Ylli botëror me rrënjë shqiptare, Dua Lipa, ka shënuar një tjetër sukses të jashtëzakonshëm në karrierën e saj, duke vendosur një rekord historik në platformën muzikore Spotify.

Këngëtarja është bërë zyrtarisht artistja e parë femër në histori që ka katër albume me mbi 5 miliardë transmetime (streams) secili.

Sipas statistikave të publikuara së fundmi, Dua Lipa ka thyer një rekord të ri, duke dëshmuar se katalogu i saj muzikor vazhdon të dominojë në nivel global dhe të tërheqë miliona dëgjues në mbarë botën.

Suksesi i saj përfshin rrugëtimin nga albumi debutues deri te dominimi i skenës pop me albumin “Future Nostalgia” dhe projektet e saj më të fundit.

Hite si “New Rules”, “Don’t Start Now” dhe “Levitating” vazhdojnë të regjistrojnë miliarda dëgjime, duke e bërë Dua Lipën një nga artistet më të suksesshme të muzikës pop bashkëkohore.

Arritja e mbi 5 miliardë dëgjimeve për katër albume të ndryshme konfirmon ndikimin e saj afatgjatë në industrinë muzikore dhe suksesin që shkon përtej trendeve momentale./A.K/

Shoqata e Fermerëve Kosovarë të Qumështit ka protestuar këtë të hënë para Ministrisë së Bujqësisë, duke kërkuar zgjidhje urgjente për situatën e krijuar pas ndërprerjes së grumbullimit të qumështit nga fermat vendore.

Fermerët dolën në protestë me mjete bujqësore dhe derdhën qumësht para objektit të ministrisë, ndërsa mbanin pankarta me mbishkrimet “Mos na leni pa bukë” dhe “Mbroni prodhimet vendore”.

Sipas Shoqatës, vendimi për protestë u mor unanimisht në mbledhjen e mbajtur më 5 korrik, pasi, siç thanë, institucionet nuk kanë reaguar ndaj shqetësimeve të tyre.

“Protesta është e pashmangshme me situatën e krijuar për mosgrumbullimin e qumështit të freskët nga fermat tona, duke hasur në vesh të shurdhër tek akterët kompetentë”, thuhej në njoftimin e shoqatës.

Fermerët kanë paraqitur tri kërkesa kryesore: rifillimin e menjëhershëm të grumbullimit të qumështit, publikimin urgjent të rezultateve të analizave për të larguar dyshimet mbi produktet vendore dhe rikthimin e çmimit të mëparshëm të qumështit, me qëllim që të shmanget falimentimi i fermave.

Protesta vjen pas zhvillimeve të javës së kaluar, kur Agjencia e Ushqimit dhe Veterinarisë (AUV) njoftoi se gjatë një inspektimi në kompaninë “Vita” kishte konstatuar mospërputhje me legjislacionin në fuqi, pas verifikimit të dokumentacionit, kontrollit fizik të objektit dhe inspektimit të linjave të prodhimit.

Një ditë pas inspektimit, kompania “Vita” njoftoi ndërprerjen e përkohshme të punës, ndërsa drejtori i përgjithshëm, Artan Spahija, tha se vendimi ishte marrë nga bordi i kompanisë.

Ndërkohë, Komisioni inspektues i AUV-së bëri të ditur se gjatë kontrollit është konstatuar se fabrika kishte shkelur vendimin e Ministrisë së Bujqësisë që ndalon përdorimin e qumështit pluhur, vajit të palmës, hirrës dhe përbërësve të tjerë në produktet e qumështit. Sipas AUV-së, rezultatet përfundimtare do të bëhen të ditura pas analizave laboratorike./A.K/

Diagnostikimi i hershëm mbetet çelësi i suksesit në trajtimin e sëmundjeve të sistemit tretës, ndërsa Departamenti i Gastroenterologjisë në United Hospital po ofron shërbime të avancuara diagnostike dhe terapeutike, të mbështetura në teknologjinë më bashkëkohore dhe protokollet ndërkombëtare të mjekësisë.

United Hospital, nën drejtimin e Edmond Hajrizit, një prej emrave më të njohur në fushën akademike dhe të inovacionit teknologjik në Kosovë, po konsolidohet si një nga institucionet më moderne të kujdesit shëndetësor në vend. Vizioni i tij për të ndërthurur teknologjinë më bashkëkohore me ekspertizën mjekësore ka krijuar një model të ri të ofrimit të shërbimeve shëndetësore, të bazuar në cilësi, siguri dhe standarde ndërkombëtare.

Kontributi i Hajrizit në zhvillimin e teknologjisë dhe inovacionit është reflektuar edhe në modernizimin e infrastrukturës mjekësore të United Hospital, ku investimet në pajisje të avancuara diagnostike, trajtime moderne dhe staf të specializuar kanë ngritur ndjeshëm nivelin e shërbimeve që u ofrohen pacientëve.

