Ministria e Punëve të Jashtme dhe Diasporës e Republikës së Kosovës konfirmon arrestimin e qytetarit të Republikës së Kosovës, Hazir (Arif) Haziri, nga autoritetet e Serbisë, më 8 shtator 2025, në pikën kufitare në Merdarë, gjatë hyrjes së tij në territorin serb me automjet privat.

Sipas njoftimit të MPJD-së, menjëherë pas marrjes së informacionit për këtë rast, Zyra Ndërlidhëse e Republikës së Kosovës në Serbi është angazhuar përmes kanaleve zyrtare dhe diplomatike për të siguruar informacione të sakta dhe të plota mbi ndalimin e Haziri.

“Zyra Ndërlidhëse e Republikës së Kosovës ka adresuar një kërkesë zyrtare autoriteteve të Qeverisë së Serbisë për të konfirmuar arrestimin e Haziri dhe për të sqaruar arsyet ligjore të ndalimit të tij. Lidhur me rastin, është njoftuar edhe Delegacioni i Bashkimit Evropian në Serbi, si dhe përfaqësuesit diplomatikë të vendeve të Quint-it. Nëse ndaj Haziri vendoset masa e paraburgimit dhe iniciohet procedurë penale, Zyra Ndërlidhëse e Republikës së Kosovës në Serbi do të bëj kërkesën për vizitë zyrtare në qendrën e ndalimit. Në këtë fazë, Ministria e Punëve të Jashtme dhe Diasporës u bën thirrje të gjithë qytetarëve të Republikës së Kosovës që të shmangin udhëtimet nëpërmjet territorit të Serbisë, me qëllim të garantimit të sigurisë dhe mirëqenies së tyre. MPJD gjithashtu nënvizon nevojën urgjente për reagim nga ana e Bashkësisë Ndërkombëtare ndaj praktikave represive të autoriteteve serbe, të cilat bien ndesh me parimet themelore të së drejtës ndërkombëtare dhe me konventat ndërkombëtare për të drejtat e njeriut. Rritja e rasteve të ndalimeve dhe maltretimeve të qytetarëve të Republikës së Kosovës nga autoritetet serbe përbën shkelje të frymës së dialogut dhe të marrëveshjeve të nënshkruara mes dy palëve”, thuhet në njoftim.

Ministria e Punëve të Jashtme dhe Diasporës zotohet se do të vazhdojë të angazhohet me përkushtim për mbrojtjen e të drejtave dhe interesave të qytetarëve të Republikës së Kosovës, kudo që ndodhen./S.K/KP/MPJD/

Avokati serb, Cedomir Stojkoviq ka reaguar pas raportimit se dy spiunë kanë ikur nga arresti shtëpiak në Serbi, për çka ka thënë se ata janë larguar sipas planit të presidentëve Aleksandër Vuçiq dhe Xi Jinping.

Kinezi Cuj Guanghaj dhe britaniku Xhon Miler, ekstradimin e të cilëve e kërkojnë Shtetet e Bashkuara të Amerikës nën akuzat për spiunazh dhe kontrabandë të teknologjisë ushtarake, kanë ikur nga arresti shtëpiak në Beograd pasi hoqën byzylykët elektronikë.

“Spiunët kinezë që u arrestuan në Serbi me kërkesë të SHBA-së u nxorën nga vendi nga agjentët e Agjencisë së Sigurisë dhe Informacionit (BIA), sipas një marrëveshjeje të mëparshme mes Aleksandar Vuçiq dhe Xi Jinping”, ka shkruar Stojkoviq në X.

Sipas tij, shërbimet e sigurisë së Serbisë kanë organizuar largimin e tyre nga Serbia.

“Para kësaj, Cuj Guanghaj dhe John Miller, edhe pse të arrestuar me urdhër arresti ndërkombëtar dhe me kërkesë për ekstradim, në vend që të mbaheshin në paraburgim u vendosën në arrest shtëpiak, një precedent deri atëherë krejtësisht i panjohur në sistemin gjyqësor. Sepse, sigurisht, spiunët për të cilët një shtet tjetër kërkon ekstradimin do të arratisen nga arresti shtëpiak”, ka shkruar tutje ai.

Stojkoviq ka shtuar se një gjë e tillë edhe pritej.

“Nuk ka asnjë dilemë që të dy kanë fluturuar me avion nga aeroporti i Beogradit direkt për në Kinë ose përmes Rusisë. BIA i kaloi jashtë kontrollit kufitar dhe i futi në avion. Dikun rreth 99% është pikërisht kështu si ka ndodhur. Ai 1% i mbetur lidhet po me BIA-n, por duke kaluar përmes kufirit të zakonshëm”, ka përfunduar ai.

