Lajmet

Numër i madh i fëmijëve me simptoma të Covid-19 po trajtohen në QKMF-në e Prishtinës

Published

5 years ago

on

Në Qendrën Kryesore të Mjekësisë Familjare (QKMF) në Prishtinë, ditët e fundit janë paraqitur për trajtim numër i madh i fëmijëve me simptoma të Covid-19.

Diamanta Raça-Hoxha, shefe e Repartit të Pediatrisë në QKMF, në një intervistë për Ekonomia Online, ka deklaruar se është rritur ndjeshëm numri i pacientëve të vegjël që kërkojnë ndihmë, me simptoma nga më të ndryshmet.

Ajo thekson që këto simptoma janë të shkaktuara prej viruseve, që në fillim janë simptoma të lehta, por që më vonë po shkaktojnë komplikime te fëmijët.

“Kohëve të fundit për shkak ndryshimit të variacionit, temperaturës së jashtme edhe ndryshimeve në temperaturë jashtë edhe brenda mund të themi se është rritur ndjeshëm numri i pacientëve të vegjël që kërkojnë ndihmën në njësinë tonë. Simptomat janë të ndryshme, në formë të kollës, temperaturës, rrjedhjes së hundëve, plogështisë tek fëmijët më të mëdhenj, që vetëm shprehen që janë të plogësht, kokëdhimbjes, refuzimit të ushqimit, tek fëmijët më të vegjël është në formë të vjelljes, barkqitjes, humbje të oreksit, padisponimit e kështu me radhë. Padyshim këto ftohjet që quhen në popull, ose flamat me gjuhë popullore janë të shkaktuara prej viruseve, edhe viruset në qarkullim janë në numër shumë i madh i viruseve, që te ne në mjekësi emërtohen si adeno viruse, rino viruse, viruse influencës, para influencës, edhe formë korona virusi që është tash pak më aktual, kështu që ka numër të madh të viruseve që shkaktojnë këto inflamacione, shkojnë me inflamacione kryesisht me rrugët e epërme të frymëmarrjes, me simptoma që i përmenda, e shkojnë me inflamacione të hundës, në formë të faringitit pra pezmatimit të fytit, të telave të zërit, zakonisht në fillim shkon në formë të lehtë, me simptomat e lartpërmendura por më vonë, mundet me u komplikuar, infeksioni munde të zbres poshtë dhe të shkaktoj bronhite të thjeshta, bronhite me frymëzanie, dhe pezmatim të indit mushkëror”, deklaroi tutje ajo.

Tutje ajo tha që normalisht që nga Covid-19 janë fëmijët më të atakuarit, sepse sipas saj, organizmi i fëmijës është shumë i ndjeshëm.

“Patjetër fëmijët janë më të atakuarit, sepse organizimi i fëmijës është shumë i ndjeshëm, se vet imuniteti krijohet në moshë tre deri në katër vjeçare, fëmijët janë pa imunitet deri në këtë moshë, pas kësaj moshe krijohen disi imunitet, sa ma i vogël që është fëmija, atëherë edhe fëmija është më lehtë transmetohet infeksioni, prej të rriturit tek fëmijët”, deklaroi ajo.

Doktoresha tha se mjekimi fëmijëve u bëhet në kohën e duhur dhe në bazë të situatës ata dërgohen edhe për mjekim të mëtutjeshëm.

“Na jemi gjithmonë në gatishmëri, shërbimi jonë punon 12 orë, punohet edhe gjatë shtunave, e dielave edhe kujdestari e natës, pastaj edhe natën fëmija mund të vizitohet kështu që jemi mjaft vëmendshëm, kur vjen fëmija menjëherë evidentohet në sportel nga motrat, ku matet pesha, gjatësia nëse ka nevojë me i dhanë shpejtë e shpejtë ndonjë medikament nëse është temperatura shumë e ngritur, ose freskojmë fëmijën dhe ambientin dhe ajo ndikon si simptomë, pastaj mjeku e bën ekzaminimin dhe terapinë adekuate, nëse është për ma tutje e dërgojmë tek laboratori, bazë analizave e japim terapinë definitive”, shtoi ajo më tek.

Related Topics:
Continue Reading

Lajmet

​Ronaldo: Së shpejti do të tërhiqem nga futbolli

Published

52 minutes ago

on

November 5, 2025

By

Cristiano Ronaldo ka pranuar se po i afrohet fundit të karrierës së tij futbollistike, duke zbuluar se pensionimi është shumë afër. Në një intervistë me gazetarin anglez Piers Morgan, sulmuesi 40-vjeçar i Al-Nassr foli me sinqeritet për fundin e rrugëtimit të tij në futboll dhe krahasimin e përjetshëm me Lionel Messin.

“Kur do të dal në pension? Së shpejti, por mendoj se do të jem gati,” tha Ronaldo. “Sigurisht, do të jetë shumë e vështirë dhe ndoshta do të qaj. Por jam përgatitur për të ardhmen time që kur isha 25 vjeç, kështu që besoj se do ta përballoj mirë. Asgjë nuk krahasohet me adrenalinën që ndien kur shënon një gol, por gjithçka ka një fillim dhe një fund. Kam pasione të tjera dhe do të kem më shumë kohë për veten dhe familjen time.”, tha ai.

Ndërkohë, i pyetur për Lionel Messin, Ronaldo ishte i prerë.

