Lajmet

OKB-ja kërkon 5 miliardë dollarë për Afganistanin për të ‘shmangur katastrofën’

OKB-ja tha se 4.4 miliardë dollarë nevojiteshin brenda Afganistanit.

Published

4 years ago

on

Kombet e Bashkuara thanë të martën se i duheshin 5 miliardë dollarë ndihmë për Afganistanin këtë vit për të shmangur një katastrofë humanitare dhe për t’i ofruar vendit të shkatërruar një të ardhme pas 40 vitesh vuajtje.

OKB-ja tha se 4.4 miliardë dollarë (3.9 miliardë euro) nevojiteshin brenda Afganistanit, ndërsa 623 milionë dollarë të tjera kërkoheshin për të mbështetur miliona afganë që strehohen përtej kufijve të tij. Sipas tyre, 22 milionë njerëz brenda Afganistanit dhe 5.7 milionë të tjerë afganë të zhvendosur në pesë vende fqinje kishin nevojë për ndihmë jetike këtë vit.

“Një katastrofë e madhe humanitare po afrohet. Mesazhi im është urgjent: mos ia mbyllni derën popullit të Afganistanit” – Martin Griffiths

“Na ndihmoni të rritemi dhe të shmangim urinë e përhapur, sëmundjet, kequshqyerjen dhe përfundimisht vdekjen”.

Prej kur talibanët morën kontrollin e Afganistanit, vendi është zhytur në kaos financiar, me inflacion dhe papunësi në rritje. Uashingtoni ka ngrirë miliarda dollarë të aseteve të vendit, ndërkohë që furnizimet me ndihma janë ndërprerë rëndë. Vendi gjithashtu pësoi thatësirën më të keqe në dekada në vitin 2021.

Ai tha se nëse realizohet kërkesa, do të ndihmonte agjencitë e ndihmës të rrisin shpërndarjen e ushqimit dhe mbështetjen e bujqësisë, shërbimet shëndetësore, trajtimin e kequshqyerjes, strehimoret emergjente, aksesin në ujë dhe kanalizime, mbrojtjen dhe arsimin.

Griffiths tha se pa ndihmën humanitare, vdekjet, uria dhe shpërnguljet e mëtejshme masive do të vazhdojnë në Afganistan.

Paratë do të shkojnë për 160 organizata joqeveritare, bashkë me agjencitë e OKB-së që ofrojnë ndihma. Disa do të përdoren për të paguar punëtorët e vijës së parë sic është personeli i kujdesit shëndetësor – por jo nëpërmjet administratës talibane.

Rreth tetë milionë fëmijë mund të humbasin arsimin e tyre sepse mësuesit kryesisht nuk janë paguar që nga gushti, përfundoi Griffiths.

Shefi i OKB-së për refugjatët, Filippo Grandi tha se qëllimi i pakos së ndihmës ishte të stabilizonte situatën brenda Afganistanit, duke përfshirë njerëzit e zhvendosur brenda vendit, duke parandaluar një vërshim të mëtejshëm të emigrantëve që iknin përtej kufijve të vendit./UBTNews/

Related Topics:
Continue Reading

Rajoni

Me shumicë votash, Vesa Shatri zgjidhet Kryetare e re e Këshillit Studentor të UBT-së

Published

14 hours ago

on

December 3, 2025

By

Këshilli Studentor i UBT-së ka zhvilluar procesin zgjedhor për përzgjedhjen e përfaqësuesve të rinj të studentëve, në një proces të drejtë, transparent dhe të monitoruar nga autoritetet akademike të institucionit. Me shumicë votash, Vesa Shatri është zgjedhur Kryetare e Këshillit Studentor të UBT-së, duke marrë besimin e studentëve për të udhëhequr strukturën përfaqësuese të tyre.

Në përbërjen e re të kryesisë, janë zgjedhur këta përfaqësues:

  • Kryetare: Vesa Shatri
  • Nënkryetare: Eliona Kastrati
  • Sekretar: Mal Shehu
  • Këshilli Akademik: Ema Spahija
  • Komisioni për Ankesa: Elena Jashanica
  • Komisioni i Cilësisë: Odesa Mala
  • Komisioni Disiplinor: Rizgjim Sejdiu
  • Komisioni i Etikës: Arianit Hasani

Procesi zgjedhor u mbikëqyr nga përfaqësues të lartë të UBT-së, përfshirë Prorektorin e UBT-së, Prof. Dr. Binak Beqaj, sekretarin e institucionit, Prof. Dr. Artan Tahiri, këshilltarin në Zyrën e Rektorit, Prof. Dr. Elmi Kelmendi, koordinatoren për Çështje Akademike në UBT, Mirlinda Jashanica, si dhe Ismije Pllana, nga zyra e sekretarit.

