Policia e Kosovës, përkatësisht Drejtoria për Hetimin e Trafikimit me Narkotikë në Prishtinë, ka realizuar me sukses operacionin e koduar “Delivery”, i cili rezultoi me arrestimin e pesë personave dhe sekuestrimin e një sasie të konsiderueshme të drogës dhe pajisjeve teknologjike.

Sipas njoftimit, aksioni nisi pas një pune intensive operative që identifikoi dy persona të dyshuar për shpërndarjen e marihuanës dhe kokainës në kryeqytet.

Gjatë zbatimit të planit taktik mesditën e së mërkurës në Veternik, të dyshuarit, të cilët po lëviznin me një veturë Golf 8, tentuan t’i shmangen policisë duke nisur një ndjekje me shpejtësi të lartë që përshkoi Fushë-Kosovën, Podujevën dhe përfundoi në hyrje të Vushtrrisë, ku edhe u prangosën nga njësitet policore.

Gjatë kontrollit të veturës dhe përgjatë rrugës ku të dyshuarit kishin hedhur pako me lëndë narkotike gjatë ikjes, policia sekuestroi mbi 3.3 kilogramë marihuanë dhe sasi të kokainës të ndarë në 25 qese.

Operacioni u zgjerua me bastisje në katër lokacione të ndryshme në Prishtinë, ku u gjetën edhe dy peshore digjitale, mbi 4 mijë euro para të gatshme, valuta të huaja, dy vetura dhe katër telefona celularë.

Sipas komunikatës, forenzika rajonale ka dokumentuar të gjitha provat në vendin e ngjarjes, ndërsa hetimet po vazhdojnë në bashkëpunim me Prokurorinë e Shtetit.

Një detaj i rëndësishëm i këtij operacioni ishte zbulimi i një hapësire të modifikuar si “Call Center” në njërin nga lokacionet e bastisura, ku u sekuestruan pesë laptopë. Për shkak të dyshimeve për krime kibernetike, në rast u përfshinë edhe hetuesit e specializuar të kësaj fushe, të cilët ndaluan një person të pestë të përfshirë në këtë aktivitet.

Me urdhër të prokurorit kujdestar, të gjithë të dyshuarit janë dërguar në qendrën e mbajtjes për 48 orë, ndërsa Policia e Kosovës ka rikonfirmuar përkushtimin e saj në luftën kundër narkotikëve dhe krimit të organizuar.

Policia e Kosovës ka njoftuar për arrestimin e një personi në Deçan, i cili dyshohet se ka kryer veprën penale të dhunimit para disa javësh.

Sipas raportit zyrtar, bëhet fjalë për një të dyshuar burrë kosovar, i cili është vënë në pranga pas hetimeve lidhur me rastin e raportuar nga viktima femër kosovare.

Ndërsa me urdhër të prokurorit, viktima është dërguar në Institutin e Mjekësisë Ligjore (IML) për ekzaminime mjekësore gjinekologjike.

Pas intervistimit të të dyshuarit, prokurori ka nxjerrë vendim që ai të dërgohet në mbajtje për procedime të mëtejshme hetimore.

Në raportin 24-orësh të Policisë së Kosovës bëhet e ditur se janë evidentuar dy raste të armëmbajtjes pa leje në qytetin e Vitisë dhe Kamenicës.

Në fshatin Tërpezë të Vitisë, një person ka dorëzuar vullnetarisht në stacionin policor një armë zjarri, pasi i kishte skaduar afati i lejes.

Ndërkohë, në fshatin Berivojc të Kamenicës, njësitet policore kanë realizuar një bastisje në shtëpinë e një të dyshuari, ku kanë gjetur dhe konfiskuar dy pushkë gjysmë-automatike, 100 fishekë dhe tetë karikatorë.

Lidhur me të dyja rastet është konsultuar prokurori kompetent, i cili ka udhëzuar që pas intervistimit të personave të dyshuar, ata të lirohen në procedurë të rregullt.

Në raportin 24-orësh të Policisë së Kosovës raportohet se është arrestuar një person i dyshuar për veprën penale “Mashtrim kompjuterik” në Prishtinë.

Sipas njoftimit, i dyshuari është shtetas i Republikës së Shqipërisë, i cili dyshohet se ka kryer veprime të jashtëligjshme përmes pajisjeve teknologjike.

Gjatë operacionit policor, në cilësi të provave materiale janë sekuestruar pesë llaptopë, katër telefona celularë dhe pajisje të tjera që dyshohet se janë përdorur për kryerjen e kësaj vepre. Lidhur me rastin, me vendim të prokurorit, i dyshuari është dërguar në mbajtje për procedime të mëtejshme ligjore.