Kampionia e Kosovës në basketboll, Trepça, humbi në rezultat shumë të ngushtë në përballjen me PAOK-un grek.

Në momentet e fundit, mitrovicasit nuk ia dolën dhe dueli u mbyll me rezultat 75-77.

Skuadra kosovare nuk ka fituar asnjë duel në edicionin e sivjetshëm të FIBA Europe Cup deri tani, ndërsa nga ana tjetër, grekët kanë pasur dy fitore e një humbje./S.K/KP/

Kryeministri Edi Rama deklaroi se progresraporti i publikuar dje nga Komisioni Evropian për vitin 2025 thotë shumë gjëra, por mbi të gjitha thotë që Shqipëria është në rrugën e duhur për të përmbyllur teknikisht negociatat brenda 2027-ës.

Në një konferencë të përbashkët për shtyp me ambasadorin e Bashkimit Europian, Silvio Gonzato, i cili i dorëzoi progresraportin e Komisionit Evropian, Rama tha se patjetër në këtë rrugë të duhur ka sfida në çdo hap, sfida dhe çështje për t’u adresuar jo vetëm në mënyrë sasiore, por edhe në mënyrë cilësore, shkruan ATSH.

Kryeministri vuri në dukje se raporti i progresit është një gotë e mbushur përgjysmë.

“Ajo që ne kemi bërë gjithmonë dhe do të bëjmë përsëri është që duke marrë të gjithë energjinë e nevojshme nga gjysma e plotë të fokusohemi me të gjithë energjinë e nevojshme tek gjysma bosh, në mënyrë që brenda 2027 ta përmbyllim këtë proces dhe në mënyrë që raporti i vitit 2027 të shkruajë: rekomandojmë anëtarësimin e Shqipërisë në Bashkimin Europian”, theksoi Rama.

Kreu i qeverisë u shpreh se ndjehet krenar që tanimë askush nuk harron të thotë që Shqipëria është në pararojë të këtij procesi së bashku me Malin e Zi dhe që më në fund Shqipëria është shembulli pozitiv që iu jepet edhe të tjerëve që duan të bëhen pjesë e familjes evropiane.

Ky është raporti për mua, vijoi Rama, të tjerat janë të gjitha pjesë të detajuara të një procesi ku ne i kemi kryer në një kohë rekord hapjen e 5 grup-kapitujve.

Kryeministri shprehu besimin se Shqipëria do të kryejë edhe hapjen e grup-kapitullit të gjashtë.

“Do ta mbyllim vitin me të gjithë grup-kapitujt e hapur”, tha Rama.

Kjo, shtoi Kryeministri, ka ardhur si rezultat i një fakti që e risolli në vëmendjen e të gjithëve.

“Në ‘vitet e poshtërimit’, siç unë i quaj dhe do t’i quaj gjithmonë ato vitet kur na e jepte Kadiu, por na e refuzonte Aliu, kur Komisioni rekomandonte hapjen e negociatave dhe për shkak të një, dy apo tre vendeve Këshilli nuk arrinte t’i hapte negociatat me Shqipërinë, ne jemi përgatitur për ditën kur negociatat do të hapeshin, kemi punuar njësoj sikur të ishin hapur”, nënvizoi Rama.

Për këtë arsye, theksoi Kryeministri, grupi ynë negociator ka shkëlqyer në këtë proces sepse nuk ka vajtur në tryezën e negociatave për të mësuar aty se çfarë duhet të bëjë, por ka qenë i mirëstërvitur gjatë periudhës 3-vjeçare të poshtërimit të Shqipërisë./S.K/KP/

Të paktën 114 persona kanë vdekur nga tajfunët më të fortë të këtij viti, ku shkaktoi përmbytje të mëdha në Filipinet qendrore. Presidenti i Filipineve, Ferdinand Marcos Jr., ka shpallur gjendje katastrofe në territor.

Stuhia ka përmbytur qytete të tëra në Cebu, ishullin më të populluar të rajonit, ku u raportuan 71 vdekje. 127 të tjerë janë të zhdukur dhe 82 të plagosur, sipas zyrtarëve.

Autoritetet provinciale të Cebu-s raportuan 28 vdekje të tjera, të cilat nuk u përfshinë në numrin e publikuar nga zyra kombëtare e mbrojtjes civile, sipas AFP-së.

Kalmaegi u nis nga Filipinet të enjten në mëngjes dhe po lëviz drejt Vietnamit qendror, ku banorët janë ende të tronditur nga përmbytjet që vranë dhjetëra persona./S.K/KP/BBC/

Chelsea pati një kohë të vështirë në Ligën e Kampionëve kundër Karabakh Agdam në Baku dhe arriti të barazojë me rezultat 2:2.

Ndaj kampionëve azerbajxhanas Karabakh Agdam, të cilët kishin arritur në fazën e ligës së Ligës së Kampionëve vetëm nëpërmjet kualifikimit, të kaltrit me vështirësi arritën një barazim.

Estevao solli Chelsea në epërsinë pas 16 minutash. Leandro Andrade barazoi shifrat në minutën e 29-të, ndërsa Marko Jankoviq në minutën 39 nga penalltia solli vendësit në epërsi të papritur.

Alejandro Garnacho, i cili hyri në fushë në pjesën e parë, barazoi për ekipin e Premier Ligës, në minutën e 52-të.

Pafos nga Qipro ka fituar ndeshjen e tyre të parë në Ligën e Kampionëve ndaj Villareal të Spanjës me rezultatin 1:0. Autor i golit të fitores ishte Derrick Luckassen në minutën e 46-të./S.K/KP/