Sport

Oferta nga Barcelona për Christensen dhe transferimi i një mesfushori të ri, situata momentale te Chelsea

Raportohej se krerët e Chelseat për shkak të çmimit të lartë të Haaland refuzuan ta transferojnë atë.

Published

5 years ago

on

Në afatin kalimtar të transferimeve gjatë verës, kampioni evropian Chelsea arriti që ta transferoj yllin belg, Romelu Lukaku, duke refuzuar mundësinë për ta transferuar yllin e Dortmundit, Erling Haaland.

Raportohej se krerët e Chelseat për shkak të çmimit të lartë të Haaland refuzuan ta transferojnë atë, duke e shikuar opsionin e Lukakut si ideal për sulmin e tyre.

Por, kjo gjë e ka hendikepuar sulmuesin Timo Werner, i cili nuk është duke pasur minutazhë të mjaftueshme, ku edhe është spekuluar se gjermani mund të largohet nga skuadra e Thomas Tuchel.

Rreth kësaj situate ka folur gazetari i njohur Fabrizio Romano, i cili përmes një interviste me “TalkChelsea” ka treguar për të ardhmen e Werner, arsyen pse pista Haaland dështoi dhe situatën momentale të kontratave me mbrojtësit Christensen dhe Rudiger.

Fillimisht, Romano tregoi që Chelsea ishte i interesuar në Haaland, ku kishte pasur kontakte me agjentin e tij Mino Raiola, por shuma e lartë që e kërkonte Dortmundi bëri që “Blutë” të transferojnë Lukakun.

“Duke e ditur që në vitin 2022 Haaland ka një klauzolë lirimi prej 80 milionë eurosh, Chelsea kishte menduar që Dortmundi do ta pranonte një shumë në regjionin e 125 milionë eurove. Por kjo gjë nuk ndodhi pasi që Dortmundi nuk do ta pranonte kurrë këtë ofertë. Ata kërkonin 180 milionë për Haaland, dhe kjo është arsyeja pse Chelsea nuk ishte kurrë në bisedime të avancuara me të”, tha Romano.

“Kur e kuptuan situatën me Haaland, Chelsea vendosi për Lukakun. Në fakt, ata kishin përgatitur ofertën për Lukakun për javë të shumta, në një mënyrë top sekrete, me agjentët e lojtarit dhe klubin e Interit. Për këtë arsye, ata kishin një marrëveshje brenda 48 orëve me Lukakun. Mendoj që ishte strategji perfekte, dhe jo e lehtë”, shtoi Romano.

Romano vazhdoi me situatën e Timo Werner, duke thënë se ka gjasa që lojtari mund të largohet nga Chelsea.

“Werner është blerë që të jetë ylli i tyre për vite me radhë, por ai nuk tregoi paraqitje shumë të mira, dhe pastaj e transferuan Lukakun. Në anën psikike, nuk është e lehtë për të që të konsiderohet si Plani B. Për këtë arsye ekzistojnë shanset që Werner do të largohet nga Chelsea verën e ardhshme’, tha Romano.

Po ashtu, Romano ka treguar që skuadra e Chelseat është duke punuar që të arrijë marrëveshje mbi rinovimin e kontratave sa më shpejtë me mbrojtësit si Rudiger e Christensen.

“Situata e Rudigerit është shumë e qartë. Ai dëshiron një kontratë të rëndësishme. Para ardhjes së Tuchel, ai konsiderohej si njëri nga lojtarët e fundit në Chelsea, kurse pas Tuchel ai është duke kaluar nëpër momente fantastike. Nëse ai vazhdon me paraqitje të mira, Chelsea do t’i jap atë që kërkon, por momentalisht është shumë larg që marrëveshja të arrihet”, tha Tuchel.

“Sa i përket Christensen, ata kishin arritur marrëveshje në fund të gushtit, por në fund situata ndryshoi ku agjentët e tij filluan t’i propozojnë oferta nga klubet e tjera, ndër to edhe Barcelona, dhe tani vetë Christensen ka zgjedhur të ketë më shumë kohë për të menduar para se t’i thotë po Chelseat”, shtoi gazetari i njohur italian.

