Shqipëria po hedh hapin e radhës drejt modernizimit financiar me nismën kombëtare “Cashless Albania 2030”, që synon të rrisë ndjeshëm përdorimin e pagesave digjitale nga qytetarët dhe bizneset.

Programi parashikon ndërtimin e një infrastrukture të avancuar, të sigurt dhe funksionale, ku terminalet POS, platformat online, pagesat me QR dhe transfertat e menjëhershme të bëhen pjesë e përditshmërisë.

Në tryezën e prezantimit të programit, Ministrja e Ekonomisë, Delina Ibrahimaj, theksoi se objektivi kryesor është rritja e përdorimit të pagesave elektronike dhe reduktimi i informalitetit në ekonomi.

Sipas saj, është e domosdoshme koordinimi i të gjitha iniciativave ekzistuese dhe bashkimi i aktorëve publikë e privatë për të arritur objektivat e përbashkëta.

“Ka iniciativa të ndryshme të cilat është e nevojshme t’i kokrrizojmë dhe t’i bashkojmë forcat për arritjen e objektivit. Qëllimi i programit është rritja e përdorimit të pagesave, reduktimi i informalitetit, përmirësimi i edukimit financiar dhe krijimin e një infrastrukture efikase elektronike, ku të gjithë aktorët të punojnë sëbashku, duke përmendur këtu terminalet, platformën qeveritare të pagesave apo QR kodin e përbashkët që duhet të na unifikojë të gjithëve. Ne duhet të kemi një komunikim të të dhënave zyrtare që ta ndihmojnë procesin e politikbërjes”, theksoi ajo.

Ministrja Ibrahimaj nënvizoi disa prej synimeve kryesore të “Cashless Albania 2030”.

“Rritja e përdorimit të pagesave elektronike në të gjithë vendin; Reduktimi i informalitetit dhe rritja e transparencës; Përmirësimi i edukimit financiar për qytetarët dhe bizneset; Krijimi i një infrastrukture efikase elektronike, me terminale POS dhe platforma të unifikuara; 60% e pagesave të jenë digjitale deri në vitin 2030; 100% e institucioneve publike të pranojnë pagesa elektronike“.

Ajo bëri të ditur se janë hartuar 12 masa konkrete, ndër të cilat përfshihet edhe krijimi i Këshillit për Pagesat Digjitale, një strukturë koordinuese që do të formalizohet me urdhër të Kryeministrit dhe që do të mbikëqyrë zbatimin e programit. Ministrja bëri të ditur se Këshilli për Pagesat Digjitale pritet të ngrihet zyrtarisht brenda muajit dhjetor, ndërsa mbledhja e parë synohet të zhvillohet më 19 dhjetor. Nga janari 2026, pritet të nisë implementimi i disa prej masave të para.

“Është një këshillë që do të formalizohet me një urdhër kryeministri, por që ka kompetenca të limituara dhe bëhet me qëllim të zbatimit të këtij projekti të përbashkët. Brenda muajit dhjetor dum të ngremë zyrtarisht Këshillin për Pagesat Digjitale dhe duam të propozojmë që mbledhja e parë e Këshillit të jetë në datën 19 dhe nga janari i 2026, presim fillimin e implementimit të disa prej masave”, tha Ibrahimaj.

Në këtë tryezë, Ministri i Financave, Petrit Malaj, theksoi se hapat e parë drejt reduktimit të parasë fizike tashmë kanë nisur, në përputhje me prioritetet e qeverisë dhe Paketën Fiskale që pritet të miratohet.

“Kemi filluar dhe jemi në linjë me prioritetet e vendosura nga qeveria, me Paketën Fiskale që po kalon. Janë ndërmarrë hapat e parë për reduktimin e cash. Është një objektiv i qeverisë që deri në vitin 2030 të eliminojmë cash, në mënyrë që të bëjmë një formalizim më të madh të ekonomisë shqiptare”, u shpreh Malaj./S.K/KP/

Protesta e radhës në mbështetje të çlirimtarëve të Kosovës që po mbahen në paraburgim në Hagë, raportohet se do të mbahet më 13 dhjetor në Shkup, lajm këtë të cilin e ka bërë të ditur Ali Ahmeti, kryetar i Bashkimit Demokratik për Integrime (BDI).

E për këtë ka reaguar kryeministri i Maqedonisë së Veriut, Hristijan Mickoski, duke thënë se nuk e mbështet këtë marsh.

“Me këtë protestë po mundohen të mobliziohen para Kongresit të partisë. Me këtë ata vetëm po e vërtetojnë se do ta kenë shumë të vështirë që në të ardhmen të gjejnë partner të koalicionit. Unë nuk e mbështes këtë ide dhe as nuk pajtohem me këtë marsh. Jam i bindur që as VLEN nuk do ta mbështesë”, u shpreh ai.

Pas kësaj, Organizata e Veteranëve të Luftës së UÇK-së ka thirrur për sot konferencë për media në ora 10:00 në Prishtinë. /S.K/KP/

Kylian Mbappé është shumë pranë një momenti historik te Real Madridi, ku ka shënuar 55 gola gjatë vitit 2025 dhe i duhen vetëm edhe katër që të thyejë rekordin e Cristiano Ronaldos, i cili në vitin 2013 shënoi 59 gola në një vit të vetëm.

Me pesë ndeshje të mbetura në kalendar, Mbappé e ka të gjitha mundësitë për ta kaluar legjendën portugeze.

Forma e tij fantastike u konfirmua edhe në mesjavë, kur shënoi dy gola dhe dha një asist në fitoren 3-0 kundër Athletic Bilbaos.

Ai ka 16 gola dhe katër asiste në LaLiga, shumë përpara Robert Lewandowskit të Barcelonës, i cili ndodhet i dyti me tetë gola.

Fillimi i tij te Real Madridi nuk ishte i thjeshtë pas largimit nga PSG në vitin 2024, por që prej fillimit të këtij viti Mbappé ka qenë krejtësisht i pandalshëm.

Dhjetori i jep edhe disa mundësi të tjera për të rritur numrat, pasi Real Madridi do të përballet me Manchester Cityn në Champions, me Sevillan e Alavesin në ligë dhe me një kundërshtar ende të panjohur në Kupën e Mbretit.

Sfida e parë e tij do të jetë ndeshja e së dielës kundër Celta Vigos, një skuadër në mes të tabelës. Rekordi i Ronaldos dukej i paarritshëm për shumë vite, por 2025-a e Mbappés e ka bërë të duket shumë afër thyerjes./S.K/KP/

Presidenti rus Vladimir Putin është në Delhi për t’u takuar me kryeministrin indian Narendra Modi dhe për të marrë pjesë në një samit vjetor të mbajtur nga të dy vendet.

Kjo është vizita e parë e Putinit në Indi që kur ai nisi pushtimin e tij të plotë të Ukrainës në vitin 2022 – Kremlini do të kënaqet duke demonstruar se përpjekjet perëndimore për ta izoluar atë kanë dështuar, shkruan redaktori ynë i Rusisë.

Ata do të zhvillojnë bisedime edhe të premten për një numër marrëveshjesh që janë në plan.

Takimi vjen muaj pasi SHBA-të e goditën Indinë me një tarifë shtesë prej 25% për blerjet e saj të naftës ruse.

Ai gjithashtu vjen në sfondin e përpjekjeve të SHBA-së për të ndërmjetësuar paqen por Putin paralajmëroi përsëri të enjten se Ukraina duhet të tërhiqet nga rajoni i Donbasit ose Rusia do ta pushtojë atë./S.K/KP/