Lajmet

Pamjet e civilëve ukrainas, të ekzekutuar rrugëve, tronditin botën

Zelensky akuzoi trupat ruse për kryerjen e gjenocidit në vrasjen e civilëve në Bucha.

Published

4 years ago

on

DPA/ – Pamjet e varreve masive, makinave të djegura dhe trupave të pajetë të rreshtuara rrugëve në periferi të Kievit shkaktuan tronditje dhe zemërim midis liderëve perëndimorë, me shumë prej tyre që akuzuan Rusinë për krime lufte ndërsa realiteti i pushtimit të saj u bë i dukshëm.

Ukraina thotë se tani ka gjetur trupat e 410 civilëve nga qytetet periferike të Buchas dhe Irpenit, jashtë kryeqytetit Kiev, pas tërheqjes së trupave ruse.

Presidenti i Këshillit të BE-së, Charles Michel, i përshkroi vrasjet e civilëve si një masakër dhe njoftoi planet për të forcuar sanksionet ndaj Rusisë.

Kryeministri britanik Boris Johnson premtoi se do të bënte gjithçka në fuqinë e tij për të “fikur makinën e luftës së Putinit”, ndërsa kancelari gjerman Olaf Scholz tha se presidenti rus Vladimir Putin dhe mbështetësit e tij do të përballen me pasoja për veprimet e tyre, duke premtuar një raund të ri sanksionesh në ditët në vijim.

Presidenti ukrainas Volodymyr Zelensky akuzoi trupat ruse për kryerjen e gjenocidit në vrasjen e civilëve në Bucha.

“Kur gjejmë njerëz me duar të lidhura pas shpine dhe me kokë të prerë, nuk e kuptoj”, i tha ai transmetuesit amerikan CBS.

Rusia ka mohuar se forcat e saj ishin përgjegjëse për masakrën e civilëve në Bucha dhe thotë se pamjet e përhapura gjerësisht të trupave të vdekur të shtrirë në rrugë mund të jenë false.

Politikanët ukrainas akuzuan gjithashtu trupat ruse për dhunë seksuale ndaj grave dhe vajzave ukrainase.

Në një video të postuar në Twitter të dielën, Olexiy Goncharenko, një deputet, tha se trupat e grave të zhveshura ishin gjetur në anë të një rruge jo shumë larg Kievit.

“E kuptoni se çfarë ndodhi,” tha ai, duke shtuar se pas sulmit të grave, rusët kishin tentuar t’i digjnin trupat e tyre.

Kryetari i Irpenit, Oleksandr Markushyn, tha se gratë dhe vajzat në Irpen ishin qëlluar me armë zjarri, duke thënë për Deutsche Welle-n se më pas ato ishin goditur nga tanket.

Nuk pati asnjë reagim të menjëhershëm ndaj akuzave nga rusët.

Zemërimin fillimisht e shkaktoi një video e Ministrisë së Mbrojtjes të Ukrainës që tregonte trupat e disa njerëzve të shtrirë buzë rrugës, disa me duar të lidhura pas shpine.

Pamjet nga mediat ndërkombëtare në vend konfirmuan se ishin gjetur trupa të shumtë.

“Ju nuk mund të mos i shihni këto imazhe si një goditje në stomak”, i tha CNN-it sekretari amerikan i Shtetit Antony Blinken, duke theksuar se qeveria amerikane kishte arritur tashmë në përfundimin se trupat ruse po kryenin krime lufte në Ukrainë.

Sekretari i përgjithshëm i NATO-s, Jens Stoltenberg i tha transmetuesit amerikan CNN se vrasjet në Bucha ishin “një brutalitet kundër civilëve që nuk e kemi parë në Evropë për dekada”.

Duke komentuar tërheqjen e trupave ruse nga Kievi, Stoltenberg tha se kjo nuk ishte një tërheqje e vërtetë, por thjesht Rusia “po ripoziciononte” trupat e saj.

NATO tha se ishte e shqetësuar për një rinovim të mundshëm të sulmeve ruse, veçanërisht në jug dhe lindje të Ukrainës.

