UBT vazhdon të jetë një institucion lider në ofrimin e përvojave praktike për studentët, përmes bashkëpunimeve me institucionet më të rëndësishme në vend. Në këtë kuadër, është realizuar me sukses një vizitë studimore në Autoritetin Rregullativ të Komunikimeve Elektronike dhe Postare (ARKEP), me pjesëmarrjen e studentëve të vitit të katërt të Fakultetit Juridik.

Kjo vizitë përbën një aktivitet të rëndësishëm edukativ, që synon të forcojë lidhjen mes teorisë dhe praktikës, duke i mundësuar studentëve të njihen nga afër me funksionimin real të një institucioni shtetëror me rol të rëndësishëm në garantimin e rregullsisë dhe transparencës në fushën e komunikimeve elektronike dhe postare në Kosovë.

Gjatë vizitës, studentët patën mundësi të bashkëbisedojnë me ekspertë të ARKEP-it, të cilët ofruan një pasqyrë të qartë mbi kompetencat ligjore të këtij autoriteti, sfidat me të cilat përballen në rregullimin e tregut, si dhe rëndësinë që ka ky institucion në mbrojtjen e të drejtave të konsumatorëve dhe promovimin e konkurrencës së ndershme.

Ky aktivitet është pjesë e përpjekjeve të vazhdueshme të UBT-së për të promovuar programin Juridik si një program cilësor, i cili përgatit juristë të aftë për të kontribuar në sistemin ligjor dhe institucional të vendit. Studentët e këtij programi nuk marrin vetëm dije teorike, por pajisen edhe me shkathtësi praktike përmes vizitave, punëtorive dhe praktikave profesionale, duke u bërë kështu më të përgatitur për tregun e punës dhe sfidat profesionale që i presin.

Në UBT u mbajt Akademi Përkujtimore për Prof. Dr. Naser Kamberin, nën patronatin e Rektorit të UBT-së, Prof. Dr. Edmond Hajrizi. Kjo ngjarje u organizua për të nderuar jetën, veprën dhe kontributin e jashtëzakonshëm të profesor Kamberit – një ndër figurat kyçe të arsimit të lartë dhe një intelektual që dha gjithçka për përparimin e dijes dhe zhvillimin e studentëve në Kosovë e më gjerë.

Në hapje të ceremonisë, pas pritjes së të ftuarve dhe një minute heshtjeje në nderim të profesorit, fjalën e mori Rektori i UBT-së, Prof. Dr. Edmond Hajrizi, i cili theksoi kontributin e veçantë të prof. Kamberit në ndërtimin e programeve akademike dhe ngritjen e kapaciteteve shkencore në institucion:

“Profesor Naser Kamberi ishte një prej themeleve të fuqishme të UBT-së në fushën e shkencave të agrikulturës dhe mjedisit. Ai ishte shembull frymëzues i përkushtimit, dijes dhe vlerave të larta profesionale. Kontributi i tij nuk do të harrohet kurrë – ai jeton në brezat e studentëve që ai edukoi me aq dashuri”.

Në vijim, për jetën dhe kontributin profesional të profesorit foli edhe Dekani i Fakultetit të Inxhinierisë së Agrikulturës dhe Mjedisit, Prof. Dr. Fidan Feka, i cili lexoi jetëshkrimin e të ndjerit dhe ndau disa kujtime të veçanta:

“Profesor Kamberi ishte një njeri me shpirt të madh dhe dije të thellë. Ai i qasej çdo sfide me seriozitet dhe përkushtim të pashoq, dhe ishte gjithmonë i gatshëm të ndihmonte studentët dhe kolegët e tij. Kemi humbur një njeri të urtë dhe të pazëvendësueshëm”.

Në emër të institucioneve lokale, fjalën e mori Zëvendëskryetari i Komunës së Preshevës, Ragmi Mustafa, i cili u shpreh:

“Presheva ndjehet krenare që pati një personalitet si profesor Kamberi. Ai ishte ambasador i dijes, bashkëpunimit dhe integrimit akademik në mbarë hapësirën shqiptare. Trashëgimia e tij do të vazhdojë të jetojë në çdo student që ndoqi rrugën e tij”.

Akademia Përkujtimore u përmbyll me emocione, reflektim dhe mirënjohje të thellë për figurën dhe veprën e prof. Dr. Naser Kamberit – një njeriu që i dha arsimit më shumë se një jetë, duke frymëzuar breza të tërë përmes dijes, përkushtimit dhe vizionit të tij.