Me shëndetin e qytetarëve të Kosovës si prioritet kryesor, United Hospital synon të ofrojë diagnostikim të saktë, trajtim cilësor dhe kujdes të integruar, duke krijuar kushte që gjithnjë e më shumë pacientë të gjejnë brenda vendit shërbimet mjekësore për të cilat dikur orientoheshin drejt klinikave jashtë Kosovës. Përkushtimi ndaj inovacionit, profesionalizmit dhe investimeve të vazhdueshme e pozicionon këtë institucion si një nga qendrat më perspektive të mjekësisë moderne në vend dhe në rajon.

Ndryshe nën kujdesin e Dr. Valon Hamzës, specialist i gastroenterologjisë, pacientëve u ofrohen ekzaminime të specializuara për diagnostikimin dhe trajtimin e sëmundjeve të stomakut, zorrëve, ezofagut dhe mëlçisë. Përmes pajisjeve moderne dhe metodave endoskopike të avancuara, realizohen kontrolle të detajuara që mundësojnë zbulimin e hershëm të patologjive dhe ndërhyrjen në kohë.

Shërbimet e departamentit përfshijnë vizita specialistike gastrohepatologjike, ekografi të abdomenit, gastroskopi dhe kolonoskopi diagnostike e terapeutike, si dhe procedura endoskopike për largimin e polipeve (polipektomi), ndalimin e gjakderdhjeve të brendshme dhe marrjen e biopsisë për analiza histopatologjike.

Sipas specialistëve të këtij departamenti, simptoma si dhimbjet e vazhdueshme të barkut, urthi, fryrja, çrregullimet e tretjes, gjakderdhjet ose ndryshimet në funksionimin e zorrëve nuk duhet të neglizhohen, pasi diagnostikimi i hershëm rrit ndjeshëm mundësitë për trajtim të suksesshëm dhe parandalon komplikimet serioze.

Përveç shërbimeve diagnostike dhe terapeutike, United Hospital ka përgatitur edhe pako të veçanta gastroenterologjike, duke përfshirë paketën e kontrollit me analiza laboratorike, paketën e kontrollit specialistik, si dhe gastroskopinë dhe kolonoskopinë me sedacion, me qëllim që pacientët të kenë qasje më të lehtë në kontrollet parandaluese.

Me staf të specializuar, pajisje të teknologjisë së fundit dhe përkushtim ndaj standardeve më të larta të kujdesit shëndetësor, Departamenti i Gastroenterologjisë në United Hospital synon të ofrojë diagnostikim të saktë, trajtim profesional dhe kujdes të vazhdueshëm për shëndetin e sistemit tretës, duke e vendosur pacientin në qendër të çdo shërbimi mjekësor./rajonipress/

Edicioni i 14-të i Festivalit të Arkitekturës në Kosovë (KAF) do të nisë të hënën, më 6 korrik, duke sjellë një program të pasur me ligjërata, punëtori dhe diskutime mbi sfidat e arkitekturës dhe urbanizmit në kohë krizash globale.

Tema e sivjetme e festivalit është “The City After – Design in an Age of Crises” (“Qyteti Pas – Dizajni në Kohë të Krizës”), e cila synon të nxisë debat mbi rolin e arkitekturës dhe dizajnit në periudha të pasigurisë, konflikteve dhe transformimeve të mëdha shoqërore.

Në kuadër të programit do të organizohen 13 ligjërata publike, tri punëtori me fokus në territoret palestineze, si dhe tri turne arkitektonike.

Për herë të parë, festivali ka hapur edhe një program bursash për arkitektë të rinj nga Palestina, të cilët do t’i bashkohen aktiviteteve duke udhëhequr punëtori dhe duke mbajtur ligjërata publike.

Sipas organizatorëve, tema e këtij viti trajton ndikimin e luftërave, krizave klimatike, paqëndrueshmërisë ekonomike, migrimit të detyruar dhe trazirave politike në zhvillimin e qyteteve, duke sfiduar profesionistët dhe qytetarët të reflektojnë mbi mënyrat e rindërtimit pas krizave.

“Në vend të kësaj, rindërtimi duhet të përballet me pyetje më të thella në lidhje me drejtësinë, qëndrueshmërinë, kujtesën dhe të ardhmen e jetës kolektive”, thuhet në deklaratën programore të festivalit.

Përmes ligjëratave, punëtorive, ekspozitave dhe diskutimeve publike, KAF 2026 synon të krijojë një platformë ndërkombëtare dialogu mbi mënyrën se si arkitektura dhe dizajni mund t’u përgjigjen sfidave të kohës, duke kontribuar në ndërtimin e qyteteve më të drejta, më të qëndrueshme dhe më shpresëdhënëse./A.K/