Kryenegociatori i Ukrainës në bisedimet e paqes me Moskën, David Arakhamia, tha në televizionin shtetëror se kishte shenja pozitive në bisedime dhe tha se një takim Zelensky-Putin në Turqi ishte gjithashtu i mundur.

Rusia, megjithatë, hodhi poshtë këtë optimizëm dhe kryenegociatori Vladimir Medinsky tha se ka ende shumë punë për të bërë.

Këshilltari presidencial ukrainas Olexiy Arestovych tha se ai priste që lufta të përfundonte pas “dy deri në tre javë”.

”Gjithçka tani varet nga rezultati i luftimeve në juglindje të vendit”, tha ai.

”Ushtria ruse nuk ka më asnjë rezervë”, pohoi këshilltari, sipas një raporti në faqen e lajmeve strana.news.

Ka pasur spekulime prej disa kohësh se Putini mund t’i japë fund luftës deri në kohën e festimeve ruse që shënojnë fundin e Luftës së Dytë Botërore, më 9 maj.

Related Topics:
Continue Reading

Lajmet

KSHZ: VMRO-DPMNE kryeson në 54 komuna, LSDM në 8, VLEN në 8 dhe AKI në 5 komuna

Published

8 minutes ago

on

October 20, 2025

By

Në zgjedhjet lokale në Maqedoninë e Veriut nga 75.37 përqind e votave të përpunuara, kandidatët për kryetarë të VMRO-DPMNE-së dhe Koalicionit kryesojnë në gjithsej 54 komuna, LSDM dhe Koalicioni në 8, Koalicioni VLEN në 8 dhe Aleanca Kombëtare për Integrim në 5.

Kandidati i ZNAM-it, Maksim Dimitrievski, kryeson në Kumanovë, Kurto Duduš nga Unioni i Romëve në Shuto Orizare, Arijan Ibraim nga Partia Demokratike e Turqve në Qendër Zhupë.

Në Strugë dhe Studeniçan, kryesojnë kandidatët e pavarur Mendi Qyra dhe Azem Sadiki.

Kandidatët për kryetarë të komunave të VMRO-DPMNE-së garojnë në Aerodrom, Berovë, Manastir, Bosilevë, Bërvenicë, Butel, Valandovë, Vasilevë, Vevçan, Veles, Vinicë, Gazi Babë, Gjevgjeli, Gjorçe Petrov, Gradsko, Debarcë, Dellçevë, Demir Kapijë, Dollek Ilinden, Jegunovce, Kavadar, Karbinci, Karposh, Kisella Voda, Kërçovë, Koçan, Kratovë, Mavrovë dhe Rostushë, Makedonska Kamenica, Makedonski Brod, Mogila, Negotino, Novaci, Novo Sellë, Ohër, Petrovec, Pehçevë, Prilep, Radoviçe, Staro Nagoriçan, Strumicë, Çucer Sandevë dhe Shtip.

LSDM dhe Koalicioni prijnë në komunat Bogdacni, Zërnovci, Konçe, Kriva Pallankë, Krivogashtani, Krushevë, Lozovë, Rosoman dhe Qendër.

Sipas të dhënave të deritanishme, kandidatët nga Koalicioni VLEN prijnë në komunat e Haraçinës, Bogovinës, Dibrës, Zhelinës, Sarajit, Tearcës, Tetovës dhe Çairit.

Kandidatët e AKI-së prijnë në komunat Vrapçisht, Gostivar, Likovë, Pllasnicë dhe Çashkë./S.K/KP/AlsatMK/

Continue Reading

Lajmet

​Aleanca Kombëtare për Integrim fiton bindshëm Gostivarin dhe Vrapçishte

Published

17 minutes ago

on

October 20, 2025

By

Aleanca Kombëtare për Integrim (AKI) ka fituar në Gostivar sipas rezultateve zyrtare në ueb faqen e Komisionit Shtetëror të Zgjedhjeve.

Kandidati nga radhët e AKI-së Valbon Limani ka marrë 60.75 për qind ose 16 mijë e tetë vota nga 115 vendvotime të numëruara deri më tash nga gjithsej 121 sosh.

