Organizata e Traktatit të Atlantikut të Veriut (NATO) ka nisur stërvitjet gjashtëjavore “Steadfast Dart 2025”, që po zhvillohen në Bullgari, Rumani dhe Greqi, duke testuar aftësinë e saj për t’u vendosur me shpejtësi në Evropën Lindore pa ndihmën drejtpërdrejtë të Shteteve të Bashkuara. Këto manovra, të cilat zhvillohen përpara përvjetorit të tretë të pushtimit rus të Ukrainës, përfshijnë rreth 10,000 ushtarë nga nëntë shtete dhe janë operacioni më i madh i planifikuar nga NATO për këtë vit.

Në stërvitje, marrin pjesë forca nga Rumania, Bullgaria, Greqia, Italia, Sllovenia, Spanja, Turqia, dhe Mbretëria e Bashkuar. Operacioni është i udhëhequr nga Britania, me rreth 2,600 ushtarë dhe 730 automjete. Gjatë manovrave janë angazhuar gjithashtu 17 anije, mbi 20 avionë dhe 1,500 automjete.

Stërvitjet synojnë përmirësimin e gatishmërisë dhe kapacitetit të NATO-s për të reaguar shpejt në situata krizash, siç është lufta në Ukrainë. Megjithatë, mungesa e një kontributi të drejtpërdrejtë nga SHBA-të është e dukshme, duke pasur parasysh shqetësimet që po shprehin shtetet evropiane për mbrojtjen kolektive dhe mbështetjen nga administrata e re amerikane, e udhëhequr nga Presidenti Donald Trump.

Në një kohë kur administrata Trump ka shprehur interes për të negociuar drejtpërdrejt me Rusinë për çështjen e Ukrainës, Sekretari i Mbrojtjes i SHBA-ve, Pete Hegseth, theksoi në Bruksel se shtetet evropiane duhet të rrisin shpenzimet e mbrojtjes dhe të kontribuojnë më shumë në financimin e luftës në Ukrainë./UBTNews/

Kryetari i Komisionit Qendror të Zgjedhjeve (KQZ), Kreshnik Radoniqi, ka parashikuar të enjten se procesi i numërimit të të gjitha votave për kandidatë për deputetë, do të mund të zgjasë deri në dy javë, ndonëse nuk është bërë ndonjë vlerësim i saktë.

Në mbledhjen e KQZ-së është bërë e ditur se tashmë ka nisur procesi i numërimit të votave për kandidatët për deputetë në 18 komuna, në tetë komuna numërimi pritet të nisë sot, ndërsa në 12 të tjera po bëhen përgatitje.

Kosova i ka mbajtur zgjedhjet e rregulla parlamentare më 9 shkurt.

Me Ligjin e ri për Zgjedhjet në Kosovë, të miratuar më 2023, votat për kandidatët për deputetë do të duhej të nisnin të numëroheshin në mëngjesin e 10 shkurtit, mirëpo zyrtarët e KQZ-së kanë përmendur problemet administrative si arsye për vonesat.

Drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala, ka thënë se shkaktarë për vonesat në numërim janë problemet në ofrim të shërbimeve të teknologjisë informative, siç është lidhja e kamerave me laptopë dhe monitorë.

Ai ka thënë se KQZ-ja është duke angazhuar profesionistë të teknologjisë informative nëpër këto komuna për të përmbushur aspektin e funksionalizimit.

Zyrtarë të KQZ-së i kanë bërë thirrje Buzhalës që të ketë gati një Plan B, në rast se sistemi do të vazhdojë të dështojë, apo të ketë probleme tjera me qasjen në të.

Ai ka garantuar që nëse në ditët në vijim problemet do të vazhdojnë të raportohen, atëherë KQZ-ja do t’i kthehet metodës së vjetër dhe do të hapë tender për t’i siguruar tre lloje formularësh, për të përmbyllur këtë proces sa më shpejt që është e mundur.

Megjithatë, zyrtarë të KQZ-së janë pajtuar njëzëri që të mos luftohet për shpejtësi, por për saktësi të rezultateve.

KQZ-ja është përballur me probleme me serverë edhe në ditën e zgjedhjeve, kur janë numëruar vetëm votat për subjekte politike. Disa kanë aluduar që faqja mund të ketë qenë shënjestër e ndonjë sulmi kibernetik.

Kryetari i KQZ-së, Kreshnik Radoniqi, ka thënë se nuk ka informacione shtesë, pasi tani rasti i takon Policisë së Kosovës dhe Prokurorisë së Shtetit.

Organizatat joqeveritare kanë fajësuar KQZ-në për problemet që kanë dalë prej nisjes së numërimit të votave.

Partitë në pushtet e kanë fajësuar Qeverinë, ndonëse ajo është kundërpërgjigjur, duke thënë se nuk është përgjegjëse për serverët e KQZ-së, dhe se softueri i është dhuruar KQZ-së nga Organizata për Siguri dhe Bashkëpunim në Evropë (OSBE), ndërsa akuzat drejt ekzekutivit i ka konsideruar përpjekje të ulët “për të shkaktuar huti, me qëllim që të ulet besimi në procesin zgjedhor dhe në rezultatin e tij”.