Për fund, Romano foli edhe për repartin e mesfushës, duke treguar që do t’i ofrohen kontrata të reja mesfushorëve si Kante dhe Jorginho, ku edhe tregoi se kampioni anglez ka shprehur interesim tejet serioz në shërbimet e yllit të Monacos Aurelien Tchouameni.

“Chelsea dëshiron që të transferojë një mesfushorë të ri në rolin e shkatërruesit. Aurelien Tchouameni është opsioni që ata preferojnë, ku edhe vazhdimisht janë në kontakte me agjentin e tij. Po ashtu, vetë lojtari do të dëshironte me çdo kusht kalimin në Premier Ligë, dhe Chelsea është i përfshirë në garën për të siguruar shërbimet e tij”, tha Romano.

Këto janë disa nga lajmet më të reja rreth klubit të Chelseat nga gazetari Fabrizio Romano, i cili konfirmoi që “Blutë” e Londrës do të hynë në këtë afat kalimtar të transferimeve me synimin për të përforcuar më shumë skuadrën, drejt garës për titullin e Premier Ligës angleze dhe atë të Ligës së Kampionëve.

Related Topics:
Continue Reading

Sport

Fundjava e shqiptarëve në Evropë, këto janë ndeshjet

Published

3 days ago

on

September 11, 2026

By

Futbolli evropian sjell sonte dhe gjatë vikendit disa përballje interesante ku në qendër të vëmendjes do të jenë edhe futbollistët shqiptarë.

Beşiktaş – Erzurumspor, ora 20:00. Mbrëmjen e së premtes e hapin Kristjan Asllani dhe Milot Rashica, të cilët me fanellën e Beşiktaşit do të kërkojnë një tjetër paraqitje të mirë ndaj Erzurumsporit. Tifozët shqiptarë do t’i kenë sytë te dyshja kuqezi, në një sfidë që Beşiktaşi synon ta kalojë me sukses.

Venezia – Fiorentina, ora 20:45. Pak më vonë në Itali, Albion Rrahmani me Venezian do të ketë përballë Fiorentinën. Sulmuesi shqiptar do të kërkojë të lërë gjurmë në këtë përballje dhe të ndihmojë skuadrën e tij në një sfidë aspak të lehtë.

Hoffenheim – Stuttgart, ora 15:30. Të shtunën, radha i vjen Fisnik Asllanit me Hoffenheimin, që pret Stuttgartin. Një përballje interesante në Bundesligë, ku Asllani synon të jetë protagonist dhe të ndihmojë Hoffenheimin për të marrë pikët e plota.

Sunderland – Arsenal, ora 21:00. Mbrëmjen e së shtunës vjen një nga ndeshjet më të mëdha të vikendit për tifozët shqiptarë. Granit Xhaka me Sunderlandin do të përballet me ish-skuadrën e tij, Arsenalin. Një sfidë me shumë emocione për mesfushorin shqiptar, i cili do të ketë përballë një kundërshtar të fortë dhe një duel që premton shumë spektakël.

Sassuolo – Juventus, ora 20:45. Vikendi mbyllet të dielën me Edon Zhegrovën dhe Juventusin, që udhëtojnë te Sassuolo. Zhegrova do të jetë një nga emrat që tifozët shqiptarë do ta ndjekin me interes, ndërsa Juventusi do të kërkojë një tjetër rezultat pozitiv në kampionat.

Pesë ndeshje, disa prej futbollistëve tanë më të njohur dhe plot emocione për t’u ndjekur. Nga Beşiktaşi te Juventusi, nga Xhaka te Zhegrova, shqiptarët janë sërish në qendër të vëmendjes në futbollin evropian.

D.L

Continue Reading

Sport

Fundjavë e zjarrtë në futboll, këto janë sfidat kryesore

Published

3 days ago

on

September 11, 2026

By

Futbolli i madh rikthehet me disa përballje që premtojnë spektakël. Në Premier League, të shtunën në ora 16:00, Aston Villa pret Nottingham Forest, në një duel ku të dyja skuadrat do të kërkojnë pikë të rëndësishme. Në të njëjtën orë, Chelsea përballet me Hull Cityn në Stamford Bridge, me londinezët që synojnë të marrin fitoren para tifozëve të tyre. Po në ora 16:00, Liverpooli pret Fulhamin në Anfield, një sfidë ku vendasit do të kërkojnë të vazhdojnë me rezultate pozitive.

