Nënkryetarja e PDK-së, Vlora Çitaku, ka theksuar se është detyrë e Vetëvendosjes që të gjejë një zgjidhje për të zhbllokuar situatën politike në Kosovë. Ajo theksoi se debati i ditëve të fundit ka qenë i gabuar, duke shtuar se çështja nuk është nëse PDK ka ndryshuar qëndrim, por nëse ka pasur përpjekje nga ana e Vetëvendosjes për të zhbllokuar situatën.

“Po besoj që i tërë debati i këtyre ditëve të fundit është në mënyrë të gabuar. Nuk është çështja a ka ndërruar qëndrim PDK-ja, por a ka ndryshuar qëndrim dhe a ka përpjekje për zhbllokim nga ana e subjektit të parë parlamentar, Vetëvendosjes. Kjo parti duhet të zhbllokojë situatën”, tha Çitaku.

Malajzia ka hequr regjimin e vizave për shtetasit e Kosovës të cilët dëshirojnë të qëndrojnë në këtë shtet deri në 30 ditë.

Presidentja e Kosovës, Vjosa Osmani, nëpërmjet rrjeteve sociale, shprehu mirënjohje ndaj autoriteteve të Malajzisë për këtë vendim i cili vjen para vizitës së saj zyrtare në këtë shtet, gjatë javës së ardhshme.

“U jam thellësisht mirënjohës autoriteteve të Malajzisë për vendimin e tyre për të lejuar lirim nga vizat për të gjithë qytetarët e Republikës së Kosovës për qëndrime deri në 30 ditë. Ky hap i rëndësishëm, i kombinuar me hapjen e ardhshme të Ambasadës sonë në Kuala Lumpur gjatë vizitës sime javën e ardhshme, është një shenjë e qartë se lidhjet midis dy vendeve tona po forcohen çdo ditë e më shumë“, theksoi Osmani.

Osmani shkroi se mezi pret që të angazhohet me liderët shtetërorë javën e ardhshme për të punuar së bashku në thellimin e bashkëpunimit dhe për të avancuar interesat e përbashkëta.

Malajzia e njohu pavarësinë e Kosovës më 30 tetor të vitit 2008.

Kryetari i Nismës për Kosovën, Fatmir Limaj, ka theksuar se qëndrimi i partisë së tij për votimin e Albulena Haxhiut për kryetare të Kuvendit mbetet i pandryshuar.

Kjo deklaratë u bë para seancës konstituive të Kuvendit, e cila pritet të vendoste për këtë pozicion të rëndësishëm në institucione.

Limaj theksoi se Nisma ka një qëndrim të qartë dhe të qëndrueshëm në lidhje me këtë çështje, duke shtuar se asnjë ndryshim nuk ka ndodhur në politikën e partisë për këtë çështje të rëndësishme

Deputeti i Lidhjes Demokratike të Kosovës (LDK), Armend Zemaj, ka deklaruar se partia e tij do të vazhdojë të mos e mbështesë kandidaten e Lëvizjes Vetëvendosje (VV) për kryetare të Kuvendit të Kosovës.

“Sigurisht që do të votojmë kundër, derisa është kjo situatë që e ka sjellë Vetëvendosje, duke u sjellë sikur një parti që thuajse e ka fituar e vetme vullnetin e qytetarëve të Kosovës”, u shpreh Zemaj para seancës konstituive të Kuvendit.

Ai theksoi se për momentin nuk ekziston asnjë emër nga VV që do të mund të merrte përkrahjen e LDK-së, duke përjashtuar mundësinë e një kandidati konsensual.

“Nuk mund të ketë kandidat konsensual derisa arroganca dhe mënyra si bëhen politikat, si tenton kapjen e institucioneve, edhe konsensusi për ndonjë emër të përveçëm është i pamundur në këtë situatë”, përfundoi Zemaj.