Sebaedin Dauti nga koalicioni VLEN, ka marrë 4 mijë e 60 vota ose 15.41 për qind.

Në komunën Vrapçishte, kandidati Isen Shabani nga Aleanca Kombëtare për Integrim AKI ka fituar garën për kryetar të komunës duke marrë 6 mijë e 50 vota ose 88.13 për qind.

Kandidati nga radhët e VLEN-it Mehmet Seferi ka marrë 6.80 për qind ose 467 vota.

Ndërkaq,në Bogovinë kandidati nga radhët e VLEN-it ka marrë 48.83 për qind ose 5 mijë e 295 vota, ndërsa kandidati nga Aleanca Kombëtare për Integrim 5 mijë e 207 vota ose 48.02 për qind,

Sipas kësaj, Feti Abazi nga koalicioni VLEN dhe Besnik Emshi nga Aleanca Kombëtare për Integrim AKI do të garojnë në balotazh më 9 nëntor, pasi asnjëri prej tyre nuk ka marrë 50 për qind të votave të nevojshme në raundin e parë.

/S.K/KP/

Continue Reading

Lajmet

​Mickoski nga VMRO-DPMNE shpall fitoren në më shumë se 30 komuna

Published

19 minutes ago

on

October 20, 2025

By

Kreu i VMRO-DPMNE-së, Hristijan Mickoski shpalli fitoren në më shumë se 30 komuna, përfshirë edhe Strumicën e cila njihej si bastion i LSDM-së.

Mickoski tha se VMRO-DPMNE ka fituar edhe në Dellçevë, Berovë, Manastir, Shtip, Kavadar, Gjevgjeli, Sveti Nikollë, Ohër, Gazi Babë, Gjorçe Petroc, Resnjë dhe në shumë të tjera.

“Para nesh ka edhe dy javë, dy javë ku duhet ta rrethojmë ndryshimin që e filluam. Kemi fitore në mbi 30 komuna që në raundin e parë. Fituam bindshëm në raundin e parë në Strumicë, 20 vjet e kemi pritur këtë ditë”, tha ai./S.K/KP/AlsatMk/

Continue Reading

Lajmet

​Manchester United triumfon në derbin ndaj Liverpoolit

Published

22 minutes ago

on

October 20, 2025

By

Në kuadër të xhiros së tetë të Premier Ligës angleze është zhvilluar një nga ndeshjet më të zjarrta të sezonit, derbi mes Liverpoolit dhe Manchester Unitedit, i cili përfundoi me fitoren e “djajve të kuq” me rezultat 2:1.

Skuadra e trajnerit Ruben Amorim e nisi ndeshjen në mënyrën më të mirë të mundshme, duke kaluar në epërsi që në minutën e dytë me golin e Bryan Mbeumo, i cili shfrytëzoi një gabim në mbrojtjen e vendasve dhe mposhti portierin Alisson.

Liverpooli kërkoi me ngulm barazimin gjatë gjithë pjesës së parë, por pa sukses, ndërsa reagimi erdhi vetëm në minutën e 78-të, kur Cody Gakpo realizoi për 1:1 pas një aksioni të bukur ekipor.

Megjithatë, gëzimi i “The Reds” zgjati pak, pasi në minutën e 84-të mbrojtësi Harry Maguire u ngjit më lart se të gjithë në zonë dhe me një goditje të saktë me kokë shënoi golin e dytë për Unitedin, duke i dhënë skuadrës së tij një fitore të madhe në transfertë.

Pas këtij triumfi, Manchester United ngjitet në kuotën e 13 pikëve dhe renditet në vendin e nëntë të tabelës, ndërsa Liverpooli mbetet në pozitën e tretë me 15 pikë, duke humbur mundësinë për t’u afruar me kryesuesit.

Ky derbi konfirmoi se United po rikthehet gradualisht në formë, ndërsa për Liverpoolin, humbja në “Anfield” shërben si alarm për përmirësim në javët e ardhshme./S.K/KP/

Continue Reading

Të kërkuara