UEFA do të mbajë këtë të enjte një takim urgjent online për të dhënë qëndrimin e saj përfundimtar lidhur me planin e presidentit të FIFA-s, Gianni Infantino, për t’ua shitur investitorëve privatë një pjesë të aksioneve të organizimit të Kupës së Botës.

Sipas propozimit të Infantinos, 20 deri në 30 për qind e aksioneve të Kupës së Botës do të transferoheshin te investitorë privatë përmes një kompanie simotër të quajtur FIFA Forward Enterprise. Në këmbim të mbështetjes, FIFA u ka premtuar përfitime të konsiderueshme financiare të gjitha 211 federatave anëtare.

Afati i fundit për federatat që të japin përgjigjen e tyre është 19 shtatori, por UEFA pritet ta refuzojë zyrtarisht propozimin në mbledhjen e sotme.

“Kemi mësuar se FIFA ka vendosur një afat kohor për federatat që të mbështesin propozimet, përndryshe oferta për pagesën e njëhershme do të tërhiqet. Kjo është e gjitha që duhet të dimë rreth këtij plani”, thuhet në reagimin e UEFA-s.

Një nga temat që pritet të diskutohet gjatë takimit është edhe mundësia e ndërmarrjes së masave më të ashpra, përfshirë një bojkot të mundshëm të Kupës së Botës, që do të nënkuptonte mos pjesëmarrjen e përfaqësueseve evropiane në turne.

Megjithatë, jo të gjitha federatat anëtare të UEFA-s ndajnë të njëjtin qëndrim. Federata e Futbollit e Republikës Çeke ka shprehur mbështetje për planin e FIFA-s.

“Ne shohim avantazhe pragmatike për futbollin çek”, ka deklaruar presidenti i federatës çeke, David Trunda.

Pavarësisht kësaj, pritet që UEFA të dalë me një qëndrim të qartë kundër planit të Infantinos, duke kundërshtuar përfshirjen e investitorëve privatë në organizimin e ngjarjes më të madhe të futbollit botëror.

D.L

Përzgjedhësi i Brazilit, Carlo Ancelotti, ka nisur të mendojë për të ardhmen e kombëtares, pavarësisht zhgënjimit nga eliminimi në fazën e 1/8 së finales të Kupës së Botës ndaj Norvegjisë.

Trajneri italian ka bërë të ditur se fokusi i tij tashmë është ndërtimi i një skuadre konkurruese për ciklin e ardhshëm katërvjeçar, duke i kushtuar vëmendje të veçantë futbollistëve të rinj dhe ekipit që do ta përfaqësojë Brazilin në Lojërat Olimpike “Los Angeles 2028”.

Sipas Ancelottit, Brazili nuk duhet të ndjekë modelin e kampiones së botës, Spanjës, apo të Francës, por të krijojë identitetin e vet.

“Ne nuk duhet të kopjojmë. Ne duhet të mësojmë se si mund të përmirësohemi”, ka deklaruar Ancelotti në një intervistë për AP.

Italiani theksoi se skuadra është e konsoliduar në mbrojtje dhe sulm, por ka nevojë për më shumë cilësi në repartin e mesfushës.

“Disa pozita janë të mbuluara mirë, në mbrojtje dhe sulm. Po shikojmë për përmirësim dhe zhvillim në mesin e mesfushorëve. Lojërat Olimpike mund të jenë një moment vendimtar”, u shpreh ai.

Ancelotti, i cili u rikthye në Brazil të dielën, ka dëgjuar shpesh për suksesin olimpik të vitit 2021 në Tokio, ku Brazili mposhti Spanjën 2:1 dhe mbrojti medaljen e artë. Megjithatë, nga ajo gjeneratë vetëm Bruno Guimarães dhe Matheus Cunha ishin pjesë e përfaqësueses braziliane në Kupën e Botës 2026.

Trajneri 67-vjeçar beson se investimi te talentët e rinj dhe zhvillimi i tyre do të jetë kyç për rikthimin e Brazilit në majën e futbollit botëror.

D.L

Fenerbahçe ka siguruar kualifikimin në raundin e tretë kualifikues të Ligës së Kampionëve, pasi eliminoi skuadrën polake Gornik Zabrze me rezultat të përgjithshëm 2:1.

Në ndeshjen e kthimit, të zhvilluar të mërkurën, gjiganti turk barazoi 1:1 me Gornik Zabrzen, rezultat që i mjaftoi për të avancuar falë fitores minimale 1:0 në takimin e parë.

Fenerbahçe kaloi në epërsi që në minutën e 12-të me Anderson Taliscan, ndërsa Michal Sacek barazoi shifrat në 1:1 në sekondat e fundit të pjesës së parë.

Me këtë rezultat, skuadra turke siguroi një vend në raundin e tretë kualifikues, ku do të përballet me kampionen austriake, Sturm Graz, në luftën për një vend në fazën “play-off” të Ligës së Kampionëve.

D.L

Chelsea nuk arriti të sigurojë një vend në garat evropiane për sezonin 2026/27, por stadiumi i saj, “Stamford Bridge”, mund të jetë sërish skenë e ndeshjeve të Ligës së Kampionëve.

Skuadra londineze e mbylli sezonin 2025/26 të Premier League në vendin e 10-të, duke mbetur jashtë Ligës së Kampionëve, Ligës së Evropës dhe Ligës së Konferencës. Arsenali, Manchester City, Manchester United, Aston Villa dhe Liverpooli siguruan pjesëmarrjen në Ligën e Kampionëve, ndërsa Bournemouthi dhe Sunderlandi u kualifikuan në Ligën e Evropës. Brightoni, që e përfundoi sezonin në pozitën e tetë, do të luajë në fazën kualifikuese të Ligës së Konferencës.

Megjithatë, sipas raportimit të The Standard, “Stamford Bridge” është një nga stadiumet që po shqyrtohen nga Shakhtar Donetsku për zhvillimin e ndeshjeve si vendas në Ligën e Kampionëve. UEFA vazhdon të mos lejojë organizimin e takimeve evropiane në Ukrainë për shkak të situatës së sigurisë të krijuar nga lufta, duke e detyruar klubin ukrainas të gjejë një stadium jashtë vendit.

Një zëdhënës i Shakhtarit ka konfirmuar se klubi është në negociata me disa stadiume në Mbretërinë e Bashkuar dhe Gjermani.

“Shakhtari aktualisht është në negociata me disa stadiume në Mbretërinë e Bashkuar dhe Gjermani për të siguruar një stadium ku do të zhvillojë ndeshjet e Ligës së Kampionëve sezonin e ardhshëm. Nuk do të komentojmë më tej derisa të merret një vendim,” ka deklaruar ai.

Përveç “Stamford Bridge”, në listën e opsioneve janë edhe “Gtech Community Stadium” i Brentfordit dhe “Craven Cottage” i Fulhamit.

Shakhtar Donetsku, kampion i Ukrainës për herë të 16-të dhe i drejtuar nga ish-futbollisti i Atletico Madridit dhe Barcelonës, Arda Turan, do ta nisë aventurën në fazën e ligës së Ligës së Kampionëve më 8 shtator. Sezonin e kaluar, skuadra ukrainase ndeshjet si vendase në këtë garë i zhvilloi në “Veltins Arena” në Gelsenkirchen të Gjermanisë.

D.L