Zgjedhja e kryesisë së re vjen me synimin që përfaqësimi i studentëve të jetë sa më efektiv, gjithëpërfshirës dhe i orientuar drejt përmirësimit të vazhdueshëm të jetës akademike e studentore në UBT. Përfaqësuesit e rinj do të angazhohen për të qenë zëri i studentëve, për të adresuar kërkesat e tyre dhe për të bashkëpunuar ngushtë me menaxhmentin e institucionit.

Në fjalën e saj, Kryetarja e re, Vesa Shatri, falënderoi studentët për besimin dhe theksoi angazhimin e saj për të mbrojtur interesat e tyre dhe për të ndërtuar ura komunikimi të qëndrueshme mes studentëve dhe strukturave drejtuese të UBT-së.

Continue Reading

Lajmet

BE-ja i kërkon KPK-së zbatimin e plotë të reformave: Shteti ligjor, parakusht i domosdoshëm për integrim

Published

14 hours ago

on

December 3, 2025

By

Zyra e Bashkimit Evropian ka njoftuar se në takimin e zhvilluar me Këshillin Prokurorial të Kosovës, u është bërë thirrje të gjithë anëtarëve të tij t’i zbatojnë plotësisht reformat e KPK-së.

Në njoftimin e lëshuar nga kjo zyrë, thuhet se shteti ligjor është parakusht thelbësor për Bashkimin Evropian.

“Zyra e BE-së në Kosovë u bëri thirrje sot të gjithë anëtarëve të tij që të zbatojnë plotësisht dhe së bashku reformën e KPK-së, të sigurojnë ligjshmërinë e vendimeve të tyre, të veprojnë me integritet dhe të mbrojnë besimin e publikut në sistemin e drejtësisë”, thuhet në njoftim.

Pas shkarkimit të u.d. së kryeprokurorit Besim Kelmendi dhe përplasjeve brenda KPK-së, Zyra e BE-së dje ka kërkuar takim urgjent me të gjithë anëtarët.

Ndërsa tri organizata të shoqërisë civile kanë paralajmëruar për rritje të rrezikut të kundërligjshmërisë në KPK.

Për këtë arsye ato kanë kërkuar ndërhyrjen e gjykatës./EO

Continue Reading

Lajmet

​Certifikohet NISMA

Published

16 hours ago

on

December 3, 2025

By

Komisioni Qendror i Zgjedhjeve ka certifikuar sot subjektin politik Nisma Socialdemokrate, për pjesëmarrje në zgjedhjet e parakohshme parlamentare të 28 dhjetorit.

Drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala tha se Nisma ka përmbushur të gjitha kriteret sipas ligjit për zgjedhje dhe ka paguar taksën për certifikim.

“Periudha e certifikimeve politike ka përfunduar me 30 nëntor. Subjekti politik NISMA ka përmbushur kriteret për certifikim duke dorëzuar listën e nënshkrimeve dhe mbështetësve dhe ka paguar taksën për certifikim. Nuk ka gjoba nga PZAP, KQZ dhe Zyra”, tha Buzhala.

Më 2 dhjetor 2025, KQZ mori vendim për certifikimin e 22 subjekteve politike, 16 parti politike; tri koalicione, dy iniciativa qytetare dhe një kandidat i pavarur për pjesëmarrje në zgjedhjet e dhjetorit, ndërsa nuk e ka certifikuar Listën Serbe./KP

Continue Reading

Lajmet

Lista Serbe fton konferencë për media pas moscertifikimit nga KQZ

Published

16 hours ago

on

December 3, 2025

By

Lista Serbe, ka njoftuar se sot më 03.12.2025, në ora 15:00, në selinë e partisë do të mbajnë konferencë për media.

Sipas njoftimit, drejtuesit do të flasin për vendimin nga KQZ-ja i cili siç pretendojnë ata ka penguar pjesëmarrjen e subjektit në zgjedhjet e parakohshme parlamentare të 28 dhjetorit 2025, transmeton KosovaPress.

“Udhëheqja e Listës Serbe do të mbajë një konferencë të jashtëzakonshme për media, ku do të flasë për vendimin joligjor për të penguar pjesëmarrjen e Listës Serbe në zgjedhjet e parakohshme parlamentare më 28 dhjetor 2025” thuhet në njoftimin e partisë.

Ndërsa dje gjatë mbledhjes së dytë lidhur me përgatitjet për procesin zgjedhor, KQZ-së nuk ka certifikuar Listën Serbe për zgjedhjet e parakohshme parlamentare të 28 dhjetorit.

KQZ votoi certifikimin ndaras për partitë politike, meqë rast Lista Serbe me 2 vota për, 2 kundër dhe 7 abstenime nuk u certifikua./KP

Continue Reading

Të kërkuara