Cuj dhe Miler u arrestuan më 24 prill 2025 në hotelin “Hajat” mbi bazën e urdhër-arrestit ndërkombëtar të SHBA-së.

“Për personat në fjalë është urdhëruar lëshimi i fletarrestimit, të cilin do ta zbatojë Drejtoria e Policisë së Beogradit, Departamenti për Kërkime”, thuhet në vendimin e Gjykatës së Lartë në Serbi./S.K/KP/

Nepali po përballet me një valë trazirash, pasi protestat e dhunshme të së martës përfunduan me arratisje masive nga dy burgje në pjesën perëndimore të vendit.

Zyrtarët kanë konfirmuar se të paktën 900 të burgosur janë në arrati, ndërsa dhjetëra të tjerë mund të jenë shpallur të zhdukur në burgje të tjera ku raportohen sulme ende të pakonfirmuara.

773 të arratisur nga burgu i Kaskit

Sipas Zyrës së Policisë së Distriktit Kaski, gjithçka ndodhi gjatë pasdites së të martës, kur protestues të lëvizjes “Gjenerata Z” u përplasën me forcat e rendit dhe arritën të hyjnë me forcë në ambientet e burgut, duke hapur rrugën për arratisjen e 773 të dënuarve.

Burime nga vendngjarja raportojnë për dëmtime serioze në infrastrukturën e burgut, ndërsa pjesa më e madhe e gardianëve ishin tërhequr për shkak të përshkallëzimit të dhunës në qytet.

127 të arratisur në Tulsipur

Ndërkohë, në një incident të ngjashëm, 127 të burgosur kanë arritur të ikin nga burgu i Tulsipurit, në provincën Dang të Nepalit.

Policia e Zonës për Tulsipurin ka konfirmuar arratisjen dhe ka nisur një operacion kërkimi në të gjithë rajonin, ndërkohë që kontrolli i brendshëm në burg mbetet i kufizuar për shkak të protestave që vijojnë jashtë mureve.

Tension në rritje dhe mungesë kontrolli

Protestat, të udhëhequra nga një grupim i njohur si “Gjenerata Z”, kanë nisur si reagim ndaj politikave qeveritare dhe korrupsionit në sistemin gjyqësor. Por ditët e fundit janë kthyer në revolta të dhunshme, me pasoja serioze për rendin publik.

Autoritetet nepaleze nuk kanë komentuar ende mbi masat e sigurisë që dështuan të parandalojnë arratisjet, por njoftojnë se janë në ndjekje të të arratisurve dhe po rivlerësojnë nivelin e sigurisë në të gjitha burgjet e vendit./S.K/KP/

Prokuroria e Shtipit njoftoi se ka ngritur akuza kundër ish-kreut të Prokurorisë së Lartë të Shkupit, Mustafa Hajrullahi dhe Prokurorit të Lartë Jovan Cvetanovski, dhe po ndiqen penalisht për “kursim” të rasteve.

Ish-kreu i Prokurorisë Hajrullahi akuzohet për pesë vepra penale thuhet në njoftim.

“Duke vepruar gjatë procedurës hetimore, prokurori publik siguroi prova në lidhje me veprimet zyrtare të Prokurorit të Lartë Publik të lartpërmendur dhe një prokurori tjetër publik nga Prokuroria e Lartë Publike e Shkupit, sipas të cilave ai ngriti një aktakuzë kundër tyre, duke i akuzuar ata se kanë kryer, si bashkëkryerës, një vepër penale të vazhdueshme të Shpërdorimit të Detyrës dhe Autoritetit Zyrtar sipas nenit 353, paragrafi 1 i Kodit Penal”, thonë nga Prokuroria, shkruan Alsat

Prandaj, ata sqarojnë se të akuzuarit, në periudhën nga janari 2023 deri në gusht 2024, në Prokurorinë e Lartë Publike të Shkupit, së bashku me pjesëmarrjen në veprimet për kryerjen e krimit, me dashje kanë kryer veprime të shumëfishta të lidhura në kohë që përbëjnë kryerje të shumëfishtë të të njëjtit krim, duke përfituar nga e njëjta marrëdhënie e përhershme dhe të njëjtat rrethana, duke ndërmarrë veprime zyrtare që tejkaluan kufijtë e autoritetit të tyre zyrtar./S.K/KP/Alsat/