Aksioni nis që sonte në La Liga, ku Sevilla përballet me Valencian në ora 21:00. Një duel tradicional i futbollit spanjoll, ku të dyja skuadrat do të kërkojnë tri pikët dhe një paraqitje bindëse.

Këto janë vetëm disa nga ndeshjet më interesante të përzgjedhura për këtë fundjavë, me Premier League dhe La Liga që premtojnë emocione, duele të forta dhe shumë spektakël për tifozët e futbollit.

D.L

Continue Reading

Sport

Dita e parë pa sukses për xhudistët e Kosovës në Budapest

Published

3 days ago

on

September 11, 2026

By

Xhudistët e Kosovës kanë nisur të premten garimin në Grand Slamin e Budapestit, por dita e parë nuk solli rezultate pozitive.

Në kategorinë deri në 52 kilogramë, Fatjona Kasapi u eliminua që në luftën e parë. Ajo pësoi humbje me Ippon nga italiania Kenya Perna.

Në kategorinë deri në 57 kilogramë garoi Flaka Loxha, e cila po ashtu u ndal në duelin e parë. Loxha u mposht me Ippon nga japonezja Haruka Funakubo.

Garat për xhudistët kosovarë vazhdojnë të shtunën, kur në tatami do të paraqiten Laura Fazliu, Akil Gjakova dhe Dardan Cena.

D.L

Continue Reading

Sport

Kartal jep dorëheqjen pas incidentit me shishen, por Yildirim e refuzon

Published

3 days ago

on

September 11, 2026

By

Trajneri i Fenerbahçes, Ismail Kartal, dha dorëheqjen pas incidentit të pakëndshëm gjatë ndeshjes ndaj Romës në Ligën e Kampionëve, ku një tifoz e goditi me shishe në kokë. Takimi në Stamboll përfundoi me rezultatin 1:1.

Kartal e bëri të ditur vendimin për largim gjatë konferencës për shtyp pas ndeshjes, duke thënë se nuk kishte ndërmend të kthehej më në postin e tij.

“Po largohem për të mos u kthyer më. E kam marrë këtë vendim për t’ia qartësuar rrugën klubit”, deklaroi 65-vjeçari.

Megjithatë, dorëheqja e tij nuk u pranua nga presidenti i klubit, Aziz Yildirim. Kreu i Fenerbahçes konfirmoi se Kartal do të vazhdojë të jetë trajner i skuadrës dhe i dha atij mbështetje të plotë.

“Disa tifozë hodhën një shishe në kokën e trajnerit gjatë ndeshjes. Ai është i shqetësuar për këtë”, tha Yildirim.

“Kam folur me Ismail Kartal. Ai përmendi incidentin me shishe, por gjithashtu është ankuar se është nën presion”.

I pyetur nëse Kartal kishte vendosur të qëndronte në detyrë, Yildirim u përgjigj:

“Nuk ka nevojë që ai të thotë se do të vazhdojë. Unë jam eprori i tij. I kam thënë të vazhdojë dhe kjo është e gjitha. Ne jemi familje”.

Ndërkohë, Fenerbahçe ka njoftuar se personi që hodhi shishen në drejtim të trajnerit është identifikuar dhe i është ndaluar hyrja në stadium.

Yildirim foli edhe për presionin e madh që po përjetojnë trajneri dhe skuadra, pavarësisht se objektivi i parë i sezonit – rikthimi në Ligën e Kampionëve – është arritur.

Kartal ka një histori të gjatë me Fenerbahçen. Ai kaloi një dekadë si futbollist i klubit dhe më pas e drejtoi skuadrën në sezonin 2014/15, ndërsa në sezonin 2021/22 ishte trajner i përkohshëm. Në sezonin 2023/24 u rikthye sërish në krye të ekipit.

Ai kishte qenë edhe pjesë e stafit teknik kur Fenerbahçe fitoi dy titujt e fundit të kampionatit, ndërsa për herë të katërt mori drejtimin e skuadrës në qershor.

D.L

Continue Reading

Të kërkuara