfra.

Lajmet

Gol emocionues i Dembele, dedikim për Jota pas humbjes tragjike

Published

14 hours ago

July 5, 2025

UBTNews

Ousmane Dembele shënoi një gol të rëndësishëm në fitoren 2:0 të Paris Saint-Germainit ndaj Bayern Munchenit, duke ndihmuar ekipin e tij të kualifikohet në gjysmëfinalen e Kupës së Botës për Klube.

Pas golit, Dembele bëri një festim të veçantë, duke nderuar kujtimin e ish-futbollistit të Liverpoolit, Diogo Jota, i cili së fundmi humbi jetën tragjikisht në një aksident trafiku në Spanjë, së bashku me vëllain e tij, Andre Silva.

Kjo fitore përforcon pozicionin e PSG-së në turneun ndërkombëtar, duke u afruar drejt finaleve.

Lajmet

Dështoi edhe tentimi i 42-të, Kuvendi ende pa kryeparlamentar

Published

14 hours ago

July 5, 2025

UBTNews

Deputetët e Kuvendit të Kosovës nuk arritën të zgjedhin kryetarin e parlamentit edhe në tentimin e 42-të. Në këtë votim, vetëm 39 deputetë votuan pro krijimit të një komisioni që do të shqyrtojë mundësinë e votimit të fshehtë për zgjedhjen e kryeparlamentarit. Seanca u mbyll dhe pritet të vazhdojë pas dy ditësh.

Ndryshe nga herët e kaluara, votimi u zhvillua në një seancë që u mbajt në mbrëmje, pasi ajo e planifikuar për paraditen e së shtunës u shty për shkak të një alarmi të rremë për bombë në ndërtesën e Kuvendit.

Gjatë seancës, kryesuesi Avni Dehari ndërpreu fjalimet e deputeteve Ganimete Musliu nga PDK-ja dhe Jehona Lushaku nga LDK-ja, të cilat kërkonin rikthim të votimit në formë të hapur.

Që nga 15 prilli, deputetët janë mbledhur çdo dy ditë për të konstituar Kuvendin, por pa sukses. Lëvizja Vetëvendosje, si fituese e zgjedhjeve të 9 shkurtit, propozoi fillimisht Albulena Haxhiun për kryetare, por ajo nuk mori shumicën e votave. Më pas, VV-ja kërkoi ndryshim të mënyrës së votimit duke kaluar në votim të fshehtë.

Më 26 qershor, Gjykata Kushtetuese urdhëroi që Kuvendi të konstituohet brenda 30 ditëve. Megjithatë, interpretimi i këtij vendimi ka qenë i ndryshëm mes LVV-së dhe partive tjera. VV-ja argumenton se Kushtetuesja lejon ndryshimin e mënyrës së votimit, ndërsa partitë tjera kundërshtojnë këtë qëndrim.

Pas këtyre zhvillimeve, Partia Demokratike dhe Lidhja Demokratike i kanë drejtuar sërish Gjykatës Kushtetuese për sqarime të mëtejshme.

Lajmet

Gashi: Kryetari i Kuvendit duhet të zgjidhet me votim të hapur

Published

14 hours ago

July 5, 2025

UBTNews

Deputeti i Lidhjes Demokratike të Kosovës, Arben Gashi, ripotencoi qëndrimin se zgjedhja e kryetarit të Kuvendit duhet të bëhet me votim të hapur dhe se çdo ndryshim në procedurat kuvendare duhet të kalojë përmes mocionit procedural.

“Ndryshimi i çdo procedure kuvendare bëhet me mocion procedural. Mocioni procedural duhet të propozohet në seancë dhe të votohet së pari shmangia e rregullores me dy të tretat e deputetëve dhe pastaj ndryshimi i procedurës. Është e paarsyeshme të ndodhë diçka e tillë. Duhet të vazhdohet sipas vendimit që është marrë dhe mënyrës se si është votuar gjithmonë. Kryetari i Kuvendit duhet të zgjidhet me votën e hapur,” tha Gashi.

Ai u shpreh gjithashtu i qetë lidhur me situatën e sigurisë në Kuvend, pas paralajmërimit për një mjet shpërthyes.

“Policia dhe institucionet e sigurisë po e kryejnë punën e vetë. Ne të tjerët duhet t’i kryejmë punët tona,” deklaroi deputeti i LDK-së.

Seanca konstituive, e cila ishte paraparë të mbahej në orën 11:00, u shty për në orën 20:00 për shkak të paralajmërimit për një bombë brenda ndërtesës së Kuvendit. Pas kësaj, Policia e Kosovës kërkoi nga deputetët që ta lirojnë ndërtesën.