Pas 99 për qind të votave të numëruara, Lëvizja Vetëvendosje prin me mbi 40 për qind të votave, Partia Demokratike e Kosovës është e dyta me rreth 22 për qind të votave, Lidhja Demokratike e Kosovës e treta me 17 për qind të votave, pasuar nga koalicioni mes Aleancës për Ardhmërinë e Kosovës dhe Nismës Socialdemokrate me rreth 7 për qind të votave.

Asnjëra parti nuk i ka siguruar votat e nevojshme për të formuar Qeverinë – pasi nevojiten votat e 61 deputetëve – prandaj njohësit e çështjeve politike kanë paralajmëruar se Kosova mund të përballet me turbulenca politike në ditët dhe javët në vijim.

Kryeshefi i kompanisë “Pastrimi”, Petrit Reçica, ka mohuar akuzat e Komunës së Prishtinës se kompania po saboton procesin e menaxhimit të mbeturinave. Komuna ka pretenduar se “Pastrimi” ka sabotuar gjashtë kamionë të rinj dhe nuk ka shpërndarë 2500 kontejnerë.

Reçica ka sqaruar për KOHËN se kamionët janë funksionalë, por kanë probleme teknologjike dhe po operohen manualisht deri në rikodimin e tyre nga prodhuesi, pasi modeli aktual nuk njeh kontejnerët e përdorur në Prishtinë. Sa i përket kontejnerëve, ai ka theksuar se “Pastrimi” nuk mund t’i shpërndajë pa një leje zyrtare nga Komuna, duke refuzuar ftesat përmes mediave.

Ndërkohë, drejtori i Shërbimeve Publike, Bekim Brestovci, ka deklaruar se do të shqyrtohen mundësitë për ta tejkaluar situatën, duke theksuar se mungesa e kontejnerëve dhe sabotimi i kamionëve përbëjnë rrezik për shëndetin publik. Ai ka lënë të kuptohet se mund të ketë prapavijë politike pas kësaj situate.

Në një deklaratë për media, “Pastrimi” ka akuzuar Komunën për mbajtjen peng të dy kamionëve të mbeturinave, me qëllim që ato t’i dorëzohen një kompanie private. Kompania e ka quajtur këtë veprim keqpërdorim të pushtetit dhe ka akuzuar kryetarin Përparim Rama për manipulim të opinionit publik dhe krijimin e një krize artificiale.

Gjithashtu, “Pastrimi” ka mohuar pretendimet për dëmtimin e gjashtë kamionëve, duke theksuar se testimi publik ka treguar probleme teknike që kanë ekzistuar që nga blerja dhe se Komuna nuk ka marrë masa për t’i rregulluar. Sipas kompanisë, Komuna u ka dërguar një email zyrtar për shpërndarjen e kontejnerëve vetëm pas konferencës për media, kur u ballafaqua me pyetje nga gazetarët.

Në fund, “Pastrimi” ka theksuar se menaxhimi i mbeturinave po tentohet t’i jepet një kompanie private, duke rrezikuar vendet e punës të mbi 900 punëtorëve dhe duke aluduar se fondi prej 16 milionë eurosh mund të përdoret për qëllime të tjera./KOHA/

Gjatë dëshmisë së tij në Dhomat e Specializuara të Kosovës në Hagë, dëshmitari Sylejman Selimi deklaroi se Adem Jashari ka qenë figura kryesore e Ushtrisë Çlirimtare të Kosovës (UÇK) dhe nuk ka marrë urdhra nga Shtabi i Përgjithshëm, por ka dhënë urdhra dhe është konsultuar me të. Ai sqaroi se Jashari ka pasur kontakte të vazhdueshme me Shtabin e Përgjithshëm dhe me grupe të ndryshme të UÇK-së.

Gjykatësi e ballafaqoi Selimin me një deklaratë të mëparshme ku ai kishte thënë se çdo veprim ishte i planifikuar nga Shtabi i Përgjithshëm, por dëshmitari qëndroi në pohimin e tij se Jashari ishte udhëheqësi kryesor i UÇK-së dhe pa të nuk do të kishte Ushtri Çlirimtare.

Selimi mohoi të ketë raportuar ndonjëherë te Qeveria e Përkohshme e Kosovës gjatë kohës që ishte komandant i përgjithshëm i UÇK-së dhe tha se nuk kishte kontakte me anëtarë të Shtabit të Përgjithshëm përveç Bislim Zyrapit.

Ai pohoi se të akuzuarit Hashim Thaçi, Kadri Veseli, Jakup Krasniqi dhe Rexhep Selimi kanë pasur kontakte me Adem Jasharin para luftës. Procesi gjyqësor kundër tyre po zhvillohet mbi akuza për krime lufte dhe krime kundër njerëzimit, ndërsa të gjithë janë deklaruar të pafajshëm./UBTNews/