“Fitimi i Kupës së Botës nuk është një ëndërr për mua, sepse nuk më përcakton si futbollist. Fitimi i një turneu në 6 ose 7 ndeshje nuk mjafton për t’u bërë një nga më të mirët në histori. Numrat nuk gënjejnë, e di vlerën time dhe jam në krye të listës së rekordeve. A është Messi më i mirë se unë? Nuk pajtohem, nuk dua të jem modest.”

Ronaldo, aktualisht pjesë e klubit Al-Nassr në Arabinë Saudite, është golashënuesi më i mirë në historinë e futbollit me mbi 870 gola në karrierë dhe një nga emrat më të mëdhenj të të gjitha kohërave./S.K/KP/

Continue Reading

Lajmet

Raporti i Komisionit Evropian për Serbinë 2025: Nuk respektohen të drejtat e shqiptarëve

Published

1 hour ago

on

November 5, 2025

By

Pasivizimi i adresave në Luginën e Preshevës është përfshi edhe në Raportin e Komisionit Evropian për Serbinë 2025, ku theksohet se kjo është një praktikë diskriminuese, duke shtuar edhe se aty nuk ka përfaqësim të shqiptarëve në administratë, polici dhe drejtësi.

Për këtë Kryetari i Këshillit Kombëtar Shqiptar, Enkel Rexhepi ka thënë se do të kërkojnë zbatim të plotë të rekomandimeve të Këshillit të Evropës dhe të Komisionit Evropian, duke theksuar se dinjiteti dhe barazia nuk mund të jenë premtime, por standarde.

Postimi i plotë i Rexhepit:

Raporti i Komisionit Evropian për Serbinë 2025 konfirmon atë që flet Lugina:

Të drejtat e shqiptarëve në Luginën e Preshevës nuk respektohen në mënyrë të barabartë. Në dokument theksohen qartë:

Pasivizimi i adresave si praktikë diskriminuese,

Nën-përfaqësimi i shqiptarëve në administratë, polici dhe drejtësi,

Vonesa në zbatimin e planit të veprimit për pakicat kombëtare,

Mungesa e qasjes së barabartë në arsim dhe në përdorimin zyrtar të gjuhës shqipe.

Këto janë fakte që kërkojnë zgjidhje institucionale, jo vetëm konstatime periodike.

Këshilli Kombëtar Shqiptar do të vazhdojë të kërkojë zbatim të plotë të rekomandimeve të Këshillit të Evropës dhe të Komisionit Evropian, sepse dinjiteti dhe barazia nuk mund të jenë premtime por standarde.

Shqiptarët e Luginës nuk kërkojnë as më shumë, as më pak se të jenë qytetarë të barabartë në shtetin ku jetojnë./S.K/EO/

Continue Reading

Lajmet

Një shtetas i huaj theret me thikë në Gjakovë, dërgohet për mjekim në QKUK

Published

3 hours ago

on

November 5, 2025

By

Policia e Kosovës ka bërë të ditur se një shtetas i huaj ka kërkuar ndihmë mjekësore në Qendrën Kryesore të Mjekësisë Familjare në Gjakovë, pasi dyshohet se ishte therur me thikë.

Në raportin 24-orësh të policisë thuhet se rasti ka ndodhur gjatë mbrëmjes të së martës, teksa viktima dyshohet se ka pasur dy plagë kur ka pranuar trajtim mjekësor.

Viktima me udhëzim të mjekut kujdestar është dërguar në QKUK teksa Policia ka nisur hetimet për rastin./S.K/PK/

Continue Reading

Lajmet

Njëmbëdhjetë të vdekur dhe mbi 30 të lënduar nga zjarri në shtëpinë e pleqve në Tuzlla

Published

3 hours ago

on

November 5, 2025

By

Njëmbëdhjetë njerëz e kanë humbur jetë dhe më shumë se 30 të tjerë janë lënduar si pasojë e një zjarri që shpërtheu në katin e shtatë të një shtëpie pleqsh në Tuzlla mbrëmjen e së martës, njoftuan të mërkurën autoritetet në kantonin e Tuzllës në Bosnje.

Sipas të dhënave të fundit të pakonfirmuara, 30 persona janë shtruar në spital në Qendrën Klinike Universitare në Tuzlla, ndërsa numri i të lënduarve që deri më tani kanë kërkuar ndihmë mjekësore është më i lartë.

Viktimat janë banorë të shtëpisë dhe trupat e tyre do të dërgohen për identifikim dhe autopsi, sipas autoriteteve.

Nuk është e qartë se çfarë e shkaktoi zjarrin.

Kryetari i Bashkisë së Tuzllës, Zijad Llugaviq, thirri takim të jashtëzakonshëm mëngjesin e së mërkurës, në të cilin do të paraqiten të dhëna rreth shkaqeve të zjarrit, numrit të viktimave dhe gjendjes së të lënduarve.

Në një njoftim zyrtar disa orë pas zjarrit, shtëpia e pleqve konfirmoi numrin e të vdekurve dhe të lënduarve, dhe shtoi se të lënduarit po trajtohen në Qendrën Klinike Universitare të Tuzllës.

Sipas saj, mes të lënduarve ka edhe oficerë policie, zjarrfikës, punonjës mjekësorë dhe punonjës të shtëpisë së pleqve në Tuzlla./S.K/EO/

Continue Reading

Të kërkuara