Një natë për t’u mbajtur mend në Sunderland.

Në rikthimin e tij në garat evropiane pas 53 vjetësh, klubi anglez e nisi aventurën në Europa League me një fitore të madhe para tifozëve të tij në “Stadium of Light”.

Sunderlandi triumfoi 1:0 ndaj AZ Alkmaarit, në një ndeshje ku protagonist ishte edhe kapiteni Granit Xhaka.

Mesfushori shqiptar e luajti të gjithë takimin dhe me paraqitjen e tij ishte ndër lojtarët më të spikatur të ekipit vendas.

Heroi i mbrëmjes ishte Enzo Le Fée, i cili në minutën e 66-të realizoi nga pika e bardhë për t’i dhënë Sunderlandit tri pikët në ndeshjen e parë të fazës së ligës.

Pas më shumë se pesë dekadash mungesë, Sunderlandi u rikthye në Evropë me një fitore dhe një natë të paharrueshme për tifozët e tij.

D.L

Mesfushori 22-vjeçar, Dion Kacuri, ka marrë ftesë nga përzgjedhësi i Kosovës, Franco Foda, dhe pritet të jetë pjesë e “Dardanëve” në katër ndeshjet e radhës të Ligës së Kombeve.

Sipas burimeve të Telegrafit, Kacuri e ka pranuar pozitivisht ftesën e teknikut gjerman, duke bërë kështu hapin e madh drejt përfaqësimit të Kosovës në nivel senior.

Kacuri konsiderohet si një prej talenteve të futbollit zviceran. Ai ka qenë pjesë e përfaqësueseve të Zvicrës U18, U19, U20 dhe U21, ndërsa në total ka regjistruar 18 paraqitje dhe tri gola.

22-vjeçari aktualisht është pjesë e Lustenaut në Austri, ku luan si i huazuar nga Baseli. Në këtë sezon ai ka bërë gjashtë paraqitje dhe ka shënuar një gol, duke qenë një prej futbollistëve më të spikatur të skuadrës.

Paraqitjet e tij kanë tërhequr edhe vëmendjen e Franco Fodës. Përzgjedhësi i Kosovës ishte i pranishëm në tribunë gjatë ndeshjes ndaj Sturm Grazit, ku Kacuri u vlerësua me notën 7.3 nga “Sofascore”.

Ai aktivizohet kryesisht në pozitën e qendërmesfushorit, por mund të luajë edhe si numër 6 apo numër 10, duke i dhënë fleksibilitet në fazën ofensive dhe defensive.

Nga Zvicra e shihnin si pasues të Granit Xhakës

Kacuri ishte një futbollist shumë i vlerësuar në sistemin e Zvicrës, ku për një kohë ishte konsideruar edhe si një prej kandidatëve për të ndjekur gjurmët e Granit Xhakës në mesfushë.

Megjithatë, tashmë ai ka zgjedhur Kosovën dhe do të jetë një tjetër futbollist që kalon nga përfaqësueset zvicerane te “Dardanët”.

Kacuri ka luajtur më herët edhe me Leon Avdullahun te Baseli. Dy futbollistët kishin qenë bashkë në formacionin startues të klubit zviceran në vitin 2024, ndërsa tani mund të ribashkohen edhe me fanellën e Kosovës.

Lista e plotë e Kosovës pritet të publikohet në fund të kësaj jave.

“Dardanët” do t’i zhvillojnë katër ndeshje brenda 14 ditësh. Fillimisht, më 24 shtator, Kosova përballet me Irlandën në stadiumin “Fadil Vokrri”, ndërsa tri ditë më vonë udhëton në Austri.

Më 1 tetor, Kosova do të luajë ndaj Izraelit në Hungari, ndërsa cikli mbyllet më 4 tetor në Prishtinë, sërish ndaj Austrisë.

D.L

Ajo që u raportua gjatë ditës së martë tashmë është zyrtare: Lionel Messi është përfshirë në listën e lojtarëve të ftuar nga përzgjedhësi i Argjentinës, Lionel Scaloni.

Superylli i Inter Miamit do të rikthehet në përfaqësuese për një ndeshje të veçantë përshëndetëse, e cila do të zhvillohet në stadiumin legjendar “Monumental” të Buenos Airesit.

Argjentina do t’i zhvillojë tri ndeshje miqësore në këtë periudhë. Kampionët e botës do të përballen me Bolivinë më 30 shtator, Burkina Fason më 3 tetor dhe Beninin tri ditë më vonë. Pikërisht sfida ndaj Beninit pritet të jetë momenti special për Messin.

Kjo do të jetë një tjetër paraqitje simbolike e yllit argjentinas me fanellën e kombëtares, pas një karriere ndërkombëtare të jashtëzakonshme, kulmi i së cilës ishte triumfi në Kupën e Botës në Katar në vitin 2022.

Messi ka fituar gjithashtu dy edicione radhazi të Kupës së Amerikës, në vitet 2021 dhe 2024, duke kompletuar një prej kapitujve më të rëndësishëm në historinë e futbollit argjentinas.

Me 207 paraqitje, 125 gola dhe 68 asistime për Argjentinën, Messi ka lënë pas një rekord të jashtëzakonshëm.

Tani, “Monumentali” po përgatitet të mirëpresë edhe një herë kapitenin legjendar, në një natë që pritet të jetë e veçantë për futbollin argjentinas.

D.L

Federata e Karatesë e Kosovës ka njoftuar se këtë të diel, më 20 shtator 2026, do të organizohet Kampionati Shtetëror për kategoritë e kadetëve, juniorëve dhe moshat e reja U21.

Garat do të zhvillohen në Pallatin e Rinisë në Prishtinë, me fillim nga ora 11:00.

Marrë parasysh rëndësinë e këtij eventi për promovimin e talentit dhe përkushtimit të karatekave kosovarë, Federata u ka uruar sukses të gjithë pjesëmarrësve, ndërsa u ka bërë thirrje sportistëve, trajnerëve dhe dashamirësve të karatesë që të pranishëm për të mbështetur garuesit.

D.L