Në ambientet e Bibliotekës në Parkun Shkencor, Inovativ dhe Teknologjik të UBT-së në Lipjan, u organizua Akademia Përkujtimore në nder të jetës, veprës dhe trashëgimisë së profesor Arsim Murselit – arkitektit të njohur, intelektualit të shquar dhe pedagogut të përkushtuar të UBT-së.

Nën patronatin e Rektorit të UBT-së, Prof. Dr. Edmond Hajrizi, kjo akademi mblodhi familjarë, kolegë, studentë dhe bashkëpunëtorë të shumtë për të kujtuar dhe nderuar figurën e një njeriu të veçantë që la gjurmë të pashlyeshme në arsimin dhe arkitekturën në Kosovë.

Në hapje të akademisë, pas një minute heshtjeje në nderim të profesorit, fjalën e mori Rektori i UBT-së, Prof. Dr. Edmond Hajrizi, i cili theksoi rëndësinë e trashëgimisë që la pas vetes profesor Murseli:

“Profesor Arsim Murseli ishte një figurë emblematike për UBT-në. Ai ishte jo vetëm një ligjërues i shkëlqyer dhe një profesionist i përkushtuar, por mbi të gjitha një njeri me vlera të rralla humane. Ai e donte UBT-në me shpirt dhe e përjetonte suksesin e çdo studenti si sukses personal. Me veprën dhe karakterin e tij, ai mbetet një udhërrëfyes për të gjithë ne”.

Fjalë të veçanta për jetën dhe kontributin e profesorit dha edhe prof. Mimoza Sylejmani, kolege e tij nga Fakulteti i Arkitekturës dhe Planifikimit Hapësinor, e cila përmes leximit të jeteshkrimit solli në vëmendje rrugëtimin e pasur profesional dhe personal të tij:

“Profesori Arsim Murseli ishte një njeri që e ndërtonte jetën siç ndërtonte edhe objektet: me kujdes, përkushtim dhe dashuri. Ai ishte mentor për shumë nga ne, dhe ndikimi i tij do të ndjehet gjatë në çdo kënd të këtij institucioni”.

Ndërsa Afrim Llabjani, Drejtor i Arsimit në Komunën e Ferizajt, u shpreh:

“Ferizaj e ka humbur një prej figurave më të çmuara të edukimit dhe qytetarisë. Kontributi i tij në arsim dhe në krijimin e standardeve të reja akademike është i pazëvendësueshëm”.

Emocione të thella solli edhe fjala e motrës së profesorit, znj. Hyrije Murseli, e cila në emër të familjes falënderoi UBT-në për kujdesin dhe nderimin e veçantë që po i bëhej profesorit:

“Familja jonë është thellësisht mirënjohëse për këtë organizim kaq dinjitoz. Arsim Murseli jetoi me përkushtim ndaj dijes dhe dashuri ndaj njerëzve, dhe ne ndjehemi krenarë që ai la pas vetes kaq shumë dashuri dhe respekt”.

Akademia u përmbyll me ndjenja mirënjohjeje, por edhe me një reflektim të thellë mbi trashëgiminë që la pas vetes profesori – një jetë të dedikuar dijes, edukimit dhe ndërtimit të së ardhmes përmes formimit të gjeneratave të reja.

Më datë 26 maj 2025 (e hënë), me fillim nga ora 11:30, në ambientet e Parkut Shkencor, Inovativ dhe Teknologjik të UBT-së në Lipjan, do të organizohet Akademi Përkujtimore në nder të Prof. Dr. Naser Kamberit, profesor i shquar, studiues i palodhshëm dhe figurë e rëndësishme e arsimit të lartë në Kosovë.

Kjo ceremoni përkujtimore organizohet për të nderuar jetën, veprën dhe kontributin e tij të çmuar në formimin akademik të shumë brezave të studentëve, si dhe për përkushtimin e tij të jashtëzakonshëm në zhvillimin e arsimit dhe kapaciteteve shkencore në vendin tonë.

Prof. Dr. Naser Kamberi ka qenë një prej figurave themelore në ndërtimin e programeve akademike në UBT, duke sjellë vlera të veçanta përmes angazhimit të tij profesional dhe vizionit të gjerë akademik. Ai do të kujtohet përherë si një njeri me integritet të lartë, përkushtim ndaj dijes dhe dashuri të thellë për studentët dhe kolegët.

Në emër të Rektorit të UBT-së, Prof. Dr. Edmond Hajrizi, stafit akademik, studentëve dhe të gjithë komunitetit të UBT-së, ju ftojmë të bëheni pjesë e kësaj akademie përkujtimore për të nderuar kujtimin dhe trashëgiminë e profesorit tonë të nderuar.